رواية كبرياء أعمى للكاتبة الشيماء محمد الفصل الحادي عشر
وقفنا الحلقه اللي فاتت ان سهيله بتحاول تقنع ادهم يسيب ليلي سهيله: ادهم انا لسه بحبك ولسه عايزاك، انت عارف ان ليلي مش مناسبه ليك ولا عمرها هتفهمك وبعدين هيا طول الوقت مع حمدي، وعلي طول ضحك وهزار، وبتستغل انك... ادهم: ايه سكتي ليه؟كملي كلامك قوليها، بتستغل اني اعمي سهيله: مش قصدي اجرحك بس ده فعلا اللي بيحصل.
ادهم: شوفي يا سهيله، علشان نقفل الموضوع ده نهائي، علاقتي بيكي انتهت خلاص وانتهت من زمان. انتهت يوم ما بصيتي لراجل غيري وثقتي فيكي انتهت، انتي بصيتي لراجل غيري وانا بكامل صحتي ما بالك وانا اعمي هتعملي ايه؟ اما علاقتي بليلي فده شيئ ما يخصكيش نهائي وسبق وقولتلك ما تدخليش في اللي مالكيش فيه، اعتقد كده انا واضح جدا سهيله اتضايقت من ادهم قوي وزقته بعيد عنها وسابته ومشيت.
سابته وسط الجنينه وبعيد عن البيت بكتير، وادهم من ساعه الحادثه ما دخلش الجنينه ابدا وهو حاليا معندوش اي فكره هو فين والبيت في اي اتجاه.. هنا اول مره ادهم يحس بعماه، يحس بالعجز، مش عارف يمشي ازاي ولا يرجع البيت ازاي، جرب ينادي بس محدش رد، صعبت عليه نفسه قوي لما وقع علي الارض وقع في وسط الطينه.
فضل قاعد مكانه مستسلم تماما محطم نفسيا ومدمر، مستني اي حد يجي ياخده من ايديه يوديه بيته، استسلم لليأس والعمي وتمني ان حياته تنتهي باي طريقه... ليلي في اوضتها سهرانه لانها اتعودت ما تنامش غير لما تسمع ادهم يدخل اوضته ويستقر في سريره، بس النهارده اتأخر والقلق مالي قلبها، اخيرا قررت تنزل تشوفه نزلت لقت البيت ظلمه والكل نايم وادهم وسهيله مش موجودين.
فكرت ليلي ان ادهم خرج مع سهيله وهنا حست بنار وغيره جواها وحست انها هتتخنق فطلعت بره البيت تتمشي شويه وتشم هوا يمكن نار قلبها تبرد.. وهيا بتتمشي شافت خيال في الارض فقربت تتأكد لقته ادهم واقع علي الارض ومستسلم تماما، جريت بسرعه عليه ليلي: ادهم، ادهم حبيبي ايه اللي حصل وايه اللي وقعك كده وسهيله فين؟ ادهم: سيبيني في حالي، انا مش عايزك انتي بالذات مش عايزك ابعدي عني وفري شفقتك لحد غيري ابعدي..
قالها وزقها بعيد عنه، مقدرتش تسيبه واقع في الارض كده وهدومه كلها متوسخه طينه وايديه، هنا قررت في داهيه كبريائها المهم دلوقتي كبرياؤه هوه.. ليلي: ادهم ارجوك خليني اساعدك، متنساش انا مراتك، انا ستر وغطا عليك، ارجوك يا ادهم امسك ايدي، سبق وقلتلك اني مش هسيب ايدك ابدا بس انت ديما اللي بتسيب ايدي، مد ايدك ليا ادهم مد ايده اخيرا لمراته وسابها تساعده.
اخدته ليلي بسرعه علي الحمام وساعدته يقلع هدومه وحست بيه بيترعش بين ايديها وهيا مش عارفه هو بيترعش من البرد اللي كان فيه ولا من كبرياؤه اللي اتهز.. اترددت تساعده ازاي وهيا شايفاه بيترعش قدامها، بس التردد استمر لحظه بعدها قلبها انتصر مينفعش تسيب حبيبها كده ما ينفعش تتخلي عنه تاني.. قربت منه وضمته لصدرها وحاولت تدفيه حاول ادهم يبعدها عنه بس محاولاته كانت ضعيفه لانه هو عايزها تفضل في حضنه.
ادهم بيفكر: لا مش عايز شفقتها، مش عايز غير حبها، فضلت ليلي تضم فيه لحد ما اخيرا استسلملها تماما واقنع نفسه هقبل بكل اللي تقدمهولي وطالما انا بدفع يبقي هستمتع بالي بين ايديا حتي لو مش بتحبني كفايه انها جنبي، هستفاد بكل شيئ بتقدمهولي وهشبع كل حاجتي منها فضل ادهم في حضنها الليل كله وقضوا مع بعض اجمل ليله.
ليله كانت كلها حب وشوق هما الاتنين كانو مشتاقين لبعض قوي وطول الليل كل واحد بيعتبر ان دي اخر ليله ليه فبيستغل كل لحظه فيها، كانت ليله رائعه بس للاسف كانت من غير كلام. كل واحد خايف يتكلم ليبوظ سحر الليله اتفاجأ ادهم بليلي بتصحيه وبتقوله ان النهار طلع والمفروض يصحوا، اول مره ينام بالعمق ده، فابتسم ليها ليلي: ياااااااااااااه اد ايه واحشاني ابتسامتك دي. متعرفش انا بعشق ابتسامتك دي قد ايه!
ادهم: وانتي متعرفيش كام مره حلمت اصحي في حضنك كده.. شدها ادهم ليه وقرب راسها منه فقربت هيا كمان منه وسلمته شفايفها علشان يدوبوا الاتنين مع بعض في لحظات مسروقه وقضوا اجمل صباح مع بعض، ضمها ادهم لصدره جامد وهيا حطت راسها علي قلبه تستمتع بدقات قلبه، اتمنت انهم يفضلو كده علي طول وان لحظه الحب دي ما تنتهيش ابدا، بس لكل شيئ نهايه واللحظات الحلوه بتنتهي.
فضلو يرغوا ويتكلموا ونسيوا كل المشاكل اللي بينهم وحسوا انهم رجعوا زي الاول قررت ليلي انها تقول لادهم انها اتجوزته علشان بتحبه وبس ومفيش سبب تاني وانه هو جرحها بكلامه فاتصرفت كده، لازم تصارحه علشان تفضل في حضنه علي طول لانهم هيكونو اسعد اتنين بالحب اللي بينهم ليلي: ادهم انا عايزه اقولك حاجه ممكن ادهم بيلعب في شعرها: مش عايز اسمع حاجه عايز افضل في حضنك وبس.
ليلي: اسمعني الاول وبعد كده خليك في حضني علي طول ادهم: مهم قوي الكلام دلوقتي يعني ليلي: اه مهم عايزه اصارحك بحاجه ادهم: قولي اللي عايزاه بسرعه مش عايز نضيع وقت كتير في الكلام مفهوم ليلي: ادهم انت سبق وقلت ان اكتر حاجه بتحبها فيا هيا الصراحه وانا في الفتره الاخيره مكنتش صريحه معاك وارتكبت غلطه في حقك كبيره قوي..
ليلي بتتكلم وادهم قلبه بيدق بسرعه وحاسس انها هتفوقه من حلمه الجميل وهتصدمه وعمال يحضر نفسه للاسوء ادهم: كملي سامعك ليلي: انا وحمدي... هنا الباب خبط ودخلت كريمه عليهم. كريمه الفرحه مش سايعاها لما شافتهم في حضن بعض وحست ان خطتها بتنجح.
كريمه: صباح الخير للحلوين، ليلي حمدي مستنيكي من بدري انتي ناسيه انك موعداه تقضي اليوم معاه وهو هينقيلك فستان الحفله يالا يا حبيبتي قومي اجهزي بسرعه ما ينفعش تخليه مستني كده ليلي: حاضر هلبس وانزل كريمه: يالا يا ادهم تعال نفطر انا وانت مع بعض بما اننا هنفضل لوحدنا انا وانت ادهم: لا معلش ياست الكل افطري انتي انا هكمل نوم كريمه: براحتك يا حبيبي، يالا يا ليلي بسرعه ليلي: حاضر.
خرجت كريمه وسابتهم الاتنين في حاله صعبه ليلي: ادهم انا كنت عايزه اقول... ادهم: مالوش لازمه الكلام خلاص، بسرعه علشان ما تتأخريش علي معادك، بالليل مع راجل والصبح مع راجل ما بتضيعيش وقتك، بعد اذنك خرج ادهم وسابها وهيا حست ان كريمه قطعت الخيط الرفيع اللي كان ابتدي يوصل بينهم، كريمه بحسن نيه كل ما تتدخل تبعد بينهم اكتر وبدل ما تقله انها بتحبه خلته شك ان في علاقه بينها وبين حمدي ومش عارفه تتصرف ازاي.
ليلي: هروح اقوله واخليه يسمعني غصب عنه، لا بس هو بيشك فيكي، لو بيحبك مش هيشك فيك، خلي عندك كرامه لسه من لحظه اتهمك انك علي علاقه براجل تاني وانتي عايزه تروحيلوه، ايوه هروحله لاني بحبه هقوله واللي يحصل يحصل، هتقوليله وهيرمي حبك في وشك انتي نسيتي انه اتجوزك علشان خاطر امه، نسيتي لما قلتيله انك بتحبيه وقالك ما تخلطيش الحب بالمتعه، نسيتي لما قالك انه بيتسلي مش اكتر. عايزاه يقولك ايه تاني مستنيه منه ايه؟
هنا ليلي قررت انها تحافظ علي كبريائها ونزلت لحمدي.
ادهم في اوضته بيحمد ربنا انه ما اتسرعش وصارحها بمشاعره الحقيقيه، يا تري شكلك هيكون ايه لما تقولك انها بتحب حمدي وان انت اعمي ومتنفعش زوج، الحمد لله ان امه دخلت. لان دخولها حماه من خيبة امله لما هيا تعترفله لانه مش هيقدر يستمر لو قالتها صريحه، ساعتها لازم ينفصل عنها، طيب وانت مستني ايه اصلا ما كل حاجه واضحه قدامك، هيا وحمدي متفقين جدا ومش بيفارقو بعض، بعد الحفله لازم اقعد معاها واحط النقط علي الحروف، لأ مش لازم استسلم هى مراتي وفي اوقات كتير بحس انها بتحبني وحمدي طول عمره بيحاول يقلدني وطول عمره ورايا يبقي ليه دلوقتي هسلم حاجه ملكي لحمدي لازم استرد قلب مراتي ده الصح!
اشترت ليلي فستان جميل طويل وليه حفيف كده لما بتمشي لبست وحست نفسها فعلا اميره او ملكه ناقصها بس التاج وهيا بتبص لنفسها في المرايه الباب خبط ودخل ادهم، كان في شنط في طريقه فقربت ليلي وفضت طريقه علشان ما يخبطش في حاجه وهو ماشي ادهم: فستانك ده ليه ديل ولا طويل قوي؟ ليلي: الاتنين هو طويل وديله طويل شويه من ورا ولونه بينك بيلمع شويه، اول مره البس حاجه زي دي، حاسه كأني سندريلا وهيا رايحه الحفله.
ادهم قرب منها وهو مبتسم وشم برفانها ادهم: في ريحه ياسمين انتي عندك هنا ياسمين في الاوضه؟ ليلي: لا دي ريحه برفاني اشتريته النهارده انا بحب ريحه الياسمين جدا حلوه ولا لأ؟ ادهم: لا حلو هادي وجميل، كده بقيتي ورده قلبا وقالبا ليلي: متشكره جدا، انت كمان شكلك في البدله يجنن ابتسم ادهم ابتسامه مصطنعه ادهم: انا جايبلك هديه ممكن تقبليها مني ليلي: طبعا انت بتسأل.
ادهم طلع من جيبه علبه صغيره وفتحها كان فيها اسوره متعلق فيها قلبين صغيرين ومعاهم جرس صغير بيعمل صوت كل ما يتحرك، ليلي اتضايقت قوي من هديته انه يشك فيها حاجه لكن يجيبلها جرس تعلقه في ايديها كتير قوي، هو عايز يعرف كل حركاتها، للدرجه دي، لا كده كتير قوي ومعرفتش تسكت اكتر من كده وانفجرت فيه.
ليلي: ما احسن تجيبلي جرس كبير اعلقه في رقبتي زي البقره اللي بيربطوها في الساقيه وكل ما تقف يجي صاحبها يضربها ويمشيها ادهم: انتي ليه بتفكري فيها كده مش يمكن يكون قصدي حاجه تانيه؟ ليلي: لاني فاهماك كويس، انت عايز تعرف كل حركاتي وبتعوض عماك بالطريقه دي لو مش هتشوفني يبقي تسمعني، صح؟ ليلي بعد جملتها دي حست انها زودتها جامد قوي لان وش ادهم اترسم عليه صدمه مؤلمه وتعابيره كلها اتهزت.
ادهم: بعوض عمايا؟هههه خلاص ارميها في الزباله واسف ان هديتي ضايقتك بالشكل ده مكنش قصدي ادهم رمي العلبه من ايده وسابها وهو قلبه موجوع قوي من كلامها هو مافكرش بالطريقه دي ابدا ابدا وده مكنش قصده نهائي، استغبي نفسه قوي علشان فكر انها ممكن تفهم تصرفه ده لازم يبطل تخيلات بقي ويفوق من احلامه كل اللي كان عايزه انه ينام في حضنها وكل ما تتحرك جنبه يسمع صوت الجرس فيعرف انها جنبه مشاركاه ضلمته وانه مش لوحده.
مكنش عايز غير كده بس هيا فهمته غلط، هيا سبق وقالتله انها اتجوزته علشان فلوسه يعني الهدايا الرمزيه مش هتنفع معاها، ليه تخيل انها هتحس بيه او هتبقي عايزه تتطمنه في ليله، الظاهر انه لازم يبطل تخيلات ويرجع لواقع انه اعمي وانها متجوزاه لمجرد انه غني وبس...
نزل الحفله وليلي كمان نزلت قربت منه ومسكت ايده اتصلب للحظه بس هدي وبدأ يعرفها علي اصحابه واتفاجأ لما سمع صوت الجرس اللي في ايديها (ليلي لبست الاسوره علشان حست انها زودتها قوي معاه فقررت تعوضه بانها تلبسها) ادهم فرح انها لبست اسورته بس فكر نفسه انه ما يتوهمش تاني لانها ممكن تكون مش عايزه تزعله او تخسر بنك الفلوس اللي متجوزاه..
سهيله كانت موجوده في الحفله واتضايقت قوي لما شافتهم ماسكين ايدين بعض وقررت انها لازم تفرق بينهم بأي طريقه، مش واحده من الشارع تاخده مني وانا اتفرج حمدي: سهيله مالك؟ما تسيبيهم في حالهم واستسلمي بقي وبعدين ليلي سوري يعني اجمل منك بمراحل، بهدومها القديمه كانت اجمل فأكيد وهيا اميره اكيد... سهيله قاطعته: اخرس مين دي اللي اجمل مني، دي زي سندريلاواخر الليل هترجع لهدومها المقطعه.
حمدي: ممكن تكون فعلا سندريلا، بس ما تنسيش ان في اخر القصه الامير اتجوز سندريلا,,وفي حكايتنا هو اصلا متجوزها سهيله: مش كتير، مش هيفضل متجوزها كتير وهتشوف حمدي: انتي حره خليكي في اوهامك سابها ومشي وهيا فضلت تراقب ليلي علشان تستفرد بيها لحد ما لمحت ادهم بيتكلم مع حمدي وانضم لاصحابه وسابو ليلي لوحدها سهيله: ليلي ازيك معرفتكيش ده صح لبس البوصه تبقي عروسه اللي يشوفك دلوقتي ما يشوفكيش وانتي لسه جايه.
ليلي: ماهو الواحد طول ما هو عايش بيتعلم، واديني اهوه بقيت صاحبه البيت بكل ما فيه حتي صاحبه ملكي، انتي بقي ليكي ايه هنا، هاه؟ سهيله اتضايقت قوي ومش عارفه تقولها ايه لحد ما لمحت الاسوره في ايديها سهيله: جميله قوي اسورتك دي، انتي بتحبي الشخاليل ولا ايه؟ ليلي: دي هديه من ادهم، وانا لابساها علشان خاطره سهيله لقت فرصتها تنتقم.
سهيله: ههههههههههه هههههههه، هي دي هديته هههههههه مكنتش متخيله انك هبله كده، واشتراها امتي هاه وخرج امتي؟امتي اخر مره شوفتي ادهم بيخرج بره البيت، لا وكمان يشتري ههههه ليلي: قصدك ايه؟ ولا دي لعبه جديده.
سهيله: لا يا حبيبتي، الاسوره دي كانت بتاعتي في يوم من الايام والقلبين الصغيرين دول قلبي انا وادهم، بس هو ضاف عليهم الجرس علشان يسمع كل حركاتك، خلي بالك بقي من حركاتك ههههههههههه، قال هديه قال، دي فضلاتي انا يا حبيبتي ليلي معرفتش تعمل ايه، لقت نفسها بتخلع الاسوره وبترميها في وش سهيله ليلي: اشبيعي بيها هيا وصاحبها انا قرفت منكم اشبعوا ببعض سابتها ومشيت وطلعت اوضتها وقالت لكريمه انها مصدعه شويه.
ومحتاجه ترتاح.. ليلي فضلت في اوضتها تستني ادهم يدخل اوضته وحست انها سمعت صوت في الحمام بس بعد كده ما سمعتش حاجه فحست انها متهيألها؟شويه كده سمعت ادهم بيدخل الاوضه وحست بخبطه علي باب الحمام فقامت تشوف ايه، دخلت الحمام كان فاضي فقربت تشوف ادهم من بابه المفتوح كان نور اوضته خفيفي قوي، شافت منظر عمرها ما هتنساه ابدا.
شافت سهيله لابسه قميص نوم وعليه روب طويل وبتقرب من ادهم من وراه ومدت ايديها حوالين رقبته وكانت لابسه الانسيال وضمته ليها وباسته في رقبته وهيا وراه وضماه حست للحظه ان ادهم اتفاجئ بوجودها كأنه استغرب من وجودها بس بعد كده فرح جدا من وجودها فرحه عاشق اخيرا لقي حبيبته شدها من وراه وضمها لصدره، ليلي مقدرتش تشوف اكتر من كده فبعدت بس سمعته بيقولها بصوت مليان شوق ولهفه.
ادهم: اه يا حبيبتي لو تعرفي اد ايه كنت مشتاق اضمك من جديد لصدري واخدك في حضني كده، انا بحبك.
رواية كبرياء أعمى للكاتبة الشيماء محمد الفصل الثاني عشر
ليلي سمعت ادهم بيقول لسهيله ادهم: اه يا حبيبتي لو تعرفي اد ايه كنت مشتاق اضمك من جديد لصدري واخدك في حضني كده، انا بحبك دخلت ليله اوضتها حست قلبها بيتعصر وانها بتموت او ممكن يكون الموت اهون مليون مره من احساسها ده. كرهته او حاولت تكرهه، لازم تمشي من هنا، ذل جوز امها وضربه ليها وشغلها في المطعم اهون مليون مره من جرحها بالشكل ده!
فعلا اول ما النهار بدأ ينور اخدت حاجتها اللي جت بيها وسابت كل حاجه هو اشتراها بفلوسه ومشيت. خرجت والكل نايم وطلعت بره البيت تجري تجري كأنها سجين هربان من حكم اعدام واخيرا وصلت لمحطه القطار وحجزت تذكره وقعدت تستني القطار، اخيرا جه معاد القطار وراحت تركب لقت صوت بينادي عليها.. حمدي: ليلي استني ( بيجري عليها) ارجوكي يا ليلي استني لحظه ليلي: حمدي ارجوك سيبني امشي، مش هقدر استني اكتر من كده.
حمدي: براحتك اسمعيني وبعد كده امشي لو عايزه، دقيقه مش اكتر ارجوكي ليلي: اتفضل قول بسرعه علشان الحق القطار حمدي: ماما كريمه تعبت ونقلناها المستشفي وبتسأل عليكي ليلي: ايه ماما تعبت؟خدني ليها بسرعه يا حمدي ركبت معاه العربيه، هيا ممكن تكون بتكره ادهم بس كريمه بتحبها ومتقدرش تتأخر عنها ابدا.
حمدي: هيا قلقت عليكي لما قلتي انك تعبانه امبارح واول ما صحيت طلعت تتطمن عليكي ولما اتأخرت طلعت الخدامه تشوفها لقتها واقعه علي الارض ليلي: انا السبب، انا السبب فضلت تعيط حمدي: ما تعيطيش يا ليلي هيا قلبها تعبان وكلنا عارفين ده، هروبك ممكن يكون سبب من الاسباب بس مش السبب الرئيسي وانتي عارفه كويس ايه اللي تاعب قلبها ليلي: انا اسفه انا كنت انانيه ومفكرتش غير في نفسي، مفكرتش هروبي ده هيسبب ايه ولمين...
حمدي: انت فعلا خساره في ادهم، اول مره اشوفه غبي كده، بس عايزك تعرفي اني جنبك علي طول.. ليلي: عارفه يا حمدي ومتشكره جدا ليك، ادهم عامل ايه دلوقتي؟ حمدي: محدش بيعرف ايه اللي جواه، بيخبي مشاعره كويس بس هو اكيد محتاجلك.. ليلي: عمره ما هيحتاجني طول ما سهيله جنبه.. حمدي: سهيله لمت هدومها ومشيت الصبح بدري، حتي بعد ما عرفت ان كريمه تعبانه مشيت.. ليلي: وادهم عرف انها مشيت؟ حمدي: ادهم هو اللي قالي انها مشيت.
ليلي: انت عرفت مكاني ازاي؟ حمدي: ادهم هو اللي قالي ادور عليكي هنا وصلو المستشفي وليلي طلعت لكريمه، شافت ادهم قاعد بره اوضتها وساند دماغه علي عكازه وحست اد ايه هو عاجز، ولسه هتقربله وتحن ليه افتكرته وهو بيضم سهيله في حضنه فبعدت قبل ما تقرب.. ادهم حس بيها ادهم: انا متشكر انك رجعتي جميلك ده مش هنساه ليلي: انا رجعت علشان خاطرها ادهم: عارف عارف، ادخليلها.
دخلت ليلي عندها وشافتها ضعيفه وتعبانه، اول ما كريمه حست بيها ابتسمتلها بس ما قدرتش تتكلم وراحت في النوم الممرضه: هيا عرفت انك موجوده وابتسمت وده شيئ كويس خليكي جنبها ليلي: اكيد هفضل جنبها بعد ما كريمه راحت في النوم ليلي خرجت لادهم كان واقف ومستني ليلي: ادهم ( صوتها كان همس ) بس هو سمعه فقربت منه ليلي: ادهم انا اسفه ادهم: شوفتيها؟ ليلي: اه شوفتها وابتسمتلي..
اتحرك ادهم بس خبط في كرسي من كراسي الانتظار وكان هيوقع بس سند نفسه، اول مره ليلي تشوفه مكسور ومهزوز كده، فاقد ثقته بنفسه، حست انه اتغير كتير بعد الليله اللي فاتت، زي ما يكون شيء جواه انكسر، اكيد سفر سهيله وبعدها عنه للمره التانيه كسره بالشكل ده... ادهم: اقعدي يا ليلي جه الوقت اللي لازم نتكلم فيه عن مستقبلنا ليلي عايزه تواسيه تقول اي حاجه ليلي: انا اسفه يا ادهم اسفه جدا.
ادهم: لا يا ليلي انا اللي اسف، اسف علي حاجات كتيره قوي، اسف اني اجبرتك تتجوزيني، اسف اني اهنتك كتير قوي، اسف اني كنت بطلع ألمي وكرهي لقدري عليكي، اسف علي حاجات كتير حصلت ولو الزمن يرجع لورا هغير حاجات كتير قوي حست ليلي بألم جامد جواها، ملوش لازمه الكلام، هي عارفه انه بيحب سهيله ومش قادره تشيل صورتها وهو بيضمها من دماغها.
ليلي: مالوش لازمه الكلام يا ادهم، انا هفضل لحد ما والدتك تسترد صحتها وبعد كده... ما قدرتش ليلي تكمل لانها عايزه تعيط فكمل ادهم نيابه عنها ادهم: وبعد كده تمشي؟صح؟ علي العموم انا مش هطلب منك اكتر من كده، هتفضلي لحد ما صحتها تتحسن وبعد كده هنسافر انا وانتي بحجه اننا نغير جو وهنقعد في الشاليه كام يوم وهرجع من غيرك وهقولها ان انا وانتي ما اتفقناش وهنخترع اي حاجه، وطبعا هديكي التعويض اللي تطلبيه.
ليلي عيطت بصمت لانها حست بنفسها رخيصه قوي، حاجه اخد غرضه منها ودفع ثمنها وبعد كده رماها، وادهم فهم سكوتها انها راضيه عن كلامه وموافقاه، بعد عنها علشان ما تشوفش دمعه غدرت بيه ونزلت من عينه، حبه بيضيع من بين ايديه وهو واقف مش عارف يعمل ايه؟ خلاص دي النهايه...
ليلي سابته ومشيت ودخلت تقعد جنب امه وبعد ما مشيت طلع اسورتها من جيبه وصوت الجرس الحزين فيهاوكلمها( كان نفسي تكوني صوت فرحتي، صوت يفكرني ديما ان انا مش لوحدي وان حبيبتي معاياي ومشاركاني وحدتي بس الظاهر انك هتكون رفيق وحدتي وهتفكرني ديما بان كان ليا حبيب في يوم بس خساره سابني وراح) كل يوم صحة كريمه بتتحسن ووافقت انها تعمل العمليه طول ما ليلي جنب ادهم وفعلا عملتها واتحسنت كتير واخيرا رجعت بيتها.
طول النهار ليلي بتقعد مع كريمه وادهم بيحاول يتجنبهم علي قد ما يقدر وبعد ما اتطمن ان صحه امه بتتحسن قالهم انه هيسافر يقابل دكتور بره علشان علاجه، فرحت كريمه جدا ان ابنها عايز يكمل علاجه وهيا مش عارفه انه بيهرب مش اكتر... في يوم ليلي كانت بتتمشي في الجنينه فشافت حمدي ليلي: ازيك حمدي، تصدق ليك وحشه؟ ايه انت فين واختفيت كده ليه؟ حمدي: ليلي عايز اتكلم معاكي في موضوع مهم.
ليلي: خير في ايه؟ عايز تقول ايه؟ ادهم جراله حاجه انطق؟ حمدي: لا ما تقلقيش، ادهم كويس، بس يا تري هو ملهوف عليكي كده زي ما انتي ملهوفه عليه؟ انا عايز اسألك سؤال: هو اللي بينك وبين ادهم انتهي مش كده؟ ليلي: مش من حقك تسأل سؤال زي ده؟ بصلها بغيظ وكلمها بصوت عالي.
حمدي: مفيش حد من حقه يسأل غيري انا، فاهمه؟من اسابيع واسابيع وانا شايفك ومراقبك وادهم بيدمرك شويه شويه، وشك الجميل دبل وعماله تستحملي وساكته لحد امتي هاه؟ قوليلي لحد امتي؟انتي غرقانه في حزن وهم خلاكي مش ملاحظه قد ايه بحبك، سامعه بحبك يا ليلي، بحبك اكتر من اي شيئ في الدنيا، اطلبي الطلاق من ادهم وانا اوعدك اني هخليكي اسعد انسانه في الدنيا وهنسيكي عذاب ادهم كله... قرب منها وحاول يضمها بس هيا بعدت.
ليلي: انت ازاي تتصرف كده؟ ازاي تخون مش بس صداقتي ليك ده انت بتخون ثقه العيله كلها فيك، انا مرات ابن عمك، انا عارفه انكم مش متفقين بس ده ما يديلكش الحق انك تخونه، قولي امتي ادهم قصر معاك في اي شيئ؟امتي خانك او حتي عمل اي شيئ يزعلك؟مش مشكلته ان انت بتغير منه، انت ممكن تنساه لكن انا ابدا، فاهم ابدا عمري ما اقدر انساه لحظه..
حمدي: حاولت يا ليلي كتير اقاومك، انساكي، بعدت وغرقت نفسي في الشغل بس حبك اكبر من اني انساه، وادهم ما يستاهلش حبك ده، تقدرلي تقوليلي هو فين دلوقتي لانه مارحش يشوف دكاتره ولا اي حاجه، اقولك انا ادهم سافر بره، واكيد سافر لسهيله، وسابك انتي هنا تهتمي بامه، وبعد كل ده بتدافعي عنه ليلي: والمفروض اني اكرهه لمجرد ان هو مقدرش يحبني؟ حمدي: اي واحده عاقله بتعمل كده.
ليلي: ومين قالك اني عاقله، شوف يا حمدي، ادهم روحي وقلبي وعقلي وكياني كله حتي لو محبنيش انا هفضل احبه.. حمدي: يبقي خلاص انا لازم امشي.. ليلي: تمشي تروح فين؟مينفعش تمشي، الشغل والشركه وادهم وكريمه هيعملو ايه من غيرك؟مفكرتش فيهم؟ حمدي: ادهم ادهم ادهم، هو مفيش حد مهم غيره؟ ليلي: حمدي انت ابن العيله دي زي ادهم بالظبط والشغل والشركه وكل حاجه ليك فيها زي ادهم بالظبط، انت بس بتبص للامور من ناحيه واحده.
حمدي: انتي عايزه مني ايه؟ ليلي: عايزاك تفضل هنا في مكانك وشغلك وتبطل تبص لادهم كمنافس ليك بص له ان اخ ومحتاج لاخوه جدا، محتاج لمساعدتك بس مكسوف يطلبها، كان لازم تكون اكتر واحد يعتمد عليه ادهم بس للاسف فرحت فيه وبدل ما تمسك ايده بقيت بتدور علي اي لحظه يقع علشان تضحك عليه ومش مكفيك ده، ده انت كمان عايز تاخد منه مراته، حتي لو مش بيحبني هتبقي برضه اخدت مرات واحد اعمي، ارجوك اعتبر ادهم اخوك ارجوك..
حمدي: عمري ما فكرت في ادهم بالشكل ده ليلي: يبقي جه الوقت اللي تقوم فيه بدورك كابن للعيله دي وتشيل المسؤليه شويه وتكون اخ لادهم وابن لكريمه وتساعدهم علي قد ما تقدر مش تهرب.. حمدي: هفضل يا ليلي مؤقتا علشان انتي طلبتي مني ده، وهجرب موضوع اخ لادهم بس لو اتكبر والله ما هرحمه ولا هسأل فيه تاني ليلي: مش هيتكبر، وشكرا جدا لتفهمك يا حمدي.
سابته ومشيت وهيا بتسأل نفسها ليه ما تحبش واحد زي حمدي بسيط وصريح بدل ما تحب واحد معقد زي ادهم، واحد سبق وقلبه اتشغل بحب واحده تانيه غيرها...؟ اخيرا اتحسنت صحه كريمه وادهم رجع بيته وهو وليلي بيتعاملو باحترام شديد وبيتجنبوا بعض علي قد مايقدروا، هما الاتنين مش قادرين يحسوا بحب بعض، كل واحد كبرياؤه اعمي...
ليلي بعد ما صحه كريمه اتحسنت قررت انها خلاص تمشي لان ملهاش مكان في البيت وفعلا راحت لادهم تبلغه بقرارها...
رواية كبرياء أعمى للكاتبة الشيماء محمد الفصل الثالث عشر
ليلي نفذت وعدها بانها تهتم بكريمه بس كريمه صحتها خلاص اتحسنت وهيا لازم تمشي وراحت لادهم تبلغه بقرارها ليلي: ادهم ممكن نتكلم شويه؟ ادهم: طبعا اتفضلي. ليلي سكتت شويه ومعرفتش تبدأ كلامها ازاي ليلي: مامتك الحمد لله اتحسنت.. ادهم فهم هيا عايزه تقول ايه... ادهم: اه الحمد لله، الفضل ليكي بعد ربنا ولوقفتك جنبها، ودلوقتي عايزه تمشي صح؟ ليلي فكرت انه للدرجه دي عايز يخلص منها بسرعه.
ليلي: انا خلاص قمت بدوري كامل صح؟ اتمنت انه يقولها لأ، يقولها دورك انك تحبيني وتفضلي جنبي، بس دي امنيات، في نفس الوقت ادهم كان عايزها تقول انها بتحبه وهتفضل جنبه ومش هتبعد عنه ابدا بس برضه دي امنيات.
زي ما قلنا كبرياء اعمي.
ادهم: براحتك يا ليلي، مش همنعك اكتر من كده... ليلي: خلاص بكره الصبح همشي، بس مامتك؟ ادهم: سيبي امي عليا انا هكلمها سابته ليلي ومشيت علشان ما يحسش بدموعها اللي نازله غصبا عنها، خلاص انتهي، كل شيئ انتهي... بالليل ادهم دخل عند كريمه واول ما قعد جنبها كريمه: خلاص هتسيبها تمشي؟ ادهم: انتي مين قالك انها هتمشي؟
كريمه: علشان انت ابني وانا عارفاك وبعدين انا شايفاكم بتعاملو بعض ازاي وعارفه انكم مستمرين علشاني وعلشان ما تزعلونيش، بس يا ادهم انت بترتكب غلطه كبيره.. ادهم: لا يا امي انا بصلح غلطه اكبر، ارجوكي بلاش كلام في الموضوع ده تاني واقفليه لحد كده.. جه تاني يوم وليلي لمت حاجتها ومشيت وودعتها كريمه بدموعها وحمدي وصلها للمحطه وادهم رفض اصلا يشوفها وهيا ماشيه.
ادهم حس انه لتاني مره بيخسر حاجه غاليه عنده قوي ومش بايده يتصرف زي بالظبط لما خسر نظره، النهارده حس انه بيخسر نظره لتاني مره.. ادهم ساب لليلي شيك ثمن اتعابها بس هيا اديته لكريمه وقالتلها انها مش هتقدر تاخد فلوس منه وقالتلها ان ادهم سابلها الفلوس علشان يأمن مستقبلها بس هيا مش عايزه فلوس، هيا كانت عايزه حبه...
رجعت ليلي لجوز امها ولشغلها القديم وكل حاجه رجعت زي الاول بس الفرق انها قبل كده كانت بتحلم وتتمني لكن دلوقتي بقت ميته عايشه من غير روح.. في يوم بعد ما رجعت من شغلها جالها عباس جوز امها عباس: انا عايز فلوس يا بت انتي.. ليلي طلعت مهيتها واديتهاله عباس: ايه ده يا بنت انتي؟انتي فاكراني اهبل ولا ايه؟ ليلي: عايز مني ايه؟ما انا اديتك اللي معايا.؟
عباس: لا يا اختي مش عايز دول، دول خليهملك، انا عايز من ملايين حبيب القلب.. ليلي: حبيب القلب ده مالكش دعوه بيه، وبعدين انا ما اخدتش منه حاجه.. عباس: عليا انا يا روح امك؟لا ده انا عباس ليلي: قلتلك ما اخدتش حاجه منه ضربها عباس وسابها ومشي لما ملقاش معاها حاجه وقررانه يروح لادهم يطلب منه فلوس ليلي فضلت تعيط وجتلها امها الم: وبعدين يا حبيبتي واخره العياط ده ايه؟ ليلي: طيب اعمل ايه؟مش عارفه اعيش من غيره؟
الام: طيب انتي سيبتي ليه لما بتحبيه؟ ليلي: مش انا اللي سيبته هو اللي سابني، مره واحده بعد ما روحتله لقيته انسان تاني اتغير معرفش ليه؟ الام: هو انتي يا ليلي ما اخدتيش منه فلوس ولا بتضحكي علي عباس؟ ليلي: لا ما اخدتش منه اي حاجه حتي كل هداياه سيبتهاله، مش عايزاه يفتكر انه اشتراني بفلوسه.. الام: انا عايزه اقولك حاجه بس خايفه تزعلي بس يمكن تكون هيا السبب في اللي حصلك ليلي: قصدك ايه وحاجه ايه؟ قولي.
الام: بعد ما اتجوزتي ومشيتي لاحظت ان عباس معاه فلوس كتيروبيصرف كده براحته ليلي: هاه وبعدين الام: سألته الفلوس دي منين رفض يقولي بس سمعته وهو سهران مع اصحابه بيقول ان المحامي بتاع جوزك عطاله الفلوس دي علشان يوافق انك تتجوزي ادهم الاعمي؟ ليلي: انتي بتقولي ايه؟ عباس قبض ثمن جوازي من ادهم؟ الام: ايوه وباينله قبض كتير قوي كمان.
ليلي: علشان كده هو اتغير معاياي وبقي بيكلمني بالفلوس علي طول، انا لازم اروحله وافهمه كل حاجه الام: هتروحي فين ده احنا المغرب خليكي الصباح له عنين بكره الصبح روحي الدنيا مش هتطير فعلا قررت ليلي تروحله الصبح بدري.. عباس خرج وركب اول قطار وراح لبيت ادهم واول ما وصل طلب يقابل كريمه الاول، كريمه نزلت تقابله بسرعه قبل ما ابنها يحس بيه. كريمه: انت ايه اللي جابك هنا؟ وعايز ايه؟
عباس: الله الله الله ده ايه المقابله دي؟ده انا برضه من ريحه الحبايب ولا ايه؟ كريمه: اخلص قول عايز ايه وبلاش رغي؟ عباس: ولا مؤاخذه يا هانم عايز فلوس، فلوس ثمن سكاتي علشان معرفش البيه باتفاقنا. ادهم كان نازل من اوضته وهو علي السلم سمعهم وعرف صوت عباس وفضل واقف علشان يعرف هو عايز ايه من امه ودخله هو ايه؟ كريمه: ما انت قبضت وقبضت كتير كمان؟
عباس: خلصوا يا هانم انتي عارفه الدنيا بقت عامله ازاي، وبصراحه البت ليلي لما رجعت واشتغلت تاني في المطعم الفلوس اللي بتجيبها مش كفايه واحنا خدنا علي العيشه الناعمه.. ادهم استغرب ان ليلي رجعت شغلها، امال الفلوس اللي عطاهلها راحت فين والفلوس اللي قبضتها من امه فين؟ كريمه: انت فاكر ان دي بقي التكيه اللي كل ما تحتاج فلوس تيجلها، انا مش عارفه ليلي ازاي تقبل تعيش مع واحد زيك كده عاله عليها؟
عباس: جوز امها بقي هتعمل ايه.؟ وبعدين ما تنسيش ان انا جيبتهالك لحد عندك وخليتها تتجوز الننوس بتاعك، ولا تحبي اقوله انك اشتريتهاله بالفلوس.؟
كريمه: اخرس، انت اصلا اللي حبستها غصب عنها منعتها تقابل ابني وانت اللي بعدتها عنه وانا اضطريت ادفع علشان انت تسيبها ترجعله، انا دفعتلك بس علشان اخلص ليلي من ظلمك وقهرك ليها لاني عارفه انها بتحب ابني وهو بيحبها ومكنتش هسمح لكلب زيك يفرق بينهم، كان لازم احافظ علي حبهم باي طريقه، ودلوقتي اطلع بره.. عباس: لا يا هانم مش طالع بقي غير لما اقابل الننوس بتاعك واقوله.
فجأه ادهم دخل: اعتقد سمعت امي وهيا بتقولك اطلع بره اتفاجئت كريمه بابنها وعباس كمان عباس: يا باشا انا... قاطعه ادهم: اطلع بره مش عايز كلمه زياده منك نادي ادهم علي الخدم ادهم: طلعوا الراجل ده بره ولو حاول يدخل هنا تاني اطلبوله البوليس اخدوا عباس وطلعوه بره، فضل الصمت مسيطر علي المكان ادهم افكاره كلها بتتخانق مع بعضها وافتكر كل لحظه ظلم فيها ليلي وهانها، طول الوقت بيجرح فيها ويبيع ويشتري فيها وهيا مظلومه.
كريمه: انا اسفه يا ادهم، بس كنت فاكره اني كده بسعدك ادهم: تسعديني بايه؟بانك تشتريلي عروسه؟انت عارفه انت عملتي فيا ايه؟انتي عارفه انا عملت ايه؟ ادهم كان بيزعق بصوته كله كريمه: انا اسفه حقك عليا. انا عملت كده علشان بحبك.
سابها ادهم وطلع اوضته وهيا جريت وراه كريمه: هتعمل ايه؟ ادهم: هروحلها وياريت ما اكنش اتأخرت كتير لازم اصلح كل حاجه كريمه: طيب خليك الصبح ادهم: لا مش هستني اكتر من كده ارجوكي سيبني حمدي جه وسمع صوت كريمه وادهم وحس انهم بيتخانقوا علشان صوتهم عالي طلع السلم وحط شنطة اوراقه وشنطة اللاب من ايده علي اخر السلم وراحلهم حمدي: صوتكم عالي كده ليه؟ مالك يا ماما بتعيطي ليه؟ ادهم في ايه؟ فهموني ايه اللي حصل؟
ادهم: مفيش حاجه، انا لازم اسافر دلوقتي لليلي خرج ادهم من اوضته مستعجل من غير عكازه وكل همه يروح لحبيبته، وفجأه اتكعبل في شنط حمدي ووقع علي السلم، اتدحرج السلم كله لحد ما استقر تحت.. حمدي جري وراه بس ما لحقوش وكريمه صرخت علي ابنها حمدي: ادهم رد عليا ارجوك رد عليا ادهم.. ادهم اتكلم بصعوبه: ليلي هاتلي ليلي يا حمدي وغاب عن الدنيا...
رواية كبرياء أعمى
