رواية هو والجميلات الجزء الثاني للكاتبة سحر فرج الفصل الحادي عشر
وصل الكل عند القاعه المحددة للحفله علشان افتتاح المشروع الكبير اللى شركة يوسف وباباه نفذته في الغردقه. نزل يوسف ونور من العربيه ومسك ايديها ودخلوا على بابا القاعه. وسيف وملك ومي وخالد بعدهم والكل كان بيرحب بيهم وكان في استقبالهم المهندس اشرف المسئول عن المشروع. دخل الكل وقعدوا في الاماكن المخصصة ليهم. جت واحده لابسه فستان شبه عريان وحاطه مكياج كتير بس كانت موزة موزة وقربت من يوسف وسلمت عليه.
يوسف حب يعرفها على كل اللى معاه. يوسف: الانسه انجى السكرتيرة بتاعتى ومديرة مكتبى. الكل اهلا وسهلا بيكى. يوسف: نور مراتى وملك اختى وجوزها المهندس سيف والمهندس خالد ومي مراته. انچى: اهلا بحضراتكم ونورتوا الغردقه كلها. خالد: الغردقه منورة بيك يا جميل. مي بصتله وضربته بايديها في كتفه فسكت على طول. يوسف استأذن منهم كلهم وقام معاها علشان يرحب بالضيوف. نور: ايه ده انتى هاتسبنى لوحدى مش هاجى معاك ولا ايه.
يوسف: تيجى معايا فين بس يا نور انا رايح العب. انا رايح اقابل الناس اللى جايه للافتتاح وارحب بيهم. نور: طيب ماشى. سيف بص على نور ولاحظ انها حزينه وزعلانه بس طبعا مش قادر يعمل لها حاجه. ملك كانت عماله تتكلم مع سيف وسيف بيهزر معاها وهي تدلع عليه وكانوا كأنهم في شهر العسل. وكذلك خالد ومي عمالين بيحبوا في بعض وخالد عمال بيهزر معاها. وده اللى خلى نور مش طايقه نفسها وكانت غيرانه من طريقه سيف مع ملك.
قامت تتمشى في الحفله وعيونها جت على يوسف واد ايه كان الكل بيحبه وبيحترمه. انجى كانت واقفه جنبه وعماله تقرب منه وتحط اديها على كتفه بس هو مش في دماغه خالص. قربت منهم نور واول ما شافها يوسف رحب بيها. يوسف: اهلا يا حبيبتى زهقتى ولا ايه. نور: اه زهقت من القاعده لوحدى وقولت اشوف انت فين واقف معاك. يوسف: اومال الجماعه فين؟ نور: هناك ماكنهم بس كل واحده معاها جوزها عمالين بيهزروا ويتكلموا مع بعض.
يوسف: معلش حبيبتى انتى عارفه ظروفى ولازم اكون في استقبال الضيوف. نور: ماشى يا يوسف انا هاروح اكلم احمد وماما واطمن على مليكه. يوسف: ماشى يا حبيبتى وانا شويه وهاحصلك. خرجت نور بره القاعه خالص وراحت على ركن هادى اوى في الجنينه وبدأت تعيط جامد اوى اوى. هل من غيرتها على سيف؟ ولا علشان يوسف من ساعه ما جم الغردقه مش مهتم بيها خالص ومهتم بشغله اكتر. ولا مليكه وحشتها هي واحمد لانها اول مرة تبعد عنهم كده.
بس هي بدأت تعيط جامد جدا لما افتكرت مامتها وحنيتها معاها واد ايه هي مفتقداها وكانت تتمنى انها تكون موجوده وتترمى في حضنها كل لما تحس بالخنقه اللى هي حساها دى. وفجاه وهي بتعيط قرب منها شخص. سيف: نور نور: سيف سيف: مالك يا نور بتعيطى ليه؟ وليه خرجتى بره وسبتينا. نور: انت اللى بتسأل يا سيف مالى. سيف: في ايه يا نور مالك قوليلى. نور: ماليش يا سيف واتفضل سبنى لوحدى وارجع لمراتك حبيبتك وعيطت جامد وبصوت عالى.
سيف: لو سمحتى يا نور قوليلى فيه ايه علشان خاطرى. نور: سيبنى يا سيف لو سمحت مش عاوزة اشوفك سيبنى. سيف: براحتك يا نور بس ارجوكى اهدى لو سمحتى وسابها ومشى. دخل سيف على جوه وشاف خالد ومي وهما بيتكلموا وكانت ملك راحت على الحمام واستاذن خالد أنه يخرج يشرب سيجارة بره وقال لسيف خليك مع مي عقبال لما ارجع. وفعلا خرج خالد علشان يشرب السيجارة بره. مي: مالك يا سيف في حاجه ولا ايه وشك قالب كده ليه؟
سيف: نور يا مي نور عماله تعيط برة ومش عارف ليه. مي: انت بتقول ايه وهي بتعيط ليه وانت خرجت وراها ليه انت اتجننت. انا كنت خارج بره اشرب سيجاره وسمعت صوت حد بيعيط قربت منها ولقيت نور هي اللى بتعيط وسألتها مالك قالتلى امشى وسيبنى لوحدى. مي: طيب ليه وفي ايه. سيف: روحلها يا مي لو سمحتى وشوفيها مالها. مي: حاضر يا سيف خليك انت هنا علشان ملك لو جت. خالد كان خرج على الجنينه وشاف نور وهي قاعده لوحدها وبتعيط.
خالد: مالك يا نور في ايه وبتعيطى ليه. نور: مفيش يا خالد أصل تعبانه شويه. خالد: اكيد بتعيطى لان مليكه وحشاكى صح. نور: اه مليكه وحشانى وماما كمان وحشانى اوى اوى كان نفسى تكون عايشه واترمى في حضنها واحكيلها كل الوجع اللى جوايا. خالد: انا زى اخوكى يا نور لو سمحتى قوليلى في ايه. نور: عيطت جامد وجت مي على صوتها وشافت خالد وهو معاها وبدأت تهديها. خالد: اهدى يا نور لو سمحتى واحكلنا في ايه وبتعيطى ليه.
نور: غصب عنى غصب عنى. انتم اكتر اتنين عارفين انا وسيف كنا بنحب بعض اد ايه وايه الظروف اللى احنا مرينا بيها. وربنا اعلم انا سبته ليه وعشان ايه. كان لازم أنقذ أمى وكان لازم تعمل عمليه كبيرة وهاتتكلف فلوس كتير جدا. ماكنش فيه حل غير أنى اوافق على يوسف بعد ما ماما شرطت أنها مش هتعمل العمليه غير لو اتجوزت يوسف. وانا وافقت وسبت سيف وخليته افتكر أنى وافقت على يوسف علشان فلوسه. بس سيف ما يعرفش الحقيقه.
مي: بس ده في الماضى يا نور كل الكلام ده وانتى دلوقتى واحده متجوزة وعندك بنت ولازم تنسى سيف نهائى. خالد: فعلا يا نور لازم تنسى الماضى ومع الوقت هاتقدرى تنسى. نور: انسى اذاى بس وهو طول الوقت اودام عينى هو وملك. كل لما اشوفه مع ملك بحس انى بموت من جوايا. غصب عنى والله مش بايدى.
يوسف انسان كويس جدا وانا مش عاوزة اخسره وحاولت احبه واقرب منه وكنت فعلا بدأت أحبه وبذات لما جبت مليكه بس مش عارفه ايه اللى حصل من ساعه ما اتجوز سيف من ملك. مي: معلش يا حبيبتى لازم تضغطى على نفسك علشان خاطر يوسف وملك هما مالهش ذنب في اى حاجه. نور: والله يا مي انا بحب ملك جدا وبعتبرها اختى بس غصب عنى والله. خالد: اهدى كده يا نور وصلى على النبى وان شاء الله ربنا هايقف معاكى ويخليكى تنسى كل حاجه.
نور: ان شاء الله يا خالد. وفجاه مي: ملك الكل بص بزهول لما شافوا ملك بتعيط ودموعها مغرقاها واكيد سمعت كل اللى نور قالته لخالد ومي. مي قربت منها. مي: تعالى يا ملك. ملك: الكلام اللى سمعته ده حقيقى يا مي. مي: اهدى يا ملك لو سمحتى. ملك: نور وسيف كانوا بيحبوا بعض خالد: اهدى يا ملك ده كان حوار كده زمان وهما في الكليه بس هي دلوقتى متجوزة من يوسف وعندها مليكه.
ملك: يعنى كانوا يعرفوا بعض وبيحبوا بعض ولا لا قولولى الحقيقه لو سمحتوا. نور كانت عماله تعيط جامد ومش عارفه تتكلم خالص لأنها في موقف زى الزفت ومحدش كان يتخيل أن ملك تسمع الكلام ده كله. ملك قربت من نور ملك: انتى يا نور انتى! انتى اللى سيف كان بيحبها في الكليه؟ انتى يا نور اللى اعتبرتك اختى وحبيتك وقولت ربنا عوضنى باخت وبقيتى مرات اخويا. نور: غصب عنى والله يا ملك انا حبيبتك جدا واعتبرتك فعلا اختى.
وعمرى ما عملت حاجه وحشه ليكى. ملك: اومال ايه الكلام اللى سمعته ده يا نور. انتى لسه بتحبى سيف ومش قادرة تنسيه. انا مش مصدقه انا بحلم صح انا بحلم ده اخر شىء كنت أتوقعه انتى يا نور انتى. فجاه.
جريت ملك وفضلت تجرى وتجرى وتخبط في ناس موجوده في المكان ووقعت على الأرض وقامت تانى وجريت لحد خرجت من باب الفندق وخالد كان بيجرى وراها ويادوبك خارجه من باب الفندق جت عربيه سريعه جدا جدا وخبطت ملك ووقعتها على الأرض وفي ثوانى كانت ملك على الأرض وكانت غرقانه في دمها والأرض كانت غرقانه دم. خالد: ملك ملك ملك ردى عليا ارجوكى ويادوبك جت جرى مي ونور وشافوا منظر ملك وهي غرقانه في دمها وخالد جنبها على الأرض.
خالد: حد يتصل بالاسعاف بسرعه بسرعه. يا ترى ايه اللى هايحصل لها؟
رواية هو والجميلات الجزء الثاني للكاتبة سحر فرج الفصل الثاني عشر
ملك فضلت تجرى وتجرى لحد ما خرجت برة الفندق خالص ولسه بتجرى بسرعه وفي ثوانى جت عربيه سريعه جدا خبتطها ووقعتها على الأرض. خالد كان بيجرى وراها ولسه يا دوبك خارج من الباب شاف ملك والعربيه بتخبطها. خالد: ملك ملك ارجوكى قومى يا ملك وفجاه شاف الدم نازل من كل جسمها وراسها بتنزف جامد. وفي ثوانى كانت وصلت مي ونور وشافوا ملك مرميه على الأرض وغرقانه في دمها وخالد جنبها.
مي: خالد في ايه وايه اللى حصل وملك جرالها ايه ارجوك قولى يا خالد. نور قعدت جنب ملك على الأرض وكانت منهارة وعماله تصرخ جامد ومش مصدقه اللى حصل لملك كده وكانت عماله تفوقها لكن للاسف ملك كانت مش بترد. خالد بسرعه اتصل على سيف وقاله اطلع برة الفندق بسرعه وهات يوسف. سيف: في ايه يا خالد نور حصلها حاجه. خالد: بقولك بسرعه اخلص.
سيف كان خرج بسرعه من غير ما يقول ليوسف وجرى وخرج على الباب برة واتصدم اول لما شاف الكل قاعد على الأرض وناس كتير ملمومه. قلبه كان حاسس ان اللى في الارض دى نور كام خايف يقرب لاتكون فعلا نور اللى غرقانه في دمها مش في دماغه ابدا انها ملك. قرب بسرعه بس شاف نور ومي وخالد وللاسف لقى ملك مراته وحبيبته واللى حامل في ابنه هي اللى غرقانه في دمها. سيف: ملك ملك ايه اللى حصل حد يقولى.
مي: مش وقته يا سيف هاتوا بسرعه عربيه. سيف... هات العربيه بسرعه يا خالد. خالد قام بسرعه يجرى وجاب عربيته وشالوا ملك من الأرض وبسرعه راحوا على أقرب مستشفى.
يوسف كان في الحفله وكان بيرحب بضيوفه والناس اللى جت من اوربا مخصوص ومن كذا دوله عربيه علشان المشروع الجديد ده. لكن للاسف جه المهندس اشرف واستأذن من الناس اللى كانوا مع يوسف وطلب أنه يكلمه على انفراد. يوسف: خير يا اشرف في ايه. اشرف: الصراحه يا باشمهندس في خبر مش حلو لسه عارفه دلوقتى حالا. يوسف: خبر! خبر ايه يا اشرف انطق.؟
اشرف: في واحده من اللى كانوا مع حضرتك عربيه خبتطها بره الفندق ونقلوها على المستشفى وهي غرقانه في دمها. يوسف: انت بتقول ايه يا اشرف ومين فيهم ومستشفى ايه. اشرف: اهدى يا باشمهندس وتعال نروح بسرعه وراهم على المستشفى. وفي ثوانى كان يوسف خرج هو وأشرف وركبوا العربيه وراحوا على المستشفى. وصلوا على هناك ودخلوا بسرعه على الاستقبال وسألوا على الحاله وبلغوهم انها فوق في الطوارىء.
جرى يوسف بسرعه لحد الاسانسير وطلع على فوق ونزل اودام الطوارىء. اول لما خرج شاف سيف قاعد على الأرض وعمال يعيط جامد. وخالد واقف جنب مي اللى عماله تعيط وكان فستانها كله غرقان دم. وبسرعه عينه كانت بدور على ملك وعلى نور بس للاسف شاف نور كانت منهارة من العياط وعماله تعيط جامد. جرى عليها ومسك ايديها وقالها ملك فين يا نور؟ ملك اختى فين يا خالد. ملك اختى فين يا مي. ملك مراتك فين يا سيف. حد يقولى اختى فيييييين.
خالد: اهدى يا يوسف ان شاء الله هاتكون كويسه وهاتقوم بالسلامه ما تقلقش. يوسف: ايه اللى حصل؟ وايه اللى خرجها بره اصلا؟ وانتم كنتم معاها ليه كلكم. حد يفهمنى هاتجنن الدكتور فتح الباب وخرج الكل جرى عليه وسأله على ملك. الدكتور: اهدوا يا جماعه لو سمحتوا الحاله خطيرة جدا وعندها نزيف على المخ ونزيف من الرحم هي كانت حامل. سيف: ايوا يا دكتور كانت لسه في شهورها الاولى انا جوزها ارجوك طمنى.
الدكتور: للاسف يا استاذ الخبطه كانت جامده جدا وحصلها نزيف داخلى ونزيف على المخ واكتشفنا ان في نزيف من الرحم كمان ولازم ننقلها فورا على العمليات. مي ونور كانوا عمالين يعيطوا جامد ومنهارين جدا. يوسف كان مش مصدق اللى بيحصل حوليه ومش مصدق كل اللى حصل لأخته. سيف قعد على الأرض بعد ما قال للدكتور اللى حضرتك تشوفه وفعلا الدكتور طلب بسرعه انها تتنقل على اوضه العمليات فورا.
خالد قعد جنب سيف اللى منهار على ملك ومش مصدق اللى حصلها. نور: انا السبب يا مي انا السبب مي: اهدى يا نور علشان خاطرى وان شاء الله هاتقوم بالسلامه. نور: انا السبب انا لا يمكن هاسامح نفسى ابدا. يوسف: انتى السبب ليه يا نور انتى عملتى ايه لملك. مي: اهدى يا يوسف وبعدين هاتفهم كل حاجه. يوسف: اهدى ايه حد فيكم يقولى ايه اللى حصل لاختى انطقوا.
خالد: ارجوك يا يوسف مش وقته خالص الكلام ده اهدى كده ووحد الله وادعيلها انها تقوم بالسلامه ان شاء الله. يوسف مسك ايده وبعزم ما فيه وخبطها في الحيطه. وفي لحظه تليفون يوسف رن وكان أبوه اللى بيرن عليه. يوسف: الووو الاب: ايوا يا يوسف يا ابنى خير اخبارك ايه واخبار الحفله ايه. يوسف بصوت حزين: الحمد لله يا بابا وكله تمام. الاب: اومال صوتك زعلان كده ليه في حاجه يا ابنى ولا ايه. يوسف: ابدا يا بابا تعبان شويه.
الاب: واختك وجوزها عاملين ايه عمال ارن عليها مش بترد. يوسف: كلهم كويسين يا بابا بس تلاقيها مش سامعه من صوت الموسيقى اللى في الحفله. الاب: ماشى يا ابنى ربنا معاكم ابقى سلم عليها وعلى سيف ونور. يوسف: حاضر يا بابا حاضر. قفل الموبيل وكان الكل خايف ومتوتر وحزين على اللى حصل لملك وعدى اكتر من اربع ساعات ومفيش اى حد خرج علشان يطمنهم على ملك. فجاه الباب اتفتح وخرج الدكتور وعلى وشه التعب والحزن.
سيف ويوسف جريوا عليه وسألوه طمنا يا دكتور ملك عامله ايه. الدكتور: العمليه كانت كبيرة جدا وخطيرة واحنا عملنا كل اللى علينا وقدرنا نوقف النزيف. بس للاسف البيبى نزل. وادعوا ربنا أن الكام ساعه الجايين يعدوا على خير وتعدى من المرحله الخطر اللى هي فيها. سيف: مش مشكله البيبى المهم عندى ملك ارجوك يا دكتور اعمل كل حاجه علشان تقوم بالسلامه ارجوك يا دكتور.
الدكتور: والله عملنا كل الى نقدر عليه والباقى على ربنا ادعولها تقوم بالسلامه وبعد الكام ساعه الجايين على خير. نور كانت عماله تعيط جامد ويوسف مستغرب من عياط نور وكان هايتجنن ويعرف ايه اللى حصل لأخته. عدا كذا ساعه والنهار بدأ يطلع والكل كان قاعد بلبس الحفله والتعب والارهاق والخوف في نفس الوقت على ملك كان ظاهر عليهم.
يوسف: خالد خد مي ونور وارجع على الفندق وغيروا هدومكم واستريحوا شويه وانا وسيف هانفضل هنا ما تقلقوش. سيف: يوسف عنده حق خد البنات يا خالد وغيروا هدومكم وابقوا تعالوا لو عاوزين تانى. خالد: انت بتقول ايه بس يا سيف انت ويوسف انا مش هامشى واسيبكم لوحدكم في الظروف دى. يوسف: علشان خاطرى يا خالد خدهم خليهم يغيروا لبسهم وابقى تعال يا عم تانى. خالد: ماشى يا جماعه هاروح اوصلهم على الفندق وارجع لكم على طول.
سيف: ماشى يا خالد. وفعلا خالد خد نور ومي ونزلوا على تحت وخد عربيه يوسف ورجع على الفندق. الدكتور جه ودخل اطمن على ملك وبلغهم ان الحاله زى ما هي لسه خطيرة. سيف: لو سمحت يا دكتور عاوز ادخل اشوفها. الدكتور: هي مش حاسه خالص ولا هاتحس بيك لما تدخلها. سيف: انا عارف يا دكتور بس ارجوك انا حاسس لما ادخل لها انها هاتفوق وهاتحس بيا وبيوسف كمان.
الدكتور: ماشى بس ارجوكم تلت دقائق مش اكتر من كده وواحد واحد اللى يدخل لها. سيف: حاضر يا دكتور متشكرا جدا ليك. سيف لبس لبس خاص بالعنايه المركزه علشان يدخل لملك وكان أعصابه متوترة جدا اول لما شافها وهي على السرير ومتربطه من دماغها ووشها ظاهر عليه كدمات كتير. سيف قرب من ملك وبدأت دموعه تنزل على حالها وعلى منظرها وكان ماسك نفسه بالعافيه. قرب من ملك ومسك ايديها وغصب عنه دموعه نزلت وبدأ يعيط.
سيف: فوق يا ملك. فوقى يا حبيبتى انا مش هاقدر اعيش من غيرك. انا بحبك اوى اوى يا ملك اوعى تمشى وتسبينى. ارجوكى يا ملك ارجوكى وفي لحظه ملك فتحت عينيها وحركت اديها ومسحت دموع سيف. سيف مش مصدق نفسه انها فاقت وصحيت وفتحت عيونها. سيف: ملك حبيبتى الحمد لله الف حمد وشكر ليك يارب. ملك: سيف سيف: عيون سيف وحياه سيف يا ملك. ملك: انت كنت بتحب نور. سيف: ارجوكى يا حبيبتى بلاش تتعبى نفسك وانا عمرى ما حبيت حد غيرك انتى وبس.
ملك: انت بتحبنى يا سيف. سيف: انا بموت فيكى يا حبيبتى. ملك: وانا كمان بحبك اوى يا سيف. سيف: وانا بموت فيكى يا قلبى. ملك: انا اسفه يا سيف كان نفسى احققلك اللى نفسك فيه واجبلك البيبى اللى انت عاوزة. سيف: انا عاوزك انتى وبس يا حبيبتى انتى كل حاجه ليا. ملك: يوسف اخويا فين؟ سيف: يوسف بره هايتجنن عليكى. ملك: طيب لو سمحت خليه يجى عاوزة اشوفه. سيف، ثوانى وهايكون هنا يا حبيبتى.
وفي ثوانى كان دخل يوسف بعد ما لبس البس بتاع العنايه وقرب من أخته وهو بيعط عليها. ملك: يوسف حبيبى ما تزعلش ارجوك انا كويسه وهارجع تانى زى الاول ونضحك ونهزر ونلعب مع مليكه. يوسف: ما تتعبيش نفسك يا حبيبتى ارجوكى. ملك: لازم اقولك على حاجه يا يوسف. سيف قلبه كان هايقف اول لما ملك قالت كده وكان خايف لا ملك تكون سمعت حاجه عن نور. ملك: يوسف نور بتحبك خلى بالك منها وخلى بالك على مليكه وماما وبابا.
يوسف: ما تقوليش حاجه يا ملك ارجوكى ما تتعبيش نفسك. ملك: انا فرحانه أن آخر اتنين هاشوفهم هو انت يا يوسف وسيف حبيبى. سيف قرب منها ومسك ايديها وباسها وقالها ارجوكى لو سمحتى ما تقوليش حاجه وان شاء الله هاتقومى بالسلامه ونرجع نهزر ونضحك زى الاول. ملك: خلى بالك على سيف يا يوسف علشان خاطرى وغمضت عينيها. وفي ثانيه أعلنت الأجهزة في العنايه عن توقف القلب. يوسف جرى ينده الدكاترة بسرعه. سيف: ملك ملك.
ملك ارجوكى ما تسبنيش انا بحبك يا ملك اوعى تموتى وتسببنى يا حبيبتى. الكل كان جه بسرعه وخرجوا يوسف وسيف بره الاوضه. وحاولوا يعملوا ليها تنشيط للقلب وصدمات بالكهرباء. لكن للاسف خرج الدكتور وبلغهم انها ماااااتت. الدكتور: البقاء لله سيف: لا لا لاااااااااا يوسف وقع على الأرض من شده الصدمه وكان منهار جدا. خالد كان جاى جرى بعد ما سمع صوتهم وعرف واتأكد من منظرهم وحالتهم وحزنهم أن ملك ماااااتت.
يا ترى ايه تواقعتكم الايام القادمه. معلش انا عارفه أن الحلقه حزينه بموت ملك بس للاسف غصب عنى.
رواية هو والجميلات الجزء الثاني للكاتبة سحر فرج الفصل الثالث عشر
سيف: ملك. ملك ارجوكى ما تسبنيش انا بحبك اوى يا ملك. اوعى تموتى وتسبينى يا حبيبتى. الكل بسرعه كان جه وخرجوا يوسف و سيف بره الاوضه وقفلوا الباب. وحاولوا يعملوا ليها تنشيط للقلب وصدمات كهرباء بس للاسف. خرج الدكتور وقالهم البقاء لله. سيف: لا لا لااااااااا ووقع يوسف على الأرض من شده الصدمه وكان منهار جدا. خالد كان جاى جرى بعد ما سمع صوتهم وشاف منظرهم وعرف واتأكد أن ملك حصلها حاجه.
خالد قرب منهم هما الاتنين وقرب من سيف وخده في حضنه وحاول يهديه شويه لكن دموعه غصب عنه نزلت على منظر صاحب عمره ويوسف اللى كان منهار تماما. وراح وخد يوسف في حضنه وفضلوا التلت صحاب مع بعض وفي حضن بعض وفي حزنهم كمان. بدءوا يستوعبوا اللى بيحصل حوليهم. خالد: اهدى يا سيف ما تعملش في نفسك كده. اهدى يا يوسف انت كمان وفوق وشوف هانعمل ايه وهاتبلغ والدك ووالدتك ازاى.
يوسف: انا اللى عاوز أعرفه ايه اللى حصل بالضبط وايه اللى خرج ملك بره الفندق وكانت بتجرى ليه قولى يا خالد. خالد، مش وقته خالص الكلام ده يا يوسف سيبه بعدين المهم دلوقتى واللى المفروض يتعمل. يوسف: مش عارف هبلغهم ازاى الخبر ده مش عارف يا خالد قولى اعمل ايه انا هاتجنن انا مش مصدق اللى بيحصل ده كله. انا لو قولتلهم إن ملك ماتت ممكن يموتوا فيها. صحه بابا وماما ضعيفه ومش هايسحملوا الخبر ده.
انا هاتصل بالمهندس اشرف ويجى يخلص هو كل حاجه بسرعه ويحجزلنا على أقرب طيارة علشان ننزل عليها. يوسف: وانت يا خالد روح لنور ومي وخليهم يجهزوا الشنط وبلغهم بالخبر ده وابقى هاتهم وحصلنا على المطار. خالد: ساكت ليه يا سيف ارجوك قول حاجه وحد الله كده وفوق علشان نشوف هانعمل ايه وانا هاتصل بى بابا يخلص كل حاجه في مصر والمطار. علشان خاطرى يا سيف احنا كلنا زعلانين عليها ربنا يرحمها.
وعلشان خاطر البنات اللى معانا انا اصلا مش عارف هاقولهم ازاى الخبر ده. سيف: ملك ماتت يا خالد انا كنت بحلم انا وهي نشوف ابننا أو بنتنا انا مش عارف اعمل ايه من غيرها. كل لما اقرب من حاجه واحبها تروح منى ليه يا خالد ليه فهمنى. يوسف كان سامع كلام سيف وقلبه بيتقطع على أخته الوحيده اللى ماتت في عز شبابها وهي لسه عروسه ما لحقتش تفرح وكانت حامل كمان. كل حاجه حلوة راحت معاها.
عدى الوقت وخالد كان راح على الفندق وبلغ مي ونور اللى كانوا مصدومين من الخبر ده. نور فضلت تصرخ وتعيط وتقول انا السبب انا السبب هي ماتت بسببى انا. انا مش هاقدر اسامح نفسى ابدا. ربنا كان خدنى انا وسابها هي. مي: والدموع مغرقاها اهدى يا نور حرام عليكى اللى بتعمليه في نفسك ده. ربنا يرحمها ويصبر سيف ويوسف على فراقها. وابوها وامها الله يكون في عونهم ويصبرهم.
خالد: اهدوا يا جماعه ويالا بسرعه جهزوا الشنط علشان هانطلع على المطار.
وصل الكل على المطار وكان سيف ويوسف مع ملك في قلب العربيه بتاعه الاسعاف ودخلوا للمطار من جوا بعد ما اطمنوا انها دخلت الطيارة. خالد كان وصل ليهم وكان معاه نور ومي. نور جريت على يوسف واترمت في حضنه وفضلت تعيط جامد. مي راحت لسيف اخوها وخدته في حضنها وهو ما صدق اترمى فيه وبدأ يعيط اوى اوى وبصوت عالى وكان الحزن هو سيد الموقف على الكل. يوسف اتصل وهو في المطار وبلغ ابوه اللى اتصدم اول لما سمع الخبر.
ومكنش مصدق ابدا اللى حصل لابنته. ركبوا الطيارة وبعد نصف ساعه كانوا وصلوا لمطار القاهرة والكل كان في استقبالهم. الام كانت في حاله انهيار تام لما عرفت الخبر من جوزها ومن الصدمه ماكنتش قادرة تتحرك ولا تتكلم خالص ونقلوها على المستشفى. خلص المهندس اشرف وخالد كل إجراءات المطار وخدوها على المسجد علشان يصلوا عليها ويودعوها الوداع الاخير.
الكل كان في حاله من الحزن والأسى على ملك واللى حصل لها فجاه ومحدش كان متوقع ابدا اللى بيحصل ده. وبعد الصلاه راحوا على مدافن الأسرة ودفنوها وكان سيف في حاله من الانهيار. يوسف كان ماسك باباه وكان خايف عليه جدا من الصدمه. خلصوا الدفن والكل راح على المستشفى علشان يطمنوا على الام. واول لما وصلوا المستشفى راحوا على الاوضه بتاعه الام. يوسف جرى على أمه وخدها في حضنه وفضلوا يعيطوا جامد جدا.
الام: فين ملك يا يوسف؟ فين اختك يا حبيبى؟ ملك راحت فين يا نور؟ ودوتوا بنتى حبيبتى فين؟ سيف قرب منها واترمى في حضنها وفضل يعيط جامد اوى لحد ما الكل كان عاوز يهديه ويخرجه بأى طريقه.
عدى كذا يوم والحزن كان هو اللى ميسيطر على الكل. سيف كان رجع لبيته لان امه كانت تعبت جدا بعد موت ملك ومكنتش متخيله انها تموت كده وبالصوره دى. وده اللى خلى مي وخالد يقعدوا معاهم لحد ما الفترة دى تعدى وسيف يكون رجع لنفسه ولحياته الطبيعيه. لانه من ساعه موت ملك وهو اكتر الوقت قافل على نفسه ورافض الاكل والكلام مع اى حد حتى مي أخته.
يوسف كان حزين جدا وكان رافض الكلام مع نور خالص وكان بينام لوحده في اوضه تانيه بعيد عنها. نور حاولت اكتر من مرة انها تتكلم معاه بس هو للاسف كان بيرفض. و المرة الوحيده اللى كلمها كان عاوز يعرف ايه اللى حصل بالضبط وهما في الحفله وايه اللى ملك شافته أو سمعته وخلاها تفضل تجرى كده لحد ما تخرج بره الفندق والعربيه تخبطها. لكن الاجابه الوحيده من نور للاسف هي العياط.
وده اللى كان بيخلى يوسف يتأكد أن في حاجه حصلت وخلت ملك تجرى والعربيه تخبطها وتكون النتيجه موتها. سيف كان في اوضته والباب خبط وكانت مي عاوزة تطمن عليه. مي: ارجوك يا سيف طمنى عليك لو سمحت. سيف: لو سمحتى يا مي سبينى لوحدى مش عاوز اكلم مع حد خالص. مي: ارجوك يا سيف ماما تعبانه علشانك اوى حاول تيجى تشوفها وتطمن عليها. سيف: قولتلك سبينى لوحدى. مي مشيت وفقدت الامل أنه يفتح لها الباب بس فجاه سيف فتح ونده عليها.
مي: الحمد لله يا حبيبى طمنى عليك عامل ايه؟ سيف: مش كويس وبموت يا مي وهاتجنن ومش مصدق اللى حصل لملك وأنها تموت كده وعلشان ايه وايه اللى حصل؟ مي: مش وقته يا سيف ومفيش حاجه اصلا حصلت. سيف: لا في وانا متاكد ان ملك شافت حاجه او سمعت حاجه. ارجوكى يا مي انا بموت من جوايا علشان اعرف ايه اللى حصل بالضبط. مي: الصراحه يا سيف انت لما قولتلى روحى شوفى نور بتعيط ليه.
روحت لقيت خالد معاها وكانت منهارة وعماله تكلمه واول لما شافتنى حكينا عن الماضى كله وعن حبك انت وهي وعن موت والدتها. وللاسف ملك كانت واقفه واحنا مش واخدين بالنا وسمعت كل الكلام اللى قالته نور. سيف: انتى بتقولى ايه؟ ملك عرفت اللى كان بينى وبين نور. وهي بتموت بتوصى يوسف عليها. ازاى. ازاى. وليه ما قالته ليه ولا جت سألتنى ليه يا مي ليه؟ مي: اهدى يا سيف علشان خاطرى واللى حصل حصل.
ده نصيبها وربنا اللى كاتب لها كده. سيف: ملك كانت حامل يا مي فاهمه يعنى ايه. يعنى مراتى يعنى حبيبتى وكل حاجه حلوة ليا. انا من ساعه ما نور اتجوزت وخلفت مليكه وبقيت اعتبرها ماضى ولازم انساه. وقربت واتعلقت من ملك وحبتها جدا جدا. بس عمرى ما تخيلت أن يحصل كده ابدا. انا بموت يا مي بموت من جوايا وحاسس أن موت ملك كسرنى وكلامك ده هايحسسنى بالذنب أنى ما قولتلهاش عن العلاقه اللى كانت بينى وبين نور.
انا خوفت اقولها لاخسرها لما تعرف كده وان نور مرات اخوها كانت حبيبتى الاولى. مي: ربنا يرحمها المهم عاوزين نشوف نور ونطمن عليها وتشوف هي قالت ليوسف حاجه ولا لا.
رواية هو والجميلات
