رواية عشقني الأدهم للكاتبة روضة رجب الفصل الثامن

فى مستشفى العونى ذهبت رهف برفقه مازن لمقابله ادهم لبدا عملها.
كان يجلس ادهم ومازن ورهف فى مكتب رهف.
مازن وهو ينهض: أنا همشى بقى خلى بالك من نفسك يا رهف وانا هبقى اعدى عليكى عشان نروح مع بعض.
رهف: تمام ماشى خلى بالك من نفسك.
رحل مازن وقال ادهم وهو ينهض: أنا هسيبك دلوقتى تجهزى نفسك وشويه كده وهعدى عليكى.
رهف: أنا كنت عايزه اشكرك عشان قبلت تشغلنى معاك.

ادهم بابتسامه: يا ستى شكر ايه بس انتى اختى يلا هسيبك عشان عندى عمليه وعلى فكره كلها كام يوم تكونى اخدتى على الجو هنا وهتنزلى عمليات معايا هتبقى من ضمن الفريق بتاعى.
هزت رهف رأسها بالموافقه وخرج ادهم ليكمل عمله.

ذهبت إلى المطبخ وهى تقول بسعاده: اخيرا يوم اجازه الواحد زهق من الشارع.
سميره(الام): طب روحى بقى يا حببتى هاتيلى الحجات دى من تحت.
واعطتها ورقه.
تقى يزهق: يوووووه ده انا مصدقت يوم اجازه ياربى هوا فى حد داعى عليا مقعدش يوم فى البيت هاتى يا ماما هنزل حاضر.
سميره: استنى بس يا مجنونه انتى هتنزلى ببجامه سبونج بوب دى البس حاجه تانى.

تقى: مالها البيجامه هنزل كده محدش ليه عندى حاجه وبعدين أنا مش رايحه حته بعيده أنا رايحه السوبر ماركت اللى تحت.
سميره: صبرنى يا رب.
نزلت تقى على السلم ولكنها اصتدمت فجاءه بشخص.
تقى بتأفئف وهى تلتقط حقيبتها: استغفر الله العظيم كده كتير اللى بيحصل انهارده ده كتير مش تفتح يا...
قطعت حديثها عندما رأت أنها اصتدمت بمازن.
مازن: أنا آسف مخدتش بالى والله.
تقى وهى تكاد تبكى: حصل خير.

مازن: مالك بس مين اللى مزعلك كده.
تقى: مصدقت يوم اجازه وهقعد فى البيت لقيت امى بتقولى انزلى هاتى الحجات دى.
ضحك مازن على مظهرها الطفولى بدايه من بيجامتها وشعرها.
مازن: خلاص خليكى انتى وانا هروح اجيبلك اللى انتى عايزاه.
تقى: هوا أنا ممكن اعمل كده بس اول ما هطلع لامى من غير الحاجه دى هتلاقينى نازله وراك بس من البلكونه بعد ازنك بقى عشان اتاخرت.
صعد مازن اللى شقته وهو ينوى فعل شيء.

فى الساعه السابعه مساء ذهب مازن إلى المستشفى وصعد إلى رهف وطرق الباب.
رهف من الداخل: ادخل.
مازن: حببتى عامله ايه.
رهف: الحمدلله.
مازن: طيب يلا ولا لسه عندك شغل.
رهف وهى تأخذ حقيبتها: لا خلصت يلا.

مر شهرين على ابطالنا.
رهف وقد نسيت ما حدث لها وتاقلمت مع الحياه.
مازن يحاول التقرب من تقى.
تقى ورهف أصبحوا صديقتان.
ادهم وقد أصبح يشعر بشعور جديد تجاه رهف.

فى يوم جديد كانت العائله جميعها متجمعه فى منزل مازن.
مازن بحماس: أنا عندى خبر مهم لازم تعرفوه.
محمد: قول يابنى.
ادهم: اتحفنى.
مازن: جاهزين بس المفاجئه.
رهف بزهق: خلص أنا اتحمست.
مازن: انا قررت اتجوز.
ذياد: مبروك يا صاحبى.
محمد: مبروك يا حبيبي.
بارك له الجميع.
ادهم: ويا ترى مين تعيسع الحظ قصدى سعيده الحظ.
مازن: تقى ساكنه فى الدور اللى فوقينا.
رهف بسعاده: يه ده بجد هتتجوز تقى مبروك يا مازن.

احتضنها مازن: الله يبارك فيكى يا حببتى عقبالك.
ادهم: اهه ربنا استجاب دعوتك.
مازن باستغراب: ازاى يعنى مش فاهم.
ادهم: أنا عايز اتجوز رهف.

توقعاتكوا هل رهف هتوافق ولا هترفض.

رواية عشقني الأدهم للكاتبة روضة رجب الفصل التاسع

ادهم: أنا عايز اتجوز رهف، وسكت قليلا ثم نظر لها وقال: موافقه.
نظرت له رهف بصدمه وقالت: أنا مش موافقه.
وذهبت إلى غرفتها واتصلت على صديقتها نور.
نور بعتاب: الناس اللى مبتسالش.
رهف ببكاء: نور أنا تعبانه اوى.
نور: مالك يا حببتى إليه اللى حصل.
رهف: ادهم اللى حكتلك عنه عايز يتجوزنى.
نور: طيب ايه المشكله لو مش عيزاه ارفضيه لو عيزاه وافقى.
رهف: المشكله انى مش عارفه أنا عيزاه ولا لأ.

نور: بصى يا رهف أنا عارفه ومتاكده انك بتحبيه.
قاطعتها رهف بسرعه: ايه، لا، ااانا مش بحبه.
نور: رهف انا صحبتك وعرفاكى اكتر من اى حد طريقه كلامك عنه ووصفك ليه ولشخصيته ولخبطتك دى كل ده بيدل على انك حتى متعلقه بيه بلاش يا ستى نقول بتحبيه.
رهف بدموع: مش قادره أوافق يا نور أن...
قطع كلامها صوت مازن وهو ينادى عليها.
رهف: طيب هكلمك تانى يا نور مازن عايزنى.
نور: طيب سلام خلى بالك من نفسك.

خرجت رهف لمازن وهى تقول بستغراب: ايه ده هما مشيوا.
مازن: اه مشيوا، ونظر لها وهو يقول بهدوء: انتى ايه اللى مخليكى رافضه ادهم.
انفجرت رهف فى البكاء: مش عارفه أنا خايفه اول ما قال كده أنا خفت واتلخبطت.
احتضنها مازن: يا رهف ادهم بيحبك والله وانتى كمان بتحبيه.

كادت رهف أن تعترض على كلامه فقال: متقوليش لا لمعت عينك وانتى بتحكيلى عملتوا ايه فى الشغل مع بعض بتقول انك بتحبيه أو على الأقل معجبه بيه أنا مش بقولك وافقى خدى وقتك وفكرى واستخيرى ربنا وبعدين قوليلى رأيك ماشى.
رهف: ماشى حاضر.
مازن وهو ينهض: أنا همشى دلوقتى عندى شغل مهم هتقعدى ولا هتطلعى عند تقى.
رهف: لا هطلع بخاف اقعد لوحدى هنا.
مازن: طيب هطلع معاكى اسلم على طنط سميره.

رهف بمزاح: طنط برضو ولا ناس تانيه.
مازن: انتى يا بت انتى مش كنتى مكتئبه من شويه.
رهف: لا ما أنا فوقت خلاص.
مازن: طب امشى ياختى اطلعى قدامى.

خرجت تقى من غرفتها لتفتح الباب بعد أن سمعت صوت الجرس.
تقى بمرح: يا ولكم يا ولكم نورتينا يا اوختى.
مازن: احم ازيك يا انسه تقى.
تقى وهى تهمس لرهف: مش تقولى أن اخوكى معاكى.
رهف: ما انتى اللى مسحوبه من لسانك اعملك ايه.
تقى: اتفضل يا استاذ مازن.
مازن: شكرا أنا كنت جاى اسلم على طنط سميره.
تقى: ماما فى السوق مش موجوده.
مازن: ماشى سلام خلى بالك من نفسك يا رهف.
جلست رهف وتقى فى الغرفه.
رهف: شفتى اللى حصل.

تقى بفضول: ايه اللى حصل احكى بسرعه.
رهف: طب عشان فضولك ده مش هحكى.
تقى: شيكولاته وتشيذكيك.
رهف: لا ده كده احكى بقى.
تقى: ها قولى.
رهف: دكتور ادهم ات...
قاطعتها تقى وهى تقول: لا متقوليش مات.
رهف: مات ايه يا شيخه بعد الشر ده كان...
قاطعتها تقى مره اخرى: يبقى اتخطف يا صغير على الخطف يا دكتور ادهم يا...

رهف: باااااااااااااااااااس (بعيدا عن الروايه بااااس دى أنا وخداها من صديقتى اسراء فياريت نحييها يا جماعه)ايه ده بس بقى يا بنتى اسكتى راديو اتفتح اسكتى شويه.
تقى: اومال ماله.
رهف: هوااا، اتقدملى.
تقى بدهشه: لا بتهزرى الواد المز ابو عيون قطط ده.
رهف بستغراب: عيون قطط.
تقى: مهوا عنيه لونها رمادي زى عيون القطط.
رهف وقد أحست ببعض الغيره: وانتى عرفتى منين أن عنيه رمادى.

تقى بمرح: ايه ته ايه ته احنا بتغير ولا ايه نقول مبروك.
رهف: بغير، لا طبعا وبعدين أنا اصلا لسه موافقتش.
تقى: ايه ده بقى اومال ايه قلبى بيدق والكلام ده يا بنتى وافقى عايزه البس سواريه.
رهف وهى تحدفها بالمخده: هوا ده اللى همك، لسه مش هقول موافقه ولا لا هصلى استخاره كده الاول وبعدين اشوف.

مر اسبوع وكانت رهف تحاول الابتعاد وتجنب ادهم.

فى صباح يوم جديد استيقظت رهف بنشاط وارتدت ملابسها المكونه من دريس اسود عليه حزام زهرى وخمار زهرى عليه نقوش سوداء وخرجت إلى المطبخ لتعد الافطار.
بعد قليل وجدت مازن يدخل إلى المطبخ فالتفت له وهى تقول بابتسامه: صباح الخير.
مازن: صباح النور ايه النشاط ده فيه حاجه مفرحاكى.
اومئت رهف رأسها بنعم.
مازن: ويا ترى ايه اللى مفرحك كده.
رهف: انا قررت خلاص بخصوص موضوع ادهم.
مازن: وايه قرارك.
رهف بابتسامه: موافقه.

رواية عشقني الأدهم للكاتبة روضة رجب الفصل العاشر

مازن بترقب: وايه قرارك.
رهف بابتسامه وخجل: موافقه.
مازن بفرحه شديده: مبروووك يا رورو.
احتضنها مازن وهو يقول: ايه اللى حصل خلاكى توافقى.
نظرت له رهف وقصت له ما حدث.

كانت رهف بمكتبها تستعد للذهاب للاستراحه واستكمال العمل فسمعت صوت طرقات على الباب.
رهف: ادخل.
دخل ادهم إلى المكتب فنظرت له وما أن همت بالتحدث قال هو: أنا عايز اقعد معاكى نتكلم شويه ممكن.
صمتت قليلا ثم قالت: ماشى.
ذهبوا إلى إحدى المقاهي وجلسوا فبدأ ادهم الحديث قائلا: ممكن أسألك سؤال.
رهف: اتفضل.
ادهم: انتى لسه رفضانى.
نظرت له رهف بحيره وقالت: مش عارفه.

ادهم: بصى أنا مقدر اللى انتى فيه بس أنا عايزك تجاوبى على سؤالى بصراحه، انتى صليتى استخاره.
رهف: ايوه.
ادهم: مره ولا كذا مره.
رهف: لا كذا مره.
ادهم: وحسيتى بأيه.
رهف بدموع وتوتر: ااااااانا...
قاطعها ادهم قائلا: من غير دموع لو سمحت أنا محترم قرارك بس عايز افهم سبب رفضك، ممكن متعيطيش.
و مد لها كوب الماء.
شربت رهف وصمتت قليلا حتى هدأت.
ادهم: ها احسن دلوقتى.
رهف: الحمدلله.
ادهم: طيب ممكن تجاوبى على سؤالى.

رهف: بص أنا هجاوبك بصراحه، أنا من بعد ما صليت الاستخاره حسيت براحه كبيره.
فابتسم ادهم لها واكملت هى قائله: بس أنا خايفه.
ادهم: من ايه خايفه من ايه، ايه اللى حصل خوفك منى.
رهف: أنا مش خايفه منك بس اللى حصلى صعب اوى.
ادهم بهدوء: متخافيش طول ما أنا جنبك، أنا هنتظر مكالمه مازن ليا بكره يبلغنى بموافقتك أو رفضك وفى الحالتين هنفضل أصحاب اتفقنا.
رهف براحه: اتفقنا.
وذهبوا عائدين اللى عملهم.

مازن: اممم يعنى هوا منتظر مكالمتى انهارده.
رهف: ايوه.
مازن: أنا اهم حاجه عندى أن انتى مبسوطه، ثم أكمل مازحا: بس مفيش مانع أوقع قلبه شويه.
نظرت له رهف: ازاى يعنى.
مازن: لا ازاى دى سيبيها عليا أنا هظبطهولك.
رهف بسعاده: اعمل اللى انتا عايزه بس براحه عليه شويه.
مازن: اااااه بدأنا خوف وغيره.
فضحكت رهف واكملوا فطورهم وذهبوا اللى أعمالهم.

وصل مازن ورهف اللى المستشفى فنزل مازن معها من السياره.
رهف باستغراب: ايه ده انتا هتدخل.
مازن: اه هطلع لادهم.
ذهبوا إلى المصعد وذهبت رهف إلى مكتبها ومازن إلى مكتب ادهم.
دخل مازن إلى المكتب بدون أن يطرق الباب.
ادهم بتعجب: ايه ده يا عم مش تخبط ولا مش شايف الباب.
مازن وهو يجلس: اسكت عشان عايزك فى موضوع مهم.
ادهم: قول ايه هوا الموضوع المهم.
مازن بهدوء مصتنع: انتا قعدت مع رهف واتكلمتوا.

ادهم وقد بدأت دقات قلبه ترتفع: ايوه هيا اتكلمت معاك.
مازن: للاسف اه.
ادهم بتوتر: ليه للاسف.
مازن: أنا عارف ان اختى قراراتها دايما متسرعه بس هيا مصممه أنا مش عايزك تزعل كل شيء قسمه ونصيب وفى الاول والآخر ده قدر ربنا مش هنعترض عليه.
ادهم: ونعم بالله يلا الحمدلله.
مازن وهو ينهض: أنا جيت كان لازم اوصلك الرساله.
ادهم بحزن: خلاص يا مازن إجابتها وصلت.
مازن: برضو لازم اقولك هيا قالت ايه.
ادهم: مش هتفرق كتير.

مازن: على العموم هيا وافقت.
فتح ادهم عيونه على وسعهما وهو ينظر لمازن بتوعد: ايه قولت ايه.
مازن وهو يضحك عليه ويبتعد: أهدى كده وبلاش تتهور احنا فى المستشفى.
ادهم: وانا بقول خلاص راحت منى وانتا تقولى قسمه ونصيب وقدر ربنا وفى الاخر تطلع بتضحك عليا أنا ده انا هوريك.
مازن: هههههههه لا بس بصراحه لبست المقلب مكنتش اعرف انك واقع اوى كده.
ادهم وهو يركض خلفه: طب والله ما هسيبك خد هنا.

فى مكتب رهف أنهت رهف مكالمتها مع صديقتها نور وكانت قد أخبرتها بموافقتها على ادهم.
جائت الممرضه واخبرتها أن هناك مريض بالعمليات فذهبت رهف اللى ادهم لكى تخبره.
طرقت رهف على باب المكتب فلم تجد سوى صوت ادهم وهو يتشاجر مع أحد.
طرقت مره اخرى وأيضا لم تجد رد فقررت الدخول.
فتحت الباب بهدوء ولكنها صدمت مما رأته.
كان مازن يركض وادهم خلفه.
فقالت بصدمه: ايه اللى بيحصل ده.

نظر لها ادهم وقال: هوا فى ايه انتى واخوكى مش عاجبكم باب مكتبى اغيره عشان ترتاحوا ده ايه العيله اللى مبتشوفش البيبان دى.
رهف: أنا خبطت مرتين على فكره وانتو مسمعتوش.
ادهم: طيب كنتى جايه ليه.
رهف: الممرضه بلغتنى ان فى حاله فى العمليات.
ادهم: تمام روحى انتى وانا هاجى وراكى.
نظر ادهم لمازن: هاتمشى ولا والله لموتك.
مازن: بس يا عم أنا ماشى اصلا عندى شغل اخوك قارفنى من الصبح عمال يرن سلام.

ذهب ادهم لرهف بينما نزل مازن لسيارته فرن ذياد مره اخرى.
مازن: فى ايه يا عم عمال تزن عايز ايه.
ذياد: انتا فين عندنا شغل يلا.
مازن: أنا جاى اهه كنت عند ادهم فى المستشفى.
ذياد: بتعمل ايه هناك.
مازن: كنت ببلغه ان رهف وافقت خلاص.
ذياد: طيب قبل ما تيجى عدى على بابا فى البيت عشان عايزك خلص بسرعه معاه عشان الشغل.
مازن: ماشى سلام.

ذهب مازن إلى منزل محمد العونى و فتح له احمد الباب.
احمد: نعم.
مازن: هوا ايه اللى نعم اوعى كده.
احمد: يلا يا ابنى امشى من هنا.
مازن: طب يلا يا شاطر العب بعيد عشان مضربكش.
جاء محمد من الخلف وهو يقول: اهلا يا مازن اتفضل.
مازن: شوفت يا اونكل ابنك ضربنى وطردنى وقالى انتا مفكر أن ده بيتك اطلع بره ومتجيش هنا تانى.
نظر له احمد بصدمه: ده انتا مش هتدخل النار حدف ده انتا هتدخلها بصاروخ.

محمد وهو يضحك: بس ادخل يا مازن وانتا يا احمد سيبنا شويه.
جلس مازن بجانب محمد فقال محمد: عامل ايه يا مازن ورهف عامله ايه.
مازن: الحمدلله احنا كويسين، ذياد قالى أن حضرتك عايزنى.
محمد: ايوه كنت عايز اعرف رهف قررت ايه بخصوص موضوعها هيا وادهم.
مازن: هوا ادهم مكلمكش.
محمد: لا مكلمنيش.
مازن: أنا لسه كنت عنده وبلغته بقرارها.
محمد: وقررت ايه.
مازن: موافقه.

محمد بسعاده: الحمدلله اعمل حسابك بقى الاسبوع الجاى هنخطبلك وبعدين هنيجى نطلب رهف رسمى.
مازن: ربنا يخليك لينا يا اونكل أنا همشى دلوقتى عشان عندى شغل وهبقى اكلم حضرتك.
محمد: ماشى خلى بالك من نفسك سلام.
مازن: سلام.