رواية أحببت فاطمة الجزء الثاني للكاتبة فاطمة حمدي الفصل التاسع والثلاثون
- فاطمة إزيك، إيه الصدفة الجميلة دي..؟ قالها ذلك الشخص الذي دخل عليهم فجأة دون مقدمات، ليقترب كريم منه وهو يبعده عنها للخلف ويقف حاجز بينهما قائلا بصوت جهوري: - إنت مين إنت وعاوز إيه..؟ إستغرب قليلًا من إسلوبه العنيف نوعا ما، ثم قال بجدية: أنا باهر، زميلها بالمدرسة! فاطمة وقد إبتسمت بإحراج: آآ أهلا وسهلا بيك يا أستاذ باهر إزي الصحة..؟
إلتفت إليها كريم وحدجها بنظرات نارية متوعدة، ثم عاد ينظر إلى باهر قائلا بصوت أجش صارم: ويا أستاذ باهر يا اللي بتعلم أجيال، هل ينفع تنده على واحدة ست كده في الشارع بصوت عالي وكمان عاوز تسلم عليها..؟ إيه ماتعرفش الأصول؟ تنحنح باهر بإحراج وأجاب بصوت خافت: أنا آسف بس أنا إتفاجئت بيها لأنها إنقطعت عن الشغل بدون أسباب فكنت عاوز أسألها مابتجيش ليه بس، على العموم آسف للأزعاج، عن إذنكم..
أنهي كلامه وسار مبتعدا عنهم، في حين زمجرت فاطمة بضيق: إنت إيه اللي عملته ده..؟ برقت عينيه بوميض غاضب وهو يضغط على ذراعها بقوة هادرا: نعم؟ أنا اللي بعمل..؟ ده إنتي نهارك مش فايت معايا النهاردة، إزاي أصلا ينادي عليكي كده وإزاي تسمحي لنفسك تتكلمي معاه وأنا واقف! تدخل والده يبعده عن زوجته التي إنفجرت باكية، ثم عنفه قائلا بصرامة:.
جري إيه يا كريم إحنا في الشارع، هي عملت إيه لكل ده؟ الراجل هو اللي نده عليها هي مالها بقي! كريم بحدة: دي بتقوله إزي الصحة! مالها هي بصحته بتتكلم ليه معاه أصلا..! إبراهيم بهدوء: يابني ما إنت أحرجت الراجل وهي حبت تلطف الجو عديها طيب عشان خاطري إهدي.. تمتمت فاطمة من بين بكاؤها بتذمر طفولي: ما هو على طول عايشلي دور سي السيد كده، حاحة تخنق! إقترب منها مجددًا وقد كز على أسنانه محذرا:.
ماتبرطميش وعدي ليلتك معايا، مش عاوز أتغابي عليكي فاهمة؟ نظرت إلى والده وهي تمسح دموعها بظهر يدها قائلة: شايف إبنك يا عمي كمان عاوز يتغابي. إنفجرت هالة ضاحكة ليضحك والده هو الاخر قائلا من بين ضحكاته: طيب معلش وبطلي عياط وبعدين ده كريم حبيبك شوية كده وهيصالحك.. ثم جذب إبنته هالة وهو يقول بمرح: تعالي يا لولو نمشي ونسيبهم عشان السكر عِلي عليا بسببهم..
بالفعل توجهت هالة مع أبيها وهما يضحكان بمرح، في حين كتفت فاطمة ذراعيها أمام صدرها وهي ترمقه بنظرات مغتاظة، ليقول هو بخشونة: يلا إمشي قدامي.. حركت رأسها نافية، ثم قالت بعناد: مش همشي معاك! تجمدت ملامحه بغضب، لتقول بخوف: غير لما تجبلي شوكولاته، الحجم الكبير.. رفع حاجبيه بإندهاش من تصرفاتها العفوية، أيضحك أم يواصل تعنيفها لها، أم يعانقها بمحبة لطفولتها تلك!؟.
وما كان منه إلا أن جذبها من ذراعها وهو يدفعها أمامه بغيظ قائلا: طب إمشي قبل ما أتغابي بجد! سارت معه وهي تتمتم بضيق، وتجولا بصحبة هالة ووالده إلى أن إنتقت فستانها أخيرا ونال إعجابه أيضا بعد مُعاناة، ولكن... قال بنبرة جادة لا تحمل من اللين أو الرفق: بس ده لونه موف، مش هينفع خالص! نظرت له بتعجب وأردفت بضيق: طب ما إنت بتحب الموف في إيييه..؟ رد وقد رفع أحد حاجبيه:.
ماحدش يشوف اللون ده عليكي غيري، يعني قدام الناس ماينفعش فهمتي؟ تأففت وهي تضرب الأرض بقدمها بغيظ شديد، ثم قالت بعصبية: بس ده ظلم.. -نقي أي لون تاني غير الموف والاحمر والروز، واي لون ملفت بلاش.. - أجيبه إسود عشان ترتاح؟ - بطتي يلا نروح أحسن... كادت تبكي مرة ثانية وهي تنظر له بتوسل وإستعطاف، تعلم أن تلك النظرات لها تأثير قوي عليه.. بالفعل تنهد بنفاذ صبر وقال متذمرا: طيب خلاص هاتيه وأمري لله!
بعد مرور إسبوع.. في شقة العمة رجاء جلست رجاء بصحبة إبنتها في غرفتها لتقص عليها بعد النصائح للحياة الزوجية المُقبلة عليها.. أنصتت مني إليها، حيث قالت رجاء بجدية: دلوقتي يا بنتي إنتي داخلة على حياة تانية خالص، مشوار طويل، ومعاكي رسالة لازم تقضيها، كل اللي فات ده كوم واللي جاي كوم تاني وقبل ما أتكلم معاكي لازم أعرفك ان الجواز يا إما بيفشل فشل تام. يا إما بينجح نجاح باهر، مافيش وسط ولا نص ونص..
هيبقي عندك بيت وزوج وأولاد كل ده في مسؤليتك، إسمعي كلام جوزك ديما طول ما هو بيقولك على الصح بلاش تمرد وخلاص، اما لو بيقول غلط ده كلام تاني وبرضو هتناقشيه بكل إحترام، أهله تحسني معاملتهم هيشيلك في عنيه وإعرفي إنك عمرك ما هتبقي عنده أحسن من أمه فإوعي في مرة تيجي تقارني نفسك بيها، إحترميها هتلاقي معزتك عنده بتزيد، هيحبك أكتر كل لما يلاقي علاقتك بيها كويسة، خليكي صريحة وواضحة معاه إن غلطتي إعتذري مش عيب الإعتذار ده إحترام وأخلاق، تمام يا بنتي؟
هزت مني رأسها بالموافقة، لتستكمل رجاء بهدوء:.
كل الدلع اللي كنتي فيه ده تحطيه على جنب شوية، وخليكي راسية وعاقلة عشان ماحدش يعدل عليكي ولا تدي فرصة لحد يقلل منك، الكلمة الطيبة وإحترامك لنفسك قبل إحترامك للناس مش هيكلفك حاجة بالعكس هيفيدك جدا وهتلاقي الكل بيحبك وبيحترمك، دلوقتي إنتي هتسافري وهتتنقلي مع ناس تانية خالص لازم تحببيهم فيكي وتعيش بما يرضي الله لان انا يا بنتي مش عيشالك الموت علينا حق وحكما هموت وهسيبك ويعز عليا يكون الكل مضايق منك نفسي اشوف الناس كلها بتحبك وانتي كمان كده، فهمتي يا بنتي؟
أومأت مني برأسها، ثم قالت بعينين دامعتين: ربنا يخليكي ليا يا ماما ويطول في عمرك... ربتت رجاء على كتفها وتابعت مبتسمة: أهم حاجة تنفذي اللي أنا قولته وكمان توعديني تتغيري للأحسن، ماشي؟ مني بإيجاب ؛ إن شاء الله.. رجاء بتساؤل: إنتي مرتاحة لعواد؟ حاسة إنك هتقدري تعيشي معاه؟ أومأت مني مجددًا وقد تورد وجهها خجلا، في حين قالت رجاء بجدية: بس إنتي ماكنتيش موافقة عليه وكان مش عاجبك إيه اللي حصل...؟
أجابتها مني بصوت خافت: هو غيرني كتير في الفترة القصيرة دي خلاني أبص للدنيا بمنظور تاني، إنتقاده ليا وتوجيه ليا للصح كبره أوي في عنيا، لدرجة إني بحس ساعات إنه يستاهل واحدة أحسن مني بكتير.. تنهدت رجاء بإرتياح وراحت تعانقها بحنان بالغ وهي تمسح على ظهرها برفق: ربنا يتتم ليكي على خير يا بنتي ويسعد قلبك.. ثم أبعدتها عنها لتقول بهدوء: بس أنا ليا عندك طلب يا مني.. مني بإهتمام: خير يا ماما.. قالت رجاء بجدية:.
خلينا نتكلم بصراحة كده وأقولك إنك غلطتي في حق فاطمة بنت خالك كتير أوي وأخر حاجة كنتي هتخربي بيتها، مش عارفة إنتي ليه بتعملي كده يا مني معاها واخر مرة أحرجتيها خالص كمان، عاوزاكي تتصافي معاها وتبقوا اخوات كده وتحبوا بعض. صمتت قليلًا، ثم تنهدت بعمق وقالت: أنا كنت هعمل كده فعلا.. ذهلت رجاء قبل إن تردف: لوحدك كده..؟ مني بنفي: لا مش لوحدي، بصراحة عواد هو اللي قالي.. رجاء بإستفسار:.
وعواد يعرف منين إن علاقتك بيها كده..؟ أجابتها مني: أنا حكيتله مرة عنها وأنا بكلمه في الموبايل وعاتبني وقالي أصالحها.. رجاء بإنبهار: إبن حلال يا عواد والله، ربنا يباركله..
في المستشفي التخصصي لعلاج العُقم بدولة سويسرا تمت عملية سارة بنجاح منذ يومان مرا، وقد تحسنت قليلًا ولكنها لم تسترد كامل عافيتها بعد... كان حسام يجلس إلى جوارها يمسح حبات العرق النابعة فوق جبينها بين الحين والآخر، يساعدها على الإعتدال في نومتها تارة، ويساعدها على الدخول إلى الحمام تارة أخري..
تستند عليه وكان خير سند لها، إزداد إحتراما في عينيها وإزداد حبا داخل قلبها، رغم ما مرت به وما سببت له من آلام لم يتخلي عنها، بل ساهم في علاجها لطالما كان الحُب المخلص، لابد أن يغفر.. تواصلتا شقيقاتها معها عبر الهاتف وإطمئنتا على سلامتها وأخبرهم حسام أنها في أفضل حال، وأصبح الأمور جميعها على ما يُرام، ولكن هناك شئ صغير لابد أن يحدث حتى تكتمل الأمور، فقط طفله الصغير الذي يتمناه..
طرقت مُني باب الشقة وإنتظرت حتى تفتح الباب، طال الإنتظار، فعادت تطرق الباب مرة ثانية بنفاذ صبر، لتستمع إلى صوتها الحانق من الداخل: يوووه، ما طيب يا هالة إصبري شوية الله! وما إن فتحت حتى تفاجئت بها وهي ترمقها بإستغراب، كتفت الأخيرة ذراعيها أمامها وهي تقول بضيق مصطنع: كل ده عشان تفتحي، فاضيالك أنا؟ عقدت فاطمة ما بين حاجبيها وهي تسألها بإندهاش: إنتي عاوزة مني إيه؟! أردفت مني بغرورها المعتاد:.
يعني هعوز منك إيه يا بطة إنتي..! تأففت فاطمة ثم قالت بضيق: إنتي عاوزة إيه خلصي عشان أنا ماليش خلق أوف.. تابعت مني وقد رفعت أحد حاجبيها: عاوزة أصفي حساباتي معاكي، وأخد حقي منك.. فاطمة بغضب: نعم يا ختي..؟! حق إيه ده بقي إن شاء الله دفعتها مني برفق وتوجهت إلى داخل الشقة وهي تقول بجدية: إوعي كده خليني أقعد أخد نفسي أنا فرحي بكرة ومش حمل تعب يا ختي..
تعجبت فاطمة لإسلوبها الغريب والجديد عليها أيضا، جلست قبالتها وقالت بنفاذ صبر: خير إن شاء الله؟ إرتبكت مني وتوترت بشدة لا تعرف من أين تبدأ حديثها، مسحت على وجهها وحسمت أمرها ثم قالت بتلعثم: آآ، أنا، بصي يا بنت الناس، أنا جاية عشان أعتذرلك.. فاطمة بذهول: تعتذري؟ أومأت مني برأسها وقالت بثبات:.
أيوة، بعتذرلك على كل حاجة حصلت مني وضايقتك، يعني أنا غلطت فيكي كتير وإستفزيتك وحاولت أبوظ علاقتك بجوزك، فأنا جايلك عشان أقولك أنا آسفة وآسفة إني أحرجتك المرة اللي فاتت أنا كنت مش عارفة بعمل إيه كنت تايهه ومحتاجة حد يحبني بجد ويحاول يصلح مني، مش هكدب عليكي كان كل أملي إن كريم هو الحد ده وقلت يمكن يبصلي ويحبني بجد لكن فشلت وطلعتي أنتي الأولي والأخيرة في حياته، بس ربنا عوضني بعواد عشان ياخد بإيدي ويفهمني الصح والحمدلله إنه جه ودخل حياتي في الوقت المناسب وغيرني وخلاني أحب كل الناس، ياريت يا فاطمة تسامحيني، أنا مسافرة بكرة ومش عاوزاكي تكوني زعلانة مني ولا شايلة في نفسك..
لم تصدق فاطمة أنها مُني، تلك التي أمامها، التي تتحدث بكل إحترام، ما الذي حدث لها..؟ هل يتغير الإنسان بهذه السرعة، نعم حين يشاء الله له بالهداية... أردفت فاطمة بعدم تصديق: إنتي بتتكلمي بجد، ? مني بمرح: جد الجد يا فاطمة، ها سامحتيني بقي..؟ إبتسمت فاطمة بعفوية لترد ببساطة: عمو إبراهيم كان ديما يقولي مثل شعبي قديم من جه بيتك جاب الحق عليك وأنا مسامحاكي يا مني.. مني بتساؤل: من قلبك؟ فاطمة بتأكيد: من قلبي..
نهضت مني وعانقتها ولأول مرة يتجسد ذلك المشهد، فاطمة ومُني متعانقتان بمحبة وود!، وتصالحتا الإثنتين في غمضة عين..!
مرت الساعات ساعة تلو الأخري حتى آتي اليوم التالي بكل ما يحمل.. تزينت مُني وتألقت في فستانها الأبيض الشاهي والحجاب الذي إنسدل عليه مُغطيا ما يجب أن يغطي، لقد جعلها عواد ترتديه وهي لم تعترض فلقد كانت تفعل ما يقول بالحرف، وإن إعترضت لديه القدرة الكافية على إقناعها..
تم عقد القران في أحد المساجد الكبيرة لتُصبح مُني زوجة لعواد شرعا على سنة الله والرسول وأخيرا لمسها عواد أخيرا وهو يأخذ يدها بين راحة يده، فخفق قلبها وضرب بعنف أثر لمسته الحانية وتملكها شعور غريب لكنه رائع أرضاها وبشدة... إنتهت الزفة التي وعدها بها عواد ليتغير المسار وتتجه السيارات إلى محافظة المنوفية حيث ستقطن مني هناك بصحبة زوجها..
قررت رجاء البقاء مع إبنتها ليومان على الأقل حتى يطمئن قلبها عليها أكثر وقد ذهب البقية كلا منهم إلى منزله..
وفي السيارة.. قال عواد وهو يميل عليها قليلًا بنبرة جادة لا تحمل أي نوع من أنواع الرومانسية: مبروك يا مدام عواد.. ردت بخجل وهي تنظر له بشئ من الإستغراب: الله يبارك فيك.. منحها إبتسامة جذابة وهو يسألها: مالك مندهشة ليه؟ مطت شفتيها وأخبرته: مش عارفة بس طريقتك محيراني شوية! أخبرها ضاحكا بخفوت: لكل مقام مقال يا عروسة، ماتستعجليش على رزقك إومال!..
رواية أحببت فاطمة الجزء الثاني للكاتبة فاطمة حمدي الفصل الأربعون والأخير
خطت بقدمها أول خطوة في مشوارها المُقبل مع أول خطوة داخل شقتها.. دخل عواد خلفها وراح يغلق الباب خلفهما لترتجف مُني بتوتر بالغ وقد فركت كلتي يديها في بعضهما، وفجأة وجدت نفسها بين ذراعيه وقدميها تركلان بالهواء فشهقت بقوة وهي تنظر له بخجل شديد، فما كان منه إلا أن غمز بعينه وهو يتوجه بها نحو الغرفة فإزدردت ريقها بصعوبة بالغة وخرج صوتها خافت جدا: ن نزلني يا عواد..
بالفعل أنزلها على عتبة الغرفة، ثم رفع ذقنها بطرف إصبعيه وقال بهمسٍ أذابها: مبروك يا حبيبتي، نورتي بيتك ونورتي حياتي يا منمن.. شعرت أنها ستفقد وعيها وتترنح من فرط تأثير كلماته الحانية التي لم تسمعها مسبقا ولم تكن تتخيل أنها ستسمعها ذات يوم.. تلونت وجنتيها بحمرة الخجل وهي تطالعه بإبتسامة صغيرة وكأنها عجزت عن الكلام.. تفهم عواد خجلها الطبيعي، فمسح على رأسها ضاحكا: يلا نتوضي ونصلي..
هزت رأسها موافقة إياه، ولكنها نظرت حولها بإرتباك لا تعلم من أين تأتي وتذهب وهو واقفا كالجبل الشامخ أمامها دون حراك.. وأخيرا إنتبه قائلا بإبتسامة عريضة: أه سوري يا منمن، أنا هخرج أغير في الأوضة التانية وأتوضي تكوني إنتي جهزتي تمام..؟ أومأت برأسها مجددًا دون كلام، ومن ثم خرج عواد تاركا إياها ذائبة تأثرا بعشقه الذي ألقاه بداخلها دفعه واحدة...
جلسا سويا على الأريكة الصغيرة الموجودة داخل غرفتهما، لف كريم ذراعه حول كتفها وقد قربها منه هامسا بنبرة دافئة حنونة: فاكرة يوم فرحنا يا بطتي..؟ ضحكت وقد تذكرت، كلا هي لم تنسي أحلى يوم بعمرها كله، كيف تنسي ذلك اليوم الذي أصبحت فيه ملكة متوجة على ذمة العاشق، الحنون، العصبي، المتهور ذا الرجولة الطاغية، الذي إنتشلها من عالم إلى عالم آخر، من عالم والدها القاسي إلى عالمه الذي يخصها وحدها، وحدها فقط..
قالت مبتسمة بإرتياح: وهو أنا أقدر أنسي أحلي يوم بحياتي؟، ياه يا عبد الصمد.. كركر ضاحكا وراح يوكزها في ذراعها قائلا: فصيلة يا بطتي، بتكلم جد يا مجنونة إعقلي بقي! - وإنت خليت فيا عقل يا رمضان، قصدي يا كرميلة يا حبيبي.. ضحك مجددًا قائلا من بين ضحكاته: عارفة لو حد غيرك بيقولي كرميلة دي كان زمانه مع الأموات، بس مقبولة منك وعلي قلبي زي العسل يا قلب كيمو.
إتسعت إبتسامتها وهي تتمسك بيده بين راحتي يديها قائلة بنبرة حزينة بعض الشئ: فاكر يا كيمو كتب كتابنا..؟ أنا هلكت عياط اليوم ده وماكنتش طيقاك خالص سبحان الله إزاي حبيتك كده مش عارفة! خبطها برأسها بمزاح: مش بقولك فصيلة، إفتكريلنا حاجة عدلة على المسا.. ردت ضاحكة: الله مش بسترجع ذكرياتي يا كيمو، بجد أنا إزاي ماكنتش بحبك وكنت بخاف منك ومن شكلك كان عليك تكشيرة رهيبة... ضحك عاليا متذكرا ما مضي، ثم قال متنهدا:.
بصراحة كنت بشوفك يركبني ميت عفريت مش انتي لوحدك حتى اخواتك واي واحدة على وجه الأرض كنت بكره كله كله ماعدا أختي هالة، لحد بقي ما وقعتيني في حبك يا لئيمة وبقيت أعشقك وبقيت عاوز أمشي في الشارع وأقول بأعلي صوت أناااا حبيت، أنا بحب فاطمة يا بشررر.. ضحكت مقهقه وهي تدفن وجهها بكتفه، ثم قالت بهمس: حبيبي بحبك أوي خالص...!
إنتهي عواد من الصلاة بصحبتها، وما إن إنتهي حتى إلتفت لها وقد وضع يده فوق جبهتها قائلا: اللهم إني أسألك خيرها وخير ما جبلتها عليه، وأعوذ بك من شرها وشر ما جبلتها عليه.. ومن ثم برفق قبل جبينها وهو يبتسم ليخفف من حدة توترها، بالفعل بدأ التوتر يذهب تدريجيا عنها ليقول مازحا: مش عاوزة تقوليلي حاجة..؟ إبتسمت وقالت بصوت خجول: ربنا يخليك ليا يا عواد، هو إنت بتحبني بجد..؟ ضحك وقال متسائلا ببساطة:.
عندك شك في كده..؟ قالت بتردد: مش عارفة بس أحيانا بصراحة بحس إنك كتير عليا، إنت متدين وأنا لا، أخلاقك عاليا وأنا... قاطعها حين وضع كف يده فوق فمها قائلا بهدوء:.
بلاش تكملي، ربنا بيرزق من يشاء بغير حساب، ربنا بيألف بين القلوب ووضع محبتك داخل قلبي عشان انتي من نصيبي وأنا من نصيبك وبعدين كلنا مليانين عيوب كتيرة أو قليلة اهي موجودة، المهم نحاول نصلح من نفسنا ونعمل اللي علينا وعلي الله نتوكل ولا إيه يا منمن؟ أومأت برأسها، ثم قالت بإنبهار: إنت أحلي حاجة حصلت في حياتي وأحلي حاحة في الدنيا.. منحها إبتسامة مشرقة وهو يقترب منها أكثر وقال غامزا:.
طب إيه..؟! تعالي أقولك حاجة سر، و، قد إنتهي وقت الكلمات...
بعد مرور شهر كامل... تعافت سارة تماما وإستردت كامل صحتها مجددًا ولكنها لا تزال بدولة سويسرا بصحبة حسام الذي قرر التجول هُناك وعمل شهر عسل جديد كأنهما عروسان في بداية حياتهما الزوجية، كانت من أسعد لحظات حياتهما، عادت الضحكة تنير وجهها لتجعله أكثر إشراق... ألقي حسام جسده على الفراش بإرهاقٍ تام وهو يهتف بغيظ:.
خلاص مش قادر إنتي جبتي منين الصحة دي ياختي؟ ليل ونهار مشي وجري وتنطيط، إرحمي أمي أنا بايني كبرت في السن ولا إيه.. قهقهت ضاحكة وهي ترتدي عباءتها الجديدة وتدور حول نفسها أمام المرآة، ثم قالت بسعادة: إجمد أومال يا حس لسه هنعوض اللي فات من حياتنا وهنلعب ونجري لما نشبع.. ضحك ساخرا: مع نفسك يا قلب حس، إجري مع نفسك لان انا نفسي إتقطع خلاص، إحنا لازم نرجع مصر بقي إعترضت بتذمر:.
لا يا حسام عشان خاطري مش عايزة أرجع خلينا هنا شوية.. قال بنفي: لا يا سو الشركة لوحدها كده هنشحت قريب يا ماما.. ضحكت بعفوية وأردفت: سيبها على الله يا حس، بكرة النونو يجي برزقه.. إعتدل جالسا على الفراش وهو يقول بفرحة: أهم حاجة النونو يا سو، أنا هموت وأشوفك حامل بقي.. إقتربت منه قائلة بهدوء: بإذن الله يا حبيبي قريب حسام بأمل: إن شاء الله..
توالت الأيام على أبطالنا، بينما أصبحت فاطمة في شهرها السادس من الحمل، أصبحت تفعل أشياء غريبة للغاية، وكان أخر إختراعتها شطائر العنب بالجبن، والموز أيضا تارة بالجبن وتارة بالشوكولاتة!، ليتعجب كريم متسعا العينين مما تفعله، فتتلذذ هي بالطعم ضاحكة بلا مبالاه، وتلك المخللات التي تتناولها بإدمان لقد حذرها أكثر من مرة بألا تقترب منها ولكنها ستظل فاطمة، عنيدة مدلله، تفعل ما يحلو لها..
فتح خزانة ملابسه يبحث عن قميصه الأبيض، فزفر بضيق وهو يهتف مناديا عليها: يا فاااااطمة، تعالي هاتيلي القميص أوعي تقوليلي إنه مش نضيف! كان يحدثها وهي بالخارج، ثم إنتقل يبحث في خزانة ملابسها هي عله يجده بداخلها، وما إن فتح الخزانة حتى إتسعت عينيه وهو يضغط على شفتيه بغيظ عندما وجد إناء به المخللات خاصتها! وصل بها الأمر لتخبئه بالخزانة حتى لا يجده ويمنعها منه! صرخ بنفاذ صبر: فااااااطمة!
أسرعت راكضة إليه وهي تترنح يمينا ويسارا بسبب إنتفاخ بطنها، لتقول بهلع: في إيه يا حبيبي بتزعق ل... بترت جملتها وهي تراه يمسك الإناء، فتنحنحت وهي تقول بصوت خافت: آآ إيه ده، اللي إنت ماسكه في إيدك؟! هل يدفعها بالإناء الآن..؟ تلك المجنونة ستذهب عقله ليمشي دون عقل ضائعا بسببها.. إقترب منها وقد صر على أسنانه غيظا: إنتي اللي بتسأليني إيه ده!، إنتي إيه اللي بتعمليه في نفسك وفيا ده..؟ قالت بخوف:.
مش بعمل حاجة والله، ده بس نفسي راحتله ف... صاح بها بغضب: نفسك ايه وزفت إيه، مش الدكتورة قالت غلط عليكي وعلي اللي في بطنك ده، إيه مابتفهميش مابتحسيش! ردت بتذمر: إيه يا كريم أعمل ايه نفسي فيه يا أخي زفر أنفاسه بقوة، ثم قال بصوت أجش: ده إنتي هتجبيلي شلل قريب، أنا شللي على إيدك إنتي مش على إيد حد تاني!
إنفجرت باكية فجأة دون مقدمات، ثم راحت تدفن وجهها بين الوسائد فوق الفراش، تبكي كما لو أنها طفلة صغيرة بالفعل بكاءا ناعما، إهتز قلبه له ليترك الإناء من يده فليذهب للجحيم وتبا له ولكل شئ يتسبب في مضايقتها حتى وإن كان هو... فما كان منه إلا إن رفعها إلى أحضانه رابتا على ظهرها قائلا بحزم هادئ: مابتسمعيش الكلام يا بطتي وأنا خايف عليكي، أخرتها بتخبي مني المخلل في الدولاب؟ قالت بزمجرة من بين بكاؤها:.
كان نفسي فيه وكل حاجة نفسي فيها تمنعني منها ليه كده! رفع أحد حاجبيه بإندهاش: كل حاجة يا نصابة؟ ده أنا سايبك تاكلي سندوتشات العنب بالجبنة براحتك والموز بالجبنة الرومي، إرحميني الرحمة حلوة جنابي هطق منك أقسم بالله... ضحكت رغما عنها مقهقه بصوت عالِ، ليضحك هو الاخر قائلا ؛: مجنونة رسمي وربنا، لو شوفتك بتاكلي مخلل تاني بجد مش عارف هعمل ايه فيكي.. قالت بإيجاز: طيب حاضر مش هاكله تاني..
أومأ برأسه قائلا: أيوة ثبتيني ثبتي، المهم فين قميصي الأبيض مش لاقيه! أجابته بحذر: بصراحة هو في الغسالة.. قطب جبينه وهو يسألها: ليه؟ أنا ملبستوش إيه اللي دخله الغسالة؟ إبتلعت ريقها وردت بخوف: آآ، أصلي لبسته النهاردة ودخلت بيه المطبخ وطبخت بيه وبعدين لقيته إتبقع فدخلته الغسالة بس كده أغلق عينيه محاولا ضبط أعصابه حتى لا يدفع رأسها بالحائط، فقالت فاطمة بتوسل:.
متزعلش مني، آسفة يا كيمو بس أصله شكله جميل كده وفيه ريحتك فبحب ألبسه شوية.. إبتسم بنفاذ صبر وهو يجذب خصلة من خصلات شعرها ويقوم بلفها حول إصبعه لتتوجع قليلا: اه يا كريم براحة.. رد عليها بغيظ وهو يضغط عليها أكثر: براحتك يا حبيبتي إعملي اللي عاوزاه ومنك لله يا بطتي على اللي عملاه فيا ده!
عاد إسلام من عمله مرهقا، لتستقبله زوجته بإبتسامتها الحانية كعادتها دائمًا.. وما إن جلس حتى جلست جواره وهي تقول بمرح: سولي عندي ليك خبر حلو أوي.. سألها بإهتمام: خير يا جميلتي؟ قالت بمراوغة: حذر فظر.. ضحك قائلا: ماعنديش دماغ أفذر، قولي بقي يا جميلة.. همست بجوار آذنه: أنا حامل.. إرتفعا حاجبيه بدهشة وهو يلتفت لها متسائلا بعدم تصديق: إيه؟ هزت رأسها مؤكدة، لتتسع إبتسامته وهو يحتضن وجهها بين كفيه:.
بجد، طب إنتي عرفتي إزاي.. أجابته ضاحكة: عادي زي ما عرفت قبل كده في سارة عملت إختبار حمل وإتأكد.. تنهد بإرتياح وقال مبتسما: الحمدلله والشكر لله مبروك حبيبتي، خلي بالك من نفسك بقي.. أومأت برأسها هامسة بحنان: من عنيا يا سولي...
مرت أربعة أشهر أخري.. إستقرت حياة الأبطال جميعهم وخاصة سارة وحسام حسام الذي أخذ يعد الأيام عدا في إشتياق لسماع كلمة أنا حامل، يتمني والمني يزيد يوما بعد يوم..
وذات يوم دلفا إلى المنزل بعد إن أغلقت سارة الباب حيث كانا يحضران حفل زفاف فجر وقضا وقت مُبهج، لم تنس سارة عمل تحليل ليلة أمس في المستشفي التي تعمل بها، حيث أنها عادت إلى عملها مجددًا بناءا على رغبة حسام الذي أخبرها بجدية أن تواصل عملها الذي تحبه بشغف وأنه أبدا لن يكون العائق لطالما ستوفق بينه وبين العمل فلا مانع... وقفت أمامه وهي تمد يدها له بنتيجة التحليل المطوية داخل ظرف.. سألها بعدم فهم: إيه ده؟
أجابته بهدوء: دي نتيحة التحليل.. هب واقفا متسائلا بلهفة: تحليل إيه..؟ قالت بجدية: تحليل الحمل يا حسام.. سألها مجددًا بنبرة قلقة ؛: ها وفي حمل ولا لا؟! صمتت وهي تطرق رأسها للأسفل، فظهرت خيبة الأمل جلية على ملامح وجهه، ثم عاد يجلس بضيق شديد، لترفع رأسها وتهتف بسعادة عارمة: أنااااا حاااامل.. هب واقفا من جديد وقد إنفرجت شفتيه بإبتسامة عريضة هاتفا: هاااااااا قولي والله! - والله العظيم أنا حامل!
وما كان منه إلا أن هبط ساجدا شاكرا لربه حامدا، وبعد عدة دقائق إستقام واقفا محتضنا إياها بقوة وهو يقول بفرحة شديدة: ياااه أخيرا يا سارة أخيرا هبقي أب! همست سارة بقلب يضرب كالطبول من شدة سعادتها: ألف حمد وشكر لله يا حسام الحمدلله..
بعد مرور إسبوع آخر... تعالي صوت صراخها من شدة الآلآم، صوتها يكاد أن يصم آذنيه لينتفض من فراشه هاتفا بهلع: فاطمة، في إيه يا حبيبتي؟ ردت من بين صراخها المتتالي: ااااااه أنا بولد.. إرتبك وكأنها المرة الأولي التي توضع بها، ليقف حائرا لعدة ثوان ثم أسرع يجذب ملابسها من خزانة الملابس وساعدها على إرتدائهم قائلا بتوتر: ماتخافيش يا حبيبتي ماتخافيش أنا معاكي..
وما إن إنتهي حتى إرتدي هو الآخر ملابسه بسرعة شديدة وتوجه بها إلى الخارج وصوت صراخها يعلو أكثر ليخرج الجميع على صوتها محاولين تهدئتها إلا إنها لم تصغي لهم وواصلت صراخها فالآلم شديدة كالإنفجار.. أسرع كريم يركض وهو يحملها هابطا الدرج وإستقل سيارته ليلحق الجميع به...
وبعد مرور ساعة كانوا يقفون في المستشفي الخاصة بالنساء والتوليد بينما هي تسير ذهابا وإيابا بناءا على رغبة الطبيبة فموعد ولادتها بعد ساعتان على الأقل ويجب السير على قدميها للتسهيل في عملية الولادة الطبيعية... كانت تصرخ والدموع تنهمر من عينيها وهي تهتف من بين صراخها: اااااه، ااااه إعمل حاجة يا كريم مش قادرة أتحمل مش قااااادرة ااااااااه..
كاد أن يتكلم لتشير له بتحذير: بس أوعي تتكلم مش عاوز أسمع صوتك دلوقتي... رفع حاجبيه بإندهاش، ليقول ضاحكا: مش هتكلم، إهدي -بقلك إسكت، إسسسسسسكت.. إنفجر الجميع ضاحكين بشدة، لتهتف بصراخ مجنون: بتضحكوا على إيه، ياربي ارحمني. تعالت ضحكاتهم بما فيهم كريم وهو يربت على ظهرها قائلا: معلش طيب حقك عليا، دلوقتي هتبقي كويسة..
ومرا الساعتان أخيرا بعد معاناة مع الالام، لتوضع فاطمة طفلتها الصغيرة التي تشبهها إلى حد كبير، فاطمة الصغيرة، آخر عنقود العائلة، ، راح كريم يحملها برفق وحنان أبوي بالغ وهو يكبر بأذنيها مستمتعا بحركتها بين يديه، صاحا طفليه ليحملاها من بين ذراعيه فتناولها أخيها إبراهيم بسعادة: الله أختي حبيبتي.. بينما قبلتها بسملة ببراءة وهي تهمس لها: الله شكلها حلو أوي يا بابا..
ضحك كريم وإتجه إلى زوجته وقد مال عليها مقبلا جبينها: حبيبي حمد لله على السلامة.. أغلقت عينيها بإرهاق، ثم تفوهت بخفوت: النونو عاملة إيه؟ ضحك وقد مسح على جبينها: زي القمر، شبهك يا بطتي.. إستمعت إلى صوت شقيقتها سارة وهي تهتف بمرح: حمدلله على السلامة يا بطوط يا مجنونة فرجتي علينا المستشفي.. كريم بجدية مصطنعة: حسابك معايا بعدين، بتزعقلي قدام الناس..؟ ضحكت بصوات واهن: ماتزعلش ياكيمو كنت بموت من الوجع..
أقبلت جميلة عليها تقول بمزاح: مبروك يا بطوطة تتربي في عزك إنتي وكريم.. فاطمة بإبتسامة: عقبالك يا جوجو إنتي وسارة وأضحك عليكم براحتي.. سارة بتوتر: أنا خايفة، إنتي رعبتيني يا بطوط تركهن كريم وخرج من الغرفة ليجد إسلام بصحبة حسام الذي هتف مبتسما: مبروووك يا أبو العيال تتربي في عزك كريم ضاحكا: عقبالك يا حس، أشوفك محتاس زي حالاتي كده قهقه ضاحكا قائلا من بين ضحكاته: على اللي أنا شفته النهاردة ده شكلي هتمرمط..
كريم مؤكدا بمزاح: ده إنت هتتنفخ ماتخافش.. إنفجر إسلام ضاحكا هو الآخر قائلا: الله يكون بالعون.. رد حسام مازحا: ما إنت هتتنفخ معانا ماتقلقش!
وتعلو الضحكات بعد مرور الأيام ويسود جو من المرح بين الجميع في عقيقة المولودة الصغيرة.. حلقاتو برجلاتو... هتف الصغار بمرح وهم يصفقون فرحين بتلك الصغيرة.. يتمازحون الكبار ويلعبون الصغار لتكتمل الصورة العائلية، وتعود الأم تضم فتياتها إلى حنانها لتغمرهن به بتدفق نادمة على ما مضي وقد غفرن لها متناسين الماضي بكُل ما يحمل من آلام وقد غفر الحب الأخطاء جميعُها.. تمت نهاية الرواية أرجوا أن تكون نالت إعجابكم
رواية أحببت فاطمة
