رواية قلعة أمل بقلم اسماء عبد العظيم الفصل الخامسثانى يوم الصبح خرجت امل علشان تروح شغلها .. وطبعا كانت خارجه بدرى عن ميعادها علشان متشوفش مجدى .. وكانت مبسوطه من جواها ان موضوع السكن تقريبا اتحل .. بس فرحتها مكملتش لإنها بمجرد مانزلت لقت مجدى مستنيها قدام عربيته ... وبسرعه اتجه ناحيتها ووقف قدامها ومنعها انها تكمل طريقها ...( امل ) لوسمحتى .. عدينى .. عاوزة اروح شغلى( مجدى ) ينفع اللى حصل منك امبارح ده .. عموما مش هنكلم فى الشارع .. فى عربيه نقدر نتعاتب فيها .. يالا ... تعالى هوصلك( امل ) لأ انا مش هركب معاك العربية ...( مجدى ) لأ هتركبى ...( امل ) يعنى ايه هركب .. هتركبنى غصب عنى ...( مجدى ) ايوه .. علشان لو مركبتيش دلوقتى بالذوق .. انا هتصل على ليلى واقولها انى عاوز اوصلك علشان متتعبيش فى المواصلات وانتى مش راضيه .. وطبعا ليلى هتسألك مش عاوزة تركبى ليه .. وخصوصا ان شغلك فى نفس طريق شغلى ... هاااا هتركبى ولا اتصل على ليلى هى تقنعك ...( امل ) انت بتهددنى بليلى ... انا معملتش حاجة غلط علشان تهددنى بالشكل ده ... انا كل اللى عاوزة اعرفه انت عايز منى إيه ؟!( مجدى ) اركبى العربية دلوقتى وانا اقولك عاوز ايه ... ولا اتصل على ليلى ... هاااا .. اركبى ...( امل ) بس دى آخر مرة هركب معاك العربية .. وعلشان تبقى عارف انا مش خايفه منك ومن تهديدك انك تقول لليلى ... على قد ما انا زعلانه على ليلى انها إتجوزت واحد زيك .. وللأسف هى فكراك ملاك ... انا كل خوفى وزعلى على ليلى على صدمتها فى جوزها ...( مجدى ) طب اركبى ...--وبعد م أمل ركبت العربية وهى كلها غضب ...( مجدى ) بصى بقا ياستى انا عاوزك تبقى لطيفه معايا .. يعنى اكلمك تردى عليا ... اقرب منك تقربى منى ... كده يعنى انما مش تعمليلى فيها الشريفه العفيفه اللى مفيش زيها ...( امل بضيق ) انا شريفه وعفيفه غصب عنك ...( مجدى مقاطعا لأمل ) آآه ما انا عارف ... شريفه وعفيفه .. هو لو انتى كده صحيح كنتى سيبتى اهلك وجيتى بلد ثانية لوحدك .. وانتى مش متجوزة ... يعنى بتسهلى على نفسك تعملى اللى انت عاوزاه من غير ما حد يحاسبك ...( امل بحده ) اينعم .. انا سيبت اهلى بس مقطعتش علاقتى بيهم ولا جيت هنا علشان اعمل اللى انا عاوزاه من غير ماحد يحاسبنى ... انا جيت هنا لإن الظروف اضطرتنى انى امشى .. وقعدت عندكم علشان انا مليش حد هنا غير ليلى وهى اللى عرضت عليا انى آجى اقعد عندكم وكمان وعدتنى انك هتلاقى لى سكن ... بس واضح انك اصلا مفكرتش تشوف لى سكن علشان افضل موجوده قدامك وتذل فيا براحتك .. فلو سمحت بقا نزلنى هنا .. وابعد عنى ... لإنى بجد مش قادره ابصلك ..( مجدى ) حلو اوى الشويتين دول .. بصى يابنت الناس ... انتى متعرفنيش انا لما احط حاجة فى دماغى وانا عاوزها .. يبقى هاخدها يعنى هاخدها ... فكرى فى الكلمتين دول .. وإلا انتى متعرفيش انا ممكن اعمل فيكى ايه او اقول عليكى ايه ... واخدالى بالك انتى ياحلوة ...( امل بحده ) نزلنى ... واللى تقدر تعمله إعمله .. طالما مبعملش حاجة غلط .. يبقى مش هخاف منك او من غيرك ...ونزلت امل من العربية وكلها حزن وغضب وكمان دموعها مبطلتش تنزل طول الطريق لحد ماوصلت للمدرسة .. حاولت تمسح دموعها ودخلت مسرعه على الحمام علشان تغسل وشها وتطرد شكل مجدى من عنيها .. وتقدر تكمل اليوم فى المدرسة ..وبعد ما إنتهى اليوم الدراسى .. فورا اتجهت امل نحو الشاطىء علشان تقابل محمود وتشوف السكن اللى قالها عليه . واتجهت مباشرة نحو الكافيتريا( امل ) السلام عليكم ..( مصطفى ) اهلا وسهلا اتفضلى ..( امل ) لو سمحت محمود موجود ..( مصطفى ) ايوه هو موجود بس بينزل طلبات لزباين .. اتفضلى .. تؤمرى بحاجة( امل ) لأ انا متشكرة بس .. انا عاوزة اشوف محمود ضرورى .. هو هيتأخر ؟( مصطفى ) لأ ابدا .. ثوانى وهتلاقيه جاى على طول .. استريحى هنا على مايجىوبعد شويه دخل محمود( مصطفى ) إيه اللى أخرك ..( محمود ) ما انت عارف لازم آلاغى الزباين ..( مصطفى ) فى ناس عاوزينك ..( محمود ) مين ..( مصطفى ) اللى هناك دى .. سألت عليك( محمود ) اه .. امل .. دى عاوزاك انت ؟(مصطفى ) تقصد إيه ؟( محمود ) ماهى دى اللى هتأجر الشقه ياعم ..( مصطفى ) دى .. !( محمود ) آه دى ... مش قد المقام ولا إيه ..( مصطفى ) لا ياعم .. لا سمح الله .. احنا اللى مش قد المقام .. بس على الله بس الشقه تعجبها .. احنا نطول انها تسكن عندنا ...( محمود ) اما اروح اندهلها .. آنسه امل ..( امل ) اه .. ازيك يامحمود ... هااا هتورينى الشقه امتى ..( محمود ) طب تعالى قابلى صاحب الشقه وهو هيوريهالك ..( امل ) هو موجود هنا ؟( محمود ) ايوه .. تعالى .. معايا .. اعرفكم ببعض ... مصطفى زميلى وصاحب الشقه .. الآنسه امل .. اللى عاوزة تأجر الشقه( مصطفى ) اهلا وسهلا .. ياآنسه امل .. انا لوكنت اعرف ان حضرتك اللى عاوزة الشقه انا مكنتش خليتك تستنى محمود ..( امل ) اهلا بيك يااستاذ مصطفى .. انا ممكن اشوف الشقه امتى ؟( مصطفى ) فى اى وقت حضرتك فاضيه فيه( امل ) يعنى ينفع اروح اشوفها دلوقتى .. من فضلك( مصطفى ) مفيش مشكلة .. هستأذن بس من صاحب الشغل .. وآجى مع حضرتك اوريهالك ...- خرجت امل مع مصطفى علشان تشوف الشقه .. وهما فى الطريق مصطفى سألها مصطفى ) محمود قالى انك هتقعدى فى الشقه لوحدك .. وليه اهلك مش هيسكنوا معاكى( امل بإحراج ) حصلت ظروف واضطريت انقل شغلى هنا واهلى فى القاهرة ..( مصطفى ) آسف ان بتدخل .. بس علشان لو ولدتى سألتنى ... هااا البيت هناك .. اتفضلى- دخلت امل مع مصطفى البيت وبعدين دخل مصطفى عند والدته الاول وطلب منها مفتاح الشقه وعرفها على امل وبعدين طلعت معاه علشان تشوف الشقه .. بعد ما تفرجت امل على الشقه ..( امل ) تمام .. الشقه كويسه ومناسبه .. ممكن اعرف هتأجرها لى بكام( مصطفى بخجل ) يعنى اللى حضرتك تقدرى عليه .. اكيد مش هنختلف( امل ) لأ انا لازم اعرف بكام ..( مصطفى بتلعثم ) طب .. يعنى ... 600 جنيه ..( امل ) ماشى وانا موافقه ... ممكن نكتب العقد النهارده ..( مصطفى ) وقت ماتحبى ...( امل ) بس لو امكن .. ممكن تساعدنى فى انى آلاقى فرش مناسب .. علشان انا عاوزة انقل فى الشقه النهارده ...( مصطفى ) انا ممكن اوصلك لمعرض فى فرش مناسب .. بس علشان تقدرى تفرشى الشقه كلها ده .. هيكلفك كثير( امل ) لأ .. انا مش هفرشها كلها .. هجيب الحاجات الضرورية بس ..( مصطفى ) وانا تحت امرك ..( امل بإبتسامه ) شكرا ليك .. ممكن تجهز العقد على ما اروح اجيب شنطتى .. وبعدها ننزل نجيب الفرش( مصطفى ) ماشى حاضر .. بس لوسمحتى ممكن البطاقة بتاعة حضرتك( امل ) آه .. لحظة واحدة( وفتحت امل شنطتها ودورت على البطاقة وفى الآخر اديتها لمصطفى .. وإستأذنت انها هتروح تجيب شنطتها ... علشان تبقى اول ليله ليها فى الشقه الجديدة بعيدا عن مجدى ...خرجت امل من البيت بسرعه وكان جواها فرحة كبيرة .. اخيرا هتبعد عن مجدى .. وبتقول فى نفسها يااااه الحمد لله .. اخيرا ..بس انا لازم مخليش ليلى تعرف عنوانى الجديد .. لازم ابعد عنها وعن مجدى نهائى .. لإنها لو عرفت العنوان ممكن مجدى يعرفه منها .. ويإذينى بأى شكل .. لأ انا لازم مقولش لليلى على العنوان .. بس لو سألتنى اقولها إيه ..ايوه .. لقيتها .. مفيش قدامى غير كده ...فى منزل مصطفى:بعد ماخرجت امل ... خد مصطفى بطاقة امل وإبتدى يتأمل فى صورتها وبيانتهاامل عبد العزيز – القاهرة – شبرا – تاريخ الميلاد 1/1/1984 – مدرسة لغة انجليزيةإيه ده مش معقول .. بقا هى اكبر منى ب3 سنين مع إن شكلها يبان اصغر من كده ... ياله انا مالى هو انايعنى هناسبها ...فى منزل ليلى:-( امل وهى بتتلفت حواليها خايفة تشوف مجدى ) السلام عليكم( ليلى ) وعليكم السلام .. إيه اللى اخرك كده ياليلى ..( امل بإضطراب ) ابدا .. خرجت من المدرسة وروحت اتمشى على الشط شويه ..( ليلى ) طب .. ادخلى غير هدومك على ما احضر الغدا واتصل على مجدى علشان يجى هو كمان ونتغدى سوا ..( امل بسرعه ) لا ..( ليلى ) لأ .. لأ .. ليه( امل بتوتر) اقصد .. انا مش جعانه .. وووكمان انا مسافرة دلوقتى وكنت جايه آخذ شنطة هدومى ..( ليلى متفاجئة ) إيه تسافرى .. تسافرى فين ؟( امل ) انا راجعه على القاهرة ...( ليلى ) ليه ؟ إيه اللى حصل ؟( امل ) متقلقيش كده ياليلى .. بس خالد اخويا اتصل عليا وقالى ان امى تعبانه .. ولازم اروح اشوفها ...( ليلى ) فجأة كده .. طب وشغلك .. هتعملى فيه إيه ؟( امل بتلعثم ) خالد اتصل بيا وانا فى المدرسة .. وانا قدمت على اجازة ..والمدير قدر ظروفى ووافق عليها ..( ليلى ) يعنى هترجعى امتى ..؟( امل ) مش عارفه لسه .. بس اكيد هبقى اكلمك ..( ليلى ) ماشى ياحبيبتى .. ربنا يطمنك على مامتك ...بس انتى هتوحشينى اوى ياامل ..( امل وهى بتحضن ليلى ) وانتى كمان .. هتوحشينى اوى ...( ليلى ) طب انتى بتعيطى ليه دلوقتى ... اللى يشوف كده يقول انك مش راجعه ثانى( امل ) لأ مش كده .. بس انتى اختى وانا بحبك اوى .. وانتى وقفتى جانبى فى الوقت اللى محدش كان جنبى .. شكرا على كل اللى عملتيه معايا ياليلى ..( ليلى ) انتى بتشكرينى على إيه احنا اخوات ياامل .. ويالا تعالى لما اوضب معاكى شنطتك علشان تلحقى تسافرى قبل الليل مايدخل عليكى ..( امل ) يالا ...خرجت امل من منزل ليلى ... وبعد ماليلى قفلت الباب وراها .. لسه بتنزل على السلم سمعت صوت هى تعرفه كويس ... شخص بيتكلم فى التليفون ومتجه نحو الصعود ...( امل ) يادى المصيبه .. هيشوفنى ..!- واتجهت امل بسرعه بالصعود للدور الاعلى من شقة ليلى ... وبعد مادخل مجدى الشقه نزلت امل بأقصى سرعه وركبت اول تاكسى قابلها .. امل فى نفسها .. الحمد لله ... وإدت العنوان للسائق .. ( العنوان الجديد )فى القاهرة ( بمنزل الحاج رجب ):-( خالد ) هااا عملت إيه يابابا فى موضوع الورشه( رجب وهو بيبص بنظره غل لسناء ): هعمل إيه يعنى .. عرضتها للبيع وبثمنها هسدد الديون .. واشترى محل صغير اعرض فيه موبيليا لورش ثانية ..( خالد ) طب عصام ليه مدخلش معاك فى الورشه ... زى ماكنتوا متفقين( رجب ) عصام .. عصام كان له شرط وحيد انه يتجوز الست امل .. وإلا مفيش مشاركة فى الورشه ...( خالد ) طب والشغل ماله ومال الجواز ...( رجب ) عصام مش محتاج يشارك حد .. انت عارف انه معاه فلوس كثير .. ومش هدفه الشغل معايا علشان سواد عنيه .. كان كل هدفه انه يتجوز الزفته ..( سناء بحده ) زفته ... انت بتشتهما ليه ؟ حرام عليك( رجب ) محموقه اوى ياختى على بنتك ...(سناء ) ايوه .. اتحمق .. متحمقش ليه ... بنتى ومعنتش هسمح لحد يظلمها ..( رجب وهو خارج ) داهيه تاخدك انتى وبنتك فى ساعه واحده ...( سناء وهى بتبكى ) الله يسامحك ...قرب خالد من امه.. ماما متزعليش علشان خاطرى ..بطلى عياط ...( سناء ) انا مش عارفه ابو بيكره امل ليه كده .. حرام عليه يدعى عليها ...امل ملهاش غيرى بعد ربنا ...( خالد ) وانا رحت فين ياماما ... امل اختى الكبيرة وانا بحبها وهفضل جنبها ..وعلشان تطمنى انا هسافر قريب لأمل .. علشان اطمن عليها وكمان علشان تحس اننا جنبها( سناء بفرحه ) بجد ياخالد .. ربنا يخليك لإخواتك ياحبيبى .. بس هتسافر إمتى وهتقول لأبوك إيه ؟..( خالد) لأ طبعا انا مش هقول لبابا .. بس ادينى فرصه كده اظبط امور دراستى .. وهحاول انى اسافر لأمل قبل الامتحانات وساعتها ابقى اخترع اى حجة لبابا ..فى الاسكندرية منزل ليلى:-مجدى بعد مادخل البيت سأل ليلى على امل بحجة انه بيطمن عليها .. وانها زى اخته( مجدى ) اومال امل فين ياليلى مش شايفها يعنى .. هى لسه مجاتش( ليلى ) امل .!. انت مقابلتهاش على السلم وانت طالع .. ده هى يادوبك خرجت وانت طلعت .. مش معقوله تكون لحقت تنزل بالسرعه دى ...ده انا قولت انكم اتقابلتو على السلم علشان كده انت مسألتش عليها من ساعة ما جيت ...( مجدى بعدم فهم ) لأ ... المهم يعنى هى راحت فين ؟( ليلى ) سافرت القاهرة .. اخوها اتصل عليها وقالها ان والدتها تعبانه فخدت اجازة وراحت تشوفها .. وتقعد معاها يومين( مجدى ) وإزاى المدير بتاعها سمح لها بالاجازة بالسرعه دى .. ده هى لسه مستلمه الشغل من اسبوع .. هيوافق لها على الاجازة بسهوله كده ..!( ليلى ) انا عارفه بقا ... هى قالتلى كده .. وقالت لى ان المدير بتاعها مقدر ظروفها علشان كده وافق ..هااا احضر الغدا دلوقتى ...( مجدى وهو سرحان وبيكلم نفسه ) غريبه ... انا مش مطمن للكلام ده .. فى حاجة مش مظبوطه!...

رواية قلعة أمل بقلم اسماء عبد العظيم الفصل السادسرجعت امل على بيت مصطفى ولقت مصطفى فى إنتظارها .. اخد شنطتها وطلعها الشقه ... وبعدين خرجوا سوا علشان يشتروا الحاجات اللى محتجاها امل:-( مصطفى ) آنسه امل .. انا آسف على سؤالى .. بس(امل ) سؤال إيه ؟ إسأل( مصطفى ) الحاجات اللى انت هتشتريها دى هتتكلف فلوس كثير .. يعنى انتى معاكى فلوس تكفى ..( امل ) متقلقش انا عامله حسابى .. انا ليا حساب فى البنك .. ومعايا الفيزة كارت .واقدر اسحب اللى انا عاوزاه من اى ماكينة صرافة .. فلو سمحت وصلنى على اول ماكينة علشان اقدر اسحب الفلوس ..- سحبت امل الفلوس اللى محتجاها وبعد كده راحت إشترت الفرش الضرورى اللى هتحتاجه فى الشقه وبعدين رجعت على البيت وكان الوقت إتأخر .. وساعدها مصطفى كثير فى ترتيب الشقه .. وكمان مها اخته ... لتستعد امل للمبيت فى اول ليله ليها بعيدا عن مجدى ...( مصطفى موجه كلامه لأمل ) هاااااااا .. الحمد لله كده خلصنا .. محتاجه حاجة ثانية ..( امل بكسوف ) انا متشكرة جدا ليك يااستاذ مصطفى .. انا تعبتك معايا .. انا مش عارفه ارد لك جميلك ده ازاى ..( مصطفى ) مفيش جميل ولاحاجة .. المهم انك تبقى مرتاحه .. آه بالحق كنت هنسى ..إتفضلى .. دى نسخة العقد بتاعتك .. عن إذنك ..( امل وهى بتمد إيدها علشان تاخد العقد ) آه .. انا كمان كنت هنسى .. لحظة بعد إذنك يااستاذ مصطفى ..( مصطفى ) خير .. فى حاجة ثانية محتجاها ..( امل وهى بتفتح شنطتها ) شكرا انت مش مخلينى احتاج حاجة .. بس إتفضل( مصطفى ) فلوس إيه دى ..( امل ) ده إيجار الشقة ...( مصطفى بإحراج) بس ده اكثر من حق الشقه ..( امل ) لأ مش اكثر ولاحاجة .. ده إيجار ثلاث شهور مقدم ..( مصطفى ) طب .. ليه .. انتى ممكن تدفعى كل شهر .. وكمان بعد ماتقبضى( امل بإبتسامه) لأ .. كده احسن .. علشان احس ان البيت بيتى .. ولا إنت بقا ناوى تطردنى بعد اول شهر ..( مصطفى ) ههههه لأ ابدا انا مقدرش اطردك .. البيت بيتك .. واحنا ضيوف .. عن إذنك .. ولو احتاجتى اى حاجة اندهيلى على طول .. تصبحى على خير ...( امل بفرح ) وإنت من اهل الخير ...- نزل مصطفى ودخل على مامته وعلى وشه إبتسامه عريضه سميرة ) يارب دايما اشوفك مبسوط .. بس إيه سر الإبتسامه اللى على وشك دى( مصطفى ) الحمد لله فرجت .. الآنسه امل دفعتلى ايجار ثلاث شهور مقدم يعنى 1800 جنيه وكمان انا كنت محوش فلوس البقشيش بتاعتى يعنى حوالى 2000 جنيه كمان ... يعنى كده 3800 جنيه ... ياااامها .. مهااااا( سناء) ربنا يفرجها عليك كمان وكمان يابنى ..( مها ) نعم يامصطفى ... فى حاجة( مصطفى ) تعالى .. ماما كانت قايله لى انك ناقصك حاجات فى جهازك خدى دول .. وانزلى بكره إشترى اللى ناقصك وان شاء الله كلها كام يوم وهقبض .. وادبرلك مبلغ كمان( مها بفرحة وهى بتحضن اخوها ) ربنا مايحرمنى منك يااحلى اخ فى الدنيا ...( مصطفى ) وميحرمنيش منك .. وافرح بيكى قريب .. يالا بقا تصبحوا على خير ..علشان انا هصحى بكره بدرى علشان الشغل ...- امل قاعده فى اوضتها فى شقتها الجديدة وعماله تحسب فى الحاجات اللى اشترتها .. وتبص فى الفواتير ... ومن بين الورق لقت نسخة العقد ومعاها صورة بطاقة مصطفى... مسكته وإبتدت تقرأ بيانات مصطفى ..مصطفى على المتولى – الاسكندرية – دبلوم صنايع 5/8/1987اممممم – اصغر منى ...بس بصراحة محترم اوى ...فى منزل ليلى:-دخلت ليلى على مجدى فى الاوضه ولقيته بيتكلم فى التليفون .. انهى المكالمة سريعا ..( مجدى برخامه ) فى حاجة ..( ليلى ) ابدا .. بلاش اقعد معاك شويه ...( مجدى ) انتى مش شايفانى بتكلم فى التليفون .. لازمته ايه تيجى تتصنتى عليه ..( ليلى بتعجب ) اتصنت عليك ؟! ليه انت بتكلم مين ...( مجدى ) يعنى إيه بكلم مين وانتى مالك ... انتى هتحاسبينى ...( ليلى ) فى ايه يامجدى .. انت متعصب ليه .. انا عملت لك ايه؟...( مجدى ) لاعملتى ولا عملتيش ... خلينى ساكت احسن ... انا خارج..( ليلى ) هتخرج دلوقتى .. ده الساعة 11 هتخرج امتى .. وهتيجى امتى( مجدى بحده ) ملكيش دعوه وبعدين انتى عاوزانى افضل قاعد فى خلقتك .. ده على اساس انك تفتحى النفس اصلا ... انتى فاكره نفسك ست ...(ليلى بصدمه ) الكلام ده جديد عليك يامجدى .. فى إيه ؟ مالك ؟ متغير معايا ومع ولادك ليه .. مش مهتم لا بيا ولا بالولاد ... انا عملت حاجة زعلتك ...( مجدى ) هو انتى يعنى عاوزة تعمليلى فيها بريئة .. انتى مش شايفه نفسك عامله ازاى .. انا حاسس انى متجوز مرتبه مش ست ...( ليلى ) يعنى دى اول مرة تشوفنى ماإحنا بقالنا 7 سنين متجوزين ... إيه اللى يخليك تقولى الكلام ده دلوقتى ... قولى فى إيه ...(مجدى ) اللى يخلينى اقولك الكلام ده دلوقتى .. انى زهقت من عيشتى معاكى .. مش حاسس انى عايش .. حاسس انى مدفون .. عجزتينى بدرى ... انتى مش بتشوفى نفسك فى المرايا.. طب مبتشوفيش الستات اللى فى الشارع عاملين إزاى ... كل اللى همك الاكل والشرب والتنضيف .. انما تهتمى بنفسك وبيا لأ ... مفيش ...إوعى كده من وشى ...وزقها ووقعت على السرير ...وخرج مجدى وساب ليلى بتعيط ومش قادرة تفهم .. إيه اللى حصل لمجدى يخليه يكلمها كده.. ويهينها كده ولاول مرة من يوم ماإتجوزها ..ليلى مصدومه ... وبتقول فى نفسها ... اكيد مجدى بيفكر فى ست ثانية ...ثانى يوم الصبح:بتخرج امل ولاول مرة من يوم ماإنتقلت على إسكندرية تحس براحه .. وان مفيش حد بيراقبها .. ولا بيضايقها .. راحت على شغلها وكملت يومها فى المدرسة وبعد ماخرجت فكرت انها تتمشى شويه على الشط، وقررت فى نفسها إنها مش هتفكر فى اللى فات او اى شىء يعكر مزاجها وهتستمتع بس بمنظر البحر ...وطبعا بمجرد ماوصلت على الشط قابلت محمود .. اللى رحب بيها واللى مفوتش الفرصة طبعا وقعد يتكلم ويهزر مع امل وكإن بينهم صحوبيه.. بس كان فى شخص واقف من بعيد ومراقب الموقف .. ( مصطفى ).. محمود شخص عشرى بيحب يتكلم كثير مع اللى يعرفه واللى مايعرفوش .. واللى اى حد ياخد عنه إنطباع انه شخص ( ماطيور) عكس مصطفى اللى هو قليل الكلام .. دايما حاسس بالمسئولية .. شخص جد ... اول إنطباع عنه انه شخص ( راسى )ومن شخصية محمود .. قدرت امل انها تتعامل معاه بسهوله .. وبتعامله كإنه اخ صغير وخاصة بعد ماعرفت منه ... إنه مش بس صاحب مصطفى وزميله فى الشغل .. عرفت كمان انهم زمايل دراسة .. يعنى من نفس السن ...- بعد شويه امل قامت ..علشان تروح .. وقفها مصطفى ..( مصطفى ) آنسه امل .. ازى حضرتك ... يارب تكونى ارتحتى فى الشقه( امل ) الله يسلمك يااستاذ مصطفى .. انا فعلا إرتحت جدا ... اول مرة انام مرتاحه كده من يوم ماجيت إسكندرية ...( مصطفى بإحراج ) انا بس كنت حابب اطمن عليكى ... انك مستريحه فى الشقه عن إذنك( امل ) شكرا ليك على كل حاجة وبجد انا مستريحه جدا .. وحاسة انى فى بيتىومشيت امل وفى طريقها مرت على السوق تشترى طلبات للبيت وبعدين روحت ..فى منزل ليلى:-ليلى قاعدة على كنبة الانتريه مستنيه مجدى اللى مرجعش البيت من بعد الخناقه بينهم ..وبعد شويه بتسمع باب الشقه بيتفتح ليلى بلهفه ) مجدى .. انتى كنت فين ؟... ليه مرجعتش بليل ؟ وكنت فين ؟( مجدى ) إيه .. إيه .. كل دى اسئله ... ملكيش دعوه .. وبعدين انا عيل صغير علشان تحققى معايا .. كنت فين ...( ليلى ) انا مقصدش كده .. كل الحكاية انى قلقت عليك ..( مجدى بتريقه ) شكرا ..انك اخيرا ... قلقتى ...(ليلى ) طب انت مرحتش الشغل ..( مجدى ) شىء ميخصكيش .. هو شغلك ولا شغلى ..( ليلى وهى بتعيط ) يامجدى .. حرام عليك رد عليا كويس .. انا مش عارفه انا زعلتك فى إيه .. طب حقك عليا لو كنت زعلتك من غير ما اقصد ... بس بلاش الجفاء ده منك .. انا مش متعوده عليك كده ..( مجدى ) هو ده الوش اللى هتشوفيه من هنا ورايح ..( ليلى ببكاء شديد ) ليه ؟ علشان إيه ؟ طب إيه اللى يرضيك وانا اعمله ..( مجدى ) اللى يرضينى انك تبعدى عن وشى الساعه دى وتسبينى استريح .. إوعى كده( ليلى ببكاء وحزن شديد ) يامجدى استنى .. طب نتكلم .. طب لو مش علشانى .. علشان خاطر ولادنا .. يامجدى حرام عليك ..- رجعت امل على شقتها وهى طالعه لقت باب شقة مصطفى مفتوح .. أحرجت انها تطلع على شقتها على طول من غير ماتسلم على ولدته واخته .. خبطت ودخلت( امل ) السلام عليكم( مها ) وعليكم السلام .. اتفضلى ياابله امل ... اهلا وسهلا( امل ) اومال الحاجة فين ..؟( مها ) ماما موجوده بس تعبانه شويه ..( امل ) خير .. مالها ..؟!( مها ) ماما عندها حساسيه شديده على صدرها .. وساعات متقدرش تاخد نفسها خصوصا لو شمت ريحة دخان ..او حتى تراب ..( امل ) وهى عامله إيه دلوقتى ..؟( مها ) الحمد لله .. هى دلوقتى احسن .. اديت لها العلاج .. وسبتها تنام شويه( امل ) ربنا يشفيها ويخليها لكم يامها ..( مها ) شكرا اوى يا ابله ..تحبى تشربى إيه ...( امل ) لا معلش خليها مرة ثانية يامها .. انا لسه هطلع احضر الغداء ..( مها ) طب ما تتغدى معانا ياابله ..( امل بإحراج) شكرا يامها .. مش هقدر .. انا هطلع لو عوزتى حاجة اندهيلى- قامت امل ولسه هتخرج من باب الشقه لقت مصطفى مقابلها ...( مصطفى ) سلام عليكم( امل ومها ) وعليكم السلام( امل ) طب عن إذنكم( مصطفى بإبتسامه) انت هاتمشى علشان اناجيت .. طب انا مستعد ارجع تانى ..( امل ) لا ابدا انا اصلا كنت طالعه شقتى .. بس حبيت اسلم على مها ووالدتك ..( مها ) هى مستعجلة وعاوزة تطلع علشان تحضر الغدا …وانا قولتها تتغدى معانا النهارده بس هى مش راضيه ...( مصطفى ) فكرة حلوة.. بلاش تكسفى مها ... واتغدى معانا النهارده .. وكمان علشان تقولى رأيك فى اكل مها .. هينفع تتجوز كمان شهرين ولا نأجل الفرح ... على ماتتعلم تطبخ ..( مها) لا بقا انا بعرف اطبخ .. بس انت اللى بتتحجج علشان افضل قاعده معاك .. مش قادر على بعدى ..هههههه .. صح ولا غلط( مصطفى بإبتسامه ) طبعا صح .. هو انا اقدر اقول حاجة غير كده .. وياله بقا بسرعة حضرى الغدا واعملى حساب الآنسه امل معانا .. وماما فين صحيح ..( مها ) خمس دقايق ويكون الاكل جاهز.. وماما اخدت الدواء ونامت لما تصحى هبقى اغديها ...( امل ) بجد مفيش داعى .. خليها مرة ثانية ..( مصطفى ) ومرة ثانية ليه ...ما إحنا فيها اهو .. اتفضلى بقا وبلاش تكسفينا ..( امل بكسوف ) شكرا ..- وبعد ماجهزت مها الغداء .. قعدوا ياكلو( مصطفى ) إيه رأيك فى اكل مها يا آنسه امل ؟ هتنفع تتجوز ولا لأ( امل بإبتسامه ) بصراحة الاكل لذيذ جدا .. تسلم إيدك يامها ... إطمنى هتنفعى تتجوزى ..( مها بإبتسامه ) الحمد لله... وتسلمى ياابله ..( مصطفى ) انتى اكيد يتجمليها ..( امل بإبتسامه ) لا والله ابدا ... فعلا اكلها جميل ..( مصطفى ) بالهنا والشفا ..( مها ) اعملك شاى ولا هتشرب فى الشغل( مصطفى ) لأ مفيش داعى .. انا هشربه مع محمود( امل ) إنت راجع الشغل ثانى ؟( مصطفى ) ايوه انا بشتغل فترتين من 8- 4 ومن 5-9( امل بشفقه ) ربنا يعينك ...( مصطفى ) اللهم امين .. عن إذنكموإنصرف مصطفى رجع على شغله وفضلت امل قاعده مع مها شويه وبعدين طلعت على شقتها ..فى منزل ليلى:-مجدى صحى من النوم وفضل قاعد على السرير .. دخلت عليه ليلى ليلى ) احضرلك الغدا( مجدى ) مليش نفس ...( ليلى ) ممكن اتكلم معاك شويه ...( مجدى ) تتكلمى فى إيه ...( ليلى ) بهدوء بس ومن غير ماتتعصب .. نتفاهم( مجدى ) عاوزة إيه ..( ليلى ) انا عاوزة اسألك سؤال ؟( مجدى بعصبيه ) إنطقى عاوزة إيه ؟(ليلى ) إنت فى حد فى حياتك غيرى .. يعنى تعرف ست عليا( مجدى ) ايوه ... اعرف ..( ليلى بصدمه ) تعرف! .. يعنى انت عارف ست عليا .. بتخونى يامجدى .. طب ليييييه ..( مجدى ) إتكتمى ووطى صوتك ...واعلى مافى خيلك إركبيه ..( ليلى ) طب هى مين ؟( مجدى ) مش هريحيك .. ومش هقولك .. هفضل تاعبك كده .. زى ما انا تعبان ..وقام غير هدومه وسابها وخرج .. فضلت ليلى تبكى .. ومش مصدقه ولا مستوعبه إزاى مجدى يخونها .. ويعترف بسهوله كده ..( ليلى بتكلم نفسها) طب هى مين .. مين دى اللى يجيلها قلب تخطف راجل من مراته وعياله ... وهى مستمرة فى البكاء ... ياااااه انا محتجالك اوى يا امل .. محتجالك تكونى جنبى ...انا تعبانه اوى .. وخدت تليفونها علشان تتصل على امل وتحكى لها وتفضفض معاها- فى شقة امل:تليفونها بيرررن .. بصت فى التليفون لقت ليلى بتتصل عليها امل فى نفسها ) ليلى ..!( امل ) الو .. ازيك ياليلى( ليلى بصوت مخنوق ) امل وحشتينى ... انتى عامله إيه ووالدتك ازيها ..( امل ) انا كويسه وماما كمان كويسه .. الحمد لله .. مال صوتك ياليلى( ليلى ببكاء ) انتى هترجعى إمتى ياامل ...( امل بتوتر ) مش عارفه لسه ..( ليلى ) انا محتجالك اوى ياامل( امل ) خير فى إيه ياليلى .. مجدى متغير معايا اوى .. وبيتخانق معايا من غير سبب .. تصورى ياامل انه يعرف واحدة عليا( امل بإضطراب وقد إحمر وجهها ) واحدة ! مين اللى قالك( ليلى وهى بتبكى ) هو ياامل .. هو اللى اعترف لى انه يعرف واحدة عليا .. وانه مش طايقنى ولا طايق يشوفنى ... انا مش عارفه ايه اللى غيره .. هو مكنش كده ...( امل ) ومقلكيش هى مين ؟( ليلى ) لأ مش راضى يقولى ..( امل ) طب إهدى .. وبطلى عياط ..( ليلى ) اهدى ازاى ! وابطل عياط ! إزاى وانا شايفه بيتى بتخرب .. وجوزى بيضيع منى انا مش عارفه اعمل إيه .. انا محتجالك تكونى جنبى اوى ياامل ..( امل بصوت مخنوق ) معلش ياليلى صدقينى مش بإيدى انى اكون جنبك .. بس علشان خاطرى إهدى وحاولى تتفاهمى معاه ... وتشوفى إيه اللى مضايقه .. وتحاولى تصلحيه( ليلى ) حاولت ياامل .. بس مفيش فايده .. كل يوم اسوء من اليوم اللى قابله .. من يوم ما إنتى سافرتى .. وهو متغير معايا .. مع إن لما كنتى انتى موجوده معانا .. كان بيعاملنى احسن معامله .. إنتى شوفتيه.. كان بيعاملنى إزاى... وبيحب يقعد فى البيت ومكنش بيخرج كثير .. دلوقتى هو إتغير اوى .. وبقا مبيقعدش فى البيت .. تصورى انه نام بره إمبارح ولما رجع علشان بسأله انت كنت فين إتخانق معايا وسمعنى كلام جارح اوى ياامل ..( ليلى ) امل .. قوليلى اعمل إيه ...( امل بحزن ) آسفه ياليلى .. مش عارفه اقولك إيه ..

رواية قلعة أمل بقلم اسماء عبد العظيم الفصل السابعفى الكافيتريا محمود ) درش ..( مصطفى بخضه ) يا اخى حرام عليك .. انت بتتعمد تخضنى ..( محمود ) هههه انت بردوا إتخضيت .. طب دى اول مرة مقصدش اخضك وإنت بردوا إتخضيت .. معرفش انك سرحان .. بس انا خلاص إتأكدت ان السرحان عندك هوايه .( مصطفى ) ههههه عاوز إيه ..( محمود ) ابدا كنت هسألك على امل ..( مصطفى بدهشه ) وإنت بتسأل على امل ليه ..( محمود ) إيه ياعم مصطفى... صاحبتى وبسأل عليها ..ههه( مصطفى بجديه ) ماتحترم نفسك يامحمود .. إيه صاحبتى دى .. مينفعش اللى انت بتقوله ده( محمود بشك ) وإنت زعلان اوى ليه كده .. هى تخصك( مصطفى ) ولو.. بردوا ..هى إنسانه محترمه ومينفعش تتكلم عنها من وراها بالاسلوب ده( محمود ) هى وكلتك محامى ليها ولا إيه .. دى مكنتش معرفة يومين دى ياسى مصطفى( مصطفى ) ياعنى انت اللى عارفها من سنين علشان تقول عليها صاحبتى ..! ماتتكلم عدل يامحمود ...( محمود ) متزعلش اوى كده .. على فكرة انا كنت بهزر .. انا بس كنت عاوز اطمن عليها واعرف هى مرتاحه عندكم فى البيت ولا لأ ... وبعدين انا اتكلمت معاها كثير قبل كده .. وخدت عليها لدرجة انى بعتبرها زى اختى .. مش زى ما إنت فاكر ..( مصطفى بعدم فهم ) فاكر إيه ؟!محمود وهو ماشى .. إسأل نفسك .. ومشى محمود وفضل مصطفى يفكر فى كلام محمود .. هو يقصد إيه ( مش زى ما انا فاكر ) بس هو شكله زعل .. انا باين زودتها معاه ومكنش ينفع اكلمه بحده كده .. وبعدين انا إيه اللى خلانى ازعق لصاحب عمرى علشان واحدة معرفهاش ... يووووه .. انا غبى ..- بعد ما خلصت مكاملة امل مع ليلى .. امل فضلت تعيط .. وهى حاسة انها السبب فى اللى حصل لليلى .. وانه لولا مجيئها اسكندرية وقعادها عند ليلى مكنش ده كل حصل .. وان مجدى متغيرش كده مع ليلى إلا لما عرف انها سافرت.. واللى واجعها اكثر ان ليلى لجأت لها هى علشان تساعدها فى نفس الوقت اللى امل هى السبب فى مشكلة ليلى .. فضلت تعيط لحد مانامت من كثر العياط .. بعد شويه صحيت على صوت رنة تليفونها ..امل بصت فى التليفون لقت خالد اخوها اللى بيتصل امل ) الو ..( خالد ) اموله .. ازيك .. وحشانى( امل ) الحمد لله ياخالد .. انت عامل ايه وازاى ماما وهند وعمى رجب ..( خالد ) الحمد لله كلنا كويسين المهم انتى .. عامله إيه( امل ) انا الحمد لله( خالد) بس صوتك متغير كإن فى حاجة( امل بتوتر ) لأ ابدا .. انا بس كنت نايمه .. وصحيت على صوت التليفون( خالد ) آه .. معلش بقا صحيتك .. طب ماما عاوزة تكلمك( امل ) ماشى .. إديهانى .. الو .. ازيك ياماما ..( سناء ) امل حبيبتى .. عامله إيه .. وحشتينى ياامل ..( امل بصوت مخنوق ) وإنتى كمان ياماما .. ازى صحتك ..( سناء ) حبيبتى احنا كويسين .. وانا ببقى كويسه طول ما إنتى كويسه ... المهم انتى اخبارك إيه .. عامله إيه فى المدرسة .. مبسوطه ؟! وإزاى ليلى عامله إيه ؟..(امل بإضطراب ) آه انا كويسه ومبسوطه فى المدرسة .. وليلى كويسه .. الحمد لله( سناء ) طب ياحبيبتى .. يارب دايما تبقى بخير .. طمنينا عليكى دايما ياامل( امل ) حاضر ياماما .. مع السلامةانهت امل المكالمه وبعدين حطت راسها على المخده وسابت دموعها تنزل ... مش عارفه مين السبب فى كل اللى حصل ده .. امها السبب علشان اتجوزت عمها رجب .. ولا عمها رجب السبب علشان اجبرها انها تسيب البيت بسبب تعنته معاها ..ولا امل السبب لانها ملقتش مكان تروحه الا عند ليلى ... ولا ليلى السبب فى إنها استقبلتها فى بيتها فى وجود جوزها .. ولاجوزها السبب بسبب طمعه وقلة ضميره ...فى منزل ليلى:مجدى قاعد فى اوضته وقافل عليه وواضح على وشه الغضب... وبيفكر فى امل .. وبيقول فى نفسه ياترى هترجع إمتى ؟ انا ضغطت على ليلى علشان عارف ومتأكد انها هتكلم امل ... ولو هى فى القاهرة يبقى المفروض ترجع علشان تقف جنب صاحبتها ...وخاصة إنى مقلتش لليلى مين الست اللى فى حياتى .. لا بس هى ممكن متجيش اكيد هتخاف ترجع هنا تانى بعد اللى عملته معاها ... لا بس كده تبقى صاحبه ندله اوى .. ازاى متقفش مع صاحبة عمرها .. واللى وقفت جنبها فى محنتها وقعدتها فى بيتها ... يووووه انا زهقت من كثر التفكير ... بس انا مش داخل دماغى انها فى أجازة .. ماهو بالعقل كده واحدة نقلت شغل جديد مكملتش اسبوع هيتوافق لها على الاجازة .. وبعدين اصلا جوز امها طاردها من بيته يبقى إزاى هتقعد عنده المدة دى كلها ..؟وكمان هى خدت هدومها كلها يعنى لو ناويه ترجع هنا ثانى كانت اخدت معاها حاجة بسيطة مش كل هدومها ؟!وده معناه حاجة واحدة ... امل لسه هنا فى إسكندرية .. بس راحت فين ؟انا لازم اتأكد من ده بنفسى ...فى الكافيتريا:-مصطفى حاسس انه زعل محمود منه ... قرر انه بعد مايخلصوا شغل .. يحاول يصالحه( مصطفى ) محمود .. محمود .. انت مبتردش عليا ليه ؟( محمود بزعل ) نعم .. عاوز إيه يامصطفى ..( مصطفى ) انت زعلان منى ...( محمود ) والله .. يعنى إنت مش عارف ..( مصطفى ) طب حقك عليا .. انا آسف .. متزعلش منى ..( محمود ) متتأسفش يامصطفى .. انت معاك حق .. مكنش ينفع اتكلم عن الآنسه امل بالشكل ده .. وخاصة معاك( مصطفى ) يعنى إيه وخاصة معايا! ..( محمود ) لان كان واضح من نرفزتك عليا ... ان فى حاجة جواك من ناحية امل( مصطفى بإرتباك ) إنت بتقول إيه .. إنت اتجننت .. حاجة إيه ؟( محمود ) لأ متجننتش .. كان واضح عليك اوى يامصطفى .. زى ماهو واضح عليك دلوقتى ...( مصطفى بحده ) هو إيه اللى كان واضح عليا ... وواضح عليا دلوقتى .. انت عمال تقول ألغاز .. وعاملى فيها دكتور نفسانى ..( محمود ) ياعم انا مش دكتور ولا حاجة والحكاية مش محتاجه دكتور علشان يفهم انك بتحب امل .. او على الاقل اتشديت ليها ..( مصطفى بتوتر ) لأ ده انت اتجننت رسمى .. حب إيه ده اللى هيحصل فى يومين ...( محمود ) مصطفى انا عارفك اكثر من نفسى .. انت غيرت على امل لما انا قولت عليها صاحبتى .. رغم انى كنت بهزر معاك .. زى مادايما بهزر معاك بس إنت عمرك ماتنرفزت عليا زى ماجبت سيرة امل ... وبعدين الحب مش محتاج يتحسب باليوم واليومين ممكن تحب حد من اول مرة تشوفه فيها.. هو مش فى حب من النظره الاولى( مصطفى بإضطراب) لأ طبعا مفيش حاجة من اللى انت بتقول عليها دى ..( محمود ) متأكد ؟! اومال زعقتلى ليه ؟.. يعنى تخسر صاحب عمرك علشان واحدة مفيش بينك وبينها اى حاجة .. ولاحتى فى حاجة بتشدك ليها ...( مصطفى بتلعثم ) ايوه متأكد .. وزعقتلك علشان مينفعش تجيب سيرة اى واحدة وخصوصا لو كانت محترمه زى " امل" وتقول عليها صاحبتك ... إفرض ان حد سمع الكلام ده .. يبقى الموقف شكله إيه ..( محمود )آه ... انا هعمل نفسى مصدقك .. وعموما انت عارف انى اتمنى لك الخير ياصاحبى...ومشى محمود وساب مصطفى غرقان فى التفكير من كلامه .. مصطفى قرب من البحر وقعد على الشط .. وبيقول فى نفسه ... هو ممكن يكون كلام محمود صح ؟.. هو انا فعلا غيرت على امل ؟... بس ده ميمنعش فعلا انها شخصيه تتحب ...روح مصطفى على بيته ودخل اوضته .. وسرح فى كلام محمود ...مصطفى فى نفسه ... انا هتجنن إيه اللى يخلى محمود يقولى انى بحب امل او ان فى حاجة شدانى ليها ... وبعدين حتى لو انا معجب بيها .. هى فين وانا فين .. هى مدرسة وانا حياله جارسون فى كافيتريا ... يعنى عمرها ما هتفكر فيا .. انا لازم افوق لنفسى وأشيلها من دماغى ... ولما اقرر احب لازم احب واحدة زيى تعليمها على قدها ... ترضى بيا .. ايوه فعلا ده اللى لازم يحصل .. انما مش هسيب مشاعرى هى اللى تحركنى زى ماهى عايزة وفى الآخر اتعلق بواحده احس معاها انى اقل منها ... ده كمان لو هى فكرت فيا .. مع إنه مستحيل يحصل ... كفاية كده بقا تفكير .. ونام يامصطفى وإحلم على قدك ...ثانى يوم الصبح:بتصحى امل وبتبص فى الساعه لاقت انها إتأخرت على ميعاد المدرسة وإفتكرت انها نسيت تظبط المنبه إمبارح قبل ماتنام ... قامت بسرعه وغيرت هدومها .. ونزلت جرى .. وهى نازله قابلت مصطفى خارج من شقته رايح على شغله ... بيبص عليها مصطفى بيلاقى شكلها متغير عينيها وارمه ...(امل وهى ماشيه بسرعه) صباح الخير ...( مصطفى وهو ماشى ورا امل ) صباح النور.. مالك .. نازله بتجرى ليه ؟( امل ) معلش اصلى مستعجلة .. صحيت متأخر ..راحت عليا نومه( مصطفى ) آه .. اومال عينيكى ورامه ليه .. فى حاجة ؟( امل بتوتر ) لا ابدا .. مفيش حاجة( مصطفى ) لأ واضح اوى على عينيكى حمرا ووارمه كإنك كنتى بتعيطى .. او نايمه معيطة( امل بحده ) مفيش .. قولتك مفيش حاجة .. مش معيطة ولا حاجة- مصطفى حس بإحراج وإن ملوش الحق انه يتدخل فى حاجة مش تخصه( مصطفى ) طب عاوزة حاجة انا همشى من الطريق ده ...( امل ) ليه انت مش رايح على شغلك .. يعنى فى نفس طريقى( مصطفى ) لأ .. ورايا مشوار هروحه الاول قبل ماروح الشغل .. عن إذنك- مشى مصطفى من طريق ثانى .. وساب امل تكمل طريقها للمدرسة لوحدها .. بعد ما حس انها احرجته .. امل بعد مامصطفى مشى وقفت تبص عليه لغاية ماغاب عن عينها .. وبتقول فى نفسها .. انا غبيه اوى ايه اللى خلانى ارد عليه كده .. وبعدين هو معاه حق انا نمت معيطة وواضح على شكلى وعلى عنيه .. كان ممكن ارد رد ثانى من غير ما ازعله ... انا فعلا غبية .. وكملت طريقها على المدرسة ...- فى منزل ليلى:-مجدى صحى من نومه .. ملقاش ليلى نايمة جنبه ... دخل اوضة الولاد لقاها نايمة جنب اولادها .. مجدى فكر انه ياخد تليفون ليلى علشان يطلع من عليه رقم تليفون امل .. دخل بشويش .. واخد التليفون وخرج من الاوضه بشويش ونقل رقم امل على تليفونه وبعدين رجع التليفون مكانه .. وخرج ..بعد انتهاء اليوم الدراسى:-امل خارجه من باب المدرسة طبعا فكرت انها تروح على الشط ..فى المكان اللى دايما بتحب تقعد فيه .. بس المرة دى مش علشان تسرح فى منظر البحر بس لأ علشان تشوف مصطفى وتعتذر منه ... فى نفس الوقت اللى مجدى خرج من شغله وراح على مدرسة امل علشان يسأل عليها ويتأكد من ظنونه ...مجدى ركن عربيته ولسه هينزل منها لمح امل خارجه من باب المدرسة ...مجدى بيكلم نفسه .. ده كده الحكاية احلوت اوى .. بقا انتى هنا ومفهمه صاحبتك انك فى القاهرة ... انت فاكره انك ممكن تهربى منى .. طب استنى عليا ..فضل مجدى ماشى ورا امل .. لغاية ماوصلت الشط .. فكر مجدى انه يتصل عليها واكيد هترد لأنها متعرفش رقمه ... شويه وتليفون امل ررررن امل ) الو ...( مجدى ) آنسه امل ..( امل ) ايوه .. مين معايا( مجدى ) اوام كده نسيتى صوتى ياحلوة ...( امل بإرتباك ) انت هتقول انت مين ولا اقفل السكه ..( مجدى ) اكيد هقولك انا مين .. بس انا زعلان منك .. كده تسيبينى وتسافرى ..( امل وقد تيقنت من الصوت ) مين معايا ؟( مجدى ) ليلى بتسلم عليكى ...( امل بإرتباك ) مجدى !( مجدى ) ايوه مجدى .. اللى سبتيه وسافرتى .. هااا هترجعى إمتى بقا .. اصلك وحشتينى اوى...( امل ) انت جبت رقمى منين ...( مجدى ) انتى كده هتخلينى اشك فى ذكائك .. عيب ده انا مجدى .. وبعدين تليفون ليلى مش بعيد عنى ...( امل ) طب عاوز إيه .. دلوقتى ..( مجدى ) ابدا عاوز اطمن عليكى واعرف انتى هترجعى إسكندرية إمتى ؟( امل بتوتر) انا مش راجعة إسكندرية تانى .. هفضل فى القاهرة ... وياريت بقا معنتش تتصل على الرقم ده ثانى... وقفلت السكه ...( مجدى بإبتسامه وبكلم نفسه ) بقا كده بتكذبى وبتقولى انك فى القاهرة وكمان مش راجعه ههههه ... ياترى بقا هيكون شكلك إيه لما تبصى وراكى وتلاقينى واقف وراكى ...ههههه هههههه اكيد هيكون شكلك زى الكتكوت المبلول هههههههههههفى الكافيتريا:-( محمود ) مصطفى امل هناك اهى .. ماتروح تشوفها هتشرب إيه( مصطفى ) لأ روح إنت ...( محمود بيغمز بعينه ) طب ليه ؟... يابنى روح وجر ناعم ...( مصطفى بحده ) محمود ... بلاش كلامك ده ... مش رايح ...روح لها انت( محمود ) غريب امرك ياأخى .. إمبارح كنت غيران عليها والنهارده مش عاوز تشوفها هو فى إيه ...( مصطفى ) محمود ... انا ورايا شغل ومش فاضى لك ..شويه وتليفون مصطفى بيررن بيبعد عن محمود ويرد على تليفونه ... محمود راح لأمل( محمود ) اهلا وسهلا يافندم تحبى تشربى حاجة( امل بإبتسامه مصطنعه ) اهلا محمود ... ازيك .. اشرب عصير( محمود ) مالك .. شكلك متغير النهارده .. فى حد مزعلك ..( امل ) لاابدا ... مين اللى هيزعلنى .؟.. انا بس إشتغلت كثير النهارده .. اومال مصطفى فين ؟( محمود بتلعثم ) مصطفى ... إييييييه ... مصطفى هناك ...( امل ) فى إيه يامحمود .. مالك اتلخبطت كده ..( محمود ) ابدا .. اصله مشغول شويه ... هااا اروح انا اجيبلك العصير ...وبعد شويه لقت امل حد بيخط على ضهرها ...(امل من قبل ماتبص ) فى حاجة يامحمود ... إيه ده .. إنت !( مجدى ) هاااا إيه رأيك فى المفاجأة دى ...( امل بحده) انت عاوز إيه ..( مجدى وهو بيقرب من امل ) ما إنتى عارفه انا عاوز إيه ... عاوزك انتى ياامل ...( امل بدهشه) انت مجنون ... انا لايمكن اوافق على إنت عاوزه ...( مجدى ) لو علشان صاحبتك .. اوعدك انها مش هتعرف ..( امل ) بقولك إيه ابعد عنى ..( مجدى وهو بيحاول يمسك إيد امل ) ليه بس ده البعد جفا ...( امل وهى بتحاول تنزع إيدها منه ) سيب إيدى ... يامجدى بدل ما اصوت والم عليك الناس ...محمود شايل العصير ورايح بيه لامل اتفاجىء بالشخص اللى واقف مع امل وبيتكلم معاها قرب منهم .. وبعدين لقى الشخص ده مسك إيدها.. جرى عليها ..( محمود ) مين ده ياامل ؟ إنتى تعرفيه( امل ) لأ معرفوش( مجدى ) ملكش دعوه إنت .. ده كلام خاص .. روح شوف شغلك( محمود ) سيب ايدها ... بتقول انها متعرفكش وتقول كلام خاص .. ابعد عنها( مجدى بحده ) قولتلك ملكش دعوه إنت ... متدخلش( محمود بغضب) لأ هتدخل .. وابعد عنها بقا ..وإبتدى محمود يزق مجدى بعيد عن امل .. ومجدى يزقه .. وبعد كده إتدخل بعض الناس وفكوا الاشتباك بينهم .. ومجدى لقى نفسه هيتورط فى مشكله ففضل إنه يمشى ويبعد عن امل فى اللحظة دى ...