رواية زين للكاتبة سحر فرج الفصل السادس والعشرون

زين اتصدم اول لما سمع الصوت ده وحس انه يعرفه وسمعه قبل كده وعيونه جت على شاهى وهى نازله من فوق ولبسها كان فظيع عبارة عن شورت قصير جدا جدا وتيشيرت كت بحماله رفيعه اوى .. وهى اول لما شافت زين اتفاجأت وقالت بدلع .

زين.. اقصد دكتور زين و نزلت بسرعه وابتسمت وقربت منه، ولسه يا دوبك هاتمد ايديها ليه وتسلم عليه، زين بصلها بكل استحقار وبص ليوسف وقال سلام يا يوسف اشوفك وقت تانى وخد بعضه وخرج بره الفيلا وركب عربيته وطلع بيها باقصى سرعه. يوسف خد بعضه ودخل هو وشاهى اللى مكنتش طايقه نفسها خالص من قله ذوق زين معاها واتنرفزت وبصت ليوسف وقالت .. قليل الذوق اوى وحقير .. شوفت لسه هامد ايدى ليه بصلى من فوق لتحت ازاى يا عموووو.

يوسف بصلها بكل غيظ وقعد وقال .. والله عنده حق .. بقى ده منظر تنزلى بيه من فوق اودامه يعنى يا ست شاهى .. ليه حق يبصلك بالمنظر ده .. انا عن نفسى اتحرجت جدا .. لكن سياتك ولا همك ان راجل غريب يشوفك بالبس البيت ده .
شاهى بصت لنفسها وردت وقالت .. ماله لبسى بقى ان شاء الله ما هو كويس اهوووو
ولا عاوزينى البس عبايه تجرجر ورايا وانا ماشيه وبكم طويل وتخنق.

يوسف برخامه رد وقال .. والله الناس اللى بيلبسوا لبس كويس زى دول ناس محترمه ومؤدبه مش زى حضرتك مخليه جسمك عرض للكل وكأنك بتقوللهم انا اهوووو تعالوا اتفرجوا عليا .
شاهى اتغاظت من كلام يوسف ونفخت وقالت .. تمام تمام خلينا فى المهم دلوقتى .. زين كان جاى هنا بيعمل ايه فى الفيلا ؟!

يوسف بصلها ورد وقال .. زين كان جاى يسألنى عن ليل لانها مختفيه من امبارح وميعرفوش عنها حاجه .. وفضل طول الليل هو وعمر بيدوروا عليها وتوقع انى اعرف حاجه عنها وجه علشان يسألنى .

شاهى بفرحه ردت وقالت .. ايه ده هى ليل اختفت ومشيت وغارت فى ستين داهيه .. يا سلاااام كده اقدر اقرب من زين براحتى بقى .. بس هو ليه مهتم بيها اوى كده ؟! اوعى يكون بيحبها يا عموووو.
يوسف ضحك بسخريه وبصلها وقال .. لا طبعا هو مش بيحبها .. هو بيعشقهاااااااا.

هنا شاهى اتصدمت واتغاظت اوى ودبدبت برجلها فى الارض زى الاطفال وخدت بعضها وطلعت على فوق .. وهى بتبرطم وبتقول .. بيحبها على ايه دى حته بنت هبله وعبيطه فلاحه ولا تسوى.
يوسف سمعها وابتسم وقال .. ياريتك كنتى زيها يا شاهى فى ادبها وأخلاقها واحترامها لنفسها وكمان كرامتها اللى سابت علشانها كل شىء ومشيت بكل هدوء .
يا ترى روحتى فين يا ليل و١قام هو كمان وطلع على فوق علشان يلحق يجهز نفسه قبل ميعاد التصوير .

عدى كذا ساعه وليل كانت صحيت من نومها على خبط الباب .
فقامت مفزوعه من نومها وبصت حواليها وافتكرت انها نايمه فى الاوضه دى فانزلت من على السرير وراحت ناحيه الباب وقالت .. مين بيخبط ؟؟
عايده ردت وقالت .. انا يا ليل يا بنتى افتحى متخافيش .
ليل باستغراب فتحت ترباس الباب وفتحته وقالت .. اهلا يا ام احمد تعالى اتفضلى وبصتلها اوى وقالت ايه ده انتى لحقتى تروحى لعيالك وترجعى تانى للشغل كده على طول .

عايده ردت وقالت .. اعمل ايه بس يا بنتى اكل العيش صعب .. وبعد ما رجعت على بيتى وفطرت العيال وعملت الاكل وخلصت اللى ورايا كله ولسه هاخد بعضى وانام شويه علشان استريح .. لقيت المدير بنفسه بيتصل بيا وبيطلب منى انى اجيب بعضى واجى علشان فى ضغط شغل كبير النهارده فى الكافيه بمناسبه حفله صغيرة كده جت فجاه عاملها زبون كبير من زباين الكافيه .. والدنيا هيصه وزحمه بره بيستعدوا ليها .

وجيت على هنا علشان اصحيكى وتيجى تساعدينى فى المطبخ لانى مش قادرة خالص وملحقتش انام حتى ساعه واحده .. معلش يا بنتى انا عارفه ان انتى كمان تعبانه وملحقتيش تستريحى .

ليل ابتسمت وردت وقالت .. لا ابدا انا نمت على طول بعد ما انتى مشيتى وسيبتى ويادوبك لسه صاحيه على خبط الباب بتاعك دلوقتى .. متقلقيش هاغسل وشى على طول واجيلك على المطبخ .

عايده فرحت وردت وقالت.. ربنا يسعدك يا بنتى ويقويكى .. شكلك بنت حلال وجدعه وبتحبى الشغل .. على العموم هاسبقك انا على المطبخ واغير لبسى تكونى انتى جهزتى نفسك وجيتى . وااااااه كنت هانسى .. خدى الشنطه دى يا بنتى فيها بلوزة وجيبه وفستان كده من بتوع عيالى البنات جبتهملك علشان لو حبيتى تغيرى اللبس اللى عليكى ده ولا حاجه وتغسليه .. انا عارفه انهم مش اد كده بس قولت اعمل اللى عليا واجبهملك .

ليل عيونها اتملت دموع وقربت من عايده وقالت .. انا مش عارفه اشكرك ازاى على كل اللى عملتيه معايا .. ربنا يكرمك يارب ومتشكرة جدا ليكى .
عايده ابتسمت وحضنتها وقالت .. متقوليش كده يا بنتى .. ربنا يعلم انا حبيبتك واستريحتلك اد ايه .. يالا جهزى نفسك وحصلينى على طول .. سلام .
وفعلا عايده خدت بعضها و مشيت وليل قفلت الباب وراها بالترباس ودخلت تغسل وشها فى الحمام .

وفى الفيلا عند سميحه كان الكل قاعد بيفكر فى كل اللى حصل وكمان مش عارفين يعملوا ايه بالضبط علشان يوصلوا لى ليل .
الحاجه انعام بحزن بصتلهم وقالت .. ربنا هايطمنا عليها قريب ان شاء الله المهم متزعليش نفسك يا سميحه يا بتى انت واختك سماح كده .. ادعولها انها ترجع بالسلامه وتقدروا تعوضوها كل السنين اللى عدت عليها كده وهى بعيد عنكم وانتم متعرفوش عنها حاجه .. حبوها الحب اللى كنتم بتحبوه لهدى الله يرحمها .. ادوها الحب والحنيه والحنان اللى هى فقدتهم لما امها ماتت وسابتها لمرات اب متعرفش الرحمه ولا تعرف ربنا .

الحاج صفوان رد وقال.. عندك حق يا حاجه.. الله يرحمه اخويا برهان .. ياما قولتله وياما كلمته انه يوافق على اللى اسمه عبد الرحمن ده .. اهو مش اد المقام اه بس كان راجل وشهم وبيحبها وكان هايحافظ عليها وعاش معاكم كام سنه عمره ما عمل حاجه وحشه .. بس برهان كان اهم حاجه عنده ساعتها اسم العيله ومين الشخص اللى هايناسبه وعنده ايه وبيملك ايه ومن عيله كبيرة ولا فقير .

فهمته كتير ان الفقر مش عيب المهم انك تدى بنتك لراجل يحافظ عليها ويقدر يسعدها وكفايه اللى حصل لنعمه بنتى.
سميحه بحزن ردت وقالت.. الله يرحمها يا عمى هى وهدى اختى .. هربوا من بيوتهم مع اللى بيحبوهم باسم الحب وكان مسيرهم ايه فى الاخر ماتوا وهما فى عز شبابهم وكل واحده فيهم اهى سابت زكرى منها وحته من روحها تفكرنا بيها ربنا يسامحهم ويرحمهم ويغفرلهم .

الحاج صفوان رد وقال .. المهم دلوقتى يا بتى احنا هاناخد بعضنا كده ونرجع على البلد علشان زى ما انتى عارفه المصانع والشغل لوحده ومهما كان فى ولاد عمك هناك بعيالهم بس بيحتاجونى انا وصلاح معاهم فى اى شىء ومش عاوزين نتأخر عليهم اكتر من كده .. مع انى كنت عاوز افضل انا والحاجه انعام لحد ما نطمن على ليل بنت هدى .. بس اعمل ايه بقى فى الشغل اعذرونى يا بتى .. وابقوا طمنونا وعرفونا كل حاجه اول لما توصلولها .

سماح ردت وقالت .. ليه كدة بس يا عمى انتم ملحقتوش تقعدوا معانا ده يادوبك لسه جايين مم يومين اتنين خليكم كام يوم تانى والنبى يا عمى ملحقناش نشبع منكم .
الحاج صفوان رد وقال.. معلش يا سماح يا بتى انتى عارفه كويس اوى مشاغل عمك اد ايه .. والبلد كلها متقدرش تستغنى عنى ولا ساعه واحده كمان .
سميحه ردت وقالت .. ربنا يخليك لينا يا عمى ويبارك فى صحتك انت والحاجه انعام .
صلاح قام وقف وقال .. احنا هانتوكل على الله بقى وابقوا طمنونا على الغاليه بنت الغاليه هدى.

عدى بهزار رد وقال.. قولتلى بنت الغاليه ااااه يا دنجوان انت يا روميووو .. الحب القديم ده ولا ايه يا ابو ملك .. طيب والله لابلغ ام ملك بكده واشوف رايها أيه فى الحكايه دى.
الحاج صفوان رفع العكاز بتاعه وقام وقف وقال .. بس يا زفت الطين انت واتلم بدل ما افتح نافوخ ده نصين واستريح منك ومن لسانك الطويل ده اللى عاوز حشه .. احنا فى ايه ولا ايه ياض يا عبيط انت ولسه هايرفع العكاز ويضربه .. عدى جرى بسرعه من اودامه وقال .. وانا مالى بس يا (لمبى) قصدى يا جدى ما ابنك هو اللى كان شكله كده بيحب من وراك انت ونعومتى ومقضيها ومقطع السمكه وديلها .

صلاح اتصدم واتحرج من كلام عدى وقال .. اه منك انت ومن طوله لسانك اللى هادوديك فى داهيه دى يا عدى .. اقسم بالله لو مسكت ما هايحصلك طيب .
عمر حب يدخل فى الموضوع بخفه دمه هو كمان فقرب من عدى وهو عامل نفسه متعصب وهايزعقله وقال .. اخص عليك اخص يا واد يا عدى حد برضه يفضح عمه صلاح بالمنظر ده كده .. ويقول انه كان بيحب خالتو هدى وكان واقع لشوشته وخالتو هدى شكلها نفضتله ومرديتش تتجوزه.

فى اللحظه دى عدى وعمر خدوا بعضهم هما الاتنين بمنتهى السرعه وجريوا على الجنينه على طول وهما ميتين من كتر الضحك.
والكل فضل يضحك على خفه دمهم حتى صلاح نفسه ضحك وقال .. اه يا جذمه منك ليه انت .. فكرتوا الواحد بحاجات جميله وزكريات اجمل عدى عليها الزمن .. وهى
( الحب الاول )

مر حوالى تلت اسابيع على اختفاء ليل من غير ما حد يعرف حاجه عنها خالص وزين نفسيته ادمرت وحالته بقت وحشه جدا ووقف تصوير الفيلم الجديد .
حتى شغله فى الشركه بقى بكل عصبيه ونرفزة مع الموظفين .. والكل كان ملاحظ عليه الحاله دى بالذات سميحه وحسام صاحب عمره اللى كان عارف هو اد ايه اتعلق باليل .

عملوا كل اللى يقدروا عليه علشان يوصلوا ليها ومقدروش خالص وكأنها فص ملح وداب .
وفى ليله كانوا متجمعين على السفره بيتعشوا كلهم وعمر بيهزر هو وشاهندا زى عاويدهم وعمال بيناكف فيها .
عمر بصلها بغيظ وقال اوادم الكل .. طيب يا خالتو خلى بنتك الرخمه دى ترد عليا وتدينى كلمه اخيره وتقولى انها بتحبنى ومش هاتقدر تستغنى عنى وموافقه انها تتجوزنى.

شاهندا اتصدمت واتحرجت وبصتله بكل غيظ وقالت .. تصدق انت عيل رخم فى حد يعمل كده .
عمر رد بكل رخامه وقال .. اه فيه اناااااا
اعملك ايه بس بقالى كام يوم بقولك بحبك بحبك وعاوز نحدد ميعاد علشان نعمل خطوبه وانتى تقلانه عليا ومش عاوزة ترسينى على بر .

شاهندا بكل غيظ بصتله وقالت .. تقوم تعمل كده سياتك وتحرجنى .. انت مش عارف انى بتكسف يا عمر
زين نفخ و قام وقف وساب الاكل من غير اصلا ما ياكل اى شىء وراح قعد على الانتريه وشغل التلفزيون .
سميحه بصت لعمر بلوم وقالت .. عجبك كده يا زفت انت مش شايف اخوك منظره عامل ازاى مش تبطلوا لعب العيال بتاعكم ده .

عمر رد وقال.. انا عملت ايه بس يا ست ماما هى عادته ولا هايشتريها .. فضل يرخم على ليل الغلبانه لحد ما طفشها وراجع بعد كده يندم .
سماح ردت وقالت.. عيب يا عمر ما يصحش ده مهما كان اخوك الكبير ونفسيته وحشه و... وقبل ما تكمل كلامها
سمعوا زين فجاه بيقووووول .. لييييييل.

الكل انتبه ليه واستغرب .. ورجع زين تانى وقال .. ليل اهى .. تعالوا بسرعه .. ليل فى التلفزيون .. ليل اهى يا ماما .. ليل اهى يا خالتووو .
الكل بسرعه قام من على السفره وجريوا على زين وبصوا للتلفزيون واتصدموا اول لما شافوا فعلا ليل طالعه زى القمر و لابسه فستان حلو اوى سواريه وحاطه مكياج ورافعه شعرها فورمه لفوق وواقفه جنب يووووووسف .

فى اللحظه دى زين اول لما عيونه جت على يوسف بصله بكل غيظ وقال .. الحيوااااااان
انا هاموتك يا يوسف .. انا هاموتك وفى لحظه كان واخد مفاتيح عربيته وموبيله من على التربيزه وخرج فى لمح البصر من الفيلا كلها .

سميحه بكل خوف بصت لعمر وقالت .. الحق اخوك يا عمر .. الحق زين قبل ما يتهور ويعمل حاجه وحشه فى يوسف .. الحقه يا ابنى بسرعه.
وفعلا عمر خرج بسرعه ورا زين ولحقه قبل ما يطلع بالعربيه بتاعته وفتح باب العربيه وركب معاه .
عمر بينهج من الجرى وبصله وقال.. اهدى يا زين الامور مش بتتحل كده .. اهدى لما نعرف بالضبط هما وصلوا لبعض ازاى وايه اللى هى عملاه فى نفسها ده .

زين بكل عصبيه وصوت عالى رد وقال .. متقوليش اهدى .. متقوووليش اهدى خالص .. الكلب انا روحتله لحد بيته وقولتله اول لما يعرف عنها اى شىء او تتصل بيه او يوصلها يبلغنى على طول .. الحيوان شكله كده ضحك عليا ووصلها قبلى و احتفظ بيها عنده ونفذ اللى كان قايلى عليه وعمل نفسه اكتشفها وظهرها أخيرا للجمهوووور اهو .. انا لازم اموته واشرب من دمه .

عمر رد وقال .. يا زين اهدى اكيد فيه سوء تفاهم ويوسف اكيد عنده مبرراته .
زين بعصبيه بصله وقال.. مبررات ايه اللى تخليه يعمل كده .. وايه اللى يخليه يكدب عليا ساعه ما روحتله فيلته وقالى معرفش عنها حاجه .. اكيد الهانم لما خدت منه الكارت بتاعه فى الشركه ضحك عليها بكلمتين حلوين زى عاويده وراحتله بمزاجها .. انا مش هاسكت ابدا يا عمر انا مش هاسكت.

عمر حاول يهديه لكن للاسف زين كان على اخره ومش طايق اى حد يكلمه .. سميحه رنت كذا مرة عليه وهو كان بيكنسل .. فارنت على عمر وعمر قالها تهدى خالص علشان صحتها وهو مع زين متقلقش .
وفضلوا على كده لحد ما وقف زين فجأه اودام باب فيلت يوسف .

نزل زين بسرعه ودخل على جوا وفضل يرن فى جرس الباب كتيييير ويرزع بايده بس للاسف محدش رد وجه البواب اللى كان فى الحمام بسرعه على ترزيع الباب ده وبص لزين وقال .. خير يا بيه عاوز مين هنا ؟
زين بكل عصبيه رد وقال .. يوسف فيييين ؟
البواب رد وقال .. يوسف بيه عنده تصوير وشويه وزمانه راجع اقوله مين لما يوصل حضرتك .

زين بعصبيه بصله وقال .. تصوير فى انهى زفت مكان .
البواب بخوف رد وقال .. معرفش يا بيه والله هو خرج من بدرى وقالى كده هو والست هانم الصغيرة .
زين هنا خد نفس طوييييل وعمر بص للبواب وشكره ومسك ايد زين وقال .. يالا يا زين ملهاش لازمه وقفتنا دى خالص .
زين بكل عصبيه شد دراعه من ايد عمر اخوه وخرج من الفيلا وفتح عربيته وركب وقعد .

عمر خد بعضه وراح وراه وفتح باب العربيه وركب وبص لاخوه وقال .. اطلع يا زين ملهاش لازمه خالص القاعده دى ويا عالم هايرجعوا امتى من بره .
زين بعصبيه بصله وقال.. انا مش هاتحرك من هنا غير لما اشوفه واشوفها .. فامش عاوز كتر كلام ولو مش عاجبك اتفضل ارجع على الفيلا .. انا مش صغير .
عمر سكت خالص ومردش عليه وفضل ساكت .

وفى بيت الاسطى حسن كان الكل سهران والاسطى حسن كان خرج من المستشفى من اسبوعين وبعدها بيومين حسام راح اتقدم لأيه رسمى وخد والدته معاه وطلبوا ايديها وحسن وافق وأيه كانت فرحانه جدا بس كان ناقصها صاحبتها تكون جنبها فى يوم زى ده ..
وباباها وحسام اتفقوا انهم يأجلوا ميعاد الخطوبه لحد ما ليل تظهر وقروا الفاتحه بس والكل كان فرحان .

أيه كانت فى البلكونه بتتكلم مع حسام على الموبيل وعمالين بيخطتوا لمستقبلهم ولحايتهم .. والاسطى حسن ومراته كانوا قاعدين فى اوضتهم بيتكلموا مع بعض عن جهاز أيه .. و عبير كانت فى اوضتها قاعده كالعاده وماسكه الموبيل بتتفرج على الصور والفيديوهات على الفيس وفجأه قامت من على السرير واتصدمت اول لما شافت صور كتير لى ليل بفساتين مختلفه وكانت جميله جدا وكأنها عارضه ازياء واتغيرت كتير . وكاتبين تحتها .. الوجه الجديد ( ليل ) للمنتج الكبير يوسف الشريف .

عبير جريت بسرعه وفتحت باب اوضتها وراحت لامها وابوها وكمان ايه اختها ووقفت فى وسط الصاله وقالت بأعلى صوتها تعالوا بسرعه كلكم .. الحقووووا الحقوووا لقيت مين على الفيس.

حسن ومراته اتخضوا من صوت عبير ومنظرها وخرجوا بسرعه من اوضتهم وأيه استاذنت من حسام وقفلت بسرعه معاه بحجه ان مامتها بتنده عليها ودخلت للصاله بسرعه .

حسن بتوتر وقلق بص لعبير وقال .. خير يا عبير يا بنتى فى ايه وشوفتى مين خلاكى مش على بعضك كده .
أيه باستغراب بصت لاختها وقالت .. ما تنطقى يا بت انتى فى ايه وشوفتى ايه على الزفت الموبيل ده .
عبير بابتسامه ردت عليهم وقالت .. حزروا فزروا شوفت مين دلوقتى على الفيس.
امها بعصبيه بصتلها وقالت .. ما تنطقى يا بلوة انتى قلبى هايقف من الخضه .

عبير ردت وقالت .. ليل صورها ماليه الفيس بوك كله .. صور كتير اوى اشكال والوان وشكلها بقى حلو اوى اوى واييييه لابسه شويه فساتين روعه تهبل .
حسن اتصدم وجرى على عبير وشد الموبيل من ايديها وقال .. بتقولى ايه ليل ورينى هى فين بسرعه يا بنتى .
وبدأت عبير توريهم صور ليل اللى ماليه الفيس بوك كله وكان اكتر صورها مع المنتج يوسف الشريف وكاتبين بوست كبير مع الصور انها الوجه الجديد ( ليل ) احدث اكتشاف للمنتج الكبير .

هنا الكل اتصدم اول لما شافوا الصور بتاعه ليل واتفاجؤا بيها .
حسن بصدمه بصلهم وقال .. هى ليل فعلا بشحمها ولحمها .. بس إيه اللى هى عملاه فى نفسها ده .. ليه كده يا ليل يا بنتى .. ليه كده بس .
أيه خدت الموبيل من ايد ابوها هى وامها وشافوا صور ليل كلها واتفاجؤا هما كمان ومقدروش ينطقوا .
وشويه وحسن مسك موبيله ورن على سميحه هانم وبلغها باللى شافه وسميحه بلغته ان هما عرفوا بكده وشافوها فى التلفزيون وانصدموا وزين راح يشوفها هو وعمر ويجبها.

حسن بلغها ان اول لما النهار هيطلع هايجيب بعضه هو وأيه على طول ويجوا يطمنوا عليها .
وسميحه رحبت بيهم وقفلت معاه السكه بعد ما بلغته سلامها لام ايه والبنات .
أيه دخلت اوضتها ومسكت موبيلها واتصلت على خطيبها وبلغته بكل اللى حصل وانصدم واستغرب ان ليل تعمل كده من اساسه.. وقفل معاها علشان يلحق يتصل بزين علشان يشوفه فين ويروحله بدل ما يتهور فى اى شىء ويعمل حاجه فى يوسف او حتى ليل .

زين كان لسه واقف بعربيته ومعاه عمر اخوه اودام فيلت يوسف والوقت كان بيعدى عليهم ببطء رهيب .
موبيل زين رن وكان حسام هو اللى بيتصل وزين كنسل مرة واتنين وفى التالته رد وقال بعصبيه .. ايوا يا حسام .
حسام حس من صوت صاحبه انه على اخره ومش طايق حد وعصبى جدا فرد وقال .. انت فين يا زين طمنى عليك .
زين بالعافيه رد وقال .. حسام اقفل دلوقتى وهافهمك كل حاجه بعدين علشان بس مش فاضى وقفل الموبيل من غير ما يسمع رد من حسام .

حسام بدأ يقلق على زين فقام وقف وغير لبسه بتاع المستشفى فى السريع وخد بعضه ونزل منها خالص وركب عربيته وافتكر لما أيه بلغته ان زين مش لوحده وان عمر اخوه معاه فامسك موبيله تانى وهو سايق ورن على عمر .. وعمر لما سمع رن موبيله وشاف اسم حسام على الشاشه رد وقال.. اهلا يا حسام.

حسام رد وقال.. قولى يا عمر انت وزين فين بالضبط انا جاى فى الطريق .
عمر رد وقال .. يا ابنى ملوش لزوم انك تيجى احنا شويه وهانرجع على الفيلا ملهاش لازمه قاعدتنا دى خالص اصلا .
حسام رد وقال.. يا ابنى انت انطق انتم فين علشان اجلكم .

عمر خد نفس طويل وبلغ حسام انه هايبعت ليه اللوكيشن بتاع عنوان يوسف وقبل ما يقفل معاه عمر اتفاجأه بزين بيفتح باب العربيه وبيجرى منها باقصى سرعه و...

رواية زين للكاتبة سحر فرج الفصل السابع والعشرون

عمر خد نفس طويل وبلغ حسام انه هايبعت ليه اللوكيشن بتاع عنوان يوسف وقبل ما يقفل معاه عمر اتفاجأه بزين بيفتح باب العربيه وبيجرى منها باقصى سرعه وراح اتجاه عربيه يوسف اللى كانت وصلت ويادوبك بيركن فيها اودام باب الفيلا وزين اول لما شافه هو وليل فى العربيه وعمالين بيضحكوا اتجنن اكتر ونزل جرى من عربيته وراح ناحيتهم وعيونه بتطلع شرار .

عمر بسرعه قال لحسام اللى كان لسه معاه على التليفون .. اقفل بسرعه يا حسام يوسف وصل ومعاه ليل وشكل زين هايرتكب جريمه النهارده وبمنظره ده جايز يقتل يوسف كمال ويخليه كفته .. تعال بسرعه يا حسام ارجوك علشان نوقف الجريمه دى .
وقفل الموبيل ونزل جرى هو كمان من العربيه وراح ناحيه عربيه يوسف علشان يلحق اخوه قبل ما يتهور ويموت يوسف .

زين بكل عصبيه وغضب قرب من الباب بتاع يوسف اللى اتفاجأه بزين وهو بيفتح الباب وشد يوسف من العربيه واداله حته بوكس فظييييع وقعه فى الارض .. ومد ايده ورفعه وضربه بوكس تانى اشد .. عمر جرى عليهم و حاول يبعد زين عن يوسف بس للاسف زين مسك يوسف من جاكيت البدله بتاعته وفضل يضرب فيه لكمات متتاليه.. ويوسف بقى يرد الضرب لزين هو كمان فى وشه ..

وليل من الصدمه ومن اللى شيفاه اودام عنيها بيحصل بسرعه نزلت من العربيه وهى بتصرخ وبتحاول تبعد زين عن يوسف اللى بقى غرقان فى دمه .. بس زين اول لما شافها بتعمل كده وبتحاول تحوش عن يوسف وبتحميه زقها لبعيد وكانت هاتقع على الارض من شده الزقه لولا عمر مسكها وسندها .

فضلوا يضربوا فى بعض هما الاتنين وزين بيشتم فيه وهو بيقول .. يا حيوااااان يااا قذر يا زباااله .. ازاى تعمل كده .. ازاى تعرف مكانها وتجيبها عندك وتهبب فيها اللى انا شوفته ده والعالم كله زمانه شافه من غير ما تقولى ..
كنت فاكرك راجل لكن بعد اللى انت عملته ده عرفت انك انسان قذر .. انا هاموتك يا يوسف .. انا هاموتك وهاشرب من دمك .

انا جيتلك هنا وقولتلك لو عرفت عنها اى حاجه ابقى بلغنى .. مكنتش اعرف انك انسان واطى كده .. مكنتش اعرف انك هاتنتهز الفرصه وتشغلها فى وسط زى ده وانا وانت عارفين الوسط ده كويس اوى بيحصل فيه ايه يا حيوان يا زباله.
ليل اتصدمت و بعلو صوتها وبكل عصبيه بصتله وقالت ... بببببببببببببس كفايه ياااا زين كفااااااية
بس بقى .. بببببس.

انت عاوز منى ايه .. مش كفايه اللى انت عملته وقولته .. مش كفايه تهزيقك وجرحك ليا.
مش كفايه اهانتك ليا وسط شركتك ووسط موظفينك واودام سكرتيرتك .
مش كفايه معايرتك ليا بأهلى وبعيلتى .
مش كفايه قولت انى جايبك من الشارع وده كده شىء يعرك .

انت عاوز منى ايه يا زين سيبنى فى حالى بقى سيبنى فى حاااااالى وفى اللحظه دى قعدت على الارض وانهارت من كتر العياط وعمر جرى عليها علشان يهديها .. وحسام كمان كان وصل بعربيته ونزل بسرعه واتصدم اول لما شاف المنظر ده اودامه .. وشاف يوسف على الارض وهو غرقان فى دمه ومش باين ليه أى ملامح من كتر الضرب .. وكمان شاف ليل وهى منهاره على الارض وعماله تعيط.

قرب من زين وقال .. ايه اللى انت هببته ده يا زين .. انت ازاى تعمل كده عجبك عجبك كده فرجه الناس عليكم فى الشارع بالمنظر ده .. عجبك يوسف واللى جراله ده .. عجبك ليل والحاله اللى انت وصلتها ليها .
زين بكل عصبيه وبرضه غرقان فى دمه بصله وقال .. وانت عاجبك اللى هو وهى عملوه ده .. عجبك منظرها وفستانها وشكلها يا حسام .. هى دى ليل البنت المحترمه المؤدبه المسكينة اللى كنا عارفينها .. يرضيك البيه يعرف مكانها ويخبى علينا كلنا .

ليل قامت وقفت وقربت من زين ووقفت اودامه على طول وعيونها فى عيونه بكل وجع وألم وقالت .. انت عاوز منى ايه يا زين ؟؟؟؟؟
زين بصلها بكل غضب وعيونه فى عيونها وقال .. عاوزك ترجعى معايا على الفيلا وتسيبى الحيوان ده وتنسى كل اللى هو وعدك بيه ده .. والشهرة والنجوميه والافلام والفلوس اللى بالملايين والحوارات دى كلها اللى انا وسياته عارفين اخرها ايه بالضبط .

ليل بكل تحدى بصتله وقالت .. ولو قولتلك لااااا مش هارجع معاك هاتعمل ايه يا زين .

زين بتحدى اكبر رد وقال .. هاخدك غصب عنك يا ليل.
لو حصلت انى اشيلك واحطك جوا العربيه بالعافيه هاعمل كده .
ليل بتحدى اقوى قربت خطوه منه وعيونها فى عيونه و ردت وقالت .. وانا اهووو اودامك يا زين يا جبالى ورينى ازاى هاتقدر تعمل كده .

زين فى اقل من ثانيه كان شايل ليل من على الارض ومشى بيها لحد عربيته وهى عماله تصرخ وتزعق فيه وتضربه فى كتفه وتقوله نزلنى نزلنى نزلنى يا حيوان .
زين ولا كأنه سامع اى شىء وفتح باب عربيته وحطها فى الكنبه من ورا وبسرعه وقبل ما هى تنزل فتح الباب وركب وقفل الابواب كلها من عنده وطلع بأقصى سرعه فى طريقه على الفيلا وساب عمر وحسام وكمان يوسف مصدومين من اللى هو عمله من غير ما حد فيهم ينطق ولا كلمه .

حسام قرب من يوسف وساعده علشان يقوم من على الارض وعمر راح يساعده هو كمان وسندوه لحد ما دخل الفيلا من جوا .. وحسام عمله الاسعافات الاولى وعمر بيحاول يطهر ليه كل الجروح بتاعته .

حسام بص لعمر واتفتحوا هما الاتنين فى الضحك.. يوسف بصلهم وقال .. اضحكوا اضحكوا ما انتم مجربتوش بوكس من بتوع سى زين .. انا قولتلكم من الاول بلاش انا بالذات بلاش تحطونى فى وش المدفع مع زين .. وانتم اللى صممتوا اننا نكمل اللعبه دى عليه للاخر علشان خاطر ليل .

حسام بيضحك اوى وقال .. معلش يا يوسف مكنتش اعرف والله انه هايبقى بالتهور والجنون ده كله انا قولت هايشتمك ويهزقك ويسمعك كلمتين حلوين وياخد بعضه ويمشى ومكنتش اتخيل ابدا انا او عمر او حتى ليل انه يعمل كده .. على العموم عندى انا دى يوسف معلش حقك علينا كلنا .
وكمل كلامه وقال .. فاكر يا يوسف لما كلمتنى فى شقتى وانا يا دوبك كنت ساعتها راجع من المستشفى وقولتلى انك لقيت ليل .
وساعتها انا مكنتش مصدق خالص ولما جيت وشفتها بنفسى صدقتك .

فلاش بااااك.
الكافيه كان زحمه كتير وهيصه ودوشه والمطبخ كان فظيييع والكل بيشتغل بهمه ونشاط .. وفجاه دخل مدير المكان وطلب من ليل بسرعه انها تلبس لبس العاملين اللى بيقدموا الطلبات وتبدا تساعد باقى زملائها برة .. وليل ساعتها اتكسفت جدا بس فى الاخر عايده شجعتها على كده وان دى ثقه وفرصه كبيرة من مدير الكافيه ليها ولازم تستغلها .

وفعلا دقايق معدوده وليل لبست لبس العاملين وخرجت وهى متوترة وخجوله وبدات تقدم الطلبات بنفسها للضيوف .
لحد ما المسؤول عن الطلبات طلب منها انها توصل لتربيزه 8 الطلبات دى وهى فعلا راحت قدمتها واتفاجأت ساعتها بوجود يوسف اللى اتصدم هو كمان اول لما شافها فحاولت انها تبعد وتتهرب منه وتدخل المطبخ بسرعه بس يوسف قام من مكانه وراح وراها ولحقها بسرعه .

يوسف باستغراب بصلها وقال .. ليل انتى بتعملى ايه هنا ؟؟
ليل ردت وقالت .. بعمل ايه يعنى بشتغل هنا يا استاذ يوسف .
يوسف رد وقال .. ليل انتى مش عارفه زين قالب عليكى الدنيا ازاى وبيدور عليكى فى كل حته وفى كل شارع وجالى الفيلا وسأل عليكى .. وقالى لو عرفت عنك حاجه او انتى اتصلتى بيا ابلغه على طوووول و....

ليل ردت بسرعه قبل ما يوسف يكمل كلامه وقالت .. لاااااا ارجوك يا استاذ يوسف مش كفايه اللى هو عمله معايا وانا فى الشركه مش كفايه جرحه لكرامتى ومعايرته لاهلى .. ارجوك يا استاذ يوسف بلاش تبلغه انك شوفتنى .. ارجووووك لو سمحت .. هو ملوش دعوة بيا من هنا ورايح .
يوسف بحيرة رد وقال .. طيب يا ليل زى ما تحبى ولو عزتى اى شىء انا تحت امرك فى اى حاجه وهاعمل نفسى انى مشفتكيش زى ما انتى عاوزة .

ليل بخجل ردت وقالت .. اشكرك يا استاذ يوسف ربنا يخليك .
يوسف سلم عليها ويادوبك مشى كام خطوة اودام .. سمع ليل بتقول .. استاذ يوسف ممكن اسالك سؤال لو سمحت.
يوسف رجع تانى وبصلها وابتسم وقال .. اوى اوووى اتفضلى يا ليل انا تحت امرك .

ليل بكل خجل ردت وقالت .. حضرتك تعرف دكتور حسام عز الدين صاحب زين .
يوسف فضل يفكر شويه وقال .. حسام عز الدين ااااه اعرفه محتاجاه فى اى حاجه ؟
ليل ابتسمت وقالت .. طيب حضرتك متعرفش رقم موبيله ايه علشان عوزاه ضرورى .

حسام طلع موبيله من جيبه وفتحه وبدأ يدور على رقم حسام لحد ما لقاه وبص لى ليل وقال .. وادى يا ستى رقم حسام تحبى تكلميه .
ليل ابتسمت وقالت.. لا شكرا انا هاجبلك ورقه وقلم واخده منك وبعدين ابقى اكلمه وقت تانى علشان الشغل اذا سمحت .
وفعلا بسرعه جابت ليل ورقه وقلم وخدت رقم دكتور حسام وبعدها يوسف خد بعضه ورجع لأصحابه يقضوا سهرتهم .

وبعد ما رجع فيلته اول حاجه عملها علشان يبقى مطن اكتر على ليل بدام هى مش حابه ان زين يعرف مكانها .. انه يتصل على حسام بنفسه ويبلغه بوجود ليل فى الكافيه ده بدل ما هى تخاف وتبعد وتمشى لمجرد ان يوسف عرف مكانها وممكن يبلغ زين بكده .
وفعلا اتصل على حسام اللى يا دوبك كان لسه راجع شقته حتى مغيرش لبسه واتفاجأه برقم غريب بيرن عليه .

حسام رد وقال.. السلام عليكم .
يوسف رد السلام وقال ..دكتور حسام .
حسام رد باستغراب وقال .. ايوا مين حضرتك .
يوسف رد وقال .. انا المنتج يوسف الشريف وصاحب زين اكيد تعرفنى.
حسام استغرب اكتر وقال .. اهلا بحضرتك استاذ يوسف خير .
يوسف رد وقال.. انا اعرف مكان ليل .
حسام بصدمه رد وقال .. بتقول ليييييل .

وبدأ يوسف يحكيله كل اللى حصل من ساعه ما زين راحله وسأله على ليل لحد ما قابل ليل فى الكافيه ووعدها انه مش هايبلغ زين .
حسام فرح جدا وخد منه عنوان الكافيه ده وبلغه انه هاينزل ويروح لها فورا ويحاول يقنعها انها ترجع معاه حتى على المستشفى وتشتغل فيها ويشوفلها مكان أمن ومناسب تنام فيه بدل الكافيه ده .

ويوسف فرح ان حسام هايقدر يساعدها وطلب منه انه يبقى يطمنه على ليل ولو احتاج لاى شىء هو او ليل هايكون تحت امره .
حسام خد بعضه بعد ما قفل موبيله ونزل وركب عربيته وراح على العنوان اللى يوسف اداهوله .. لحد ما وصل اودامه وركن عربيته ودخل على جوا .
الكافيه كان هادى نوعا ما واول لما دخل حسام قعد على تربيزه و سأل عن ليل .
وواحد من العاملين راح بلغها وهى استغربت جدا .

ليل اول لما راحت اتفاجأت بحسام وفرحت جدا وكأنها لقت الاخ والسند والأمان اللى كانت بتتمناهم وغصب عنها دموعها نزلت وصعبت عليها نفسها اوى .
حسام هو كمان صعبت عليه ليل وبدا يهديها ويطمنها وطلب منها انها تسيب الشغل هنا فورا وتروح معاه عند مامته فى شقته هى فى انتظارها .
ليل اعترضت وقالت انها هاتفضل هنا وتشتغل وتاكل عيش واستحاله انها ترجع عند زين واهله تانى .

حسام فى الوقت ده قرر انه يحكى لى ليل كل الحقيقه .. وفعلا حكى لى ليل كل حاجه هو عرفها من الاسطى حسن بالتفصيل وهروب مامتها من اهلها مع ابوها وجوازها وان سميحه هانم تبقى خالتها هى وسماح وان زين وعمر وكمان شاهندا يبقوا ولاد خالتها .

ليل مكنتش مصدقه ولا مستوعبه كل الحكايه دى وكأنها بتحلم وبتسمع لحسام وهى مصدومه.. وبدات تسأل حسام عن حاجات كتير.. سألت ازاى ابوها وامها خبوا السنين الطويله دى كلها السر ده والحكاية دى وكمان الاسطى حسن بدام كان عارف ليه بعد موت ابوها ما حاولش يقولها... وان بعد السنين دى كلها يطلع عندها عيله واهل زى ما كانت بتتمنى طول حياتها .. وسألته كمان ازاى قدرتوا توصلوا لعم حسن بالسهوله دى وحكالكم كل ده .. فاحسام حاكلها بالتفصيل كل اللى يعرفه وبالذات على حادثه الاسطى حسن اللى لولاها مكنش عرف حاجه .

ليل دموع كتير عيطتها وفى نفس الوقت فرحتها لان اخيرا هايبقى عندها عيله وسند تتحامى فيهم من غدر الدنيا .
ليل مسحت دموعها وبصت لحسام وقالت.. انا مش قادره اصدق ومش قادره استوعب يا دكتور حسام .. زين بعد كل اللى قاله ليا ده ومعايرته ليا بأهلى يطلع ابن خالتى .. اززززاى ازاى انا هاتجنن .

حسام رد وقال .. ليل زين بيحبك اوى .. وعمل كل اللى عمله ده علشان كان بيغير عليكى من يوسف .. اعذريه يا ليل وحاولى تسامحيه ولو حابه يا ستى تنتقمى منه وتردى ليه الجرح اللى جرحه ليكى انتقمى .. المهم دلوقتى انا عاوزك تنسى كل لحظه حزنتى فيها واتوجعتى واتألمتى .. عاوزك تقفلى صفحه الماضى بحلوه وبمره .. عاوزك تفتحى صفحه جديده وسط اهلك اللى بيحبوكى ومع زين اللى بيعشقك .. انتى مش عارفه زين بقت حالته عامله ازاى من اخر مرة شوفتيه فيها .

ليل ابتسمت بحزن وقالت .. معقول هاقدر يا دكتور حسام .. معقول هاقدر انسى كل ده .

حسام قام وقف ومد ايده لى ليل وقال .. يالا بينا اول خطوة وسيبى الباقى للايام يا ليل .. والدتى انا حاكلها عنك كل شىء من ساعه ما جيتى المستشفى وحبتك اوى .
وبعدين عيب بنت من بنات عيله السيوفى تبات برة بالشكل ده يا هانم.
ليل رغم دموعها ضحكت وقالت .. فعلا ماما الله يرحمها كان اسمها هدى برهان السيوفى .

حسام ضحك ولسه يا دوبك هايمشوا ليل قالته ثوانى هاسلم على ام احمد جوا واجيب شنتطى.
حسام استغرب مين دى وقال ماشى ولسه ليل هاتروح على المطبخ قابلت عايده اللى قلقت عليها وجت علشان تشوفها وتعرف فى ايه واتقابلت هى وليل مع بعض وقالت .. فى حاجه يا بنتى اتاخرتى كدة ليه .. ليل ابتسمت و شكرتها جدا جدا وقالت ان حسام اخوها جه وهاترجع معاه على البيت .

عايده فرحت جدا ان ليل هاترجع لاهلها وزعلت انها هاتسيبها فى نفس الوقت وودعتها وليل جابت شنتطها من الاوضه اللى كانت نامت فيها .
ومشيت مع حسام وركبوا العربيه وراحوا على شقه حسام .
واول لما وصلوا والدة حسام كانت فى استقبالها ورحبت بيها جدا بكل طيبه وحنيه وحب وورتها اوضه صغيره للضيوف تبقى تستريح فيها .

يوم واتنين وام حسام حبتها اكتر وطلبت من حسام انها تفضل معاهم وميخلهاش تروح تشتغل معاه فى المستشفى وبعد محايلات كتير حسام و ليل وافقوا بس بشرط .
طلبت من حسام انه يتصل على يوسف وعمر ويجبهم عنده الشقه ويعملوا تمثليه او لعبه على زين علشان تعلمه من خلالها الادب شويه ويبطل البرود والتكبر والغرور اللى هو فيه ده .

وكمان علشان تفك عقدته ويعرف ان ليل مختلفه عن خطيبته الاول ويحاول ينسى اللى هى عملته فيه ويعامل البنات افضل من كده .
وكمان يبطل اسلوبه وطريقته وعصبيته مع الناس وبالذات موظفيه .
حسام فرح جدا للفكرة دى وكمان والدته وفعلا اتصل على يوسف وكمان عمر وبلغ كل واحد فيهم انه عاوزه ضرورى وخلاهم يجوا عنده الشقه .

عمر اتفاجاه بوجود ليل وفرح جدا انها عند حسام ومامته .. وفرح اكتر لما عرف ان حسام قالها الحقيقه بتاعتها اللى مكنتش تعرفها وبصلها وقال.. خلى بالك يا ست هانم من هنا ورايح الكلمه كلمتى والشوره شورتى انا ابن خالتك وليا حكم عليكى.
الكل فضل يضحك على كلامه وهزاره . وكمان يوسف اتفاجاه ان حسام قدر يقنعها انها تيجى هنا وتفضل مع والدته افضل من الكافيه .

وفى الاخر حسام وليل شرحوا ليهم التمثليه اللى ليل عاوزة تعملها على زين علشان تعلمه الادب شويه وترجع كرامتها اللى هو جرحها ليها حتى ولو بدون قصد منه .. وكمان يبطل الحاجات الغريبه اللى هو بيعملها دى ويبطل غروره وتكبره واسلوبه الزفت مع الناس كلها .
ومن هنا اتفق عمر ويوسف وحسام وعلى راسهم ليل على وضع خطه كبيرة من خلالها ليل تنتقم من زين .
ورغم اعتراض يوسف انه يقف فى مواجهه مع زين الباقى قدروا يقنعوه ووافق فى الاخر علشان خاطر ليل .

وعلشان حسام وعمر اكتر اتنين عارفين نقط ضعفه ساعدوهم فى التمثليه دى اوى .
ويوسف بدأ يجهز ليل على اساس انها اكتشاف جديد لعالم السينما .
وجبلها احدث موديلات الفساتين ووداها اكبر بيوتى سنتر للفنانين الكبار وبقت تنزل يوميا تلعب رياضه وتهتم باكلها وبشرتها .

وخلال تلت اسابيع كانت ليل نجمه كبيرة ظهرت فى عالم السينما على ايد يوسف الشريف .. ومن خلال علاقات شريف الكبيرة فى المجال ده عمل مؤتمر صحفى وعزم فيه كبار الصحفين والمصورين علشان يصوروا ليل وهى معاه وزين يشوفهم .. والخبر على طول انتشر فى جميع وسائل السوشيل ميديا .
وبكده يوصلوا لزين ان يوسف هايشغل ليل معاه فى المجال ده .. وهو ميعرفش ان دى تمثيليه هما عملوها عليه علشان يبطل عاميله مع ليل والكل ☺

زين كان سايق عربيته بمنتهى السرعه وليل ورا قاعده على الكنبه بتضرب فيه بايديها الاتنين وتصرخ وتقول .. نزلنى .. نزلنى يا مجنوووون .. نزلنى يا رخم .
انا عاوزة يوووسف .. رجعنى ليوسف خطيبى .
هنا زين اتصدم وفرمل العربيه فجأه وبعصبيه فتح الباب بتاعه ونزل وشد ليل من العربيه بالعافيه كمان ووقفها اودامه وقال .. بتقولى اييييييه ؟؟
يوسف خطيبك انتى ازااااى .. اكيد انتى اتجننتى .. ازاى تعملى كده .. ازاى تتخطبى للحيوااان ده .. ازاى من غير ما تاخدى رأينا .

ليل حبت تفرسه اكتر فردت وقالت .. انا حره اعمل اللى اعمله انا وهو بنحب بعض اوووى وهو وعدنى انى هاكون نجمه كبيرة فى عالم السينما .. مش زيك بتجرح وتوجع.

زين مصدوم ومكنش يتخيل كده ابدا وبكل حزن رد وقال .. ليل ارجوكى فوقى .. يوسف واللى زيه ده بيضحكوا على البنات اللى زيك علشان يوهموهم بحاجات كتير مش حقيقيه
ليل انااااا...
فى اللحظه دى لو كان نطق وقال بحبك .. كانت ضعفت ليل وكانت هاتترمى فى حضنه وتنسى كل اللى هو عمله فيها بس للاسف .
ردت عليه وقالت .. انت ايه يا زين ؟؟

زين بتكبره وغروره مقدرش ينطقها وخد نفس طويل وقال .. ليل انتى بنت خالتى هدى ودى الحقيقه اللى لازم تعرفيها وتفوقى لنفسك .. ماما وخالتوا سماح من ساعه ما عرفوا وهما هايتجننوا عليكى .. هما قابلوا عم حسن وقالهم على الموضوع ده كله .
ليل عملت نفسها مش عارفه اى شىء وعملت نفسها اتفاجأت وقالت .. زين انت بتقول ايه انا بنت خالتك ازااااى .
زين ركب العربيه وقالها اركبى وهى فعلا ركبت وطلع باقصى سرعه وقال .. لما توصلى الفيلا ماما وخالتوا هايقولولك كل حاجه .

وفضل باقى الطريق هو وهى ساكتين خالص مكنوش سامعين غير صوت انفاسهم لحد ما وصلوا الفيلا ونزل هو وهى ودخلوا على جوا .
وسميحه اول لما شافتها ابتسمت وفرحت اوى وعيونها اتملت دموووع و ضمتها لحضنها بكل طيبه وحنيه وحب وكأنها حاضنه اختها هدى اللى اتحرمت من حضنها ومن ريحتها سنين طويله .

وليل ما صدقت اترمت فى الحصن ده وعيطت بكل حرقه وهى بتقول .. اااااااه .. ااااااه يا خالتوا .. اااه يا امى .. ياما اتمنيت الحضن ده من زمان اوووى .. ياما اتمنيت حضن يكون نفس حنيه وطيبه وريحه امى .. ااااه يا خالتوا .. اااه .. ماما وحشتنى اوى يا خالتوا .. ماما وحشتنى اوى .
سميحه وسماح وشاهندا الكل كان بيعيط على اللحظه دى .. زين مقدرش يتحمل منظرها ده وخد بعضه على فوق وطلع على اوضته .

سماح قربت منها وخدتها فى حضنها واتفتحت اكتر فى العياط وقالت .. ااااه يا ليل يا حبيبتى .. ياما اتمنينا نشوف هدى تانى وربنا بعتك لينا تعوضينا حضنها وحنيتها .
امك يا ليل كانت حنينه اوى اوووى والكل بيحبها ... اتحرمنا منها سنين طويله وهى اكيد اتحرمت مننا .
شاهندا قربت منها وهى بتعيط وفتحت ايديها لى ليل وحضنتها وقالت .. ليل انا مش مصدقه ان بعد العمر ده كله يكون عندى بنت خالة جميله اوى كده ومن هنا ورايح هاتكونى اختى وحبيبتى .. وخدوا بعض بالحضن تانى .

رواية زين للكاتبة سحر فرج الفصل الثامن والعشرون

زين اول لما طلع على اوضته بدأ يكسر فى كل حاجه اودامه لدرجه انه مسك ازازة برفان من بتوعه وحدفها بعزم ما فيه فى مرايه التسريحه اللى اتكسرت .. وافتكر ليل وهى بتقول .. يوسف خطيبى وبنحب بعض انا هو.. وافتكر كمان صورهم هما الاتنين ونظراتهم لبعض .. وافتكر لحظه ما كان بيضرب فيه وهى نزلت وحاشت عنه وبقت تزق فى زين علشان يبعد عنه .

سميحه وكل اللى تحت اول لما سمعوا صوت التكسير الفظيع ده اتخضوا واترعبوا من شده الصوت ولسه سميحه هتاخد بعضها وتطلع بسرعه تشوف ايه اللى بيحصل فوق ده وتطمن على ابنها .. ليل مسكت ايديها وقالت .. سيبيه يا خالتو .. سبيه انا عارفه هو بيعمل كده ليه ومتقلقيش عليه وتعالى اقعدى وانا هاحكيلكم على كل شىء حصل من ساعه ما اختفيت .

وفعلا قعدت سميحه وهى مستغربه وقلقانه فى نفس الوقت على زين ابنها واللى بيعمله فوق ده وقعدت كمان سماح وشاهندا وبدأت ليل تحكى ليهم على التمثيليه اللى هى عملتها هى وحسام وعمر ويوسف على زين علشان تقدر تسترد كرامتها منه بعد ما جرحها ووجعها واهانها بكل قسوة .. وكمان علشان تحاول تغير فكرته عن البنات اللى واخدها من ساعه ما خطيبته سابته وهو فى عز احتياجه لها ومحنته .. وانها تحاول ترجع زين بتاع زمان اللى حسام حكلها عنه هو وعمر .. زين المتفائل المحب المسامح مش زين المتكبر المغرور .

سميحه ابتسمت وفرحت من كلام ليل لان ده اقوى دليل على ان ليل وزين بيحبوا بعض بالشكل الكبير ده.
هو علشان تكبره وغروره وكبريائه وفى نفس الوقت خوفه ان يدخل فى اى علاقه جديده مش قادر يعترف بالحب ده لى ليل .
وهى علشان بتحبه حب كبير عاوزة تغيره لزين القديم وتحاول تثبت ليه انها قويه وهاتنجح من غير مساندته ليها ورغم جرحه ومعايرته ليها.
فى الوقت ده عمر وحسام كانوا وصلوا وعيونهم على ليل وبيدوروا على زين .

حسام اول لما دخل قال .. مساء الخير عليكم جميعا ازيك يا طنط اومال فين زين مش شايفه يعنى ؟!
سميحه ردت وقالت .. اهلا يا حسام يا ابنى اتفضل يا حبيبى اقعد .. مع انى زعلانة اوى منك وكنت هاخصمك ومش هاكلمك تانى خالص بس فى نفس الوقت عاوزة اشكرك من كل قلبى على انك وقفت جنب ليل بنت اختى هدى وحافظت عليها وبتساعدها انت ووالدتك كمان .

حسام اتصدم وبص لى ليل باستفهام وليل شاورت براسها على انها حكت كل حاجه ليهم وحسام باحراج رد وقال .. انا اسف والله يا طنط سميحه .. احنا كنا مخبين علشان نقدر نكمل الخطه مضبوط وخفنا نقول ليكم على اى حاجه والخطه تتكشف وزين يعرف .
وبعدين مفيش شكر ما بينا .. ليل دى زى اختى بالضبط واكتر وبحاول انى اساعدها باى طريقه وزين كمان اخويا وصاحب عمرى ونفسى يرجع زى زين بتاع زمان اللى كلنا مفتقدينه .

المشكله بس فى كل اللى حصل ده يوسف الشريف والعلقه اللى خدها من زين من شويه .. ده متدشدش يا عينى وحاولت انا وعمر نعمله الاسعافات الأولية.
عمر قرب وقعد على ايد الكرسى اللى قاعده عليه شاهندا وميل برأسه ناحيتها وبكل شوق قال .. وحشنى يا قمر انت.

شاهندا اتحرجت وحاولت تقلب عليه وقالت.. بقولك ايه يا أخ انت .. لو سمحت من هنا ورايح مالكش دعوة بيا خالص ولا تكلمنى ولا لسانك يجى على لسانى .. انا مش بنت خالتك انت وليل وزين والمفروض تشركونى فى كل حاجه بتعملوها .. كده تختطوا وتتفقوا وتنفذوا كمان من غير ما اعرف .. وكنت بتختفى بالساعات الكام يوم الأخيرة دى ولما كنت اسألك تتحجج وتقولى شغل وعندى شغل كتير لا يا عمر انا بجد زعلانه منك انت بالذات اوى اوى .
عمر رد وقال .. بتقولى اووووى اوووى اووووووى.

شاهندا اتكسفت جدا وزقته من على أيد الكرسى بتاعها وقامت بعيد عنه وراحت قعدت جنب ليل .
سميحه بصتله بغيظ وقالت .. اتلم يا بلوة انت وملكش دعوة بيها ومتحرجهاش كده .. وانت اصبر بس عليا حسابك معايا بعدين يا عمر .. يا لى كنت عارف مكان ليل حبيبتى ومقولتليش انا وخالتك وخبيت علينا بس هاقول ايه غير واطى .. مع انك كنت شايف القلق اللى احنا كنا فيها اد ايه .

على العموم ناوين كده تكملوا الخطه دى لحد امتى .. زين فوق بيكسر فى كل حاجه تقابله .. والظاهر كدة والله اعلم كسر الاوضه واللى فيها كلها .. ولو استمريتوا اكتر من كده جايز يهد الفيلا دى فوق روسنا كلنا .
قولولى كده ناوين على ايه تانى .. وانتى يا ليل ناويه على ايه بالضبط بعد ما فجرتى قنبله خطوبتك من يوسف .

حسام وعمر اتصدموا اول لما سمعوا الكلام ده من سميحه .. وحسام بص لى ليل وقال .. ايه ده انتى خرجتى بره الخطه اللى حطينها من غير ما تعرفينا ولا ايه ؟؟
عمر بزهول بص لى ليل وقال .. ايه ده انتى اتخطبتى امتى انتى ويوسف يا بنتى انتى وازاى ما تخديش رأينا في كده.

ليل بصتله بغيظ وقالت .. خطوبه ايه بس يا اخ انت ما تفوق كده .. انا اطريت اقوله كده لما شالنى غصب عنى وحطنى فى العربيه بالعافيه واستفزينى بالكلام وعلشان استفذه اكتر خطرت فى بالى الفكرة دى وقولتله إن انا ويوسف اتخطبنا وكمان بنحب بعض.

عمر ازبهل واتصدم وابتسم وقال .. الله يرحمك يا يوسف كنت راجل طيب .. ليل انتى ازاى تقولى لزين كده .. انتى مش شايفه عمل ايه فيه بس لمجرد انه عرف مكانك ومقلش ليه وانه عاوز يشغلك معاه .. ده كان هايموت فى ايده يا شيخه .. انتى مش عارفه احنا سايبين يوسف عامل ازاى ... انتى كده ذوتيها يا ليل ومكنش ليها لزوووم خالص موضوع الخطوبه ده زين مش بعيد يموت يوسف فيها.

حسام بصلها وقال .. عمر عنده حق يا ليل .. مكنش المفروض تشعليلى نار زين اكتر من كده .. زين فعلا مش بعيد يموت يوسف بجد علشان يستريح .. زين صاحبى من زمان وعارف هو زمانه دلوقتى بيفكر فى ايه وكويس انها جت على أد تكسير اوضته .
سماح بخوف وقلق ردت وقالت .. ربنا يستر وزين ما يتهورش اكتر من كده .. المهم يا جماعه ناوين على ايه ؟؟ وهاتعملوا ايه فى الحكايه دى ؟؟ وبتختطوا لايه الايام الجايه ؟؟

ليل ردت وقالت .. انا من بكرة هاروح احضر محاضرات فى كليه الاعلام علشان اكمل دراستى ودى كانت اهم حاجه بالنسبه ليا انى احققها .. يوسف كتر خيره بقاله كام يوم بيجرى فى الموضوع ده وكلم ناس كتير يعرفها والحمد لله قدر انه يقدم ليا هناك بشهاده الثانويه العامه بتاعتى ومجموعى الكبير.

سميحه فرحت اوى بالخبر ده وبصت لى ليل وقالت .. حلوة اوى الفكره دى وكويس ان زين بيدى محاضرات هناك علشان يخلى باله عليكى .
عمر ضحك بأعلى صوته وقال .. يخلى ايه بس يا حاجه .. ده ممكن لو شاف اى حد بيبص لى ليل او بيكلمها بس او بيسألها عن حاجه بخصوص المحاضرات يمسكه يضربه .

حسام قام وقف وقال .. ربنا يستر .. وبعد اذنكم بقى انا لازم امشى الوقت أتأخر اوى .. وسيبوا الايام الجايه هى اللى هاتعرفنا ايه اللى هايحصل .
حاولوا ما تحتكوش بزين خالص الفترة دى .. وبص لى ليل وقال .. والكلام ليكى انتى بالذات يا ليل حاولى تتجنبيه خالص .
عمر قام وقف وراح وصله لحد عربيته بره وشكره .. ولما مشى حسام بعربيته عمر خد بعضه ودخل على جوا .

وسميحه خدت ليل وطلعتها اوضه من الاوض اللى فوق كانت جنب اوضه زين على طووول وقالتلها انها من هنا ورايح دى هاتكون اوضتك ورغم اعتراض ليل انها تفضل معاهم فى نفس المكان وكانت عاوزة تقعد فى اوضه الجنينه .. لكن سميحه رفضت خالص الحكايه دى .

زين من كتر التكسير اللى كسره فى اوضته اترمى على سريره ونام على ضهره وفضل مركز بعيونه على السقف بيفكر فى كل اللى حصل معاه واتوجع اووووى لما افتكر ليل وهى بتقول انها بتحب يوسف واتخطبت ليه .

باب الاوضه اتفتح ودخلت سميحه واتصدمت اول لما شافت كميه الحاجات اللى اتكسرت فى الاوضه والازاز اللى مالى المكان فى كل حته .
فقربت من زين وقعدت جنبه على السرير وقالت .. ليه بس كل ده يا حبيبى .. ليل والحمد لله رجعت ولقيناها واطمنا عليها انها بخير وكمان هاتعيش معانا .
لزومه ايه كل اللى انت عملته ده .. فيك ايه بس يا ابنى قولى انا امك .. قولى وريحنى وريح نفسك يا زين يا حبيبى .
زين قعد وبص لامه واترمى فى حضنها زى الطفل الصغير وقال ... ااااااااه يا امى .

سميحه بكل وجع على حاله ابنها ضمته لحضنها وقالت .. مالك بس يا حبيبى فيك ايه طمنى .
زين بكل وجع وهو فى حضنها قال .. زين وحشنى اوى يا امى .. زين الطفل الصغير البرىء اللى مكنش شايل هم اى شىء ابدا .
وللاسف مقدرش كمان يعيش حياته زى اى شاب فى سنه .. ولما جه الوقت وفكر يعيش حياته ويحب ويتحب .. خد اكبر طعنه فى صدره من اكتر واحده حبها بصدق ومن ساعتها وهو مش قادر يرجع تانى زى الاول .

مش عاوز اكون زين اللى اتحمل المسؤليه من بدرى وشال شركه كبيرة بالحجم ده بعد موت ابوه .. مش عاوز اكون زين المتكبر المغرور اللى بيجرح ويوجع ومش عاوز ينجرح من حد .. هاتيلى زين يا امى .. هاتيلى زين ابنك .. هاااتيه ارجوكى .
فى اللحظه دى كانت سميحه هاتضعف وقلبها وجعها اوى على منظر زين والحاله اللى هو فيها بس هى كمان ام ونفسها ابنها بتاع زمان يرجع تانى ويملا الفيلا كلها ضحك وهزار ويرجع لطبيعته الحقيقيه اللى هى عرفاها .

مسكت نفسها بالعافيه وسكتت وطبطبت عليه وبصتله وقالت .. انت الوحيد اللى تقدر ترجعه يا حبيبى .. انت الوحيد اللى هاتحارب بعزم ما فيك علشان زين يرجع زى الاول واحسن كمان .
وقامت وبدأت تداوى جروحه وتطهرهم وطلبت منه انه يقوم يغير لبسه ده وياخد شور دافىء علشان يقدر يناااام .

طلع النهار والاسطى حسن كان وصل هو وأيه القاهرة علشان يعرفوا ايه اللى بيحصل ده وازاى ليل وصلت لكده وكانت مختفيه فين الفترة دى كلها .
سميحه وسماح كانوا صحيوا زى عاويدهم من بدرى وكانوا قاعدين فى التراس وسمعوا جرس الباب بيرن وميرفت راحت فتحت على طول ورحبت بيهم وراحت بلغت سميحه هانم بوصولهم .

وسميحه وسماح راحوا واستقبلوهم ورحبوا بيهم واتجمعوا كلهم وقعدوا فى الانتريه .
الاسطى حسن بتوتر وقلق بص لسميحه وقال .. طمنينى يا سميحه هانم قدرتوا توصلوا لى ليل او تعرفوا مكانها فين بالضبط وايه حكايه الصور بتاعتها اللى ماليه النت دى كلها والتلفزيون طمنونى لو سمحتوا انا هاتجنن من ساعه ما شوفت صورها ومنمتش طول الليل بسبب كده .

سميحه بدأت تهديه وتطمنه وبلغته هى كمان بكل اللى ليل بلغتها بيها وخلته اطمن .. مع انه كان مش مصدق كل اللى بيتقال ده .. بس فى الاخر فرح لما حس ان زين بيحب ليل واتاكيد من كل اللى بتعمله ليل ده انها كمان بتحبه زيه واكتر .

وأيه نفسها مكنتش متخيله ان حسام يبقى مشترك فى التمثيليه دى وفرحت اوى انه حاول يساعد ليل صحبتها اللى بتعتبرها زى اختها بالضبط وقدر كمان يقويها هو وعمر علشان تقدر تقوم من جديد بعد كلام زين الجارح ليها وحست انها فخورة بيه وكل شويه تتاكد ان اختيارها لحسام اختيار صح وراجل بمعنى الكلمه .. وكمان فرحت اوى ان ليل قلبها بدأ يدق لانسان بتحبه وبيحبها زى زين الجبالى .

وفجاه وهما قاعدين بيتكلموا أيه لمحت ليل وهى نازله من فوق وجريت عليها وحضنتها وفضلوا يبوسوا فى بعض كتييير .

أيه بكل حب بصتلها بفرحه لا توصف وقالت .. ليل حبيبتى وحشتينى موووت .. كل الفترة دى يا ليل ومش قادرة تتصلى على اختك وطمنيها اخس عليكى اخس طلعتى اخت فشنك ونسيتينى .

ليل بفرحه لا توصف هى كمان اول لما شافتها قالت .. أيه حبيبتى ما تقوليش كده ابدا انا مقدرش انساكى ابدا .. انتى اختى يا أيه والله وبحبك جدا بس... وقبل ما تكمل كلامها سمعت الاسطى حسن وهو بيقول .. بنتى ليل وحشتينى اوى يا حبيبتى وقام وقف وفتح ايده الاتنين وليل اول ما عيونها جت عليه ما صدقت و جريت واترمت ما بين ايديه وحضنته وحست بحنيته وعطفه وطيبته وكأنه ابوها رجع ليها من جديد .

ليل بصوت كله حزن وفرح فى نفس الوقت ردت وقالت .. وحشتنى اوى يا عم حسن .. وحشنى صوتك وحنيتك .. انا حاسه ان بابا رجع تانى بطيبته وحنيته عليا .. ومسكت ايد عم حسن وراحت ناحيه خالتها سميحه وقالت بفرحه .. عم حسن اهو يا خالتو .. عم حسن الراجل الطيب الكريم الشهم اللى وقف جنبى وساعدنى كتير بعد موت بابا .. اللى لولاه مكنتش عارفه هاعمل ايه .. عم حسن صديق واخ لبابا الله يرحمه .. وكان بيحبه اوى اوى .

ومهما اقول واحكى عليه مش هاقدر اوفيه حقه .
عمر نازل من فوق وسامع صوت هيصه ودوشه واتفاجاه بعم حسن وأيه .. وفرح اوى وراح سلم عليهم ورحب بيهم .
سميحه قامت وطلبت من دادة زينب انهم يجهزوا الفطار علشان الكل يفطر .. وبعتت ميرفت عند زين فى اوضته علشان تبلغه بوصول عم حسن .

وفعلا طلعت ميرفت على طول لفوق وخبطت على باب اوضه زين لحد ما جه وفتح وقال .. عاوزة ايه يا ميرفت .
ميرفت اتصدمت لما عيونها جت على الازاز المكسر اللى فى الاوضه وقالت .. ست سميحه بعتتنى ابلغ حضرتك ان عم حسن هو وبنته أيه تحت والكل فى انتظارك .

زين اتفاجأه ورد وقال .. تمام انزلى انتى وانا هاحصلك .
وقفل الباب وكمل باقى لبسه ولبس القميص وحط برفانه وسرح شعره وفضل باصص على جزء مكسور فى المرايه بحزن شويه وبعدها فاق من شروده وخد نفس طوييييل و نزل على تحت .

واول لما نزل قرب من عم حسن وسلم عليه ورحب بيه ومد ايده كمان وسلم على أيه بنته وبارك لها على قرايه فاتحتها على صاحب عمره .
وكل ده وعيونه مجتش على ليل خالص وكان قاصد كده وليل خدت بالها انه بيهرب منها ومن عيونها .
حتى سميحه وسماح لاحظوا كده اوى .

وفضلوا يتكلموا شويه وكل ده وهو متجاهل ليل نهائى وفجاه ليل حبت تستفذه فابصت لعم حسن اللى كان عارف التمثيليه والخطه بتاعتها كويس اوى وقالت .. مش تباركلى يا عم حسن .. مش المنتح الكبير يوسف الشريف طلب ايدى وانا وافقت وهايجى يتقدم لخالتوا خلال يومين .
زين حاول يتمالك نفسه على اد ما يقدر وعمل نفسه وكأنه مش سامع حاجه خالص هى قالتها ولا حتى عيونه جت عليها .. وده استفذ ليل اكتر وهو كمل كلامه مع عم حسن .

فابصت لأيه وقالت .. مبروك يا أيه على خطوبتك .. دكتور حسام راجل محترم جدا وعرفت انكم قريتوا الفاتحه وكنتم منتظرين انكم تعرفوا مكانى وتوصلولى علشان تشتروا الشبكه وتعملوا حفله كبيرة بالمناسبه دى .. ايه رايك يا يويو يا حبيبتى نعمل حفله خطوبتى انا ويوسف وخطوبتك انتى وحسام فى يوم واحد يااااه هاتبقى حفله حلوة اوى وكل الفنانين اللى يعرفهم يوسف خطيبى هايكونوا موجودين .

فى اللحظه دى زين كان زى البركان لما ينفجر وبصلها بكل غيظ وتحدى وحط رجل على رجل وقال .. اظن يا ليل هانم عرفتى انتى بقيتى من عيله مين كويس اوى .. وعيله كبيرة زى عيلتنا دى استحاله توافق على واحد زى يوسف .. وبعدين لو سياتك بتحبيه اوى كده زى ما انا شايف .. يجى يتقدم رسمى ويطلب ايدك منى ومن خلاتك الاتنين وساعتها نشوف ونقرر هو مناسب ليكى ولعيلتنا ولا لا.

ليل اتعصبت وحاولت انها تتمالك نفسها اكتر من كده وبصتله بتحدى وابتسمت وقالت .. والله انا لسه قايله انه هايجى ويتقدم رسمى لخالتوا .. انا طوووول الليل بتكلم انا وهو على الموبيل لوش الصبح وكنت بطمن عليه بعد اللى سياتك عملته فيه امبارح وهو بلغنى انه هايجى ويتقدم خلال يومين .
وبعدين يا مستر زين انا عندى 23 سنه وانا اللى اقرر اتجوز مين ومتجوزش مين ومش مستنيه راى حضرتك فى كده .

عمر فى اللحظه دى انفجر من كتر الضحك لطريقه كلام زين وليل مع بعض ومن كتر الضحك مقدرش يسكت واعتذر وقام راح المطبخ وشاهندا راحت وراه .
وشويه ودادة زينب جت وبلغتهم ان السفره جاهزة والكل قام وسميحه قومت عم حسن وأيه بنته بالعافيه وكانوا رافضين خالص انهم يفطروا معاهم ولولا محايله سميحه وليل عليهم قاموا واتجمعوا كلهم على السفره .

زين اعتذر انه مش هايقدر يفطر معاهم بحجه ان معدته تعبانه شويه وكمان علشان عنده محاضرة فى الكليه ويادوبك هايجهز نفسه لها وطلب من دادة زينب انها تجبله القهوة بتاعته على اوضه المكتب.
الكل قعد وفطر الا ليل اللى كانت سرحانه وحزينه من كل اللى بيحصل ده بس فى نفس الوقت عاوزة تفوق زين وترجعه لنفسه وتعمل اللى عليها لاخر لحظه .

سماح خدت بالها ان ليل مش بتاكل اى شىء فبصتلها وقالت .. نحن هنا يا ست ليل مش بتكلى ليه .. وبعدين لو مش اد اللعب متلعبيش .. ولو بدأتى حاجه لازم تكمليها للاخر وتصبرى وتستحملى لحد ما تخلصيها وتفرحى بالنتيجه اللى وصلتلها .. زين مش هايتغير فى يوم وليله فاعلشان كده لازم تصبرى يا حبيبتى .

سميحه ابتسمت وقالت .. خالتك سماح عندها حق .. لازم تصبرى وتستحملى يا قلبى لحد ما يتغير زى ما كلنا عاوزين .
وبدات ليل تاكل وشويه وشافت ميرفت وهى مدخله فنجان القهوة لزين فقامت وقفت وابتسمت وقالت .. تسمحيلى يا خالتوا اروح اوديله القهوة بنفسى .
عمر اللى رد وقال .. يا لهوووى عليكى وعلى ايامك يا ليل يا بنت خالتى .. يا بت اتقلى مش عارفه تتقلى اسألى بنت خالتك القمر دى وهى هاتعرفك التقل على اوصوله دى استاذه فى كده و عندها حاجات حلوة اييييييييه رهيبه .

شاهندا ضربته فى كتفه والكل فضل يضحك
وسميحه ابتسمت وقالت .. روحى يا حبيبتى ووديله القهوة بنفسك ربنا يقويكى عليه ده ابنى وانا عرفاه كويس اوى .
وفعلا راحت ليل واخدت فنجان القهوة من ايد ميرفت وراحت لحد باب المكتب وخبطت وزين سمح للى بيخبط انه يدخل .. واول لما شاف ليل جايبه فنجان القهوة بنفسها سند ضهره على الكرسى واستغراب وبصلها من فوق لتحت وقال ااااافندم .
ليل عملت نفسها بتتفرج على اوضه المكتب لانها اول مرة تدخلها وابتسمت وقالت .. حلوة اوضه مكتبك بس .... مش اد كده برضه.
اوضه يوسف احلى بكتير وفيها روووح والوان فاتحه وهاديه مش كلها غوامق كده .

هنا زين قام من مكانه ولف نفسه ووقف اودامها بكل غيظ وعيونه مركزه على عيونها وهى بدأت تقلق من نظرته دى جدا بالذات لما عيونه ركزت على شفايفها .. وفجأه شدها لحضنه وقرب من وشها اوى اوووى ولسه هايقرب اكتر ويبوسها من شفايفها .. فاقت ليل وزقته وبعدته بعيد عنها وخرجت بسرعه من الاوضه .

زين ابتسم وبينه وبين نفسه قال .. انا بقى هواريكى الفرق بينى وبين سى يوسف بتاعك ده من هنا ورايح يا ست ليل.
وفى لحظه ما خرجت ليل كانت شاهندا مقبلاها واستغربت منظرها ده ووقفتها وقالت .. فى ايه يا ليل وشكلك عامل كده ليه .. اوعى يكون زين قالك حاجه تزعلك .

ليل جسمها كان بيرجف واتنهدت جامد وابتسمت وقالت .. لااا لا يا حبيبتى متقلقيش تعالى نروح نقعد مع أيه علشان ميصحش تقعد لوحدها .
وفعلا خدوا بعض وقعدوا مع الباقى فى التراس يشربوا الشاى وشويه وزين جه واستأذن من عم حسن انه لازم يخرج دلوقتى علشان عنده محاضرة فى الكليه لازم يحضرها .. واتفق معاه انه هايجيب حسام معاه وهو راجع ويتغدوا كلهم مع بعض .
وكل ده وليل بتهرب من عيونه وبتحاول انها تنشغل مع أيه وشاهندا باى شىء .

وعلى طول خرج زين وركب عربيته وطول الطريق وهو بيفكر فى ليل وفى كل اللى بيحصل ومش متخيل ابدا ان ليل بالسهوله دى تروح ليوسف وتضيع منه .. وافتكر لحظه لما قرب منها فى اوضه المكتب وحاول يبوسها وهى زقته وجريت من اودامه .. وابتسم وقال .. لييييه يا ليل لييييييه . وشويه وكان وصل اودام بابا الكليه وركن عربيته ونزل بكل وقار وعيون الطلبه كلها عليه بكل حب واحترام .. وقابل بظروفها زميل ليه ووقفوا يتناقشوا شويه بخصوص المحاضرات .

يوسف كان لسه نايم فى اوضته من كتر التعب والارهاق والضرب اللى خده من زين وفجاه سمع صوت جرس الباب بيرن فافتح عيونه بالعافيه وقام من السرير وخد بعضه ونزل على تحت على طول وهو ماشى بالعافيه ومش قادر يحرك جسمه كله وراح ناحيه الباب وفتح واتفاجأه بالدكتور حسام واقف مبتسم اودامه .

حسام بضحك بصله وقال .. كنت متأكد انك لسه نايم من تأثير علقه امبارح .. علشان كده قولت اعدى عليك قبل ما اروح على المستشفى واشوف اخبارك ايه واطمن على جروحك .
يوسف بيبصله بعين مفتوحه وعين مقفوله وقال .. اضحك يا اخويا اضحك ما انا اللى اتحطيت فى وش المدفع بسببكم وانتم بعيد صح .. ومحدش فيكم نبهنى ان زين ايده تقيله اوى كده اتفضل ادخل .
حسام لسه بيضحك وقال .. فى دى عندك حق كنا المفروض نبهناك الاول .. بس يالا كله علشان خاطر ليل .

يوسف رد وقال.. ماشى ماشى اكيد هاتجربوا ايده قريب لما يكتشف التمثيليه دى كلها واننا كلنا شركاء فيها وساعتها هابقى اضحك عليكم زيك كده .
حسام بصله وقال .. ماشى وربنا يستر ساعتها يا باشا المهم اقعد يالا خلينى اطمن عليك وعلى الكدمات والجروح اللى فى وشك دى كلها علشان عندى عمليه كبيرة كمان ساعه .

وفعلا قعد يوسف وبدأ حسام يغيرله على الجروح والكدمات اللى فى وشه ولما خلص استأذن منه وخد بعضه ومشى .
ركب حسام عربيته وشويه وموبيله رن وكانت أيه خطيبته بتطمن عليه وبتبلغه انهم وصلوا عند سميحه هانم فى الفيلا من شويه وقاعدين مع ليل .
حسام رد وقال.. ايه ده معقول طب كويس لانك وحشانى اوى اوووى يا يويو .
أيه سكت من الخجل ومردتش وحسام حس بكده وقال .. ايه روحتى فين.
أيه بخجل ردت وقالت .. معاك يا حسام .

حسام رد وقال.. قلب حسام وعيون حسام بجد وحشتينى اوى يا أيه ولو مكنتيش جيتى النهارده كنت هاجيب بعضى واجيلك بكرة على البلد واقولك كلام كتييير اوى حاسس بيه ونفسى تسمعيه منى .
أيه اتكسفت وقالت .. وانا اهو معاك وسمعاك قولى بقى كنت عاوز تقولى ايه يا حسام.

حسام ابتسم ورد وقال .. عاوز اقولك انى بحبك اوى اووووى اوووى .. ونفسى اغمض عينى وافتحها اشوفك جنبى وفى حضنى وبين ايديا .. نفسى بجد يا أيه نتجوز بقى وتفضلى معايا على طول فى كل وقت وفى كل لحظه تمر من عمرى .
أيه فرحت اوى من كلام حسام بس كانت مكسوفه ترد عليه وسكتت .
حسام رد وقال .. أيه روحتى فين .

أيه ردت وقالت.. معاك يا حسام .
حسام رد وقال.. حسام بس كده .. نفسى اسمعها منك يا حبيبتى .
أيه ردت وقالت.. مكسوفه مش هاقدر .
حسام وقف العربيه فجأه وقال .. مش هاتحرك بالعربيه غير لما اسمعها منك يا أيه قولتى ايه.
أيه حاولت تجمع نفسها وتبطل خجل وردت وقالت .. بحبك يا حساااااام .

حسام فرح اوى ان اول مرة أيه تعترف ليه بحبها ده وكان يتمنى تكون اودامه فى اللحظه دى ويضمها جوه صدره ويدخلها جوه ضلوعه .
زين بعد ما خلص كلامه مع زميله دخل مكتبه وقعد شويه يقرأ فى كتاب عقبال ما ميعاد المحاضره يجى اللى كان فاضل عليها حوالى ربع ساعه وشويه وبص فى ساعته وقام وقف على طول لما اكتشف ان ميعادها جه وخد شنتطه وفتح باب مكتبه علشان يروح على قاعه المحاضرة .. واول لما دخل شاف مجموعه كبيرة من الطلبه واقفين وعاملين هيصه ودوشه واستغرب جدا .

فقرب منهم علشان يعرف سبب تجمعهم ده ايه واتصدم اول لما عيونه جت على...