ادهم اخد ليلي وسافروا يقضوا شعر العسل بره مصر لان في اماكن كتيره كان نفسه يشوفها بعنيها هيا الايام كانت اجمل من الخيال بينهم الحياه كانت حب في حب وبس كتير يفضلوا قاعدين مع بعض بس ويسكتوا وكفايه قوي انها تكون في حضنه او هو يكون بين ايديها ليلي: ادهم! ادهم: روح ادهم اتعدلت وبصتله ليلي: عايزه اطلب منك طلب ممكن؟ ادهم: روحي انا انتي بس تشاوري ليلي: بوسني ادهم: نعم يا اختي... هو ده الطلب؟ علي اساس ان انا ببطل اصلا ده انتي في حضني ليلي: ممكن تاخدني علي قد عقلي... بوسني بكل الحب اللي جواك ناحيتي... بوسني بوسه تقولي فيها انت قد ايه بتحبني؟ ادهم: علي اساس ان انا ساحر اعملها ازاي دي... ازاي اقولك قد ايه بحبك ببوسه؟ ليلي: انت مش عايز تبوسني؟ ولا انت قاطعها ادهم ببوسه طويله مفحومه بالعواطف
وبعد بينهج هو وهيا ليلي بصوت متقطع: ممكن بقي اطلب طلبي؟ ادهم: بلاش كيد الستات ده معايا... ليلي اي طلب لو بايدي مش هتاخر ابدا مش محتاجه لده ليلي: ليا غرض من ده ادهم: طيب اطلبي طلبك ليلي حطت ايدها علي شفايفه ليلي: ممكن بعد شفايفي شفايفك ما يلمسوش حاجه تانيه؟ ادهم: وانا من امتي بلمس حاجه تانيه غير شفايفك ؟ ليلي: ادهم اقعد قصادي قعدت واتربعت وهو قعد قصادها ادهم: عايزه تقولي ايه؟ واوعي تتكلمي عن الماضي ليلي: انا الماضي تقبلته بحلوه ومره... بس انا حاليا يهمني الحاضر ادهم: وانا من يوم ما دقيتي بابي ما لمستش غيرك ليلي: وانا عارفه ده كويس ومتأكده منه ادهم: امال انتي بتتكلمي عن ايه؟
ليلي: بص يا حبيبي انا بشوف حالات كتيره يا ادهم في المستشفي عندها سرطان ادهم: وبعدين؟ بتلمحي لايه؟ ليلي: سرطان رئه يا ادهم... 90% بيكون بسبب السجاير... ادهم: اممممم ده اللي بيلمس شفايفي بعدك! ليلي: ادهم حبيبي تعال نتكلم بالعقل... انا بحبك وبحبك جدا كمان وانت مرض زي ده بيهددك... ومالوش علاج... لو انت مكاني هتعمل ايه؟ لما انا كنت مخطوفه وكنت بواجه الموت كنت مستعد تعمل ايه؟ وكنت حاسس بايه؟ ادهم: ليلي دي غير دي ليلي: لا طبعا دي هيا دي... انت بتشرب سجاير كتير جدا... زمان مكنش عندك حد تخاف عليه او يخاف عليك لكن دلوقتي فيه... علشاني انا يا ادهم... انا مقدرش اشوفك بتضر نفسك كده واسكت... انا من اول مره شفتك فيها وخفت عليك منها وشدتها من ايدك مره وري مره... علشان خاطري بطلها ادهم: حاضر يا ليلي علشان خاطرك هبطلها خلاص؟
ليلي: يبقي من النهارده ادهم: لا طبعا انا مش هقضي شهر العسل بعالج اثار السجاير واعيش الاجازه في فتره انسحاب... ليلي: بعدها هنرجع اشغالنا ومش هقدر اساعدك دي فرصتنا ادهم: ليلي انتي بتفكري ازاي؟ ليلي: حبيبي لو انا خلال الاجازه دي قدرت اخليك تبطلها صدقني دي هتبقي اجمل هديه في الدنيا وما اتمناش اكتر من كده نهائي ادهم: انتي مخططه لحاجه في دماغك هاتي من الاخر عايزه تعملي ايه؟ ليلي: توعدني الاول انك هتطاوعني؟ ادهم: امم هتحدديلي اشرب واحده او اتنين صح؟ ؟ لا طبعا مش هقدر ليلي: لا طبعا مش هحددلك... العدد اللي تشربه انت اللي هتقرر بنفسك... اوعدني بقي تطاوعني وما تقوليش لأ ادهم: هو انا ليه حاسس بخيانه في الموضوع ده!؟
ليلي: اوعدني بقي ادهم: طيب ما تقولي اللي عندك الاول من غير وعود وانا لو هقدر مش هتاخر ابدا ليلي: ادهم بقي ادهم: اوعدك يا ليلي هطاوعك خلاص ارتحتي؟ ناويه علي ايه؟ ليلي: هتشرب براحتك العدد اللي يعجبك ادهم: تمام وبعدين؟ فين الإنه اللي في الموضوع بقي؟ ليلي: مفيش إنه يا حبيبي ادهم: يعني انتي هتسيبيني انا وضميري؟ ليلي: اه يا حبيبي... بس في حاجه واحده بس هتعملها ادهم: ايوووه انا مستني بقي الحاجه دي ليلي: كل ما تشرب سجاره مش هتلمس شفايفي لمده ساعتين ولا هتلمسني نهائي ادهم: نعم يا اختي... لا طبعا مش موافق... انتي بتهرجي ولا ايه؟
ليلي: ده اللي عندي وانت وعدتني... انت بقي حدد هتشرب كام واحده في اليوم ادهم: هو انتي عندك استعداد يعدي ساعتين بحالهم ما ألمسكيش فيهم؟... ليلي: انا معنديش انت عندك؟ ادهم: ليلي ما تلويش دراعي ليلي: انا بحبك... لو انت جرالك حاجه انا هعمل ايه من غيرك فكر فيا انا؟ ادهم: مش هيجرالي حاجه ولا النهارده ولا بكره ليلي: هو انت متجوزني لمده قد ايه علشان بس اعمل حسابي؟ ادهم: هو في حد بيتجوز حد بمده؟
ليلي: ماهو انت بتقول النهارده ولا بكره؟ ادهم بالمعدل اللي انت بتشربه خلال سنتين تلاته هتتدمر المفروض انا بقي اعمل ايه؟ ولو ربنا اكرمنا وعندنا بيبي اعمل ايه؟ متبقاش اناني في حبك ادهم: انا عمري ما كنت اناني في حبي... حاضر يا ليلي وايه كمان؟ ليلي: انا هدخن معاك ادهم: تصدقي بقي ان دي اول مره هخلف وعدي... بصراحه وعدين مش وعد واحد... الاولاني بتاعك والتاني وعد وعدته لابوكي اني ما امدش ايدي عليكي ابدا ليلي: هتمد ايدك عليا؟
ادهم: هو انتي مش عايزه تشربي سجاير؟ ليلي: لا انا مش عايزه انت هتشربني بايدك ادهم: علي فكره انتي دمك تقيل قوي النهارده ليلي: انت مش فاهمني... سمعت عن حاجه اسمها التدخين السلبي؟ ادهم: سمعت وعارفه ومش موافق واقفلي بقي الكلام في الموضوع ده يدوب هيقف فليلي مسكته وشدته ومسكت وشه ليلي: اللي يسري عليك يسري عليا... علي الحلوه والمره... انت كل ما بتشرب سجاره بتبعد عني او بتطلع بره من النهارده هتشربها معايا هنا... وانت جنبي وقريب مني كمان... وده اكتر شيئ هيخليك تبطلها وبسرعه كمان ادهم: انتي واخده بالك انتي بتقولي ايه؟
ليلي: ايوه وده اكتر طريقه هتخليك خلال اسبوع مبطلها وعلي فكره الاسبوع مش هيضرني قوي... ادهم: انتي ما بتحبيش ريحتها اصلا؟ ليلي: فعلا انت هتعمل ايه بقي؟ ادهم: ليلي كلامك كله مش عاجبني... سيبيني ابطلها براحتي وانا اوعدك هبطلها ليلي: معلش نجرب طريقتي وصدقني هتجيب نتيجه بسرعه... هاه هنشرب اول سيجاره امتي؟ ادهم بصلها وسابها وقام خرج البلكونه وشويه وهيا خرجت وراه ضمته وهيا وراه وسندت علي ظهره ادهم: المفروض ان ده شهر العسل مش فتره نقاهه... ليلي انا مش معترض علي فكره اني ابطل سجاير لان كده كده انا كنت هبطلها من غير حتي ما تطلبي مني بس توقيتك غلط.
ليلي: عايزه انام الليل من غير قلق او خوف عليك وطول مافي حاجه بتهدد حياتك بتطير من عيني النوم... حاجه بتقتلك ببطء... ارجوك قدر مشاعري ادهم: حاضر هقدر مشاعرك لو ده هيريحك هعمله
عدي ساعه واتنين وهما الاتنين مع بعض وخرجوا اتغدوا واتفسحوا وليلي مستنيه اول سيجاره بس ادهم مكابر ومش عايز يشربها... الليل جه وادهم برضه مش بيشرب... بدأ يتعب ومكابر وبيتعصب علي اي حد يقربله وليلي كل ما تقوله يشرب سيجاره يرفض تماما... الليل اتأخر وراحوا اوضتهم ليلي حاسه بتعب ادهم وهو بيكابر ادهم بيعرق كتير وماسك دماغه وباين عليه التعب ليلي: اللي انت بتعمله ده غلط... جسمك محتاج النيكوتين وما ينفعش تمنعه منه مره واحده كده ادهم: بقولك ايه؟ انتي قولتي طلباتك وقولتي انا احدد اشرب قد ايه وامتي مالكيش فيه بقي
ليلي سابت ادهم براحته وراحت علي السرير وادهم مراقبها وحست انه مستنيها تنام علشان يشرب اول سيجاره... فهمت دماغه وفهمت تفكيره وشويه وعملت نفسها نامت اول ما ادهم لمحها نامت قام بسرعه طلع علبه سجايره وطلع بره الاوضه وولع اول سيجاره وشد منها نفس طووووويل جدا وكأنه كان محروم من الهوا واخيرا اتنفس لحظه ولقي ليلي فوق دماغه ادهم رمي السيجاره علي اخر دراعه ادهم: يا الله منك يا ليلي... ليلي: كنت متأكده انك هتستني انام علشان تطلع تشربها لوحدك ادهم: يبقي سيبيني براحتي بقي؟
ليلي: احنا اتفقنا نشربها مع بعض ادهم: يووه يا ليلي بقي ما تعصبنيش ليلي قربت منه وسندت علي كتفه ليلي: انا اتعودت انام في حضنك... ادهم: هو انتي مش قولتي ساعتين ما المسكيش؟ ليلي: حبيبي ... ادهم قام ووقفها ادهم: ليلي انا عايز ابقي لوحدي بعد اذنك سابها ونزل يتمشي علي البحر لوحده قضي الليله كلها لوحده ورجع الصبح كانت ليلي قاعده في البلكونه كمشانه بردانه نايمه علي الكرسي ادهم اول ما شافها جري وشالها ودخلها وغطاها ليلي: اخيرا رجعت؟ قلقتني عليك ادهم: انا كويس انا هدخل اخد شاور سابها ودخل ووقف تحت الدش خرج ولبس هدومه وراح للسرير ليلي: انت زعلان مني؟
ادهم: انا تعبان ( ادهم اول مره يزعق كده) فلو سمحتي... قدري اني تعبان ليلي: انت بتزعقلي يا ادهم؟ ادهم: انتي بتستغلي حبي ليكي غلط ليلي: انت زعلان علشان انا خايفه عليك؟ ادهم: شوفي انتي خليتيني اوعدك وعلشان انفذ الوعد ده باجي علي نفسي فوق ما تتخيلي فما تطلبيش فوق طاقتي ماشي؟ ممكن بقي انام؟ ادهم عطاها ظهره بس معرفش ينام ليلي قامت وجابت علبه سجايره وعطتهاله وهو رماها علي اخر دراعه... جابتهالو تاني ورماها تاني ليلي: يووه يا ادهم بطل تكابر انت جسمك محتاج ده ادهم: مالكيش دعوه باللي جسمي محتاجه... مش هشرب انا وانتي هنا خلاص ريحي نفسك بقي ليلي قعدت قصاده وقومته ليلي: انت عندك حق لما قولت ان التوقيت غلط... خلاص يا ادهم طريقتي غلط... خلاص يا ادهم اشرب في المكان اللي يعجبك ونأجلها لبعد شهر العسل وانا واثقه ان انت هتبطلها لوحدك من غير مساعده مني ادهم:ليلي انا كل اللي محتاجه منك هو وجودك في حياتي مش اكتر... بس فعلا ده مش وقته ولا طريقته كده ابدا... انا عمري ما هقدر اشرب سيجاره وانتي تشاركيني فيها ابدا... انا اوعدك اني هبطلها واحده واحده لكن مش بالطريقه دي ابدا ليلي: خلاص حقك عليا... قوم يالا اشربلك واحده
ادهم اخد علبته وخرج يشرب سيجارته بره الاوضه
الايام اللي بعدها ليلي لاحظت ان ادهم بيقلل جدا من السجاير لوحده خلص شهر العسل ورجعوا لبلدهم واشغالهم واهلهم ادهم حس بدفا العيله وسط عيله مراته ناديه كانت ام ليه وعم محمد كان اب ليه ومصطفي زي اخوه وبدأ يدربه وياخده معاه في كل مكان بحيث يتعلم والاكتر يبقي في حمايته... ليلي لما بيكون عندها نبطشيه ادهم بيروحلها يبات معاها طول الليل وصحباتها حاسدينها علي حبيبها... ليلي مره راجعه من شغلها علي بيت ابوها ودخلت جري ما سلمتش علي حد ودخلت الحمام وفضلت تعيط وتعيط وتعيط ومهما يكلموها مش بترد ناديه اتصلت بادهم علي طول ناديه: ادهم حبيبي انت متخانق مع ليلي.؟ ادهم: لا يا ست الكل مش متخانقين ليه؟ ناديه: لا ابدا بس هيا جت هنا وزعلانه ومش عارفه مالها ومش عايزه ترد عليا او علي ابوها ادهم:،طيب يا ست الكل خليها تكلمني ناديه حاولت مع بنتها بس برضه ما ردتش ناديه: يا حبيبي مش بترد ادهم: طيب دقايق وهكون عندك ما تقلقيش وفعلا عشر دقايق وكان ادهم عندهم فتحله ابوها ادهم: هيا فين؟ عم محمد: حابسه نفسها في الحمام ادهم دخلها وخبط عليها ادهم: ليلي حبيبي افتحي... ليييييلي افتحي..لاحسن اكسر لابوكي الباب وهيطردنا انا وانتي عم محمد: لو مردتش اكسر الباب ادهم بزعيق: ليلي افتحي ليلي فتحت ورمت نفسها في حضن جوزها بتعيط وكانت مبلوله تماما لانها تحت الدش بهدومها ادهم: اششششش اهدي بقي وعرفيني في ايه؟ مالك؟ ليلي: سيبني اعيط انا عايزه اعيط ادهم ضمها وسابها تعيط شويه شاور لامها تجيبله فوطه او حاجه وجابتله ودخلته اوضتها... ادهم قلعها هدومها ومغطيها امها خبطت ودخلت ولما شافته جابتلها هدوم من دولابها وجابت لادهم كمان تيشرت من بتوع مصطفي بدل تيشرته اللي اتبل خرجت وعملت لبنتها حاجه دافيه وجبتهالها بس لقتها نايمه في حصن جوزها ناديه: قالتلك مالها؟ ادهم: لأ مقالتش بس لما تصحي اكيد سابتهم وخرجت وطمنت جوزها انها نامت في حضنه صحيت بعد ساعتين تكمل عياطها وادهم برضه معاها وابوها سمع عياطها فدخلها وامها كمان وكلهم حواليها وهيا في حضن جوزها . ادهم: طيب عرفيني بتعيطي ليه؟ ليلي: مات يا ادهم... مات النهارده... ست سنين بيتعالج وبرضه في الاخر مات... لما هيموت في الاخر مامتش من بدري ليه؟ ايه لازمته العذاب ده كله؟ عم محمد عارف ان ادهم مالوش في امور الدين ومش هيعرف يرد علي ليلي وكان عايز يرد علي بنته بس لقي ادهم بيعالج الوضع صح فسابه ووقف يتابعه ادهم: ليلي حبيبتي الاعمار دي اولا بايد ربنا وكل واحد بيتولد مكتوب هيعيش قد ايه وهيموت امتي وازاي ليلي انتو مش وظيفتكم تطولو عمر حد انتو بس بتخففوا الالم شويه او بتخلوا الحياه تستمر بشكل احسن لكن عمركم ما هتطولوا عمر حد او هتمنعوا الموت من حد... واكيد انتي عارفه الكلام ده كويس... وبعدين اتعلمي من اللي حصل بس برضه بصي لكل حاله بتعالجيها وكل واحد بتخففي المه... بس مش مكتوبلك تعالجي الكل فاهمه؟ ليلي: بس انا كنت بحبه فما بالك بابوه وامه؟ ادهم: بتحبيه؟ وبتقوليها في وشي كده؟ ليلي: كان عنده عشر سنين ادهم: ربنا يصبر اهله... فضل يهدي فيها لحد ما هديت واخدها وطلعوا كان حماه وحماته في البلكونه بيشربوا شاي المغربيه فدخل وقعدوا معاهم وشربوا معاهم الشاي اللي بيستمتع بيه لمجرد الصحبه الحلوه
كل يوم بيعدي ادهم وليلي بيقربوا اكتر وبيبفهموا بعض اكتر وفي يوم ليلي في بيتها مستنيه جوزها يرجع من شغله الباب خبط وفتحت لقت واحده قدامها وشايله عيل صغير عنده حوالي 3 سنين البنت: هو مش ده بيت المقدم ادهم؟ ليلي: ايوه هو حضرتك مين؟ البنت: حضرتي... هي هئ... انا الجو يا قطه... انا الحب القديم... وسعي بقي يا قطه من طريقي واندهي علي سي ادهم ليلي: اوعي يا ولبه خليكي بره انتي اتجننتي؟ انا مراته فاهمه؟ وبعدين ادهم مش هنا البنت: معقوله اتجوز؟ ماعلينا استناه يا قطه كلميه وقوليله زوزا هنا ... اه معرفتكيش علي الامور... ده يا قطه اسر ابنه... ليلي مش مستوعبه هيا قالت ايه ليلي: نعم ده مين؟ زوزا: ابنه يا حبيبتي ابنه كلميه بقي خليه يجي ليلي فعلا اتصلت بجوزها ادهم: ليلي مش فاضي خالص هخلص اجتماعي واكلمك اوك ليلي: انت تسيب اللي في ايدك وتيجي هنا حالا ادهم: انتي بتتكلمي كده ليه؟ وبعدين ايه اسيب اللي في ايدي دي؟ ليلي: اللي انت سمعته سيب اللي في ايدك وتعال انا عندي مصيبه هنا في البيت ادهم: مصيبه ايه؟ في ايه؟ ليلي: في واحده هنا معاها عيل بتقول انه ابنك ممكن تيجي بقي قفلت السكه وادهم مش مصدق هو سمع صح ولا اتهيأله... ساب اجتماعه وجري علي بيته ادهم: انتي مين يا بت انتي؟ زوزا: انا زوزا يا نضري نسيتني ولا ايه؟ ادهم: ايوه مش فاكرك زوزا: بس انا فاكراك يا قمر وفاكره ليلتنا مع بعض ادهم بص لمراته اللي هتتجنن ومش عارف يقول ايه؟ ادهم: انتي جايه عايزه ايه؟ زوزا: مش عايزه اي حاجه لنفسي،... انا مش طماعه لأ.. انا بس عايزاك تعرف ابنك وتشيل مسؤليته معايا ادهم: ده مش ابني زوزا: ابنك يا نضري ادهم: لما هو ابني استنيتي تلات سنين وجيتي ليه؟ ليه ما جيتيش من زمان؟ زوزا: الحوجه... قطعت الخوجه يا اخويا... ابنك كبر ومصاريفه كترت وانت تساعد معايا ادهم: قولتلك مش ابني ليلي: تعرف منين انه مش ابنك ادهم: ليلي قاطعته ليلي: انت اصلا مش فاكر اذا كنت نمت معاها ولا لأ؟ اصلا مش بعيد يكون عندك ميت عيل مش واحد بس زوزا: طيب انا اسيبكم تظبطوا اموركم دي واجيلك تاني مشيت وادهم مسك ليلي: ليلي انا معنديش عيال ليلي: تعرف منين؟ ادهم انا رايحه عند بابا يدوب هتمشي مسكها ادهم: اوعي تفكري تسيبني؟ ليلي ما تسيبينيش ليلي: ادهم انا رايحه عند بابا ارجوك سيبني دوقتي ليلي سابته ومشيت راحت بيت ابوها تعيط حكتلهم علي كل اللي حصل عم محمد: طيب انا مش فاهم برضه انتي زعلانه ليه دلوقتي؟ يعني ده ماضي ليلي: يا بابا بقولك عنده عيل عم محمد: ايوه ماشي يعمل ايه هو يعني؟ انتي قولتي قبل كده انك قبلتي ماضيه فين قبولك ده بقي؟ امال انتي كنتي متخيله ايه؟ ان الماضي خلاص انتهي... الماضي هو اللي بيرسم مستقبلنا وما ينفعش تتجاهليه ليلي: بابا انا مش ناقصه حكم ومواعظ عم محمد: طيب انتي عايزه ايه؟ ليلي: معرفش انا متخيلتش ابدا انه ممكن يكون عنده عيال نهائي... فاهم؟ مش لدرجه عيال؟ عم محمد: طيب انا هتصرف مسك تليفونه واتصل بادهم عم محمد: ايوه يا ادهم ادهم: عمي ليلي عندك صح؟ هيا كويسه؟ عم محمد: اه عندي واه كويسه المهم انا عايزك تطلقها والكلام نزل صاعقه علي الكل.
مسك تليفونه واتصل بادهم عم محمد: ايوه يا ادهم ادهم: عمي ليلي عندك صح؟ هيا كويسه؟ عم محمد: اه عندي واه كويسه المهم انا عايزك تطلقها والكلام نزل صاعقه علي الكل ادهم: افندم... انت قولت اييه؟ اطلقها؟ عمي ملحقش يكمل الكلمه لان حماه قفل السكه ليلي: بابا انت عملت ايه؟ انت ازاي تقوله كده؟ مين قالك اني عايزه اطلق؟ انا مش عايزه اطلق عم محمد: امال انتي جايه تعيطيلي ليه؟ عايزاني اعمل ايه؟ ده ماضيه وانتي سبق وعارضتيني لما رفضته ورفضت ماضيه ولا نسيتي؟ جايه زعلانه ليه؟ عايزاه يعمل ايه؟ ولو ده ابنه فعلا المفروض يعمل ايه يحطه في ملجأ ولا يموته ولا يعمل ايه؟ ليلي: انا معرفش يا بابا يعمل ايه... وبعدين انا مش عايزاك تعمل حاجه انا جيت اقولك افضفض مش تكلمه وتقوله يطلقني... انا ماشيه بعد اذنكم ليلي نزلت لجوزها بسرعه وادهم نزل لمراته بسرعه. ادهم وصل البيت عند حماه وملقاش مراته ادهم: عمي انت فعلا عايز تطلق ليلي مني؟
عم محمد: لا يا ابني انا ماليش دخل هيا عايزه تطلق هيا حره بس ما تدخلونيش بينكم ادهم: انا مش فاهم يعني انت طلبت الطلاق ليها ولا هيا ولا ايه اللي حصل وليلي فين دلوقتي اصلا؟ عم محمد: ليلي اكيد في بيتها حاليا ادهم سابه وراح علي بيته
ناديه: حرام عليك اللي بتعمله في الواد عم محمد: انا عملت ايه فيه؟ وبعدين علشان يحلوا مشاكلهم بنفسهم ما يدخلوناش بينهم ناديه: البت جايه تفضفض وبعدين دي مشكله كبيره مش صغيره عم محمد: جوزها بيعشقها يبقي تفضفض معاه هو وتحكيله هو مش احنا ولو عايزه تفضفض يبقي معاكي انتي ولوحدكم ما تدخلنيش انا ادهم راح بيته واول ما دخل ليلي كانت مستنياه ادهم: انتي بجد عايزه تطلقي مني؟ ليلي جاوبته بانها جريت علي حضنه ورمت نفسها في حصن الامان بتاعها ادهم: هو ابوكي ليه قالي اطلقك؟ ليلي: معرفش قالك كده ليه؟ انا اول ما سمعته اتجننت اخ مع بعض علي الحلوه والمره ومهما يحصل هنواجهه مع بعض ادهم تاني يوم اتفاجئ بمحضر جايله في شغله واتفاجئ انه مرفوع عليه قضيه نسب من البنت دي وده خلاه يتاكد ان البنت دي حد مسلطها عليه تفضحه مش اكتر لانه كان مستعد يتكلم ويتكفل بمصاريف الولد لو طلع ابنه طبعا في شغله اتعرف موضوع القضيه والكل بيبصله باستغراب انه مش هامه مديره استدعاه مكتبه ادهم: افندم خير؟
المدير: مرفوع عليك قضيه نسب ادهم: ده سؤال ولا بتقولي ولا ايه؟ المدير: هتعمل ايه؟ وهتحلها ازاي؟ وبعدين انت مشاكلك كتير ليه؟ ادهم: مشاكلي كتير ليه؟ لان اعدائي كتير اما بقي هعمل ايه؟ فده شيئ واضح المدير: واضح ازاي؟ ناوي علي ايه؟ ادهم: هعمل تحليل DNA ولو ابني هلتزم بيه وهتكفل بيه لو مش ابني خلاص... المدير: بتتكلم وكأن الموضوع سهل قوي ادهم: ايه اللي صعب فيه؟ المدير: سمعتك! مراتك! بيتك! حاجات كتيره قوي ادهم: سمعتي مش هتتهز لان كتير كانوا عارفني من زمان وحاجه زي دي مش غريبه ولا غير منطقيه اما مراتي فهيا متفهمه الموقف ده ومستعده لاي نتيجه مهما كانت وغير كده ما يهمنيش المدير: تحب اتدخل؟ ادهم: تتدخل ازاي؟ مش فاهم المدير: الولد مش ابنك والقضيه تتقفل ادهم: ولو هو فعلا ابني؟ المدير: ابنك او مش ابنك دي حاجه انت تتاكد منها بطريقتك بس مش لازم قدام الكل... اعمل تحليل DNA براحتك بس مش في العلن ادهم: عرضك ده يعنيلي كتير بس متشكر لأ المدير: لأ ليه؟
ادهم: لان لو انا عملت كده هفقد مصداقيتي مع نفسي قبل اي حد... وبعدين انا مكنتش ملاك وانا غلطت واللي غلط لازم يتحمل مسؤليه غلطه ما ينفعش نلف حوالين الموضوع كده واستغل منصبي... لو هو ابني هعترف بيه قدام الكل ومش بعيد كمان لو امه وافقت اخده منها وانا اربيه... انا جربت حياه اليتم فلو ده ابني مش هخليه يشرب من نفس الكاس اللي سبق وشربت منها... المدير: يا ابني براحتك انا بس حبيت اقولك اني موجود جنبك ومستعد اساعدك ادهم: عارف بس مستغرب ليه ديما بتساعدني؟ المدير: لاني ديما بعتبرك زي ابني ولا انت ملاحظتش ده انا اعرفك من كام سنه يا ادهم... وبعدين انت لك وزنك هنا ومنقدرش نستغني عنك صراحه... قوم روح بيتك واستعد لبكره وقضيه بكره... تحب ارشحلك محامي كويس ادهم: مش محتاج لو ابني هعترف بيه مش ابني مفيش قضيه فهحتاج محامي ليه؟ بعد اذنك ادهم روح بيته لمراته اللي هيا كمان مراحتش شغلها قضوا اليوم كله مع بعض في قلق وخوف وترقب تاني يوم الصبح صحيوا من نوم متقطع مليان قلق ورايحين المحكمه ليلي: هو ايه فايده المحكمه؟ انت اصلا موافق تعمل التحليل فليه رفعت عليك قضيه نسب؟ ادهم: مش عارف يا ليلي بس 90% انها مقصوده للشوشره مش اكتر... تفسيري انا ان البنت دي حد زاققها عليا ليلي: طيب ما هو التحليل هيبين ان كان ابنك او لأ ادهم: العيار اللي ما يصيبش يدوش... يعني اه التحليل هيثبت بس مش هيمنع الشوشره والرغي وممكن عايز يضرني ومتخيل انه كده ممكن انتي تبعدي عني وبكده يبقي حقق غرضه ليلي: هو انا لو كنت بعدت عنك كنت هتعمل ايه؟ ادهم: مش هعمل... متخيله ان انا ممكن اعمل ايه؟ ليلي: مش هتتمسك بيا او تحاول ترجعني ليك؟ ادهم: لا طبعا ليلي: لا طبعا؟ ليه؟ للدرجه دي مستغني عني؟ ادهم: لا طبعا ولا مستغني ولا اقدر استغني اصلا... انا بحبك وده شيئ واضح جدا واعتقد اللي وز البنت دي عليا عارف ده كويس ليلي: ولما انت بتحبني مش تتمسك بيا ليه؟ ادهم: ليلي مش هتمسك بحد مش عايزني ليلي: لو انا مش عايزاك مكنتش اتجوزتك بس الوضع اللي احنا فيه مش اي حد يتقبله... ما تخدش وجودي معاك امر مسلم بيه او ان انا علشان تقبلت الوضع ده يبقي ده فرض عليا ادهم اخد فرامل جامد ووقف وبصلها ادهم: اولا انا مش واخد وجودك في حياتي امر مسلم بيه ابدا وده بدليل ان انتي بنفسك بتقولي ان انتي حاسه ان احنا لسه في شهر العسل معني ده اني بتفنن اني اسعدك ثانيا بقي انا مقولتش ان تقبلك للوضع ده شيئ مفروض ابدا بس انتي قبلتي بيا وانا عرفتك كل صغيره وكبيره في حياتي وحاولت ابعدك عني بكل الطرق وقولتلك ان ماضيا ممكن يأثر علينا وانتي مهمكيش كل ده متجيش بقي انتي في اول مشكله وتقوليلي احمد ربنا ان انا معاك وما تعمليهاش جميله او دين في رقبتي... ولو انتي يا ليلي شايفه انك جايه علي نفسك بوقفتك دي معايا لسه في وقت الحق اوديكي بيت ابوكي لحد ما المشكله دي كلها تنتهي؟ قرري انتي عايزه ايه؟ ليلي: انت ليه كبرت الموضوع بالشكل ده؟ ؟ انا تقبلت ماضيك باي توابع ليه ومش هاممني اي حد ولحد دلوقتي بحبك وعايزاك وهتحمل معاك اي حاجه تحصل مهما تكون ادهم: امال انتي بتقولي كلامك ده ليه؟ ليلي: حاجه في نفس يعقوب ادهم: لا افهم كنتي عايزه توصلي لايه؟ ليلي ساكته ومش عايزه ترد ادهم: ليلي؟ ليلي بصوت عالي مقموص: كنت عايزاك تتمسك بيا وتقولي ان وجودك في حياتي اهم من اي حاجه تانيه وانك هتحارب الدنيا دي كلها المهم اني افضل جنبك بس بدل كده قولتلي لا متلزمنيش امشي ادهم: انا امتي قولت امشي دي؟ ليلي: في ما معناه ادهم: هو انتي محتاجه اني اقولك انك مهمه في حياتي؟ المفروض انك عارفه انتي ايه بالنسبالي وبعدين لو انتي مشيتي بنفسك عمري ما هجيلك ابدا ليلي: يعني ايه يا ادهم؟ ادهم: يعني لو انا مزعلك هاجي ابوس ايدك وهعملك كل اللي اقدر عليه علشان ارجعك لكن لو انتي مشيتي علشان مش عايزاني او مش عايزه تعيشي معايا او اكتفيتي مني يبقي هسيبك تمشي براحتك غير كده بقي يا ليلي اعتقد انتي عارفه مكانتك في حياتي ايه ومش محتاجه كلام ليلي: مفيش ست في الدنيا مش محتاجه تسمع من جوزها قد ايه بيحبها او عايزها او يتمسك بيها ادهم: طيب يا ستي انا بحبك وبعشقك وبموت فيكي وماقدرش اعيش من غيرك وحياتي من غيرك ولا تسوي... ليلي ابتسمت: كمل بقي طريقك ادهم باستغراب: بس كده؟ ليلي: ادهم انا عايزاك ترضي غروري فاهم؟ ادهم: وكده رضيته؟ ليلي: طبعا لما تقولي ما تقدرش تعيش من غيري يبقي لازم ترضي غروري... انا مغروره بحبك فاهم؟ انا بمشي وسط الكل رافعه راسي وبقول جوزي بيعشقني وما بيهمنيش حد،... وحتي لما حاولو يزعزعوا ثقتي فيك ويقولوا جوزك مرفوع عليه قضيه ولا همني لاني عارفه انك بتعشقني والثقه دي محتاجه انك كل شويه تثبتها وتقولي قد ايه بتعشقني فهمتني؟ ادهم: فهمتك يا قلبي... علي فكره قبل ما نوصل هنلاقي كتير حاضر المحاكمه دي في صاحب وفي عدو وفي عايز يتفرج وفي عايز يشمت فمستعده لده؟ ليلي: انا مستعده انت مستعد ادهم: طالما يا ليلي ايدك في ايدي الدنيا كلها ما بتفرقش معايا اخيرا وصلوا المحكمه وكان في كتير فوق ما تخيلوا صحافه اعلام ناس... زحمه مهوله لدرجه ان ادهم معرفش اصلا ينزل من العربيه لحد ما بتوع الامن جوله وحاوطوه لحد ما نزل مراته واخدها ودخل والكل بيصور وبيسألوا اسئله كتيره ادهم ماسك مراته ايديهم في ايدين بعض وداخلين قدام الكل وطبعا وجود مراته ضايق ناس كتير القاعه كانت مليانه... اصحاب ادهم... اصحاب ليلي... تقريبا كل الناس اللي تعرف الطرفين موجوده ادهم اتفاجئ ان القائد بتاعه موجود وبصله نظره فرحه اختفت لما شاف ليلي في ايده ادهم بهمس: اعتقد يا لولي ان القائد بتاعي هو وري البنت دي ليلي: اشمعني؟ ادهم: كانت في عينه نظره شماته اختفت اول ما شافك معايا ليلي: بس ده اكيد يعني؟ ادهم: لا طبعا يا حبيبي اتعملت المحكمه والمحامي بتاع البنت فضل يرغي كتير قوي وادهم استناه لحد ما خلص القاضي: فين المحامي بتاعك سياده المقدم؟ ادهم: انا مش محتاج محامي... القواضي اللي زي كده في الاخر بيتعمل تحليل DNA وانا بجيب من الاخر انا عايز نعمل التحليل ده ولو هو ابني هعترف بيه وهتكفل بيه لو لأ يبقي خلاص مفيش قضيه اصلا القاضي: يعني انت موافق تعمل التحليل ده؟ ادهم: انا اللي بطلبه القاضي حكم بالزام الاتنين يعملوا التحليل ولما تطلع النتيجه يشوفوا الوضع ايه ادهم اخد مراته وخرجوا بره القاعه وروحوا بيتهم كان عيله ليلي مستنياها ابوها وامها واخوها وقضوا مع بعض اليوم ادهم تاني يوم الصبح راح علشان يعمل التحليل ليلي: النتيجه هتظهر خلال يومين صح؟ ادهم: صح... ايه رايك لو نسافر اليومين دول ليلي: نسافر فين؟ ادهم: شرم؟ الغردقه؟ اي مكان؟ ليلي: وشغلك؟ ادهم: انا في اجازه لحد ما القضيه تخلص ليلي: بمزاجك ولا غصب عنك؟ ادهم: الاتنين ليلي: ازاي بقي؟ ادهم: القائد بتاعي عايزني اخد اجازه ومدير المخابرات ما وافقش فبالتالي سابو الاختيار ليا فايه رايك؟ ليلي: طبعا اختار الاجازه يالا نسافر ادهم اخد ليلي وسافروا تلات ايام سريعه راحو شرم الشيخ واتفسحوا واتمنوا لو الاجازه تطول اخر ليله ليلي: تصدق اول مره اتبسط كده؟ فكرتني بشهر العسل ادهم: محسساني ان انا متجوزين بقالنا كذا سنه ده احنا يدوب كام شهر اهوه ليلي: بص احنا المفروض كل شهر نخطف يومين زي دول ادهم: انتي عارفه اليومين دول احنا صرفنا فيهم قد ايه؟ ليلي: الليله ب 1500 ايه يعني وبنصرف شويه فكه فوقهم ادهم: شويه فكه؟ هو حد ضحك عليكي وقالك اني مليونير ولا حاجه؟ ليلي: يا حبيبي ربنا يخليك ليا انا بهزر يا قلبي... بس احنا مش شرط ناخد اليومين دول في بلد تانيه؟ ادهم: امال؟ ليلي: انا عندي استعداد اقضيهم في شقتي؟ المهم تبقي انت معايا ادهم: ان كان كده انا موافق... ليلي؟ ليلي: عيوني ادهم: لو الولد طلع ابني وانا حبيت اجيبه بيتي هيكون رد فعلك ايه؟ وهتعامليه ازاي؟ ليلي اتنهدت: مش عارفه يا ادهم بس اعتقد اني هحبه لانه حته منك... انا بحب اي حاجه من ريحتك فما بالك ابنك؟ ادهم: بجد يا ليلي هتحبيه؟ ليلي: بجد يا قلب ليلي ادهم اتاثر جدا بكلامها وحبها ليه واتمني انهم يفضلوا مع بعض العمر كله ادهم الصبح اتصل بيه المحامي علشان نتيجه التحليل ظهرت ومحدش يقدر يفتح الظرف غير في وجود الطرفين ادهم اخد ليلي ورجعوا مصر واتجمعوا في قاعه المحكمه والظرف اتسلم للقاضي القاضي بيفتح الظرف علشان يشوف النتيجه والكل متوتر ومستني علي اعصابه ليلي ماسكه ايد ادهم وبتضغط عليها جامد ادهم: اهدي ان شاءالله خير ## محكمه الكل سكت وبص للقاضي اللي هينطق بالحكم القاضي: بعد الاطلاع علي القضيه رقم... وبناءا علي الاوراق المقدمه حكمت المحكمه برفض قضيه النسب لان تحليل ال DNA اثبت ان الولد من المستحيل انه يكون ابن للمقدم ادهم... ومن حق المجني عليه المقدم ادهم رفع قضيه رد شرف رفعت الجلسه ليلي قامت وحضنت ادهم جامد اللي شالها من الارض اصحابه باركوله واخد مراته في حضنه ومشيوا وهو ماشي وقف قدام البنت ادهم: لو انتي محتاجه مساعده ماديه كان ممكن تطلبيها ومكنتش هتاخر بس انتي كان ليكي غرض تاني فهشوفك قريب... استنيني ادهم مشي هو ومراته وروحوا بيتهم اللي الكل اتجمع فيه واتعملت حفله حضرها الكل واتفاجئ ادهم باعمام ليلي واخوالها جايين فتح بيته ورحب بيهم عم حسن: احنا لما سمعنا باللي حصل كنا هنيجي بس حبيت ااخرها لبعد نتيجه التحليل علشان اقف في وش التخين واقولهم جوز بنتي ما يعملش كده ابدا... ادهم بص لمراته وحماه عم محمد اتدخل: دي كانت شكوي كيديه... واحده جايه ترمي بلاها علينا واهو الحمدلله ربنا كشفها عم حسن: يالا الحمد لله يا ابني ان ربنا نجاك المهم نفرح احنا بقي اليوم كان في مجمله حلو واتختم احلي واحلي ليلي كانت جميله في اليوم ده كانت مهتمه بنفسها قوي بلبسها ومكياجها وشكلها وكانت زي الملكه او هيا كانت ملكه في مملكه جوزها اخر الليل بعد ما الكل مشي كانت هلكانه وقعدت مكانها ليلي: انا تخطيت مرحله التعب... انا هلكانه ومنظر الشقه يشرح القلب ادهم: ريحي انتي... انا هلم الاطباق والكوبايات دي واحطهم في الغساله والصبح نبقي نجيب مرات لطفي تنظف الشقه... قومي انتي ريحي او خديلك دش دافي ليلي: مش قادره اقوم... ما تعمل فيا معروف وتشيلني لحد جوه ادهم: اهو ده الطمع بعينه ليلي: طمعانه في حبه حب زياده ادهم: اكتر من كده حب اتجنن ادهم شالها ودخلها اوضه النوم وحطها علي السرير ودخل الحمام وخرج غير هدومه ادهم: علي فكره انا فتحت الميه في الحمام زمان البانيو اتملي قومي ليلي بصتله بعنين نعسانه ليلي: انا هنام مش قادره خالص ادهم قرب منها وشالها ادهم: اعتقد اكتر من كده مفيش ليلي: لا في تدخلني جوه البانيو ادهم: يا صبر ايوب شالها وفعلا دخلها البانيو وسابها وخرج ادهم: اوعي تنامي لاحسن ارجع الاقيكي غرقانه ولا حاجه ليلي: ابقي شقر عليا ادهم سابها وخرج وعمل اللي قالها عليه كان مبتسم وحاسس انه مبسوط من غير سبب وحس ان حبهم اقوي من اي شيئ ممكن يواجههم مهما يكون محدش هيقدر ابدا يفرقهم عن بعض دخل اوضه النوم ملقاش ليلي خاف لتكون فعلا نامت دخلها كانت مغمضه عنيها ادهم: نايمه؟ ليلي: لأ مستنياك ادهم: ماتقوليش انك عيزاني اطلعك ليلي: لا عايزاك تشاركني... اخيرا طلع النهار وليلي صحيت من نومها في حضن جوزها قامت ودخلت الحمام وكان معاها اختبار حمل لانها شاكه ومع الظروف اللي فاتت نسيت تعمله خرجت من الحمام مش عارفه تعمل ايه؟ تصحيه؟ تسيبه نايم؟ محتاره؟ هيا عيزاه اول واحد يعرف؟ واخيرا اخدت القرار ليلي: ادهم! ادهم حبيبي اصحي ادهم: ليلي سيبيني انام ليلي: اصحي بقي ضروري ادهم قام مغمض عنيه واتعدل ادهم: ايه؟ قولي عايزه تقولي ايه؟ وانجزي علشان عايز انام ساعه كمان قبل ما اروح شغلي ليلي: مع انك مش مشجع بس هقول وخلاص... انا هجهز عشا خاص ليا انا وانت وبس ايه رايك؟ ادهم: انتي بتصحيني علشان تقوليلي اننا هنتعشي مع بعض؟ ما احنا كل يوم بنتعشي مع بعض ليلي: لا عشا النهارده خاص جدا ادهم: طيب عشا النهارده خاص انام بقي؟ ليلي: نام يا ادهم نام ادهم فعلا نام وصحي متأخر علي شغله وقام يجري واخر النهار بيكلم مراته ادهم: هو انتي الصبح صحيتيني فعلا تقوليلي هنتعشي مع بعض عشا اسبيشيال ولا انا كنت بحلم؟ ليلي: كنت بتحلم طبعا ادهم: امم طيب انا قولت بس اتاكد ليلي: اشمعني يعني؟ ادهم: لاني هتأخر شويه ليلي: طيب ماشي قفل وابتسم وقام اشتري ورد وروح وخبط علي الباب خبطته المعهوده وفتح الباب ولقي ليلي في انتظاره بفستان فوق الرائع مبتسمه ادهم: افرض اتأخرت؟ ليلي: عمرك ما اتأخرت عليا وبعدين نادرا ما بتقول كلمه وانت مش قاصدها وبعدين لا يلدغ المؤمن من جحر مرتين ادهم: وانتي اتلدغتي قبل كده؟ ليلي: انت نسيت لما عملت نفسك سكران؟ ادهم: ههههههه انتي ما نسيتيش؟ المهم احلي ورد لاحلي ورده في الكون كله ليلي اخدت الورد وحضنته قوي ادهم: تسمحيلي استأذنك خمس دقايق بالظبط؟ ليلي: ليه هتروح فين؟ ادهم: هحاول اجاري القمر اللي قدامي ده... زي ما انتي لبستيلي واتمكيجتي وبقيتي ملكه جمال من حقك اني احاول اجاريكي شويه... هغير هدومي واخد شاور واحلق دقني ليلي: اوعي تتاخر عليا ادهم: ما انتي لسه قايلالي عمري ما اتاخرت ادهم فعلا ما اتاخرش وطلعلها ولا نجم غلاف كانت معجبه بيه جدا وبتحبه جدا ليلي: هو الواحده ينفع تعاكس جوزها؟ ادهم: الشيخ بيقولك ايه حلال حلال حلال ضحكوا الاتنين وهو ضمها ليه بحب ليلي: عارف يا ادهم الواحده لما تبقي لسه بنت وتتخيل مثلا ممثل بتعشقه وتحلم بيه؟ انت بقي اللي انا بتخيله وبحلم بيه... كل ما اشوفك جاي من بعيد اقول بقي معقول الراجل ده جوزي وبتاعي لوحدي.. انا ما ببقاش مصدقه نفسي وبرمي نفسي في حضنك يمكن اصدق ادهم: بجد يا حبيبه قلبي؟ ليلي: واكتر من كده كمان ادهم: انا بقي كل ما اشوفك اقول البت دي اكيد هبله علشان حبتني ويارب ما تعقل ابدا ليلي بتضحك: الهبله دي الناس كلها بتحسدها عليك ادهم: ليلي انتي بالنسبالي في كفه والدنيا دي كلها في كفه تانيه كانوا بيرقصوا سلو مع بعض علي نور الشموع ليلي: ادهم حبيبي ادهم: عيون ادهم وقلبه وروحه ودنيته كلها ليلي وقفت علي طراطيف صوابعها وهمست في ودنه ليلي: انا حامل يا ادهم
الاول فين المنشن لاصحابك مفيش حد بيعمل منشن خالص الجزء الاول كانوا الف متابعينه راحوا فين ؟ عرفوهم يالا
كانوا بيرقصوا سلو مع بعض علي نور الشموع ليلي: ادهم حبيبي ادهم: عيون ادهم وقلبه وروحه ودنيته كلها ليلي وقفت علي طراطيف صوابعها وهمست في ودنه ليلي: انا حامل يا ادهم بعد لحظه صمت رد عليها ادهم: انتي ايه؟ ليلي: حاااامل ادهم افتكر في اللحظه دي لما امه اخدته من ايده وحبسته في قبر ابوه يموت فوقف جامد مش عارف ينطق او يتكلم ليلي: ادهم مالك؟ ادهم مش بيرد بس واقف جامد فرفعت راسها تبصله ليلي: ادهم؟ انت زعلان!؟ ادهم: لا لا مش زعلان بس اتفاجئت... ليلي: قول اتصدمت مش اتفاجئت ادهم: اه اتصدمت... مكنتش مستعد لفكره الخلفه دلوقتي ليلي: امال بتتجوز ليه بقي؟ ادهم: هو الجواز علشان نخلف وبس؟ ليلي: ايوه الجواز بيبقي علشان تعمل عيله صغيره تعيش وسطها ادهم: وانتي عيلتي الصغيره ومش عايز غيرها ليلي: بس انا عايزه اخلف ويبقي عندي عيال ادهم: وانا ما بنكرش حقك ده بس بقولك مكنتش مستعدله... سألتي وانا جاوبتك ولا كنتي عايزاني اكدب عليكي واعمل نفسي الفرحه مش سايعاني ليلي: مكنتش متخيله رد فعلك ده ادهم: وانا مكنتش متخيل انك عامله الليله دي علشان كده ليلي: كنت متخيله انك هتتنطط من الفرحه وعلشان كده حبيت اعمل ليله مميزه ادهم: مفهومنا عن الحاجات المميزه مختلف قوي ليلي: انت عايز تعمل ايه دلوقتي؟ ادهم: اعمل ايه في ايه؟ ليلي:في الحمل؟ ادهم بصلها باستغراب قوي ادهم: انتي متخيله اني هعمل ايه؟ هسقطك مثلا ولا هسيبك ولا هعمل ايه؟ ليلي: والله ما اعرفش انت ناوي تعمل ايه؟ انا معدتش فهماك اصلا ادهم: انا كنت مستعد اعترف واتحمل مسؤليه عيل ظهرلي فجأه من واحده ما اعرفهاش... متخيله هعمل مع مراتي وحبيبتي ايه؟ ؟ الظاهر ان احنا فعلا مش فاهمين بعض بعد اذنك ليلي: انت رايح فين؟
ادهم: ورايا مشوار تبع الشغل كنت هأجله للصبح بس مالوش لازمه التأجيل بعد اذنك ادهم سابها وخرج وهيا ما نطقتش قعدت مكانها وعيطت شويه والباب خبط جريت تفتح بلهفه يمكن يكون رجع فتحت بس لقت امها وابوها واخوها ابتسمت ودخلوا بس طبعا اثار العياط علي وشها ظاهر دخلوا بصمت وبيبصوا لبعض مصطفي: الاكل جاهز ياااه انا ميت من الجوع اكل ولا ايه؟ ناديه: اياك تمد ايدك اكيد مجهزاه ومستنيه جوزها وشكلها ليله خاصه واحنا جايين في وقت مش مناسب ليلي: لا لا ابدا يا ماما... يالا كلنا ناكل مع بعض ادهم مش جاي اصلا دلوقتي خالص والاكل خساره هيبرد يالا يا بابا اتفضل عم محمد: طيب اتصلي بجوزك الاول شوفيه ليلي: لسه متكلمين من دقيقتين ومش هياكل ناديه: وعلشان كده انتي زعلانه؟ جوزك وقته مش ملكه مصطفي: طبعا وانتي اكيد عارفه ده كويس... ادهم ملتزم جدا بمواعيده فلو اتاخر يبقي غصب عنه ليلي: هو حد قالكم اني زعلانه؟ انا مش زعلانه... يالا ناكل ده انا عامله حبه اكل هتاكلوا صوابعكم وراه يدوب وقفوا والباب اتفتح وادهم دخل اتفاجئ بيهم موجودين وبص لمراته عم محمد: شكل حماتك مش بتحبك دي بتعشقك الكل ضحك ادهم: وانا بعشقها هيا وبنتها... طيب واقفين ليه؟ ناديه: مستنينك ادهم: واديني جيت يالا اتفضلوا قعدوا كلهم واتعشوا مع بعض بس لاحظوا ان ليلي وادهم ما بيكلموش بعض وفي جو من التوتر بينهم اخيرا خلص العشا وناديه جت تساعد بنتها بس ادهم رفض وقعدها وهو ساعد مراته يشيلوا الاكل في صمت تام ليلي عملت شاي لعيلتها وخرجته وقعدت معاهم عم محمد: مالكم فيكم ايه؟ انتو ما بتسكتوش كده؟ متخانقين؟ ادهم: لا يا عمي مش متخانقين... وبعدين حضرتك اخر واحد ممكن نقوله ان كنا متخانقين عم محمد: ليه ان شاءالله؟ ادهم: علشان احنا مش ناويين نطلق عم محمد: نعم؟ مش فاهم ادهم: الظاهر انك بتنسي... هو مش اخر مره ليلي جتلك وانا اول ما كلمتك قولتلي طلقها ولا نسيت؟ وبعدين برضه علشان اطمنك لا احنا مش متخانقين واسال بنتك اهي قدامك اهي اتقابلت عنيهم في نظره طويله قوي ليلي: لا يا بابا مش متخانقين... ما تشغلش بالك بينا عم محمد: طيب يا رب ديما ربنا يهدي سركم... يالا بينا ليلي: ليه السهره لسه طويله؟ ناديه: لا خلي جوزك يرتاح ادهم: لا مالكوش دعوه بيا خالص وبعدين لو عايز ارتاح هدخل عادي انتو مش غرباء عن البيت يعني ده بيتكم... ناديه: ربنا يخليك حبيبي بس تعالي يا ليلي عايزاكي في كلمتين كده قبل ما نمشي اخدت بنتها ودخلت بيها اوضتهم ناديه: مالك قالبه وشك ليه كده في وش جوزك؟ ليلي: ماليش ناديه: هو انا مش عارفاكي ولا ايه؟ في ايه؟ ده انتي بتفضلي متعلقه في رقبته طول الوقت والنهارده لسانك مخاصم لسانه... في ايه بقي؟ ليلي اتفتحت مره واحده ليلي: في اني حامل ناديه: اخص عليكي وما تقوليش مبروك يا حبيبتي ودي حاجه تتخبي ولا تزعل؟ ليلي: سيادته مش عاجبه ومش فرحان وبيقولي مكنتش مستعد عايزاني اعمل ايه بقي؟ ناديه: هو ادهم مش فرحان بالحمل ده؟ ليلي: ايوه مش فرحان وكنت عامله الليله دي نحتفل بيها بس اول ما عرف زعل وسابلي البيت زي ما انتو شوفتو ناديه: بس اهو رجع علي طول مش يمكن ندم وحس انه زودها ليلي: ندم ولا ما ندمش... ادهم ما فرحش بحملي يا ماما فاهماني؟ ما فرحش ناديه: اتكلمي معاه براحه متقفشيش كده وبعدين هو ممكن يكون ما فرحش لانه خايف ليلي: خايف من ايه؟ يكون مسؤل يعني؟ ناديه: خايف بسبب اللي حصله قبل كده ليلي: وده ايه علاقته بالحمل؟ ناديه: معرفش بقي المهم انتي اتكلمي معاه واتناقشوا ليلي: ربنا يسهل اهل ليلي مشيوا واول ما قفلوا الباب يدوب ادهم هيتكلم فليلي سابته ودخلت اوضتها بتغير هدومها ومتجهلاه وما بتردش عليه ادهم: وبعدين؟ ليلي:______ ادهم: هتفضلي كتير ما ترديش؟ ليلي: __-____ ادهم: يا ستي لو زعلانه حقك عليا ليلي:______ ادهم: اديني رجعتلك اهوه عايزه ايه تاني؟ ليلي:______ ادهم: برضه مابترديش... براحتك بقي يا ليلي ادهم سابها ودخل غير هدومه وخرج بيدور علي حاجه في الادراج ومش لاقيها ليلي: انت بتدور علي ايه؟ ادهم: دلوقتي سيادتك قررتي تتكلمي؟ ليلي: لا بس بتعصبني بفتح الادراج وقفلها كده ادهم: كان في علبه سجاير هنا هيا فين؟ ليلي: عايزها ليه؟ ادهم: هيا فين؟ ليلي: عايزها ليه يا ادهم؟ ادهم: عايزها وخلاص هيا فين؟ ليلي: رمتها من زمان ادهم فضل واقف للحظات يبصلها وفي الاخر اخد مفاتيحه وسابها ليلي: انت رايح فين بهدوم البيت كده؟ ادهم مردش عليها ونزل اشتري سجاير وشرب كذا واحده ورجع بيته ريحته كلها سجاير ليلي: شربتها صح؟ ادهم مردش عليها بس بصلها وكمل قلع هدومه ليلي ريحه السجاير بتضايقها جدا. ومره واحده قامت ودخلت الحمام وبدأت ترجع ادهم قام وقف من بعيد مراقبها لحد ما خلصت وخارجه شكلها تعبان ادهم: انتي كويسه؟ قلها عادي من غير الخوف واللهفه اللي هيا متعوده عليهم لما تتعب ليلي: لا مش كويسه ريحتك قلبت معدتي وانا في العادي مبحبهاش مابالك وانا حامل؟ ادهم: سوري... هسيبلك الاوضه كلها تنامي براحتك ادهم سابها ومشي وهيا عندها ذهول من امتي هو كده؟ من امتي بيهملها كده؟ ليلي فضلت تعيط وصعب عليها من ادهم ادهم شويه وحس انه زودها معاها هيا من حقها تكون ام... مش معني انه خايف من الخلفه انه يحرمها من حقها في الامومه قام ودخلها كانت راقده وبتعيط بصمت قعد جنبها ادهم: وبعدين انا ما بحبش ازعلك ليلي: تصدق بجد فعلا ادهم: اه بجد وفعلا ليلي: علشان كده الليله دي عملت كل حاجه انت عارف انها بتضايقني ادهم: ايه اللي عملته هاه؟ ليلي: ابدا منين يا ادهم؟ هاه؟ مين صدمتك اول ما عرفت بالحمل؟ ولا سيبانك البيت؟ ولا انك تنزل وتجيب سجاير وتشربها ؟ ولا انك تسيبني برجع وتقف تتفرج؟ ولا انك تسيبلي الاوضه وتطلع بره وانا زعلانه وانت عارف قد ايه الموضوع ده بيحرق دمي؟ اختار انت من كل دول بقي ايه اللي زعلني؟ ادهم: اولا انا فعلا اتصدمت بخبر الحمل ده ودي حاجه مش مقصوده او مش بايدي غصب عني ثانيا انتي اتضايقتي وانا كمان فقلت اخرج اروق اعصابي واهديها وارجع نتفاهم عادي ثالثا بقي انتي بترجعي الف سلامه عليكي بس المفروض ان انا اعمل ايه يعني؟ وبعدها بتتخانقي معايا وريحتي مش طايقاها وقولتي انك بترجعي منها فسيبتلك الاوضه وبرضه علشان متزعليش رجعتلك اهوه اعمل ايه تاني يا ليلي؟ ليلي: مش عايزاك تعمل حاجه؟ عايزاك بس تشاركني فرحتي بالحمل ده؟ ادهم: دي شعور خارج عن ارادتي يا ليلي... ممكن يختفي؟ ممكن يقل؟ ممكن يزيد؟ اللي انا عارفه حاليا اني مش عارف افكر... مش عارف اخد اي قرار او احس باي احساس... احساس وحيد مسيطر عليا مش عارف الغيه او اقلله او اغيره ليلي: احساس ايه؟ ادهم: احساس بالخوف مسيطر عليا... عارفه انا لو ما اتحركتش من قدامك وخرجت من شويه كنت هدخل في نوبه خوف... فاكراها ولا نسيتيها؟ ليلي: خايف من ايه؟ انت هتبقي اب... ايه اللي يخوفك من ده!؟ ادهم: لا بلاش ليلي: انت لازم تقولي ما تخبيش عني ادهم: اجابتي مش هتعجبك... فبلاش ليلي: ادهم حبيبي... مفيش حاجه في الدنيا دي كلها ما ينفعش تقولهالي او اشاركك فيها... قولي ايه اللي مخوفك وانا اوعدك مش هزعل منك ادهم: خايف منك انتي ليلي اتصدمت ووللحظات مش عارفه ترد عليه ليلي: مني؟ ازاي تخاف مني؟ ادهم: انتي انسانه عاطفيه ومشاعرك في اوقات كتير بتحركك... بتتصرفي وبعدها تفكري وتندمي ليلي: برضه مش فاهمه ادهم: لما زعلتي مني اول مره عملتي ايه؟ ؟ جرحتيني جامد قوي... فضحتي سر مخبيه سنين عمري كلها... في لحظه غضب هديتي كل حاجه ليلي: انا ندمت واتاسفتلك انسي بقي ادهم: في حاجات ما بتتنسيش... بنتجاهلها ونتجاهل وجودها بس هيا موجوده... عارفه زي خبطه او جرح بيخف من فوق لكن مع اي ضربه او خبطه بيتفتح تاني وبيوجع تاني ليلي: وده ايه علاقته بالحمل وخوفك مني؟ ادهم: انتي هوائيه... لما الولد الصغير مات في المستشفي عندك عملتي ايه؟ سيبتي الدنيا وجريتي علي بيت ابوكي تعيطي هناك... ليه مجيتيش هنا؟ ليه حصن الامان بتاعك بيت ابوكي مش بيتي؟ ليلي: لا مش كده... انا مجتش هنا لاني مكنتش عايزه ابقي لوحدي ادهم: وعلشان كده حبستني نفسك هناك في الحمام لانك مش عايزه تتكلمي مع حد... ليلي كلامك بيناقض نفسه... ليلي: وعلشان كده ما خرجتش غير معاك انت؟ ادهم: ليلي انا ما انكرتش حبك ليا... انا مش عارف افهمك ازاي؟ انتي وقت الجد او وقت اي مشكله بيكون ابوكي هو الامان مش انا... ليلي: انا مش قادره افهم انت عايز تقول ايه او بتلف كل ده ليه؟ عايز تقول ايه يا ادهم؟ مش عايز تخلف مني؟ مش عايز حاجه ثابته تربطك بيا؟ عايز تبقي علي طول حر نفسك؟ ادهم: هو انا دلوقتي حر؟ ليلي انا غرقت في بحر حبك من زمان قوي ليلي: امال انت خايف مني ليه؟ صوتها علي قوي وهو رد عليها بصوت اعلي ادهم: عايزاها صريحه؟ لاني خايف في يوم تزعلي مني وتحبي تعاقبيني فيدفع ابني التمن فهمتي يا ليلي؟ انتي لما بتزعلي بتدوري علي اايه اكتر حاجه بتوجعني وساعتها هيكون ابني وده اللي خايف منه ليلي سكتت تماما ادهم: انتي اصريتي تعرفي... وقت ما قولتيلي انك حامل اول حاجه جت في بالي امي وهيا بتقفل عليا باب القبر وبس... حاولت افكر في اي حاجه تانيه معرفتش... اديكي عرفتي اهو انا خايف ليه؟ خلاص؟ ليلي: خلاص... تصبح علي خير... ليلي سابته ورقدت وعطته ضهرها ودموعها نزلت بصمت بس ساعات بيكون الصمت اعلي من اي صوت هو سامع صوت صمتها ده وسامع عياطها بس مش بايده حاجه... ده خوف مبهم جواه مالوش تفسير ومالوش سبب.. الاتنين راقدين في صمت تام واخيرا النهار نور وادهم قام يلبس وينزل شغله ليلي كمان كانت بتلبس وادهم مستنيها يوصلها لقاها مسكت شنطه صغيره وبتحط هدوم فيها ادهم: انتي بتعملي ايه؟ وايه الشنطه دي؟ ليلي: بلبس ودي هدوم ادهم: ايوه انا شايف انها هدوم بس بتعملي بيها ايه؟ ايه الشنطه دي؟ ليلي: رايحه بيت بابا كام يوم محتاجه اغير جو البيت ادهم: هتسيبلي البيت وتمشي؟ ليلي: انا مش بسيب البيت انا بس هغير جو مش اكتر ادهم: ههههههههه هتغيري جو؟ براحتك ليلي: انت بتضحك ليه؟ ادهم: لانك بتثبتي كل كلمه قولتها عنك انتي هوائيه... سيبي البيت وامشي ليلي: قولتلك انا بغير جو مش اكتر ادهم: اختلفت الاسباب والموت واحد... كلها مسميات مش اكتر النتيجه واحده ليلي: اعتبرها زي ما تعتبرها يا ادهم... انا مش عارفه انت ازاي اصلا جايلك عين تقف قصادي وتحكم عليا؟ وتتكلم معايا اصلا؟ ادهم: ليه ايه اللي غلطت فيه؟اني قولتلك حقيقه مشاعري واحساسي؟ ليلي: انت مش عارف غلطت في ايه؟ انت مش عايز ابننا ورافضه! انت ما بتثقش فيا! انت بتشبهني بسوري واحده قاتله وخاينه! هو انا خنتك قبل كده؟ ولا قتلت قبل كده؟ علشان تخاف اني اقتل ابني؟ ادهم: يالا علشان اوصلك قبل ما امشي ليلي: لا رد عليا الاول ادهم: يالا علشان اوصلك ليلي: رد عليا الاول ادهم: ارد علي ايه؟ هو انا امتي قولت اني مش عايزو؟ امتي قولتلك انك خاينه ولا الهبل اللي انتي بتقوليه ده؟ ؟ طالما ما بتفهميش يبقي روحي بيت ابوكي احسن... يالا علشان اتأخرت علي شغلي ليلي: اتفضل روح شغلك... كلمت مصطفي وهو جايلي ادهم: كلمتيه امتي؟ ليلي: وانت في الحمام ادهم: طيب لو محتاجه حاجه معاكي رقمي.. سلام ادهم سابها ومشي وراح شغله وتعامل عادي جدا مع الكل... بيضحك وبيهزر وعادي بس من جواه في الم رهيب في قلبه... وجع غريب... هو عارف من الاول ان ليلي عواطفها بتحركها... عارف انها ممكن تتخلي عنه في اي وقت... عارف ان هو مش كل حاجه بالنسبالها زي ما هيا كل حاجه بالنسباله... بس ما باليد حيله... بيحبها ومش قادر يستغني عنها،... ليلي راحت بيت ابوها الصبح واتفاجؤا بيها ناديه: جيتي ليه؟ اتخانقتوا تاني؟ عم محمد: هما اتخانقوا اولاني؟ مش قولتوا مش متخانقين... ناديه: يا بنتي اتكلمي... اوعي يكون مد ايده عليكي؟ عم محمد: مد ايده؟ مد ايده ايه؟ مين ده؟ ادهم؟ انتي اتجننتني يا وليه ولا ايه؟ انطقي يا بنتي في ايه؟ ليلي: ادهم مش عايزو يا ماما؟ عيطت في حضن امها جامد عم محمد: مش عايز ايه انا مش فاهم حاجه؟ ناديه: بنتك حامل عم محمد: طيب دي حاجه كويسه مبروك ليلي: مبروك ايه يا بابا؟ بقولك مش عايزو عم محمد: مش عايز ايه؟ ليلي: مش عايز الحمل عم محمد: اكيد انتي غلطانه... ادهم عايز عيله يبقي ازاي مش عايز عيال؟ كلام مش منطقي ليلي: بيقول انه خايف... عم محمد: خايف من ايه؟ ليلي: خايف اني اعمل فيه زي ما امه عملت... ادهم بيشبهني بامه... وبيقولي اني ممكن اقتل ابني... انت متخيل يا بابا بيفكر فيا ازاي؟ ادهم مش عايز حاجه راسخه تربطنا ببعض... عايز يبقي حر نفسه؟ ناديه: يا بنتي ادهم الحق يتقال مش كده... اكيد انتي فهمتيه غلط ليلي: يا ماما هو قالي كده؟ هو قالي خايف منك! عم محمد: لا حول ولا قوة الا بالله... ده العيال دي اكبر نعمه في الدنيا... خشي يا بنتي ريحي... اعملي لبنتك فطار وغذيها علشان اللي في بطنها عم محمد خرج وراح لادهم شغله واول ما شافه واقف وسط اصحابه ورجالته وبيتكلم عادي عم محمد: طبعا لازم تكون واقف عادي كده... هيا في البيت مموته نفسها وانت واقف بتضحك وتهزر... ادهم: اهلا بحضرتك يا عمي... اتفضل نتكلم في مكتبي عم محمد: لا مش هتفضل... مش عايز رجالتك واصحابك يعرفوا ان انت عايز تسقط مراتك ومش عايز تخلف منها؟ ادهم باستغراب: افندم؟ ؟ اسقطها؟ مين قالك التخاريف دي؟ انت بتقول ايه؟ ؟ عم محمد: هو مش ده معني اللي قولته واللي عملته؟ ادهم: ايه اللي انا عملته؟ ؟ عم محمد: مش انت مشيت مراتك بدموعها الصبح بدري... انت حتي ما هنش عليك توصلها... يا اخي طيب راعي العشره اللي بينا... ادهم: هو انت بجد مصدق الكلام اللي انت بتقوله ده؟ ؟ ... ليلي قالتلك ان انا مشيتها؟ عم محمد: قالت اللي قالته بقي!؟ ادهم: طيب يا عمي بما ان انا طلعت ابن كلب واطي للدرجه دي... انا راجل طرد مراته الصبح بدري من بيته وعايز يسقطها كمان... مستني ايه؟ عم محمد: يعني ايه مستني ايه؟ ادهم: طلقها مني ولا خليها تخلعني... بعد اذنكم ادهم ماشي عم محمد: اوقف انا مخلصتش كلامي ادهم: وانا معنديش كلام اقوله وما عنديش استعداد اسمع... اللي انتو عايزينو بلغوني بيه مع مصطفي سابه ومشي وهو فضل واقف مصطفي: بابا ايه اللي انت قولته ده؟ علي فكره ليلي اللي اتصلت بيا وطلبت مني اروحلها وقابلت ادهم تحت وقالي انها هيا عايزه تغير جو وهو عرض عليها يوصلها وهيا اللي رفضت وفضل مستني لحد ما هيا نزلت وحاول يوقفها بس هيا ما سمعتش عم محمد: واحد عايز يسقط مراته تفضل معاه ازاي؟ مصطفي: بابا طول عمر ليلي بتهول الامور... انا ما اصدقش ان ادهم عايز يسقطها ابدا... وبعدين امور زي دي ما تتناقش كده... انا مش عارف انت ليه بتعمل كده معاه؟ عم محمد: اهو اللي حصل بقي... انا مروح ادهم كان متغاظ جدا فضل يلف كتير بعربيته ومره واحده غير اتجاهه وطلع علي علي مشوار جه في دماغه وصل بلد ليلي وتحديدا عند عم حسن الكل هناك قابلوه بالترحاب اول ما انفرد بعم حسن ادهم: انا جاي لحضرتك مخصوص عم حسن: اخدت بالي وعلشان كده مشيت الكل اهوه خير يا ابني ادهم قعد معاه وحكاله حكايته كلها من يوم ما خرج بره بيته عيل لحد ما ليلي دخلت بيته ادهم: بس دي حكايتي كلها... اكيد دلوقتي فهمت ليه عم محمد كان رافضني! وليه اخدنا الوقت ده كله! وايه اساس قضيه النسب اللي اترفعت عليا؟! كده كل الخطوط وضحت قدامك عم حسن: طيب يا ابني انت بتحكيلي كل ده ليه؟ ليه كشفت كل حاجه؟ انت اتضايقت لما ليلي كشفت سرك وعالجته الوضع ليه دلوقتي جاي تقولي بنفسك؟ ادهم: لان حضرتك وافقت انك تكون الكبير بتاعي وما ينفعش تكون كده لو انت مش فاهم كل حاجه... علشان تقدر تحكم لازم تبقي ماسك كل الخطوط في ايدك... وانا حاليا محتاج لحد كبير... فكان لازم تبقي عارف الاول كل حاجه عني... اديك اهوه عرفت لان حاليا انا وبنت اخوك واقفين قصاد بعض... وطبعا عم محمد ما يتوصاش وانا مش هقدر اقف قصاده عم حسن: وانت عايزني انا اقف قصادهم ادهم: ايوه... بس الاول لازم تقرر بعد كل اللي عرفته عني هتوافق تبقي كبير ليا ولا لأ؟ ده الاول وبعدها الباقي؟ (قام وقف) خد قرارك وبلغني بيه... بعد اذنك ادهم معطالوش فرصه يرد وسابه ومشي ركب عربيته ورجع القاهره شويه وجاله تليفون ورد عليه عم حسن: يعني انت جايبني وراك علي ملي وشي..اخدت في وشك ومشيت... يا ابني مش تصبر تسمعني... المهم انت فين حاليا؟ ادهم: رجعت... انا سبت حضرتك تاخد قرارك علي مهلك... عم حسن: ايوه يعني انت فين برضه دلوقتي؟ ادهم: فين ازاي؟ في عربيتي مش في حته معينه عم حسن: طيب انا داخل عي القاهره اهوه اجيلك فين ولا اقابلك ازاي؟ يعني بدال الشحططه دي مش كنت اخدتني معاك... ادهم: معلش اعذرني اقابلك فين؟ اتقابلوا الاتنين عم حسن: انت اتكلمت اديني فرصه ارد ادهم: معلش بس حضرتك كان لازم تقرر لوحدك... يعني اخو حضرتك ما تقبلش الماضي بتاعي فممكن يكون حضرتك زيه عم حسن: يا بني انت مكنش في حد في حياتك يعلمك وياخد بايدك واتعرضت لحاجات مش اي حد يقدر يتحملها وعلي الرغم من كده وصلت وبقيت راجل ولك اسمك ومركزك غيرك كان بقي مجرم ولا قطاع طريق والحمد لله ربنا رزقك باللي يفهمك ويوريك طريق التوبه والمغفره وربنا تواب رحيم... فمين احنا بقي علشان ما نسامحش!؟ انا مازلت عند رأيي انا يشرفني ابقي باي صفه في حياتك ومحمد انا هعرف اوقفه بس الاول تقولي متخانقين ليه انت وحبيبتك...، مش لسه حبيبتك ولا بطلت تحبها؟ ادهم: لا لسه حبيبتي طبعا بس الظاهر ان انا اللي مش حبيبها عم حسن: لا هيا بتحبك بس هيا متهوره حبتين ومن النوع اللي لما بيزعل ما بيشوفش قدامه ادهم: هو انت هتقولي! انا جربت زعلها زي ما قولتلك عم حسن: طيب زعلانين ليه بقي المره دي؟ ادهم: ليه بقي فدي تسمعها منها هيا... نطلع علي هناك ولا تحب تريح شويه الاول اطلع علي شقتي؟ عم حسن: لا اطلع علي هناك وصلوا هناك ويدوب هيطلعوا عم حسن: اسبقني انت وانا هصلي في الجامع واحصلك ادهم: طيب هاجي معاك ونطلع مع بعض عم حسن: لا اطلع انت وشوف مراتك يمكن الامور تتحل وبعدها انا هاجي لو اتحلت هعرف يبقي مالوش لازمه حد يعرف اني عرفت اي حاجه... لو ما اتحلتش يبقي هدخل ونشوف ايه الوضع؟ هصلي بسرعه
عند ليلي كانوا حاطين الغدا وبيتغدوا وهو ضرب الجرس بغباء ومصطفي فتحله ودخل ومن غير سلام او مقدمات دخل ووقف جنبهم وبيزعق ادهم: انا امتي قولتلك تسقطي اللي في بطنك هاه؟ ؟ وامتي طردتك من بيتك؟ وامتي بسيبك تمشي خطوه واحده لوحدك علشان اسيبك تيجي هنا لوحدك؟ وبعدين لما انا ندل بالطريقه دي متجوزاني ليه؟ هاه؟ بعتالي ابوكي يتخانق معايا في الشغل؟ مره اخوكي يفضحني ودلوقتي ابوكي جاي يقول قدام الكل اني راجل... انا... انا مش عارف انتي بتعملي كده؟ هو مش المفروض اني حبيبك؟ ردي عليا ليلي: اولا انا ما بعتش بابا ليك وثانيا مش انت قولت انك خايف مني!؟ وخايف اني اعمل زي امك واموت ابنك... ادهم: لا انا مقولتش كده... ايوه قولت خايف من تهوراتك دي... خايف من عواطفك اللي بتقتل دي... انتي في ثانيه بتبيعي... بتعتمدي علي حبي ليكي وانك مهما تعملي هرجعلك صح؟ ؟ ليلي: لا انت قولت انك خايف اعمل زي امك ادهم: انا قولت انك لما قولتيلي افتكرت اللي حصلي... قولتلك ان ده الشيئ الوحيد اللي فكرت فيه... وقولتلك اني خايف انتي بقي ربطتيهم ببعض ليه؟ ؟
ليلي: قولتلي انك مش عايز ابني ادهم: قولتلك اني كنت مستعد اعترف واتحمل مسؤليه عيل ظهرلي فجأه فعمل ايه مع ابني بس محتاج شويه وقت... انتي بتفهمي الكلام بمزاجك... بتحكمي ديما بالظاهر... عارفه انا كنت هطلع علي المأذون اطلقك وامشي بس عملت حساب لابوكي ولامك علشان ما يقولوش اني هرميكي وامشي زي ما كنتو بتقولو قبل ما نتجوز... انا قدامك اهوه وهجيب اللي اخترته كبير يحكم بينا كلهم بصوله باستغراب وشويه والجرس رن ادهم: اهو وصل ادهم راح فتح الباب ودخل عمي حسن اللي كلهم اتفاجؤا بيه عم حسن: خير في ايه؟ وايه الكلام الغريب اللي انا سمعته ده؟ ايه يا محمد؟ للدرجه دي بقيت عيل زيهم ومش عارف تحكم بينهم؟
رواية العنيد
