رواية زين للكاتبة سحر فرج الفصل العشرونفتح الاسطى حسن عيونه بارهقاق وتعب وابتسم اول لما شاف ايه اودام عيونه .. وأيه مكنتش مصدقه نفسها انه اخيرا فتح عنيه ودموعها كانت نازله من كتر الفرحه وقالت .. بابا .. بابا حبيبى .وبسرعه مدت ايديها و رنت الجرس اللى جنب السرير بتاع باباها علشان الممرضه تيجى بسرعه وفعلا فى ثوانى الممرضه اول لما سمعت صوت الجرس كانت وصلت ليها وفتحت الباب ودخلت وطلبت من ايه انها تخرج علشان تستدعى بسرعه الدكتور حسام .أيه خرجت بهدوء وعيونها على باباها المبتسم ليها وهى مبتسمه وفرحانه انه اخيرا فاق من الغيبوبه .. واول لما خرجت شافت الدكتور حسام جاى على بعد بخطوات سريعه ومن غير ما يلتفت لأيه دخل على طول لاوضه الاسطى حسن علشان يطمن عليه .فضلت ايه واقفه على اعصابها وعاوزة حد يخرج ويطمنها لحد ما امها جت هى كمان لما حست ان ايه اتأخرت عليها وشافت القلق والتوتر اللى أيه كانت عليه وبخوف سألتها وقالت .. خير يا أيه يا بنتى حصل حاجه ولا ايه؟ طمنينى يا حبيبتى ومالك مش على بعضك ليه ابوكى حصله حاجه.أيه بهدوء ردت وقالت .. لا يا ماما اطمنى يا حبيبتى بابا بخير وفتح عيونه وابتسملى وضم ايدى وانا مسكاه .. بابا فاق يا ماما .. بابا هايرجع لينا تانى اخيرا .ام ايه مش مصدقه وفرحت جدا واول حاجه عملتها انها تشكر ربنا وتحمده انه استجاب لدعائهم وان اخيرا جوزها وعشره عمرها وحبيبها وابوا عيالها هايقوم بالسلامه ويرجع تانى ويكون فى وسطهم .وفضلوا كده لحد ما باب العنايه اتفتح وخرج دكتور حسام وهو مبتسم وفرحان وأيه جريت عليه وسألته وقالت .. خير يا دكتور طمنى بابا اخباره ايه فاااق صح قووول انه فاق .دكتور حسام بسعاده رد وقال .. واحده واحده عليا طيب .. ايوا فااااق يا ستى وهايبقى كويس باذن الله وحمد الله على سلامته.ام أيه قربت منه وهى فرحانه وبصتله وقالت .. الف شكر ليك يا دكتور ربنا يجازيك كل خير ويديك الصحه ويفرح قلبك زى ما فرحت قلوبنا كلنا .. ممكن ادخله واطمن عليه واشوفه بنفسى .دكتور حسام رد وقالة .. اكيد طبعا تقدروا تشوفوه بس ياريت بلاش كلام كتير وما تتعبهوش معاكم ومش اكتر من دقيقه واحده متنسوش انه لسه تعبان ومش هايقدر يتكلم كتير اتفقنا وعيونه على أيه بابتسامه جذابه أيه حست بيها .أيه باحراج ردت وقالت .. اكيد طبعا يا دكتور حسام وشكرا ليك .. وبعدها حسام استأذن منهم وخد بعضه ورجع على الاستقبال زى ما كان .وبعدها دخلت أيه ومامتها بكل هدوء لاوضه الاسطى حسن اللى كان مفتح عيونه ومبتسم اول لما شافهم هما الاتنين .ايه جريت عليه ومسكت ايده وقالت بكل حب .. حمد الله على السلامة يا حبيبى .. اخيرا يا بابا فوقت وفرحتنا وحشتنا اوى يا حبيب قلبى .ام ايه قربت من الناحية التانيه وبصتله بكل حب وقالت .. حمد الله على السلامه يا عمرى قلقتنا عليك .الاسطى حسن من كتر التعب والوجع اللى كان حاسس بيه مش قادر يرد عليهم بالكلام ويادوبك بيبتسم وبيشاور بعيونه .بس للاسف الممرضه دخلت واستأذنتهم انهم يخرجوا علشان ما يتعبهوش اكتر من كده زى ما دكتور حسام طلب منهم .. وهما علشان خايفين عليه وعلى صحته ما حاولوش يقعدوا اكتر من كده وكفايه انهم اطمنوا عليه وابتسموله وخرجوا مع الممرضه وأيه طمنته وقالتله .. احنا هنا يا بابا جنبك فى اوضه لوحدنا اطمن ومش هانسيبك خالص فابتسم لها وشاور براسه انه مطمن .عدى الوقت والنهار طلع وليل كانت نايمه على سريرها وفتحت عيونها اول لما حست بضوء النهار طلع وملى الاوضه كلها .. فقامت من السرير ودخلت الحمام علشان تتوضا وتجهز نفسها علشان تنزل مع زين الشركه زى ما طلب منها بالليل .الكل فى الفيلا كان بدأ يصحى واحد ورا التانى واولهم كالعادة كانت سميحه اللى كانت بتحب تصحى من بدرى مهما تكون سهرانه لوقت متأخر .. وكانت بتصحى اول واحدة علشان تبدأ تجهز وتطلب من دادة زينب كل اللى هاتحتاجه منها لليوم كله علشان تعمل حسابها من بدرى وتلحق تشترى كل الطلبات .سميحه كانت دخلت لزينب المطبخ وصبحت عليها وبلغتها بكل اللى هى عوزاه وخدت بعضها بعد كده وخرجت من المطبخ وراحت قعدت فى التيراس شويه تشم نسمه الهواء الجميله بتاعه الصبح .وهى قاعده جت سماح وصبحت عليها وهى ماسكه راسها وبتقول .. صباح الخير يا حبيبتى .. انتى هنا من بدرى ولا ايه .. ده انا قولت مفيش غيرى اللى صحى فى الفيلا.. الدنيا لسه هاديه على الصبح ولولا وجع راسى مكنتش صحيت من النوم النهارده .سميحه ابتسمت لها وردت الصباح وقالت الف سلامة عليكى ياسش حبيبتى كنتى قولتيلى وانا اخلى ميرفت تطلعلك بالفطار لحد فوق وعملتلك قهوتك كمان وتديكى برشام الصداع .سماح مفتحه عين ومغمضه عين من شده الصداع اللى هى حاسه بيه وقالت .. لا لا على ايه انا شويه كده وهافوق .. هو اكيد من كتر الهيصه والدوشه بتاعه امبارح هى اللى عملتلى صداع فظيع بالمنظر ده وشويه وهايروح لوحده .الاتنين اتفاجأوا بدخول ليل عليهم وهى مبتسه وبصتلهم وقالت .. صباح الخيروازى حضرتك يا سميحه هانم وازى حضرتك يا سماح هانم.سماح وسميحه ابتسموا ليها وردوا الصباح عليها .. وحمدوا ربنا انهم كويسين .. واستغربوا انها صاحيه من بدرى كده هى كمان .سميحه عيونها عليها وقالت .. صاحيه بدرى كدة ليه يا حبيبتى كنتى نمتى براحتك زمانك تعبتى امبارح معانا وكمان الدوشه اللى فضلت لوش الصبح دى اكيد معرفتيش تنامى منها كويس .ليل ردت وقالت .. لا الحمد لله نمت كويس وصحيت من شويه وصليت وجهزت نفسى كمان علشان هاروح الشركه مع الأستاذ زين زى ما طلب منى امبارح .ولسه ليل هاتكمل كلامها .. اتفاجأت بزين وهو بيقرب منهم وهو مبتسم نصف ابتسامه وقال .. صباح الخير .وبعدها قرب من والدته وباس رأسها .. وبص لخالتوا وقال ازيك يا موحه .. ومن غير ما يبص لى ليل قال .. ازيك يا ليل .ردوا عليه الصباح وشد كرسى وقعد وكل ده وليل لسه واقفه مكانها ما اتحركتش .ليل مدت ايديها لسميحه وايديتها العلبه اللى فيها الطقم الذهب اللى هى ادتهولها تلبسه امبارح فى الحفله وقالت .. اتفضلى حضرتك الطقم أهو ومتشكره جدا ليكى يا سميحه هانم .سميحه بكل حنيه وطيبه ردت وقالت .. ولو قولتلك ان الطقم ده بتاعك انتى واعتبريه هديه منى ليكى تقولى ايه .ليل ردت بخجل وقالت .. للاسف مش هاقدر اخده ده بتاع حضرتك انتى ولولا انك اصريتى انى البسه امبارح انا مكنتش هارضى خالص فياريت تتفضلى وتخديه واعذرينى .سماح ردت وقالت .. مفيهاش حاجه خالص يا بنتى وعيب يا حبيبتى متعمليش كده سميحه بدام قالتلك خديه ليكى يبقى تخديه .. اعتبريه يا ستى هديه بسيطه من ام لبنتها هاتقولى لا برضه يا ليل وتزعلى سميحه منك .كل اللى بيحصل ده تحت انظار زين اللى قاعد ومستمع لكل اللى بيحصل اودام عيونه ده وفجأه افتكر سلسله ليل اللى لقاها ساعه الحادثه ولحد دلوقتى هى معاه ونسى يديهالها .عيونه جت على ليل اللى كانت واقفه محرجه جدا من اللى بيحصل ده وبالذات اودام زين .. فازين بصلها اوى وهى استغربت وقال .. على فكرة يا ليل انا كنت لقيت سلسله فى عربيتى ليله الحادثه وتوقعت انها تخصك انتى لانى لقيتها على الكنبه من ورا مكان ما انتى كنتى نايمه فى العربيه ساعه ما ركبتك انا وعمر .ليل بتفكير ايه ده معقول انا افتكرتها ضاعت ساعه الحادثه وزعلت جدا عليها ومسألتش حد عليها .. وبفرحه حطت ايديها مكان ما بتكون موجوده السلسله فى رقبتها وقالت .. ايوا فعلا دى سلسلتى اكيد وقعت منى ساعه الحادثه دى من ريحه والدتى الله يرحمها .. بابا لبسهالى يوم ما ماما ماتت وقالى اوعى تقلعيها من رقبتك خالص يا حبيبتى دى من ريحه مامتك وهى كانت غاليه عليها اوى يا بنتى .ووعدته ساعتها ان عمرى ما هقلعها من قربتى خالص مع انى كنت صغيرة ساعتها وفعلا عمرى ما قلعتها خالص طول السنين دى .زين ابتسم ورد وقال طب كويس انى لقيتها وربنا يرحمها هاطلع اجيبهالك ثوانى وهانزل على طول .سميحه بكل طيبه وحنيه بصت لى ليل وقالت .. ربنا يرحمها زمانك مفتقداها يا ليل هى وباباكى اكيد .ليل بحزن ردت وقالت .. اوى اووووى يا سميحه هانم .. كان نفسى ماما بذات تكون معايا اوى فى سنى ده .. كان نفسى اتكلم معاها واحكى زى ما كل البنات بتعمل مع امهاتهم .. كان نفسى احكيلها كل شىء يخصنى وتقولى ده صح وده غلط .بس للاسف اتحرمت منها فى سن صغير اوى .وفضلوا بتكلموا شويه مع بعض .وعند زين اللى كان طلع على اوضته وفضل يدور على السلسله فى كل حته .. فى التسريحه وادراج الكوميدينوا وفى جيوب البدل بتاعته وللاسف نسى خالص هو حطها فين .. وافتكر ان آخر مرة كانت معاه حطها فى جيبه على اساس انه يديها لى ليل وهو بيزورها فى المستشفى .. بس بعد كده مش فاكر راحت فين للاسف ولا حتى فاكر كان لابس انهى بدله فى اليوم ده بالذات .فخد بعضه ونزل على تحت وراح لهم التراس وبص لى ليل بأسف وقال انا اسف جدا مش فاكر خالص انا شيلتها فين بس اكيد هلاقيها او هاسأل دادة زينب عليها ممكن تكون لقيتها وهى بتوضب الاوضه وشالتها فى اى مكان .سميحه ردت وقالت .. يا حبيبى سيب الموضوع ده عليا وانا هادور عليها بنفسى وان شاء الله هنلاقيها بدام هى غاليه اوى كده عند ليل وكمان من ريحه والدتها الله يرحمها .. وبصت لى ليل وقالت متقلقيش يا حبيبتى وان شاء الله هلاقيها ليكى .والمهم دلوقتى اتفضلى العلبه دى ومش عاوزة ولا كلمه .. اوعى تكسفينى تانى وترجعى حاجه انا ادتهالك بعد كده .ولسه ليل هاتعترض سميحه بصت لها بزعل وقالت .. انا قولت ايه .. ويالا اتفضلوا قوموا علشان نفطر كلنا مع بعض ويادوبك كانوا خارجين كلهم من التراس شافوا عمر وهو ماشى بيطوح ورايح عليهم وكأنه لسه نايم على نفسه .عمر بيفتح عيونه بالعافيه من كتر التعب والسهر وقال .. صبااااح الخييير.سميحه ردت وقالت .. يا لهوى عليك يا عمر .. منظرك عامل كده ليه يا واد انت انت جيت من السرير على هنا على طول ولا ايه من غير ما تغير وتتشطف وتلبس هدوم عدله .سماح بتضحك على منظره وقالت .. يا شيخه ردى الصباح الاول وبعدين ابقى كلميه براحتك . وبصتله وقالت صباح الفل يا حبيب قلب خالتو .ليل بتضحك على منظره وعيونها جت فجأه على زين هو كمان وهو بيضحك واول لما لاحظ انها بتبص عليه كشر وقال .. يالا يا جماعه سيبكم من البنى ادم ده عاوزين نفطر ورانا شغل كتير .عمر فتح عيونه اوى واتصدام وقال ... عاااااااااا شغل كتير ايه وبتاع ايه انا اجازة النهارده ماليش دعوة .. مش كفايه التعب اللى شوفته امبارح بسببك وبسبب ضيوفك .سميحه بقلبها الطيب بصت لزين بترجى وقالت .. شغل ايه بس يا زين يا ابنى انت مش شايف الواد عامل ازاى من كتر التعب .. سيبه النهارده يستريح ومن بكرة هايكون قبلك فى الشركه .زين بصرامه رد وقال .. ماما لو سمحتى متدخليش بينى وبينه خالص وبالذات فى موضوع الشغل ده كلنا كنا سهرانين وقمنا عادى خالص ورايحن نشوف اللى ورانا وبعدين لازم يجى علشان ليل هى كمان نازله معانا الشركه علشان يعرفها هى هاتعمل ايه بالضبط معانا ويدربها .عمر فرح جدا اول لما عرف ان ليل نازله معاهم على الشركه ورد وقال .. ميت مرة يا سميحه اقولك متدخليش بينى وبين زين لامتى هافضل اقولك كده واصلا مين قالك انى تعبان انا اهو زى الحصان دقيقه بالضبط وهاطلع اخد احلى شور واغير وتلقونى اودام عينيكم .. وفعلا فى ثانيه كان عمر طالع على فوق زى الصاروووخ وراح على اوضته علشان يجهز نفسه وينزل على طول .سميحه بضحك ردت وقالت .. ماشى يا جذمه انا غلطانه فعلا انى بدافع عنك دقنى اهى لو ادخلتلك تانى فى اى شىء يا واطى .الكل ضحك على كلامها وراحوا قعدوا على السفرة علشان يفطروا وزين يا دوبك مد ايده وخد قطعه جبنه صغيرة على واحده توست و حطها فى بوقه ومد ايده وخد فنجان قهوته اللى متعود يشربه دايما مع الفطار .ليل استغربت جدا انه ما اكلش غير قطعه الجبنه الصغيرة والتوست وانه شرب قهوة على طول و تعتبر على الريق .وفجاه وهى بصاله ومركزه معاه اوى وهو بيشرب القهوة .. زين رفع وشه وعيونه جت عليها وهى بتبصله فابسرعه هربت من نظرته واتلخمت فى الاكل وحست بالاحراج.عمر كان خلص لبسه وجهز نفسه وخرج من اوضته وقابل شاهندا هى كمان وهى نازله وصبح عليها وعاكسها زى عاويده .. وهى اتكسفت ومتعرفش السبب ايه .. وهو لاحظ ده لاول مرة شاهندا تتكسف منه كده فمحبش يحرجها وراحوا قعدوا كلهم وفطروا مع الباقين وشاهندا صبحت عليهم .وشويه وخلصت ليل اللى تعتبر ما اكلش اى شىء غير حاجات بسيطه جدا وعمر كمان اكل فى السريع فابصلهم زين وقام وقف وقال .. لو خلصتوا يالا بينا على الشركه .سميحه ردت وقالت يا حبيبى سيبهم براحتهم بتستعجلهم ليه دول حتى لسه ما أكلوش عدل ومشربوش الشاى او القهوة بتاعتهم .عمر بيحط زتونه فى بوقه وقال .. لا يا ست الكل اذا كان عليا انا كدة أكلت وانتى يا ليل لو عاوزة تكملى اكل مفيش مانع اقعدى وكلى واحنا هانستناكى .ليل بخجل ردت وقالت .. لا انا شبعت الحمد لله ومستعده .زين بصلهم هما الاتنين وقال .. طيب اتفضلوا اودامى .وفعلا خرج عمر على بره ومعاه ليل ماشيه جنبه وهو عمال يهزر ويرغى معاها وزين كان خارج وراهم هايفرقع منهم هما الاتنين .لحد ما خرجوا عند العربيات بتاعتهم وعمر راح فتح عربيته وزين كمان فى نفس اللحظه والاثنين بصوا لى ليل وفى نفس واحد قالوا اتفضلى اركبى .ليل احتارت واتفاجأت واتحرجت تركب مع مين فيهم وعيونها بينهم هما الاتنين بس فى الاخر بصت لزين وقالت .. انا اسفه يا استاذ زين هاركب مع عمر .زين من غير ما ينطق ولا كلمه واحده بصلها وركب عربيته وقفل الباب وراه وطاااار بيها بأقصى سرعه .عمر اتفاجأه بسرعته دى وقال.. يا ابن المجنونه .. هو الواد ده اتجنن ولا ايه على الصبح .. اركبى اركبى يا بنتى .. ربنا يقوينى على العيله دى .ليل حست ان زين زعل علشان مركبتش معاه هو وخدت بعضها وركبت وهى ساكته مع عمر بس فى نفس الوقت فضلت تضحك على كلام عمر وطريقته وفضلوا يرغوا طول الطريق لحد ما وصلوا اودام باب الشركه وعمر فتح الباب بتاعه ونزل وقال .. اتفضلى يا لولو الشركة هاتنور بيكى يا قمر .ليل فتحت باب العربيه ونزلت واتفاجأت بمبنى ضخم وكبير جدا وفضلت تتفرج عليه بكل اعجاب .عمر لاحظ إعجابها ده وقال .. ايه الشركه عجبتك للدرجه دى .. افتكرى ابقى احطهالك فى شنطه وتخديها معاكى وانتى مروحه..ليل ضحكت وعمر شاور بايده ليها وقال .. اتفضلى معايا .عمر اول لما دخل من باب الشركه الكل كان بيرحب بيه وبقى شخص تانى خالص وليه هيبه كده بين الموظفين ودى كانت احلى حاحه فى عمر .. ان الهزاز هزار والشغل شغل . وساعه الجد بيبقى شخص يعتمد عليه وليل لاحظت ده جدا وهى ماشيه جنبه لحد ما وصلوا لحد الاسانسير ودخلوا وطلعوا بيه على الدور التالت .عمر بهزار وهما فى الاسانسير بص لى ليل و قال وهو بيعدل فى لياقه قميصه ايه رايك انفع اكون حازم وجد مع الموظفين وليا هيبه كده ويخافوا منى ولا لا .ليل ضحكت وردت قالت .. يا عم والله انا صدقت انك كده فعلا واستغربت وقولت هو ده عمر معقول .. هو ده اللى مش بيبطل ضحك وهزار طول الوقت .. معقول بيتحول لشخص تانى خالص كده فى لحظه زى... ولسه هاتكمل وتقول زى زين بس سكتت .عمر بهزار رد وقال .. قولى قولى متتكسفيش زى اخوك زين .. فعلا زين ده ساعات تحسى انه إنسان عادى كده وبيهزر وبياخد ويدى مع الواحد وساعات لما يقفش اجارك الله محدش بيقدر عليه .. وخلى بالك انتى كده لسه مشفتيش زين وهو فى الشركه وبيتعامل مع الموظفين او فى موقع التصوير .. يا لهوووى بيكون فظييييع ومحدش يقدر يقول بم اودامه .ليل بدات تقلق واتصدمت وبصت لعمر وقالت .. روح يا شيخ ربنا يطمنك انت رعبتنى منه اكتر ما انا مرعوبه .نزلوا من الاسانسير وعمر خدها ووصلوا على مكتب زين وغمز للسكرتيرة وقالها صباح الفل يا قمر وهى ابتسمتله واحترمته علشان الضيفه اللى معاه وقالت .. اهلا استاذ عمر اتفضل وفتح الباب ودخل على طول هو وليل وقفل الباب وراه وزين كان واقف مديلهم ضهره واقف وعيونه مركزه على الشباك اللى فى اوضته جنب المكتب بتاعه وعمر راح قعد وقال .. نحن هنا وصلنا يا باشا .زين خد نفس طويييل ولف نفسه وعيونه على ليل اللى كانت لسه واقفه مكانها مقعدتش .وبصلها كتير وراح قعد على كرسيه وسند ضهره لورا على الكرسى وحط رجل على رجل وقال .. بصى يا ليل انا او عمر فى البيت حاجه وفى الشركه حاجه تانيه خالص يعنى تقولى مستر عمر ومستر زين وكل كلمه واى حركه هنا بحساب واهم حاجه تكون عندك هى شغلك وبس .. مفيش رغى وتلت وعجن او اى صداقه من اى نوع مع اى موظف هنا فى الشركه ولسه ليل هاتعترض على النقطه دى بذات بنرفزة وترد زين برق لها وقال اظن لسه مخلصتش كلامى وطول ما انا بتكلم متقطعيش كلامى مفهوم .. وكمل كلامه وقال اهم حاجه عندى النظام والدقه فى المواعيد وقام فاتح الدرج بتاعه ومد ايده ومسك علبه صغيره واداها لى ليل وقال اتفضلى .ليل باستغراب بصتله وقالت .. ايه ده ؟زين رد وقال ده موبيل جديد خليه معاكى اكيد هاتحتاجيه علشان الشغل وعمر هايبقى يجبلك خط فيه .ليل اعترضت وردت وقالت .. متشكرة جدا يا استاذ اقصد مستر زين مش هاقدر اقبله مم حضرتك ولما يبقى معايا فلوس هابقى اجيب لنفسى موبيل بفلوسى .زين قام من مكانه بعصبيه وحط ايده فى جيوبه ولف راح وقف اودامها وعينه فى عيونها وقال .. انا مش بدهولك هديه منى .. كل موظف هنا فى الشركه ليه موبيل بيخده غير موبيله الخاص .. ولما يبقى معاكى فلوس ابقى هاتى موبيل تانى خاص بيكى ده لو حبيتى .عمر قاعد ملتزم الصمت لانه عارف زين كويس جدا فى الشغل بس ليل صعبت عليه وحب انه يخرجهم من المشاحنات والتوتر اللى مالى الجو ده وقام وقف وقال .. ماشى يا زين انا هاخد ليل ووريها مكتبها الجديد عاوز اى شىء تانى منها .زين عيونه مركزه على عيون ليل لسه ورد على عمر وقال .. مش لما اشوف رد ليل الاول فى نظام الشغل هنا فى الشركه موافقه ولا مش موافقه ؟!ليل عيونها هربت من عيونه وبصت على عمر اللى كان بيحاول يخفف عنها بنظرات عيونه واخدت نفس كبير وبصت لزين وقالت موافقه .تقدروا تتفضلوا وفعلا عمر فتح الباب وخرج وليل خرجت وراه وقفلت الباب بعد ما خرجت وزين بكل عصبيه اول لنا الباب اتقفل وهما خرجوا ضغط على صاوبعه جامد وقال .. سامحينى يا ليل .انا عارف انك ملكيش ذنب فى اى حاجه حصلت معايا زمان .. بس ياريت تعذرينى وتسامحينى وتدينى فرصه اتغير واكون معاكى طول العمر .فى المستشفى خال ايه كان وصل هو وعبير من السفر وراح لهم الاوضه وفرح جدا اول لما عرف منهم ان اخير الاسطى حسن فاق من الغيبوبه وابتسم لهم كمان وعرفهم .. وعبير اول لما عرفت كده فرحت اوى وكانت عاوزة تروح تشوفه بنفسها لكن ايه اعترضت هى ومامتها وقالت بلاش دلوقتى علشان دكتور حسام نبه علينا ما نتعبهوش فى الكلام والزيارات إللى كل شويه .خال ايه بصلهم وقال .. ياااااااه الواحد اطمن وفرح الحمد لله عليه .. وتعب السفر كله راح لما عرفت الخبر الحلو ده .. ربنا يخرجه بالسلامه ويرجع زى الاول ويروح البيت بقى .ايه كانت شايفه التعب اللى ظاهر على خالها فقامت وقفت وقالت .. اقعد يا خالى واستريح تعبت معانا الكام يوم دول ربنا ما يحرمنا منك يا حبيبى .. انا هانزل يا ماما اجيب شويه حاجات من الكافيتريا بتاعه المستشفى زمان عبير وخالوا جعانين وتعبانين وبالمرة اجيب قهوة مضبوطه لخالو وشويه عصاير لينا .وفعلا أيه خدت بعضها ونزلت على تحت وراحت الكافيتريا واول لما دخلت راحت علشان تطلب شويه سندوتشات وقهوة مضبوطه وكمان شويه عصاير .وطلب منها العامل انها تستريح شويه على التربيزه عقبال لما يجهز لها الطلبات بتاعتها وفعلا ايه راحت على تربيزة قريبه فى انتظار الحاجه .دكتور حسام كان قاعد على تربيزة واول لما شاف أيه على بعد قاعده لوحدها ابتسم وراح لها وقال .. صباح الخير .. ويا ترى بتعملى ايه هنا لوحدك .أيه اتفاجأت بحسام واقف اودامها واتحرجت جدا ووشها احمر وقالت .. صباح النور يا دكتور حسام .. انا كنت بجيب بس شويه حاجات للجماعه فوق اصل خالو لسه جاى من السفر .. وكان خد عبير اختى وراحوا يجيبوا شويه حاجات من البيت ورجعوا تانى على طول .. المهم بابا اخباره ايه دلوقتى .. كنا حابين نطمن عليه .حسام بصلها وقال .. طيب هاتسيبينى واقف كتير كدة مفيش اتفضل.أيه بأحراج ردت وقالت .. لا طبعا اتفضل يا دكتور .. وفعلا حسام شد كرسى وقعد .

رواية زين للكاتبة سحر فرج الفصل الحادي والعشرونأيه بأحراج ردت وقالت .. لا طبعا اتفضل يا دكتور .. وفعلا حسام شد كرسى وقعد .وبصلها وقال .. اطمنى يا ستى هو الحمد لله افضل كمان من امبارح ومع الوقت هايبقى افضل بكتير وساعه بالضبط وهايكون نازل اوضه عاديه عقبال ما المحلول اللى الممرضه ركبته ليه يكون خلص علشان يتغذى شويه عليه .. بس مش معنى كده انكم تتعبوه بالزياره كل شويه وتتكلموا معاه كتير وتجهدوه .. ياريت تخفوا شويه زيارتكم ليه لحد ما اقرر انه فعلا بقى كويس وساعتها تقعدوا وتتكلموا معاه براحتكم ولو عاوزين تلعبوا معاه كمان يا ستى مش هامنعكم .أيه وشها ابتسم وقالت .. مش للدرجه دى يا دكتور .. اهم حاجه عندى انه يقوم بالسلامه ويرجع معانا على البيت بقى لاننا زهقنا من المستشفى اوى .حسام بنظرة اعجاب ولوم فى نفس الوقت رد عليها وقال .. للدرجه دى زهقتوا مننا وعاوزين تمشوا وتسيبونا يا انسه أيه .أيه باحراج ردت وقالت.. لا طبعا انا اسفه ان حضرتك فهمت كلامى كده انا قصدى نرجع لحايتنا الطبيعيه .. ويرجع بابا فى وسطنا بضحكته الحلوة وطيبته وحنيته اللى على الكل والغريب قبل القريب .حسام بكل اعجاب بيها وبشخصيتها رد وقال .. ان شاء الله هايخرج بالسلامه .. المهم تسمحيلى اقولك أيه على طول من غير انسه انا مش بحب الالقاب دى .أيه ردت بخجل وقالت .. اكيد طبعا يا دكتور حسام.حسام ابتسم ورد وقال .. طيب يا ست أيه قوليلى بقى انتى أيه بالضبط سورى اقصد خريجه ايه ؟! او بتدرسى ايه ؟!واحلامك ايه يعنى او طموحك ايه ؟أيه اتوترت جدا واتكسفت وحست انها فى اختبار ومش قادرة تجمع كلامها علشان ترد لحد ما جمعت نفسها ولسه أيه هاترد عليه وتبدأ تجاوب على اسئلته .. جت عبير بكل رخامه وهى متعصبه وعلى اخرها ووقفت جنب كرسى أيه وحطت ايديها فى وسطها وبصوت عالى شويه قالت لها .. انتى قاعده ترغى هنا يا هانم وسيبانا فوق قلقانين عليكى وكمان ميتين من الجوع .. فين السندوتشات وقهوة خالو اللى قولتى هانزل اجيبهم وارجع على طول وعيونها جت على دكتور حسام وقالت .. ولا نزلتى ترغى براحتك هنا ونسيتينا فوق.أيه اتكسفت جدا من طريقه عبير البايخه دى اودام حسام وقامت وقفت وبصت لحسام وقالت .. انا اسفه يا دكتور حسام .. عبير اصلها عصبيه شويه وساعات كتير بتبقى عامله زى الدبشه فى الكلام .. ارجوك تعذرنى وبعد اذنك هاروح اخد الحاجه زمانها خلصت واطلع لفوق .حسام ابتسم ورد وقال .. ولا يهمك مفيش مشكله اتفضلوا اطلعوا ولو عزتوا اى شىء انا موجود فى مكتبى .وفعلا أيه مدت ايديها ومسكت ايد عبير بكل غيظ وشدتها لدرجه ان عبير كانت هاتقع وعماله بتبرطم بالكلام وهى ماشيه وراحوا استلموا الحاجات اللى كانت أيه طلبتها وخدوا بعضهم وطلعوا على فوق .عدى كذا ساعه وفى الشركه كانت ليل قاعده فى اوضه مكتب صغيرة قريبه من اوضه زين وعمر و بتخلص شويه حاجات عمر طلبها منها بعد ما قعد معاها شويه وعلمها نظام الشغل وكمان وراها كذا حاجه وهى بشطارتها وبذكأها فهمت على طول منه وعمر عجبه زكاءها ده جدا ومكنش متوقع انها بالذكاء ده .. وبدأت تنفذ لوحدها المطلوب منها على طول وعمر رجع مكتبه .واول لما خلصت كل المطلوب منها خدت بعضها وراحت اوضه عمر وخبطت على الباب خبطه بسيطه لحد ما هو سمح لها انها تدخل .واول لما دخلت عمر ابتسم لها وقالها وعيونه على الاوراق اللى فى ايديها اوعى تقولى انك لحقتى تخلصى كل اللى انا طلبته منك ؟ليل بابتسامه جميله قربت من المكتب اللى هو قاعد عليه ومدت ايديها وحطت الاوراق كلها اللى معاها وضحكت وقالت .. انا فعلا خلصت كل اللى انت قولتلى عليه يا مستر عمر والأوراق كلها اهى جاهزة اودام حضرتك .عمر باستغراب رد وقال .. معقوله يا بنت الأيه يا قروبه .. لا بجد برافو عليكى يا لولو بس اوعى يكون فى حاجه فيهم غلط وتخلى سى زين يمسك علينا غلطه ويشلوحنى انا وانتى يا قطة .. وبلاش مستر عمر وحضرتك والرسميات بتاعتك دى بدام لوحدنا مع بعض .. المهم بجد مش عارف اقولك ايه غير .. برافووووو .وقام وقف وقالها تعالى ورايا وهى مستغربه وبصتله وقالت .. على فين قولى طيب ..عمر رد وقال .. قولت تعالى وهاتشوفى بنفسك يا ستى متخافيش مش هاخطفك .وخرجوا من المكتب بتاعه وراح على مكتب زين وفتح الباب على طول وزين كان قاعد بيخلص شويه أوراق اودامه واول لما شاف عمر ومعاه ليل ساب القلم من ايده وسند ضهره وقال .. كويس انك جيت دلوقتى كنت لسه هابعتلك .. المهم خير فى ايه ؟عمر قرب منه وحط كل الاوراق اللى ليل خلصتها اودامه على المكتب وقاله .. اتفضل يا سيدى .. كل الاوراق اللى انت طلبتها ليل خلصتها على طول زى الشاطرة .زين باستغراب بص للاوراق كلها وبعدها عيونه ركزت على ليل وقال .. عاوز تقنعنى ان ليل اللى لسه اول يوم ليها النهارده فى الشركه خلصت كل الاوراق بالسرعة دى استحاله طبعا واكيد كلها غلطات كتير وبالاسم انها خلصت وخلاص .ليل ماسكه نفسها بالعافيه وبدات ملامحها تتعصب وعمر لاحظ ده ولسه ليل هاترد على زين بكل عصبيه .. عمر مسك ايديها وكأنه بيقولها ما تتهورش وتهدى وتصبر وبص هو لزين وقاله .. الاوراق اودامك اهى راجع عليها بنفسك انت ولو لقيت اى غلطه ابقى قولى وحاسبنى .. وسلام بقى علشان ورايا شغل انا وليل .وفى ثانيه عمر كان واخد ليل وخرجوا من مكتب زين وقفلوا الباب وراهم .زين فضل باصص على كل الاوراق شويه وبعد كده خد نفس طويييل وبدا يراجع عليها هو بنفسه حوالى ساعه ونصف وهو بيراجع لحد ما خلصهم .. وكل الوقت ده مقدرش يلاقى اى غلطه واحده يمسكها على ليل .فابتسم وقال .. كنت متاكد انك زكيه جدا .. بس مش لدرجه الذكاء والنظام والترتيب ده كله فى الشغل .. واتنهد وقال سامحينى يا ليل ويارب ما تكرهينى بسبب معاملتى دى ليكى ويارب تصبرى عليا لحد ما ارجع لزين بتاع زمان اللى انا نفسى هو وحشنى..يوسف بعد عيد ميلاد زين كان راح وصل شاهى للفيلا وشاهى اتحايلت عليه انه يبات عندهم وهو وافق علشان ميزعلهاش ودخل وسهر شويه تانى هو واخوه عاصى وفضلوا يتكلموا كتير مع بعض وبعدها طلع ينام فى اوضته .وصحى من نومه لما جاله تليفون من مدير اعماله بيفكره بميعاد التصوير فقفل معاه على طول ودخل على الحمام خد شور ونزل وشاف شاهى قاعده على السفره بتاكل فسلم عليها وقعد معاها وفطر هو كمان على السريع .شاهى لاحظت انه بياكل بسرعه فاضحكت بمياسه وبصتله وقالت .. براحه يا عم انت بتاكل بسرعه كده ليه .. على مهلك محدش هايشيل الاكل دلوقتى متخفش .يوسف رد وقال .. انا باكل على السريع يا لمضه لانى اتأخرت جدا على ميعاد التصوير ولولا مدير اعمالى اتصل عليا كنت فضلت نايم طول النهار .. ولو زين وصل قبلنا على التصوير بيعاملنا كأننا تلاميذ عنده فى المدرسه .. عاوز اول لما يوصل هو الكل يكون موجود ونبدا التصوير على طول .. الدقيقه او دقيقه ايه الثانيه بتفرق معاه جدا فى شغله .شاهى بدلع ردت وقالت .. هو ده زين الجبالى يا عموووو .. وهو ده بالضبط اللى بيعمله معانا فى الكليه .. وقبل كدة طردنى من المدرج اودام الطلبه كلهم علشان دخلت بعده على طول..يوسف قام وقف وقال .. سلام بقى يا شوشو نبقى نكمل كلامنا مرة تانيه و اشوفك بعدين . عاوزة اى حاجه يا قمر ؟شاهى قامت بسرعه وابتسمت وبدأت تتدلع عليه ومسكت دراعه وبمحايله قالت .. خدنى معاك .يوسف رد وقال .. نععععم بتقولى ايه سياتك .شاهى بمياسه ردت وقالت .. وحياتى يا يويو خدنى معاك وحياتى وحياتى علشان خاطرى .. عاوزة اشوفكم وانتم بتصوروا الفيلم انت وزين .يوسف بغيظ رد وقال .. حبيبتى مش هاينفع انا مش رايح فسحه ولا سهرة فى كافيه ولا حتى عيد ميلاد زى امبارح .. يا شوشو انا رايح شغل يعنى تصوير .. يعنى زين الجبالى اللى شوفتيه امبارح .. مش هايكون هو اللى فى التصوير النهارده .شاهى ردت وقالت.. عارفه عارفه وخدنى معاك واوعدك مش هاعملك اى شىء يزعجكم او يحرجك يا عموووو وحياتى .يوسف نفخ جاااامد وبصلها بكل غيظ وقال .. امرى لله دقيقه واحده وتكونى لابسه ووقفه اودامى .. انزل من فوق الاقيكى اودام عيونى وغير كده هاخد بعضى وامشى لوحدى وابقى اضربى دماغك فى الحيط .. فاهمه .شاهى بكل فرحه فتحت ايديها الاتنين وحضنت يوسف جامد وفضلت تبوس فيه وهى بتقول .. فاهمه فاهمه يا عمووو ربنا يخليك ليا يا حبيبى وبسرعه جريت وطلعت على اوضتها علشان تجهز نفسها .يوسف ضحك وقال .. ااااه يا بكاشه انتى وبعدها خد بعضه و طلع هو كمان على اوضته علشان يجهز نفسه ويروحوا على موقع التصوير اللى كان هايبدا بعد العصر علشان كانوا عاوزين يصورا بعض المشاهد فى وقت الغروب ٠عمر راح لزين مكتبه زى ما طلب من السكرتيرة انها تبلغه واول لما دخل عمر بصله وقال .. خير فى ايه وبعتلى ليه ؟!زين ابتسم وقال .. خلصت كل الاوراق يا سيدى وللاسف لقيتها كلها مضبوطه وبجد برافووو عليها انها قدرت تخلصهم كلهم فى المده دى وبالشطارة دى .عمر فرح جدا وبصله وقال .. طيب بتقول للاسف ليه وقعت قلبى يا عم انت .. علشان تعرف بس انها زكيه وشاطرة جدا ..وكمان علشان تبقى تصدقنى .. انا هاروح ابلغها بكده علشان تفرح لان زمانها قلقانه وحاطه ايديها على قلبها من البواخه بتاعتك ومعاملتك الرخمه ليها من ساعه لما جت والارهاب اللى سياتك بتعاملها بيه .بجد حرام عليك يا زين .. ليل بنت غلبانه جدا وفى حالها ويتيمه وملهاش حد خالص .ارجوك عاملها احسن من كده بدل ما تاخد بعضها وتمشى ومنعرفش عنها اى حاجه .زين خاف من كلمه تاخد بعضها وتمشى دى .. هو مش عاوز كده ابدا بالعكس هو عاوزها اودام عنيه على طول وفعلا هو زودها جدا معاها ولازم يتعامل افضل من كده معاها وزى ما عمر بيقول دى بنت يتيمه وملهاش حد .. ومش معقول يبقى هو والزمن عليها .عمر لاحظ ان زين سرحان وبصله وقال .. هاااروحت فين .. وبص فى ساعته وقال .. يالا علشان يادوبك نروح على ميعاد التصوير وفكر شويه وقال .. وأيه رايك ناخد ليل معانا اهى تغير جو وتشوف وجوه جديده وبالمرة كأنك بتكافئها على الشغل بتاعها اللى خلصته بالشطارة والسرعه دى .زين استغرب جدا موضوع ان ليل تروح موقع التصوير ده لانه مش عاوز يدخلها وسط المجال ده خالص وكمان علشان محدش يستغرب وجودها .عمر بغيظ بصله وقال .. متفكرش كتير ومتنساش انها بقت بتشتغل معانا ومحدش هايقدر يتكلم لوجودها او يستغربه وياعم انت اهى بالمرة تغير جو شويه وحرام يا زين.انا هاروح ابلغها بكده واخدها ونستناك تحت فى العربيه اودام الشركه تكون انت جهزت نفسك يالا سلااام .وخد بعضه ونزل من غير ما يدى لزين اى فرصه انه يوافق او يرفض وزين ابتسم على اللى اخوه بيعمله وبدا فعلا يجهز نفسه علشان ينزل هو كمان لان فعلا الوقت قذف .سميحه وسماح كانوا قاعدين بيتكلموا مع بعض وفى وسط الكلام افتكروا موضوع السلسله بتاعه ليل ولسه يا دوبك سميحه هاتنده على ام فتحى وتسألها سمعوا جرس الفيلا بيضرب وميرفت جت على طول من المطبخ علشان تشوف مين على الباب .وميرفت اول لما فتحت اتفاجأت بالحاج صفوان ومعاه الحاجه انعام وصلاح ابنه وكمان عدى وفهد احفاده .ميرفت بفرحه رحبت بيهم جدا وجريت بلغت سميحه وسماح بوصولهم .. و فرحوا جدا جدا وقاموا استقبلوهم بنفسهم .سميحه بكل فرحه فتحت ايديها الاتنين وبدأت تسلم وتحضن فى عمها الحاج صفوان اللى كان وحشها جدا وكمان مرات عمها الحاجه انعام حضنتها وسلمت عليها وسلمت على صلاح ابن عمها وحضنت عدى وفهد وسلمت عليهم هى وسماح .سميحه بفرحه بصتلهم وقالت .. يا اهلا يا اهلا يا حابيبى ايه المفاجأه الحلوة دى بجد فرحتونا جدا جدا يا عمى .الحاج صفوان رد وقال .. يا اهلا بيكى يا بتى .. اذيك انتى وسماح وازى عيالكم .. وحشتونا اوى وقولنا نيجى نطمن عليكم ونشوفكم بدام انتم مش عاوزين تيجوا وتشفونا وتقعدوا معانا زى زمان .سماح بفرحه ردت وقالت .. والله ابدا يا عمى .. انتم وحشتونا جدا وكنا هانيجى قريب واتفقت انا وسميحه على كده وكنا هانقضى كام يوم عندكم علشان وحشتنا اللمه الحلوة بتاعتكم ووحشتنا انت والحاجه انعام بالذات والله .الحاجه انعام ردت وقالت .. وانتم والله يا سماح يا بتى وحشتونا وقولنا بدام نزلنا القاهرة علشان نزور سيدنا الحسين لازم نيجى ونشوفكم زى ما وعدنا سميحه بكده آخر مرة كلمناها .سميحه ردت وقالت.. والله شرفتونا يا حاجه يادى النور يا عمى يا دى النور يا مرات عمى .وعيونها جت على صلاح وقالت .. كيفك يا صلاح اخبارك ايه يا ابن عمى وازى حسين وعصام وكمان الحريم كلهم وعيالكم والسرايه كلها .. كنتم جبتوهم معاكم وقضيتم كان يوم فى وسطنا .صلاح رد وقال .. بخير الحمد لله وبيسلموا عليكم كلهم والله .سماح بابتسامه وعيونها على عدى وفهد وقالت .. ازيك يا عدى انت وفهد اذيكم يا حابيبى وحشتونى يا عيال اوى ووحشنى هزاركم ومقالبكم مع الكل .. يا ترى بعد ما اتجوزتم عقلتم ولا لسه زى ما انتم مهفوفين فى دماغكم.لسه عدى هايرد عليها رد الحاج صفوان وقال .. اسكتى يا سماح يا بتى ده مطلعين عنينا دايما وشاور على عدى وقال الاهبل ده والاهطل ده كنت مفكر بعد ما اجوزهم هايعقلوا ويبطلوا البلاوى اللى بيعملوها دايما .. بس للاسف مبطلوش ولسه زى ما هما .عدى مش عاجبه كلام جده الحاج صفوان فابصله وقال .. والله يا جدى عقلنا وبطلنا البلاوى اللى بتقول عليها دى انت بس اللى مش عاوز تصدق .. وبعدين من ناحيه الهزار اكيد هافضل زى ما انا علشان اضحكم دايما .. وبعدين بزمتك .. بزمتك يا جدى انت تقدر تستغنى عنى وعن الواد فهد وعن الضحك اللى بصحكهولك .. اعترف اعترف اودام عمتى سميحه وعمتى سماح قاعدين اهووو .الحاج صفوان بضحك هو والحاجه انعام والكل كمان رد وقال .. الصراحه لا مقدرش استغنى عن هزارك وبعدين انا بهزر معاك يا واد انت وهو .. ربنا يباركلى فيكم كلكم .فهد بص لعمته سميحه وقال .. اومال عمر وزين فين يا عمتى لسه فى الشركه ولا ايه ؟سميحه ردت وقالت.. ايوا يا حبيب عمتك لسه فى الشغل متقلقش شويه وهاكلمهم يخلصوا على طول ويجوا يسلموا عليكم .شاهندا نازله من فوق واتفاجأت بكل الموجودين وفرحت جدا وجريت فى حضن جدها الحاج صفوان اللى فرح اول لما شافها وسلمت عليه وحضنته وباسته وقالت .. جدى حبيبى وحشتنى اوى يا روح قلبى .الحاج صفوان حضنها وضمها لصدره الحنين وقالها وانتى كمان يا قلب جدك وحشتين اوى اوى وبعدها سلمت على الحاجه انعام وخالها صلاح.وبعدها سلمت على عدى وفهد ورحبت بيهم جدا وفضلوا يهزروا وبتضحكوا مع بعض ويفتكروا لعبهم ومقالبهم اللى عمرهم ما هايقدروا ينسوها ابدا لما كانوا صغيرين.الحاجه انعام بصت لعدى وفهد وقالت .. بطلوا رغى شويه وروحوا حولوا الحاجات اللى فى شنطه العربيه بدل ما تبوظ .سميحه ردت وقالت .. تعبتى نفسك ليه بس يا حاجه انعام فى خير كتير .الحاجه انعام .. ولا تعب ولا حاجه با بتى دول شويه فاكهة من الجنينه وشويه طيور وفطير مشلتت وقشطه وعسل علشان حبايب قلبى زين وعمر والقمر بتاعتنا شاهندا.وفى المستشفى الاسطى حسن كان راح على اوضه عاديه والكل كان فرحان بكده وراحوا شافوه واطمنوا عليه .كان نايم على سريره وايه وعبير جريوا عليه بكل حب وفضلوا يبوسوا فيه وهو اول لما شافهم فرح جدا وبصوت واطى جدا كله تعب وارهاق اوى قالهم .. ازيكم يا حبايب قلبى .أيه وعبير مقدروش يفسره كلامه اوى من كتر ما كان واطى .. وام ايه قربت منه وقالت حمد الله على سلامتك يا حبيبى والف بعد الشر عليك .. كنا هانتجنن عليك والله .خال أيه قرب منه وابتسم وقال .. حمد الله على سلامتك يا اخويا ربنا يقومك بالسلامه .وبعدين بلاش تتكلموا كتير اديكم شايفين اهو مش قادر يتكلم خالص .. ولا عاوزينه يتعب تانى انتى وهى وهى .والمهم انه بقى بخير وبلاش نتعبه سامعه يا أيه يا بنتى .. سامعه يا عبير .. ابوكم اهو بخير اطمنوا .أيه وعبير ابتسموا لابوهم وسكتوا خالص وسمعوا كلام خالهم .وفجاه الدكتور حسام جه ومعاه الممرضه واطمن على الاسطى حسن وبعدها طمنهم عليه .. ونظراته كلها كانت على أيه وده اللى امها خدت بالها منه .وقبل ما يخرج من الاوضه وقفت ام ايه معاه وشكرته على تعبه معاهم الكام يوم اللى فاتوا دول .وهو كالعاده رد عليها وقال .. ولا تعب ولا حاجه ده شغلى وربنا يطمنكم عليه ويخليه ليكم واستاذن وخرج وراح يلف على باقى المرضى بتوعه .ام ايه قربت من اخوها وقالت .. ما شاء الله عليه دكتور شاطر جدا ومحترم كمان وشكله كده ابن ناس .أيه ابتسمت وحاولت انها تدارى الابتسامه دى علشان محدش ياخد باله وبعدها رد خالها وقال .. فعلا انسان محترم ربنا يكرمه ويديله على اد نيته .وفى فيلا كبيرة اوى كان فى ناس كتير وهيصه ودوشه، ومهندسين صوت ومصورين والات كتير وكاميرات، وكمان فنانين وعمال وكان التصوير فى الجنينه قريب من حمام السباحه .الابطال كانوا بيجهزوا نفسهم وبيخلصوا لبسهم ومكياجهم .والمصورين كانوا جهزوا كاميراتهم هما ومهندسين الصوت ويوسف كان قاعد على تربيزه هو وشاهى اللى كانت مبهورة بالمكان وبكل اللى بيحصل حواليها فى كل حته. والكل كان فى انتظار وصول المخرج زين الجبالى وعمر اخوه .عمر كان هو وليل فى عربيته وليل كانت فرحانه جدا انها هاتحضر حاجه زى كده ومش مصدقه نفسها وشويه ووصلوا للفيلا اللى فيها التصوير وركن عمر العربيه ووقف فى انتظار اخوه اللى كان وراهم بعربيته وركن هو كمان ونزلوا .عيون زين وليل اتقابلوا فى نظره غريبه هى حستها بس مقدرتش تفسرها .. هل هو فرحان لوجودها ومتحمس للشغل ولا هو متعصب وكأنه داخل على حرب .. نظره غريبه حاولت ليل تفسرها بس للاسف مقدرتش .عمر لاحظ سرحانها فقالت .. هااااا .. روحتى فين يالا يا بنتى هانتأخر وزمان الكل فى انتظارنا .ليل فاقت على صوت عمر وقالت .. معاك اهو يالا بينا .. وخدوا بعضهم هما التلاته ودخلوا والكل رحب بيهم .يوسف اتفاجأه بوجود ليل وفرح جدا وشاهى اتصدمت بوجودها وبدأت تاكل فى نفسها من كتر الغيظ .زين هو كمان اتفاجأه بشاهى واتعصب وبص ليوسف وقال .. شاهى بتعمل ايه هنا .. احنا فى مكان شغل يا يوسف مش بنهزر .يوسف رد وقال .. انا اسف والله يا زين وعارف انك مش بتحب اى حد بره المجموعه بتاعتنا يحضر التصوير .. بس اعمل ايه كان نفسها تيجى وتحضر معانا ومقدرتش اقولها لا.وعيونها ركزت على ليل وكأنه بيقول لزين ما انت جايب بنت معاك غريبه اهى وهاتحضر التصوير هى كمان .عمر عرف هو بيفكر ازاى وبص ليه وقال .. احب اعرفكم على الانسه ليل مديره مكتب زين اخويا ومن هنا ورايح هاتشوفوها كتير معانا .. المهم يالا بينا نبدا علشان ما نتأخرش اكتر من كده والشمس تغيب .وفعلا الكل بدأ يجهز نفسه وبدؤا التصوير والابطال بدأت تمثل وزين المشهد اللى مكنش بيعجبه بقى يعيده اكتر من مرة لحد ما يبقى كويس .ليل كانت مبهورة باللى بيحصل اودامها وبالذات زين وطريقته فى شغله .. وعيونها مكنتش بتنزل من عليه بكل اعجاب .زين كان كل فتره عيونه تيجى عليها ولاحظ ان عيونها مركزه عليه هو بالذات وكان فرحان بوجودها وبنظراتها ليه .بس للاسف كمان لاحظ نظرات الاعجاب اللى فى عيون يوسف ليها وبدا يتوتر وطلب استراحه ربع ساعه وبعدين يكملوا باقى المشاهد .شاهى كانت قاعده جنب عمها ومولعه من جواها من نظرات ليل وزين لبعضهم واتاكدت ان زين معجب بيها وشكله كمان بيحبها .يوسف بص لزين وقال .. فاكر البنت اللى سألتك عليها امبارح فى الحفله وقولتلك انها اكتشافك ولا ايه .زين فهم هو يقصد أيه بالضبط وبكل عصبيه قال .. اه فاكر كنت تقصد مين بقى.يوسف حس بعصبيه زين ورد وقال .. هى دى اللى كنت بسألك عليها ليل .زين اتعصب اكتر وبصله وقال .. اسمها انسه ليل وياريت متكلمنيش تانى عنها ليل خط أحمر يا يوسف وملهاش فى المجال بتاعنا ده خالص .. ولا اكتشاف ولا بتاع فاهمنى ومش عاوز اتكلم فى الموضوع ده تانى.يوسف اتوتر ورد وقال .. يا زين انت فاهمنى غلط انا اقصد...وقبل ما يكمل كلامه زين وقف بعصبيه وبصله وقال .. قولتلك ليل خط احمر.يوسف سكت خالص وشاهى كانت متابعه الكلام كله اللى دار بينهم وكانت متغاظه جدا جدا وبصت لعمها وبهدوء قالت .. شكلها تخصه يا عمو سيبك منها .يوسف رد وقال .. استحاله طبعا زين مش بتاع الحاجات دى خالص .. بس هو فعلا فاهمنى غلط .شاهى ردت وقالت .. على كيفك انا نصحتك .وشويه وبدؤا تصوير المشاهد تانى وليل واقفه وفرحانه وعمر فرحان علشان هى فرحتها بس للاسف زين كان متعصب جدا وبدا يشخط ويزعق لكل اللى حواليه ويعيد فى المشاهد اكتر من مرة .لحد ما فجأه...

رواية زين للكاتبة سحر فرج الفصل الثاني والعشرونلحد ما فجأه سمعوا صوت صرخه جامده والكل قام وقف علشان يعرفوا ايه اللى حصل وايه مصدر الصرخه دى والتصوير كمان وقف وعمر عيونه بتدور على ليل فى كل مكان وبذات مكان ما كانت واقفه ورا لوحدها بتابع التصوير جنب حمام السباحه بس للاسف ملقهاش .عمر بصدمه صرخ وقال ليل ليل فين يا زين وخد بعضه وجرى بسرعه ومستناش رد من اخوه وزين اول لما سمع اسم ليل جرى هو كمان وراه واول لما عمر وصل عند البسين شاف ليل بتنزل وبتطلع فى المايه وشكلها بتغرق فنط بسرعه من غير تفكير وزين اول لما شاف كده اتصدم وقال .. ليييييل و نط على طول هو كمان فى قلب المايه والناس كلها اتلمت حولين البسين وشاهى واقفه فرحانه من اللى حصل ليها بس اتكبست لما شافت زين بيرمى نفسه فى البسين علشان ينقذها .عمر وزين بسرعه مسكوها وحاولوا ينقذوها .زين عيونه عليها بكل قلق وحزن وخوف وبص لعمر اللى كان مرعوب عليها وقال .. اطلع انت يا عمر بسرعه من المايه وسيبها انا ماسكها كويس علشان تقدر تاخدها منى عقبال لما أطلع ليكم ومتخليش اى مخلوق منهم يلمسها ولا يجى جنبها .لسه يوسف هايقرب منهم علشان ياخدها منهم .. زين رفض وبص لعمر اللى فهم وطلع على طول من المايه وعمل زى ما زين طلب منه بالضبط لحد ما طلع زين ويوسف كان جاب كرسى بسرعه علشان يقعدوها عليه .وزين اول لما خرج من المايه شاف عمر منومها على ضهرها وبيحاول يفوقها و عيون الكل عليهم .زين قعد جنبها على الارض بكل خوف وحاول مرة واتنين انه يفوقها بس للاسف كانت شربت مايه كتير وجسمها لونه بدا يزرق والتنفس بيقل جامد .. عمر بص لزين وقاله.. مفيش غير حل واحد يا زين .زين بصدمه وخوف انه يخسرها قاله .. انطق يا عمر اعمل ايه .عمر رد بسرعه وقال ..انعاش اصتناعى يعنى فم لفم يا زين لازم يبقى فيه تبادل غازات لان الرئه اكيد اتملت مايه .زين من غير ولا كلمه قرب من ليل اوى اوى ووشه بقى فى وشها وحط شافيفه على شفايفها وبدا تبادل الغازات ما بنهم مرة واتنين وتلاته .. والكل واقف مزهول من اللى بيحصل وبذات شاهى .لحد ما ليل بدأت تتنفس من جديد وشرقت وبدات تخرج المايه من بوقها وبتكح جامد .. فى اللحظه دى .. زين ابتسم وفرح اوى وعمر كمان فرح وليل بتعب بصتلهم وقالت .. كنت هاغرق كنت هااااغرق .. هى ..هى ال...ومن غير ولا كلمه ومن غير اى مقدمات وفى لحظه كان شايلها زين ومقعدها بشويش على الكرسى اللى كان جايبه يوسف .وطلب بسرعه حد من العمال يجبله ملايه علشان يغطوها كويس .وعيونه جت على عمر اللى فهم على طول زين عاوز ايه بالضبط يا دوبك من نظره عيونه .عمر صقف بايده الاتنين وبص لكل الناس اللى كانت واقفه وموجوده وقالهم .. فركش .. فرررركش يا جدعان .. ونكمل بكرة ان شاء الله .أيه ومامتها واختها وكمان خالها كانوا خرجوا وقعدوا فى الاستراحه على انتريه صغير جنب اوضه الاسطى حسن .. وفى وسط ما كانوا بيتكلموا مع بعض خالها افتكر موضوع حريق سعاد وعيالها واللى حصلهم وبصلهم بحزن وقال .. شوفتوا ايه اللى حصل فى البلد لما روحت انا وعبير .أيه ومامتها استغربوا جدا وأيه بصتله وقالت .. خير يا خالو حصل ايه اللهم اجعله خير .خال ايه رد وقال .. الست اللى اسمها سعاد مرات عبد الرحمن الله يرحمه .. ماتت هى وعيالها الاتنين لما الشقه ولعت بيهم كلهم .. وكمان اخوها حسان كان معاهم بس نقلوه على المستشفى فى حاله خطيرة .ام أيه اتصدمت وكمان أيه نفسها مش مصدقه .. وبصت لخالها وقالت .. يا عينى معقول حصل امتى يا خالو الكلام ده .وليل .. ليل اخبارها اوعااااا.خال ايه رد على طول وقال .. اطمنى يا بنتى مفيش حاجه حصلت لها ومحدش قال انها كانت موجوده معاهم اصلا ولا جابوا سيريتها وشكلها كده برضه لسه مظهرتش. أيه براحه واطمئنان ردت وقالت.. الحمد لله وربنا يسترها معاها بنت غلبانه ومسكينه وملهاش حد ابدا .ام أيه ردت وقالت.. سبحان الله ربنا يمهل ولا يهمل .. كانت ست فظيعه ومحدش كان بيحبها خالص من تصرفاتها وعمايلها السودا .. ومن كتر اللى عملته مع جوزها وليل ربنا انتقم منها اشد انتقام .. بس اللى صعبانين عليا العيال الصغيرة ملهمش اى ذنب فى حاجه.. يلا مش هايغلوا على اللى خلقهم .. والحمد لله ان ليل كانت بعيد عن الشقه .وعيونها جت على أيه وعبير وقالت .. اوعوا حد منك يبلغ ابوكم باللى حصل .. كفايه اللى هو فيه .. وكفايه اوى عليه اللى حصله من ساعه من ليل مشيت من بيتنا واختفت .. ولا كان بياكل ولا بيشرب ولا بينام .. وموضوع مرواحه اسكندريه ده كمان انا مكنتش مطمناله خالص وكفايه اللى حصله من المشوار ده .. وليل ربنا يسترها معاها بقى ويطمنا عليها قريب ونعرف مكانها فين بالضبط .خال ايه بصلهم وقال .. هاقوم انا اروح اصلى المغرب فى الجامع اللى جنب المستشفى اجبلكم اى حاجه وانا طالع يا بنات .أيه ردت وقالت .. شكرا يا خالو وبعدين الكافيتريا تحت فيها كل حاجه ما تتعبش نفسك يا حبيبى .. ووقت ما هانحتاح اى حاجه هاننزل نجبها من تحت .وفعلا قام خال ايه وخد بعضه وراح على الجامع وايه كمان استأذنت من مامتها وقالت هاروح اتوضا يا ماما واصلى فى مسجد السيدات انا كمان واقرا شويه قران .امها وافقت وفضلت هى وعبير قاعدين اودام اوضه الاسطى حسن بيرغوا .. وشويه وعبير قامت وقالت انها هاتروح تنام شويه فى الاوضه اللى كانوا قاعدين فيها من ساعه ما وصلوا علشان تعبانه شويه.أيه راحت واتوضت وصلت وقرات شويه قران ودعت لابوها كتير ان ربنا يكمل شفاه على خير .. وقامت وخرجت من المسجد الصغير المخصص للسيدات فى المستشفى.وهى ماشيه وقبل ما تركب الاسانسير قابلت دكتور حسام واقف اودام باب مكتبه .. فابتسم لها وقرب منها وعيونه فى عيونها وقال .. ايه ده ايه ده .. كنتى فين اعترفى وازاى تعدى من اودام باب مكتبى من غير ما تدخلى .. متقلقيش انا مش بخيل بالعكس كريم جدا وهاعزم عليكى بشاى او عصير لو حبيتى .. ولو طولتى القاعده هاجيب سندوتشات.أيه اتحرجت جدا اول لما شافت حسام واقف اودمها وابتسمت وقالت .. ابدا والله انا كنت فى مصليه السيدات بصلى المغرب وقعدت اقرا قرآن شويه ولما خلصت كنت طالعه على فوق على طول ومعرفش اصلا ان مكتب حضرتك هنا.حسام بضحك رد وقال .. ايه ده كله يا بنتى انا بهزر معاكى والله مش بستجوبك .. بس على العموم ده ما يمنعش انى اعزمك على اى حاجه فى مكتبى ده لو معندكيش اى مانع .أيه اتكسفت جدا واتردت ترد وتقول ايه لحسام بس فى الاخر ردت وقالت .. معلش انا اسفه مش هاقدر علشان بس ماما متقلقش عليا وتبعتلى ست عبير زى المرة إللى فاتت اعذرنى يا دكتور حسام .حسام اعجابه بيها ذاد جدا و رد وقال .. مفيش مشكله خالص يا ستى بس ممكن تجاوبيى على السؤال اللى انا سألته ليكى المرة اللى فاتت وعبير جت وخدتك من غير ما سيادتك تجاوبى عليه .أيه افتكرت سؤاله وابتسمت وقالت .. اذا كان كده مفيش مشكله هاجاوب على حضرتك .انا أيه عندى 22 سنه طالبه متفوقه دايما طول مراحل دراستى الحمد لله وكنت حابه ادخل كليه الزراعه قسم أنتاج نباتى ويادوبك لسه مخلصه مشروع التخرج بتاعى من اسبوع ومستنيه النتيجه .وبحلم ان يكون ليا مشروع خاص بيا لوحدى اقدر احقق ذاتى فيه وينجح ويكبر واكون مهندسه مشهورة ومعروفه .حسام اعجب اكتر بيها وبشخصيتها المرحه وكمان تفوقها فى دراستها فارد وقال .. افهم من كده يا بشمهندسه انك عاوزة تعملى مشروعك الخاص وتنجحيه وكمان تكونى مهندسه مشهورة .أيه باستغراب ردت وقالت .. اكيد طبعا دعواتك يا دكتور حسام .. وبعد اذنك بقى علشان فعلا اتاخرت عليهم .ولسه هاتمشى من اودامه وتروح تركب الاسانسير سمعت حسام بيقول .. مهندسه أيه.أيه لفت نفسها وردت وابتسمت على كلمه مهندسه دى وقالت .. نعم يا دكتور.حسام عيونه فى عيونها وابتسم وقال ..أيه تقبلى تتجوزينى ؟!أيه اتصدمت من كلام حسام ومقدرتش تنطق اى كلمه وخدت بعضها بسرعه وركبت فى الاسانسير وعيون حسام عليها وهو مبتسم وهى عيونها فى الارض ووشها احممممر من كتر الكسوف لحد ما باب الاسانسير اتقفل وطلع على فوق وفى اللحظه دى قدرت تاخد نفس طويييييل .زين وعمر بعد ما اطمنوا على ليل انها بقت افضل وكويسه وتقدر تمشى ويرجعوا على الفيلا .. خدوها وركبوها عربيه زين وعمر ساب عربيته وركب جنبها فى الكنبه من وراولسه زين هايركب ويطلع بالعربيه سمع صوت يوسف بينده عليه وقال .. زين مش محتاج اى حاجه اساعدك فيها .زين برخامه رد وقال .. لا شكرا مش محتاج اى حاجه .يوسف بفضول رد وقال.. طيب ولا الانسه ليل محتاجه اى شىء اقدر اقدمه ليها .زين اتنهد وبدا يتعصب ورد وقال .. لا يا يوسف وبعد اذنك بقى .شاهى كانت جت ووقفت جنب عمها بكل دلع وبصت لزين وقالت .. الف سلامه عليها انا مش عارفه بس هى وقعت ازاى بالمنظر ده فى البسين .. معرفتش منها هى وقعت ازى ؟زين رد وقال .. لا معرفتش ومسيرى اعرف .. سلام وفى ثانيه كان مشغل العربيه وطالع بيها وهما واقفين ماكنهم متحركوش.يوسف بغيظ رد وقال.. انا مش عارف بس هو بيتعامل معايا كده ليه ! وليه مهتم باللى اسمها ليل اوى كده الا اذا...شاهى بخوف ردت وقالت .. الا اذا ايه يا عمووو .. اوعى تكون تقصد ان زين الجبالى ممكن يبص او يفكر فى واحده زى دى .. دى شكلها بيئه اوى ومش من مستواه الاجتماعى خالص .. واستحاله اصلا .يوسف رد وقال.. مش عارف .. مش عارف يا شاهى ويارب يكون احساسى غلط.وخدوا بعضهم هما الاتنين وركبوا عربيه يوسف .. ويوسف فى طريقه وصلها للفيلا وبعدها طلع على فيلته هو علشان يستريح ويكون براحته .زين كان وصل بالعربيه ونزل وفتح الباب لى ليل علشان تنزل براحتها وفعلا نزلت واول لما نزلت وقفت وبصت لزين وابتسمت وقالت .. شكرا على كل حاجه .. وشكرا على تعبكوا معايا .. ومن غيركم كان زمانى فى عداد الموتى .زين ابتسم ورد وقال.. بعد الشر عليكى واى حد مكانى انا وعمر كان زمانه عمل كده المهم انك تدخلى دلوقتى وتستريحى وتغيرى لبسك المبلول ده نبقى نكمل كلامنا بعدين .عمر كان نزل ولف وراح وقف معاهم وبصلها وقال .. ناس تقع وتغرق وتلاقى اللى ينقذها بالتنفس الاصطناعى وناس لبسها يتبل وموبيلها يبوظ ومحفظته تبقى شوربه.ليل باستغراب بصتله وضحكت وقالت .. معلش انا اسفه مكنتش اقصد والله سامحنى بس ايه التنفس الاصطناعى ده.زين فى اللحظه دى اتصدم وبرق لعمر وحاول يغير الموضوع وقال ... يالا بينا ندخل علشان ما نتعبهاش اكتر من كده .عمر خاف ينطق او يجاوب على ليل من نظره زين ليه وبصلها وقال .. بعدين بعدين يا ليل هابقى اقولك واشرحهالك بالضبط وفرصه حاجه اقدر امسكها عليكى انتى وهو تنفعنى بعدين لو احتجت ليها مش كده يا زوز.زين واقف بياكل فى نفسه وكان كل خوفه ان عمر يشرح لى ليل اللى حصل بالضبط لما خرجوها من البيسين وخد بعضه ودخل على طول وليل واقفه مش فاهمه اى حاجه وعمر بصلها وقال .. يالا يالا يا بنتى علشان نغير واوعدك ابقى اقولك على اللى حصل بعدين .ويالا بقى علشان البت شوشو وحشتنى اوووووى .ليل ضحكت وبصتله وقالت .. قولتلى بقى علشان كده مستعجل ومش عاوز تقولى على حاجه .. ماشى يا عم ربنا يفرحكم ببعض ويسعدكم انتم الاتنين .وخدوا بعضهم ودخل زين وعمر على جوا وليل راحت على اوضتها علشان تغير لبسها المبلول ده .. واول لما زين وعمر دخلوا اتفاجئوا بوجود الحاج صفوان والحاجه انعام وخالهم صلاح وعدى وفهد .وسلموا عليهم وفرحوا جدا لوجودهم وسألوهم على كل اللى فى السرايه .سميحه باستغراب بصتلهم وقالت .. اومال فين ليل مش شيفاها معاكم يعنى يا عمر اوعوا تكونوا مزعلنها ولا حاجه .عمر رد عليها وقال انها راحت اوضتها علشان تغير وحكالها كل اللى حصل معاها من ساعه ما راحت الشركه الصبح لحد اما رجعوا .سميحه بخوف قامت وقفت وردت وقالت .. يا خبر معقول كل ده يحصل لها من غير ما تبلغونى اخص عليكم اخص انا هاروح اشوفها واطمن عليها بنفسى عقبال ما ام فتحى وميرفت يجهزوا السفرة .. بعد اذنكم يا جماعه هاروح اطمن عليها وارجع على طول .وفعلا سميحه خدت بعضها وخرجت وراحت لى ليل فى اوضتها .الحاجه انعام بصت لسماح وقالت .. مين ليل دى يا بتى اللى بتتكلموا عليها وسميحه خايفه عليها اوى كده ؟سماح حكت لعمها ومرات عمها وكل الموجودين على حكايه ليل كلها وعلى انها بنت يتيمه وملهاش اى حد خالص وزين وعمر حبوا انهم يساعدوها وجابوها تعيش هنا معانا وكمان تشتغل معاهم فى الشركه .وانا وسميحه حبيناها جدا جدا واتاكدوا انها بنت مؤدبه ومحترمه ومسكينه زى ما الشباب قاللهم عليها .وكمان قالتلهم على الشبه الكبير اللى بينها وبين هدى اختها الله يرحمها .وهنا صلاح اتفاجأه واتصدم اول لما قالت اسم هدى اودامه وحس بنغذه فى قلبه وحس كمان بحزن كبير لما بدأ يفتكر زكرياته زماااان ايام شبابه .زين استاذن وطلع على اوضته علشان يغير وينزل قبل الاكل .وعمر كان قاعد فرحان بوجود عدى وفهد اللى مشفهمش بقاله فترة طويله وكانوا مش مبطلين هزار مع بعض وضحك .. بس كمان كانت عيونه بتدور على حبيبته فى كل مكان وقام واستاذن منهم انه هايطلع يغير هو كمان وياخد شور سريع .وفعلا خد بعضه وطلع على اوضته وقبل ما يروح اوضته خبط على باب شاهندا وهى سمحت للى برة انه يدخل .وشاهندا كانت قاعده على التسريحه وبتسرح فى شعرها قبل ما تنزل على تحت و عمر اول لما دخل وعيونه جت عليها ابتسم وقرب منها ووقف فى صهرها وقال .. القمر بتاعى مختفى ليه؟شاهندا بخجل وهى مكمله تسريح شعرها قالت .. يا ابنى اتلم وبطل كلامك ده علشان بتكسف منه جداعمر قرب من وشها اوى اوى لحد ما نزل فى مستواها وهى قاعده وهمس بشافيفه لها وقال .. وانا بمووووت فيكى وانتى مكسوفه كده د وحشتيييبينى اوى اووى اوووى .ولسه هايقرب من خدها ويبوسها .. شاهندا زقته وقامت وقفت وقالت .. اتلم يا مجنننننون انت وبسرعه خرجت من الاوضه ونزلت على تحت .عمر بابتسامه عريضه ابتسم ومشى وهو مغمض عيونه وعايش اللحظه بس للاسف دخل فى الباب بوشه وراسه واتخبط وفاق وقال .. عااااااااااااا .. ومد ايده ودعكها جامد وقال اااااى .. بس يالا مش مشكله علشان خاطرك انتى بس يا روح قلبى وخد بعضه وراح على اوضته .سميحه كانت وصلت لى ليل واطمن عليها انها كويسه وبخير ومفيهاش اى حاجه .واستعجلتها انها تغير لبسها علشان متبردش وكمان علشان مستنينها كلهم على الغداء ومرديتش تجيب سيرة عمها والضيوف اللى عندهم علشان ما تتحرجش وترفض انها تاكل معاهم .ليل من غير ما تعرف اى حاجه بصت لسميحه وقالت .. طيب اتفضلوا كلوا انتم يا سميحه هانم وانا هافضل هنا واكل لوحدى .. مش عاوزة اسبب ليكم اى ازعاج وعلشان تبقوا براحتكم .سميحه قامت وقفت وطبطبت على كتفها بمل حنينه وقالت .. حبيبتى احنا كلنا هنا اسرة واحده وعيب انك تكونى هنا معانا فى الفيلا وتكلى لوحدك ميصحش يا حبيبتى.. ولا عاوزة تزعلينى منك .ليل بخجل ردت وقالت.. حاضر يا سميحه هانم ومقدرش ازعلك طبعا .. ربنا يعلم انا بحب حضرتك اد ايه .سميحه ابتسمت لها وقالت .. وبدام كده يالا ادخلى وغيرى على طول وانا هاروح اشوف داده زينب خلصت ولا لسه وحصلينى على طول يا حبيبتى .ليل بخجل ردت وقالت .. حاضر .وفعلا وشويه وخلصت ليل لبسها على طول اللى كان عبارة عن بلوزه لبنى رقيقه جدا وجيبه طويله وفتحت باب الاوضه وراحت على جوا .الكل كان متجمع وكانوا فى انتظار زين وعمر ينزلوا من فوق واول لما ليل دخلت اتفاجأت بكل الناس دى واتكسفت جدا وكانت لسه هاترجع لاوضتها لمحتها سماح وقربت منها وقالت .. اهلا يا ليل يا حبيبتى تعالى متتكسفيش مفيش حد غريب .. دول اهلنا .ليل بكل خجل قربت وبدات سماح تعرفها بيهم وبلغتها انه عمها ومرات عمها وبدات تسلم عليهم ومدت اديها الاول وسلمت على الحاج صفوان وباست ايده احتراما له وبعده الحاجه انعام اللى اول لما عيونها جت عليها اتفاجات بالشبه الكبير اللى بينها وبين هدى الله يرحمها وقالت ما شاء الله عليكى يا حبيبتى.واول لما وصلت عند صلاح وقربت منه قام وقف وهو مذهول ومد ايده ليها وقال .. اهلا بيكى يا بتى .وده اللى خلى ليل تستغرب نظراتهم اوى ليها وبعدها سلمت مدت ايديها لعدى وسلمت عليه .عدى بهزار بصلها وقال .. وانا بقى يا ستى عدى السيوفى انزلى بس البلد عندنا وقولى اسمى وشوفى ايه اللى هايحصلك ... فابتسمت وقالت اهلا استاذ عدى .الحاج صفوان ضحك وقال .. ده على اساس انك الملك فاروق ومشهور اوى كده يا اخويا .الكل ضحك وعدى بهزار رد وقال .. لا لا الملك فاروق مين بس اللى هاتشبهنى بيه ده يا جدى .. قول السلطان سليمان وحريمه وقعد يضحك .وليل مدت ايديها لفهد وسلمت عليه وهو عرفها بنفسه وراحت خدت بعضها وقعدت بكل خجل جنب سميحه .صلاح عيونه منزلتش من عليها خالص . وصحت جواه زكريات كتيرة كان بيحاول يطويها مع الزمن .. بس اول ما عيونه جت عليها .. اتفتحت كلها اودامه من جديد .وسميحه والحاجه انعام لاحظه كده عليه وتوقعوا هو بيفكر فى ايه بالضبط من ساعه ما ليل دخلت عليهم .زين كان نزل هو وعمر من فوق وعمر غمز لشاهندا اول ما عيونه جت عليها .. وسميحه قامت وقفت وقالت .. يالا يا جماعه اتفضلوا السفره جاهز ودادة زينب حنت علينا وهاتأكلنا .وفعلا الكل قام وراحوا قعدوا على السفرة اللى كانت مليانه بخيرات ربنا كلها .. محاشى ولحوم وفراخ وبط وحمام .. وكمان كان فى جزء مخصص للفطير المشلتت والقشطه والعسل اللى بيعشقهم زين وعمر .وطول الاكل ليل كانت قاعده محرجه ومكسوفه تاكل .. ولحسن الحظ ان سماح كانت قاعده جنبها وكل شويه تجبلها حاجه شكل وتقولها كلى واتغذى كويس علشان العلاج اللى بتخديه .عمر بهزار بصلها وقال .. يا عينى عليكى يا لولو .. مش لاقيه غير خالتو سماح وتقعدى جنبها .. دى هاتظغطك كده يا بنتى وتبقى اد الدرفيل .عدى حب يرد على كلام عمر وقال .. متفكرنيش يا عمر باللى عمتو سماح كانت بتعمله معانا واحنا صغيرين لما نقعد جنبها على السفره .. يا لهوووووى عمرى ما قدرت انساها وهى ماليه الطبق على آخره وبتأكلنا كلنا بالدور نفر نفر .سماح ضحكت وقالت.. اخص عليك يا واد انت وهو د انتم اتلمتوا على بعض مش كنت بغذيكم يا عيال علشان جسمكم يتأسس من صغركم .. انا كده غلطانه يا عمى .الحاج صفوان رد وقال.. سيبك منهم يا سماح يا بتى دى عيال معصعصه ومش بيتمر فيهم خليهم فى اكلهم الماسخ بتاع البيتزا والشاورما اللى بيقولوا عليها دى .الكل فضل يضحك وزين كل شويه كان بيخطف نظره من ليل .وبعد شويه خلصوا اكل والشباب خرجوا مع بعض كلهم يقعدوا فى الجنينه ويقضوا سهرتهم فيها وسميحه طلبت من ليل انها تقعد معاهم وتتسلى .. والحاج صفوان والحاجه انعام طلعوا يستريحوا شويه فى اوضتهم من تعب السفر .وصلاح وسماح وسميحه فضوا قاعدين مع بعضهم يتكلموا عن احوال البلد وعن اخبار العيله .. وشويه افتكروا ايام زمان وزكرياتهم الحلوة مع بعض .صلاح بصلهم بحزن وقال .. ياااااااه اللى اسمها ليل دى سبحان الله شبه هدى جدا الله يرحمها .سميحه ردت وقالت.. فعلا يا ابن عمى .. تشبها جدا وكأن هدى هى اللى اودامنا .. نفس الضحكه ونفس الروح ونفس النظرة فعلااا يخلق من الشبه اربعين .سماح ردت وقالت.. مش قولتلك يا صلاح انها تشبه هدى اوى .صلاح بحزن رد وقال .. يااااااااه لو هدى كانت وافقت على جوازى منها كان زمان هايكون عندنا بنت نفس السن ده تقريبا .بس هى للاسف رفضت جوازى منها علشان كانت بتحب اللى اسمه عبد الرحمن السواق بتاعكم ساعتها .مكنتش تعرف انا كنت بحبها اد ايه وممكن اعمل ايه علشان اخليها تحبنى وتكون سعيده .. ده انا من كتر حبى فيها سميت هدى بنت اختى نعمه الله يرحمها على اسمها .سميحه بحزن ردت وقالت .. الله يرحمهم هما الاتنين ضيعوا شبابهم وحياتهم وعمرهم علشان الحب .صلاح بحزن رد وقال .. فعلا عندك حق .. الله يرحمهم .وفى المستشفى وبالتحديد فى اوضه الاسطى حسن .. كانت أيه هى ومامتها معاه بيطمنوا عليه.. وما صدقوا ان الممرضه كانت مشغوله مع الحاله الخطيرة اللى وصلت من شويه فى الاوضه اللى جنبه .. دخلوا بشويش وقفلوا عليهم الباب وقربوا من الاسطى حسن اللى كان مغمض عيونه واول لما حس بيهم فتح وابتسم .أيه بفرحه بصتله وقالت .. بابا حبيبى اخبارك ايه دلوقتى .حسن رد وقال بصوت افضل من الاول وقال .. الحمد لله يا بنتى .. انا بخير المهم انتم عاملين ايه وطمنونى على ليل اخبارها ايه ظهرت ولا لسه .أيه ردت وقالت .. الحمد لله يا حبيبى احنا كويسين المهم انت .. وليل مسيرها تظهر متقلقش عليها انت عارف ان ليل عاقله وميتخفش عليها واكيد شويه كده وهاتظهر.الاسطى حسن بصلها وافتكر عنوان اهل ليل وخاف لا يكون ضاع وقال.. فين اللبس اللى كنت لابسه ساعه الحادثه .. عاوزه ضرورى فيه ورقه مهمه ومن كتر قلقه وخوفه ان الورقه تكون ضاعت كان عاوز يقوم من مكانه و...