رواية هو والجميلات الجزء الثاني للكاتبة سحر فرج الفصل الثامن

وصلوا على مطار الغردقه ونور كانت مع ملك والشباب كانوا معاهم الشنط لحد ما خرجوا بره المطار وركبوا عربيه وصلتهم على الفندق.
قعدت نور وملك في الاستقبال عقبال ما يوسف وسيف يشوفوا الحجز بتاع الاوض.
وفعلا الشيال شال الشنط وراحوا معاه ووصل كل واحد لأوضته واتفقوا أنهم هايستريحوا من تعب السفر ويتجمعوا باليل بس اهم حاجه أن مفيش حد يبلغ خالد او مي أنهم معاهم في نفس الفندق.

دخل سيف و ملك على اوضتهم ويا دوبك حط الشيال الشنط وقفل الباب وراه.
سيف: وحشتينى يا روح قلبى والفندق ده فكرنى بحاجات كتير جدا من شهر العسل.
ملك: فعلا يا سيف انا حاسه اننا لسه في شهر العسل بس زاد علينا ضيف جديد وهايكون معانا.
سيف: اهلا بالضيف وام الضيف انتم روح قلبى انتم الاتنين وربنا يقدرنى واقدر اسعدكم يا حبيبتى.

في اوضه يوسف فتحت نور البلكونه علشان تشوف المنظر الطبيعى للبحر اللى بتحبه كتير اوى وكان نفسها تيجى الغردقه من زمان.
بس للاسف ظروف تعب مامتها ووافتها مخلهاش تقضى شهر العسل في اى مكان زى اى عروسه بتقضيه.
وده بيكون حلم اى بنت قبل الجواز.
قرب يوسف من وراها وهي واقفه ومسكها من وسطها وباسها بوسه ناعمه وهاديه على رقبتها.
نور كانت سرحانه في جمال المنظر وما بدلتش يوسف الاحساس اللى هو حسه تجاها.

يوسف: للدرجه دى سرحانه في البحر وجماله يا حبيبتى.
نور: يوسف انت هنا من امتى. ما حستش بيك خالص.
انا فعلا سرحت في البحر والمنظر الطبيعى الروعه ده سبحان الله.
يوسف: انتى اول مرة تيجى اكيد الغردقه وتشوفي جمالها.
نور: فعلا يا يوسف انا اول مرة اجى بحر اصلا.
انا عمرى ما روحت لأى مكان فيه بحر.
انا يا دوبك بشوفه في التلفزيون وبس.
يوسف: من هنا ورايح هاوديكى اى مكان تحبيه وألف انا وانتى العالم كله.

نور: بجد يا حبيبى.
يوسف: بجد يا روح قلب حبيبك.
يوسف: انا هاخد شور سريع واغير هدومى وانزل اشوف المشروع واخباره ايه لان خلاص مفيش وقت.
نور: ايه ده على طول كده اومال هانتفسح امتى بقى إن شاء الله.
يوسف: يا حبيبتى عقبال ما تنامى شويه من تعب السفر هتلاقينى عندك على طول.
نور: ماشى يا حبيبى اللى تشوفه.
يوسف: نور انتى فعلا بتحبينى.
نور: طبعا يا يوسف بحبك ليه بتسال السؤال ده.

يوسف باس راسها وقالها ابدا يا حبيبه قلبي كنت عاوز اطمن مش اكتر.
يالا هاروح اخد الشور وانزل.
نور: ماشى يا قلبى.
نيجى للعرسان بتوعنا اللى كانوا في البحر وعمالين يرشوا بعض بالمياه.
خالد: طيب والله لغرقك استنى عليا.
مي: مش هاتقدر انا بعرف اعوم كويس الدور والباقى عليك انت.
خالد: بقى كده طب تعالى بقى لما اشوف بتعومى ازاى وشالها وبدأ يدخل بيها لجوه وهي تصرخ.
سيبنى: سيبنى
يا مجنون انت أنا بهزر ومش بعرف اعوم.

خالد: انا مجنون طيب.
مي: هاصرخ وألم عليك الاجانب دول علشان ينقذونى منك.
سابها خالد ونزلها براحه وبقوا وشهم في وش بعض على طول قرب منها وكان عاوز يبوسها بس هي زقته في المياه وجريت منه وخرجت على بره.
جرى وراها خالد وكان عاوز يحصلها بس من تقل المايه ماكنش عارف يجرى.
خرجت مي وقعدت تحت الشمسيه بتاعتهم.
وصل خالد وقعد هو كمان وقالها.
بقى كده ماشى يا مي ماشى انا هاعرف اخلصه منك بس في اوضتنا اصبرى عليا.

مي وهي بتضحك قالته مانيش طالعه اصلا انا هافضل هنا لبليل اطلع انت لوحدك.
خالد: نعم يا اختى اطلع لوحدى ماشى وماله واشوف اى واحده موزة كده من الجانب دول واخدها معايا على الاوضه اهو نسلى بعضنا انا وهي
مي ضربته في كتفه وقالتله والله بقى كده طيب انا هاتصل باخويا سيف ويجى يا خدنى علشان تاخد راحتك يا خالد.
وقامت ماشيه وسيباه.
خالد: انتى يا مجنونه راحه فين أنا بهزر هو انا اقدر استغنى عنك يا قمر.

انتى حبيبتى وعمرى وقلبى يا مي.
مي: لا والله والموزة الاجنبيه راحت فين كالتها القطه.
خالد: هههههههه ما بدهاش بقى وقام شايلها وراح ناحيه البحر تانى وفضلوا يلعبوا ويرشوا بعض بالمايه لحد ما تعبوا وراحوا على اوضتهم.

ام يوسف: مالك بس يا حبيبه تيته بتعيطى ليه يا مليكه.
اكيد بدورى على ماما وبابا.
هما زمانهم فرحانين مع بعض خليهم يفرحوا ببعض شويه وغيروا جو.
احمد: حضرتك بتتكلمى مع مليكه يا ماما هي هاتفهم كلامك.
الام: اهو بحاول اتكلم معاها علشان تسكت شويه.
ايه رايك يا احمد تعالى نخدها ونروح النادى نغير جو كلنا.
احمد: فكرة حلوة يا ماما انا هاروح اغير هدومى.

الام: اوك يا احمد وانا هاخلى المربيه بتاعه مليكه تغير لها وتعمل حسابها تيجى معانا هي كمان علشان تخلى بالها من مليكه.
مي اول ما طلعت من الحمام وغيرت هدومها ودخل خالد هو كمان ياخد شور
اتصلت بالموبايل على مامتها.
مي: ايوا يا ماما يا حبيبتى عامله ايه يا امى.
وازى سيف وملك.
الام: حبيبه قلبى يا ملك لسه كنتى على بالى وبفكر فيكى والله.
مي: القلوب عند بعضها يا امى ربنا يخليكى ليا يا ست الكل.

الام: اخبار عروستنا ايه واخبار خالد ايه معاكى.
مي: الحمد لله يا ماما وخالد كويس اوى وبيحبنى اوى وبيعمل كل حاجه علشان يسعدنى وانا كمان بحبه اوى.
خالد كان خرج من الحمام وسمع اخر جمله من مي لامها وابتسم وقرب منها وباسها وهي بتتكلم في الموبيل.
مي: حطت ايديها على الموبيل وقالته خضتنى يا خالد. ثوانى بكلم ماما.
خالد: بجد طيب اديهالى اسلم عليها.
مي ادتله الموبيل وهو اول ما مسكه قال لام مي.

حبيبه قلبى ست الكل ازيك يا امى عامله ايه واخبار صحتك ايه يا حبيبتى.
الام: ازيك يا ابنى عامل ايه وحشتنوا والله مش هاوصيك على مي يا خالد خلى بالك منها يا حبيبى.
خالد: دى في عنيا يا امى والله.
الام: يالا اسيبكم بقى وروحوا يا ابنى اتهنوا وافرحوا.
خالد: مع السلامه يا حبيبتى.
مي: ايه ده انا لسه ما خلصتش كلام معاها ولا سألتها عن ملك ولا على سيف.
خالد: ابقى كلميها تانى براحتك بس تعالى اقولك على حاجه مهمه.

مي: حاجه ايه المهمه دى.
خالد: تعالى بس في حضنى وانا هقولك على كل حاجه.
وراحوا في عالم تانى خالص كله حب وعشق وشوق.
الليل ليل ويوسف كان جه من برة وبدؤوا يستعدوا علشان يسهروا كلهم مع بعض.
يوسف ونور لبسوا هدومهم اللى هاينزلوا بيها.
ورنوا على سيف وملك اللى فعلا هما كمان كانوا خلصوا وكانوا مستنين أنهم يتصلوا بيهم علشان ينزلوا كلهم مع بعض.

سيف كان اتصل بإدارة الفندق وطلب منهم أنهم يعملوا حفله صغيرة لست أشخاص ويحتفلوا كلهم بخالد ومي.
في اوضه مي وخالد كان خلصوا لبسهم وكانوا خلاص نازلين على تحت علشان مي طلبت أنهم ينزلوا يتعشوا تحت بدل ما يتعشوا في الاوضه.

رواية هو والجميلات الجزء الثاني للكاتبة سحر فرج الفصل التاسع

نزل مي وخالد على المطعم تحت وكانوا ماسكين ايد بعض واول لما دخلوا استغربوا أن المكان ضلمه وفجاه.
النور نور ولقوا سيف وملك ونور ويوسف
اتصدم خالد
ايه ده انتم ايه اللى جابكم هنا.
كلهم عمالين يضحكوا على منظر خالد لما اتصدم لما شافهم اودامه.
مي ما كنتش مصدقه نفسها لما شافتهم وجريت حضنت اخوها سيف وفضلت تبوس فيه.
مي: احلا مفاجاه والله يا سيف.
سيف: مش باين خالص يا مي من منظر جوزك بصى منظره عامل ازاى.

خالد: انتم ايه اللى جبكم الغردقة اصلا يعنى الواحد ما يعرفش يتهنى بشهر العسل بتاعه يا عالم يا رخمه.
يوسف: معلش بقى يا خالد والله انا اصلا جاى في شغل هنا علشان اسلم المشروع بتاع الشركه.
سيف: وانا كمان ابوك بعتنى في شغل الشركه وقولنا بالمرة نرخم عليك شويه ونخلص منك اللى كنت بتعمله معانا في شهر العسل
ملك: هو احنا هانفضل واقفين كتير كده ولا ايه يالا بقى انا جعانه جدا.

نور: يالا يا جماعه علشان فعلا كلنا جعانين جدا.
اتجمع الكل على التربيزة المجهزة ليهم وبدأ الجرسونات يقدموا الاكل اللى سيف كان موسى بيه وهو عبارة عن جميع انواع الاسماك وجمبرى وكاليمارى والسلطات.
خالد ومي كانوا عمالين يبصوا لبعض نظرات حب بين الحين والتانى.
وكان خالد بيكلها في بوقها.
وده اللى خلى سيف يدبه كلمتين حلوين.
سيف: في ايه يا عم خالد خلى الحاجات دى في اوضتكم.

خالد: هانبتدى اهو خليك يا عم في مراتك وملكش دعوة بمراتى انا بقولك اهو.
سيف: انت شايف كده طيب. وقام ماسك واحده جمبرى بالشوكه وحطها في بوق ملك.
خالد: ايوا كده اشغل نفسك بمراتك.
يوسف: والله انتم شويه عيال.
نور: اشمعنى يعنى هما بيأكلوهم وانت لا انا زعلانه.
يوسف: حبيبه قلبى لا طبعا ما اقدرش على زعلك وراح أكلها هو كمان.
وقال كده مفيش حد احسن من حد.
ياريت نأكل بقى انا تعبت جدا النهارده من السفر ومن الشغل.

الكل كان فرحان وسعيد وفضلوا يتكلموا عن الفرح وعن مليكه شويه وعن الشغل شويه.
وبعد العشاء كان الفندق مجهز تورته كبيرة للعرسان.
بعد ما خلصوا العشاء والحلو البنات طلبت انها تروح تتمشى على البحر.
يوسف خليها بكرة والله ما قادر وتعبان جدا.
نور: علشان خاطرى يا يوسف وحياتى.
يوسف: معلش يا نور والله مش قادر وعاوز انام فعلا خليها بكرة.
خالد: يا عم انت تعال نروح كلنا دى القاعده هناك دلوقتى في منتهى الروعه.

يوسف: والله ما قادر يا خالد انا اسف انا هاخد نور واطلع وانتم خليكم براحتكم.
كل ده وسيف مش قادر يتكلم خالص ولا يوجه اى كلام ليوسف بس لاحظ أن نور زعلت وبقت حزينه.
وفعلا طلع يوسف ونور على اوضتهم.
خالد وسيف خدوا البنات وراحوا على البحر وكان الجو في منتهى الجمال والروعه وصوت الموج كان جميل جدا مع هدوء المكان والموسيقى الهاديه.
قضوا سهرتهم على البحر بعد الهزار والضحك بين خالد وسيف والبنات.

وبعدها خدوا بعضهم وطلعوا على اوضهم.
يوسف اول لما طلعوا الاوضه اتأسف لنور علشان ماقدرش يسهر مع الباقى ونور كانت زعلانه.
يوسف: حقك عليا والله هانسهر بكرة بعد الحفله بتاعه الشركه لحد الصبح.
نور: يا سلام هو انا كمان مش هاجى معاك الحفله دى ولا ايه؟
يوسف: لا طبعا لو عاوزة تيجى تعالى وانزلى الصبح نقى احلى فستان واشتريه يا حبيبتى هو انا عندى يعنى كام نور.

نور: شكرا يا حبيبى وانا هاخد حد من البنات معايا بكرة ونختار احلى فستان.
يوسف: ان شاء الله يا قلبى يالا ننام بقى علشان انا فاصل خالص وهاصحى بدرى للشغل والفنش الاخير على المشروع.
نور: لا نام انت وانا هاسهر شويه في البلكونه اشم الهوا.
يوسف: ماشى يا حبيبتى تصبحى على خير.
سيف وملك كانوا نايمين على سريرهم وراحوا في سابع نومه وفي لحظه قامت ملك تصرخ من النوم.

سيف اتخض من صريخ ملك وبسرعه نور الاباجورة اللى جنب السرير.
سيف: خير يا حبيبتى في ايه كنتى بتحلمى ولا ايه.
ملك: بنفس متقطع اه يا سيف ده كابوس بس وحش اوى وده اللى خلانى اصرخ كده انا اسفه أنى خضيتك وصحيتك من النوم بس غصب عنى يا حبيبى حقك عليا.
سيف: ولا يهمك يا حبيبتى اسف ايه بس المهم انتى بخير.
ملك: اه بخير كمل نومك انت يالا وانا هادخل الحمام.

وفعلا نام سيف وهي دخلت الحمام وخرجت بس ما كنش جيلها نوم خالص وافتكرت الحلم أو الكابوس اللى حلمت بيه وكانت خايفه منه اوى وقلبها انقبض منه.
نام الكل وطلعت شمس يوم جديد كله حب وامل وسعاده.
نور فتحت عنيها وشافت ضوء الشمس اللى ظاهر من البلكونه فقامت من السرير وراحت بشويش علشان يوسف ما يصحاش وفتحت البلكونه.
وقفت نور وشافت اجمل منظر طبيعى اول مرة تشوفه.
لون السماء الصافيه
ولون مايه البحر الروعه.

والرمال الناعمه الصفراء.
والأشجار الخضرا والورد اللى مالى المكان في الفندق والهوى النقى الجميل.
نور خدت نفس كبير وفتحت ايديها وكأنها بتقول للهواء انا اهو انا ملكك انا حاسه بيك.
وفجاه.
جه حد من وراها وحضنها لما شافها واقفه بالمنظر ده وباسها بوسه رقيقه كلها حب.
يوسف: صباح الخير يا حبيبه قلبى.
نور: صباح النور يا حبيبى.
يوسف: ايه الجمال والطبيعة الحلوة دى.
نور: فعلا يا يوسف المنظر روعه وجميل جدا.

اد ايه انا فرحانه أنى هنا وفي المكان ده بالذات.
حاسه براحه نفسيه فظيعه من الجمال والطبيعة والهدوء اللى هنا.
يوسف: بس كده مفيش حاجه تانى.
نور: انت طبعا يا حبيبى.
يوسف: عيونى ليكى يا نور.
ونفسى اعمل ليكى كل حاجه تخليكى سعيده وفرحانه كده.
نور: ربنا يخليك يا حبيبى ليا انت ومليكه.
يوسف: ويخليكى لينا يا حبيبتى.
مليكه اكيد وحشتك انا عارف لأنها وحشانى انا كمان.
نور..

ده انا هاتجنن عليها وكل شويه اتصل بماما واطمن عليها.
يوسف: هانت كلها يومين ونرجع ليهم وتبقى معاهم.
نور: انت هاتنزل دلوقتى.
يوسف: اه يا حبيبتى يادوبك الحق.
نور: طيب اطلب الفطار يجى هنا بدل ما ننزل تحت علشان تاكل حاجه قبل ما تنزل.
يوسف: لا يا حبيتى مش هاقدر يا دوبك اخد شور وانزل على طول
اطلبى انتى الفطار ليكى وافطرى قبل ما تنزلى مع البنات.
نور: ماشى يا حبيبى.
نيجى للعرسان.

خالد صحى من النوم ودخل خد شور وكل ده ومي لسه نايمه.
خالد خرج من الحمام وشاف مي لسه نايمه وحب أنه يعمل فيها مقلب علشان تصحى.
خالد مشى براحه على طراطيف صوابعه واخد كوبايه المايه اللى على التسريحه وقرب من السرير اللى هي نايمه عليه وفجاه صب شويه مايه على أيده وفي ثوانى رشهم على وش مي وهي نايمه.
مي: عااااااااااااا
ايه ده إيه الى انت عملته ده يا خالد انتى فزعتنى من النوم.

خالد: هههههههههه. احسن علشان تبطلى نوم انا مش عارف انتى بتحبى النوم اوى كده ليه.
مي: بقى كده طيب اما وريتك.
خالد: ولا هاتقدرى تعملى حاجه ده انتى هبله.
مي: انا هبله يا خالد ماشى ماشى بكرة تشوف الهبله دى هاتعمل فيك ايه.
قامت من على السرير ودخلت على الحمام وهو دخل على البلكونه.
شويه وخالد سمع مي بتنادى عليه من الحمام.
خالد راح لها وقالها نعم يا مي عاوزة حاجه.

مي: الحقنى يا خالد الحنفيه مش عاوزة تفتح خالص والشامبو على وشى تعال اعملهالى.
خالد: ايه ده معقوله وفتح ودخل وكانت مي لبست البورنس.
خالد: طب انتى لابسه البورنس ليه مش كنتى بتستحمى.
مي: اصل قولت البسه علشان ما ابردش عقبال ما انتى تعملى الحنفيه.
ولسه يا دوبك خالد بيقرب من البانيو قامت زقاه مي فيه ووقع خالد في البانيو ومنظره كان فظيع.
بقى كده ماشى يا مي بقى بترديهالى.
مي: شوفت الهبله بقى يا خالد.

وجريت وخرجت على برة.
خالد قام بسرعه بالهدوم اللى غرقانه مايه وجرى وراها وفضلوا يجروا ورا بعض لحد ما خالد مسكها وشالها وراح على الحمام بيها.
مي: سيبنى يا خالد سيبنى.
خالد: انا انا توقعينى في البانيو ماشى يا مي أما وريتك.
مي: خلاص حرمت بس انت اللى بدأت.
خالد قام حطها في البانيو وفتح عليها الدوش كمان.
خالد: مش هاسيبك النهارده
خلينا في البانيو بقى لحد ما تبوسينى بشوق وحب بوسه طويله ورومانسيه.

مي: ايه انا ابوسك انا ليه يعنى.
خالد: طب خليكى بقى في البانيو لحد ما يبنلك صاحب.
وأدى قاعده.
يا ترى خالد هايخلى مي في البانيو كده لحد امتى
تواقعتكم ايه.

رواية هو والجميلات الجزء الثاني للكاتبة سحر فرج الفصل العاشر

مي كل ده وهي لسه في البانيو وعماله تتحايل على خالد علشان يخليها تقوم بس هو مش عايزها تقوم إلا بشروط وهي مش عاوزة.
مي: طيب خلاص انا موافقه على الشروط.
خالد: ايوا كده اسمعى الكلام ونفذى على طول وبضمير.
مي: حاضر. حاضر.
خالد: ايه ده انتى بتشختى فيا!
مي: لا ابدا انا مش قصدى.
خالد: طيب يالا
مي: يالا ايه؟
خالد: يالا نفذى ولا نسيتى الشروط؟
مي: لا ابدا حاضر هانفذ يا رخم.

خالد قرب منها وهي قربت منه وباسته بوسه سريعه على خده.
خالد: نعم يا اختى ايه ده انتى هاتهزرى ولا ايه.
هي دى البوسه اللى كلها شوق ولهفه.
ده لعب عيال ده خليكى بقى في البانيو لحد ما يظهرلك صاحب أو تبوشى في قلب المايه.
مي: طيب حاضر
وقربت منه ولسه هاتبوسه موبيلها رن.
مي: الموبيل بيرن يا خالد.
خالد: هو ده وقته خليه يرن.
مي: لا يكون سيف وعاوز حاجه.

خالد: سيف اه اللى جاى مخصوص علشان يرخم عليا في شهر العسل زى ما كنت برخم عليه.
خليه يرن بقى وهاتى البوسه بقى.
مي قربت منه ومن شفايفه و جايه تبوسه الباب خبط بتاع الاوضه.
مي: احسن حلال فيك اهو سيف جالك اهو لحد عندك استلق وعدك بقى يا حلو.
خالد: بقى كده ماشى يا مي كله بحسابه وسابها وراح علشان يفتح الباب.
خالد: طيب حاضر اصبر يا اللى بتخبط.
وفتح الباب وشاف نور هي اللى واقفه اودامه.
خالد: اهلا نور.

نور: صباح الخير انتم لسه نايمين ولا ايه.
خالد لا ابدا صاحين من بدرى.
نور: اومال فين مي.
مي جت عليهم وهي لابسه البرنس.
مي: ازيك يا نور تعالى ادخلى.
نور: لا بس كنت عوزاكى تيجى معايا اشترى فستان علشان الحفله بتاعه الشركه.
مي: ماشى اغير هدومى على طول واجى معاكى.
نور: ماشى وانا هاروح اقول لملك عقبال لما انتى تخلصى.
مي: اوك
نور راحت على اوضه سيف وملك لان لما اتصلت عليها مكنش فيه شبكه الموبيل.

نور خبطت على باب الاوضه واتفاجئت لما شافت سيف اودمها لابس شورت وصدره عريان.
سيف: اهلا يا نور اتفضلى.
نور: ازيك يا سيف ملك فين اومال.
سيف: ملك جوا اتفضلى.
ملك جت على صوتهم ورحبت بنور ونور قالتلها على موضوع الحفله والفستان.
ملك: ماشى يا نور وبالمرة اشوف انا كمان فستان حلو احضر بيه.
نور: اوك هاروح أكمل لبسى عقبال لما انتى ومي تخلصوا ونتقابل تحت.
ملك: تمام يا نور.

ام سيف موبيلها رن وكانت جنه هي اللى بتتصل تطمن عليها.
جنه: الووو
ازيك يا عمتى عامله ايه يا حبيبتى.
ام سيف: الحمد لله يا حبيبه عمتك اخبارك ايه يا جنه وازى كل اللى عندك.
جنه: كلهم بخير والله يا عمتى وبيسلموا عليكى.
الام: انا قاعده لوحدى بقالى يومين ما تيجى تقعدى معايا يا جنه.
جنه: ليه يا عمتى اومال سيف ومراته راحوا فين.

الام: راحوا الغردقه سيف عنده شغل وبظروفها يوسف ونور كمان سافروا لشغل الشركه وزمانهم قابلوا مي وخالد.
جنه: بتقولى نور ويوسف كمان!
الام: اه يا بنتى نور ويوسف.
جنه بحزن: ماشى يا عمتى
الام: قولتى ايه هاتيجى تقعدى معايا لحد ما يرجعوا يا بنتى اصلى زهقت من القاعده خالص لوحدى.
جنه: هاشوف يا عمتى حاضر وأبلغهم في المستشفى واقول لبابا.
الام: ماشى يا بنتى وانا هستناكى.

احمد اخو نور كان عمال يلعب مع مليكه ومليكه بضحك من هزاره معاها.
جت أم يوسف على صوت ضحكهم.
حبيبه قلبى ما شاء الله عليكى يا مليكه ضحكتك جميله زيك وجده سامعها من اوضته وهايتجنن عليكى يا قلبى.
احمد: شوفتى يا ماما بتضحك ازاى من لعبى معاها.
الام: اه يا حبيبى لولاك يا احمد ما كونتش اعرف اتصرف معاها البنوته دى.
دى زمان نور ويوسف هايتجننوا عليها.
احمد: وانا كمان نور وحشتنى اوى اوى اول مره تسافر بعيد عنى.

الام: وانا روحت فين يا احمد ومليكه كمان راحت فين ولا ايه.
احمد: ربنا يخليكى يا ماما يارب.

لبست البنات التلاته ونزلوا على تحت واتقابلوا وراحوا على السوق.
وصلوا السوق اللى كان كله محلات جميله.
محلات للانتيكات الفرعونيه.
محلات لبس اطفال
محلات اكسسورات
ومحلات كتير للهدايا.
وصلوا اودام محل لفساتين السهرة ودخلوا على جوه وبدأت نور تختار فستان حلو ليها ولبست اكتر من واحد لحد ما اختارت فستان حلو جدا لونه احمر وطويل بفتحه من الجنب.
وملك اختارت فستان اسود قصير بس روعه.

مي عجبها فستان حلو اوى ودخلت لبسته وعجب ملك ونور جدا وكان لونه كشميرى جميل.
اشتروا التلت فساتين ودفعوا الحساب وراحوا على البيوتى سنتر علشان يبدأوا يعملوا شعرهم ومكياجهم.
يوسف رن على نور علشان يطمن عليهم وكانت نور ملخومه في المكياج فردت ملك عليه.
ملك: ايوا يا يوسف انا ملك.
يوسف: اهلا يا ملك اومال نور فين.
ملك: احنا في البيوتى سنتر ونور بتعمل المكياچ يا يوسف واودامنا شويه لما نخلص انا وهي ومي.

يوسف: اوك يا ملك ما تتاخروش علشان لازم نكون هناك بدرى قبل ما الناس تروح.
ملك: ماشى يا يوسف حاضر.
شويه وجه دور ملك للمكياج وقعدت نور ومي مع بعض.
مي: عامله ايه يا نور ويوسف أخباره ايه معاكى.
نور: ياالله يا نور كان نفسى اتكلم معاكى من زمان واحكيلك على كل اللى جوايا انا بحس انك زى اختى بالضبط والله يا مي.
مي: وانا كمان والله يا نور من ساعه لما سيف كان بيكلمنى عليكى ايام الكليه وانا حاسه انى اعرفك.

نور: سيف كان بيقولك على كل حاجه بينى أنا وهو.
مي: اه يا نور كان بيحكى كل حاجه.
نور: اقولك على حاجه يا مي واوعدينى ما تقوليش لحد.
مي: اه طبعا قولى ومتخافيش.
نور: انا مش قادرة انسى سيف خالص ولسه بحبه.
مي: انتى بتقولى ايه يا نور انتى بقيتى واحده متجوزة دلوقتى وعندك بنت. والمفروض ما تفكريش فيه خالص وتحاولى تنسيه نهائى.
فجاه جت ملك اللى خلصت مكياجها واتخضت نور اول لما شافتها وخافت لاتكون سمعت حاجه.

مي: بعدين نكمل كلامنا يا نور لازم يا نور.
نور: ماشى يا مي حاضر.
ملك: كلام ايه ده اللى بتقولوه من غيرى يا بنات.
مي: لا ابدا عن مليكه والاطفال وكده يعنى اصل خالد بيحب الاطفال جدا.
ملك: طيب تمام يالا بينا بقى.
خلصوا البنات ولبسوا فساتنهم بعد ما اتفقوا مع خالد وسيف ويوسف أنهم هايعدوا عليهم في البيوتى سنتر ويخدوهم على الحفله.

البنات كانت في منتهى الجمال والروعه وكانت فساتنهم حلوة اوى عليهم وكانوا طالعين زى القمر.
يوسف رن عليهم علشان يخرجوا ليهم وبلغهم أنهم واقفين بره.
وكان الشباب لابسين بدل حلوة اوى وطالعين هما كمان حلوين جدا.
خرجت البنات واتفاجئت الشباب بيهم وبحلاوتهم.
خالد: اوووبا ايه الحلاوة دى مين دول يا جدعان.
سيف: اتلم ياض انت خليك في اللى يخصك وبس.

يوسف: ايوا يا خالد خليك في اللى يخصك وبس وملكش دعوة بحاجه غيرك فاهم يا خالد ولا أوضح اكتر.
سيف بص لخالد وحس أن الكلام متوجه ليه هو.
بس عدى الموضوع علشان ما حدش يحس بحاجه وراحوا على البنات وكل واحد مسك ايد مراته.
سيف مسك ايد ملك وباسها وقالها ايه الحلاوة والجمال ده يا حبيبتى.
ملك: بجد حلوة يا سيف.
سيف: قمر يا حبيبتى والله.
خالد: مي ايه الجمال والعسل ده يا باشا
مي: ايه رايك عجبتك يا خالد.

خالد: اه طبعا ده انتى طالعه زى القمر.
وحسابك تقل معايا اوى فهمانى طبعا.
يوسف قرب من نور وباس رأسها وقالها انها طالعه جميله جدا وفي منتهى الروعه.
وكل واحد خد مراته
وركبوا عربيتهم وراحوا على الحفله.