رواية جميلة الجزء الثالث بقلم الشيماء محمد حلقات خاصة الفصل الحادي عشر
نزلوا وتحت اتفاجؤا الاتنين بضيف ولا على البال ولا على الخاطر .. ضيف خلى هيام واقفة زي التمثال وتمتمت: أبوي ! أبوها عم فتحي بصلها كتير من فوق لتحت باشمئزاز .. شعرها، مكياجها، بنطلونها، كلها علي بعضها كانت مختلفة عن البنت اللي خرجت من بيته: ايوه أبوكي ولا نسيتي ! نسيتي اهلك ودايرة على حل شعرك ! دايرة تتسرمحي ملونة وشك بحبة بويا ولبسالي بنطلون .. يا فضيحتك يا فتحي في البلد، على اخر الزمن بنتك هتجيبلك العار...
جميلة نزلت بهدوء: اتفضل يا أبو هاشم ارتاح .. الكلام ما بيكونش كده اتفضل فتحي: كلام ! وهو لسه فيها كلام ! انجري يا بت انتي غيري القرف اللي انتي لبساه ده واغسلي وشك ويالا بينا هيام برعب: على فين ! فتحي: على السيما يا حيلتها .. هيكون فين يا بت !
هيام: أبوس رجلك يا أبا خليني مع عمتي جميلة أبوس يدك فتحي: لاه .. أخليكي لحد ما تفضحيني ! ( زعق ) انجري يا بت هيام بصت لجميلة بترجي اللي بصت لعلية وراها: علية فين فهد و وليد ! علية: فهد بيه لسه في أوضته و وليد بيه في الجنينة جميلة: ناديهم .. وانت يا عم فتحي اقعد وارتاح من سفرك وتعال اتفضل افطر الاول فتحي زعق: متشكر انا هاخد بنتي وامشي..
مسك هيام من ايدها بعنف وجميله مسكت ايدها واتكلمت بتهديد: قلتلك اقعد وارتاح لحد ما وليد يقابلك فتحي شد هيام بعنف لدرجة ان جميلة كانت هتقع: ابعدي يا بت عم محمد .. انتي مش هتمنعيني من بنتي هتنسي نفسك ولا ايه يا ... يا چميلة هنا باب التراس اتفتح ودخل وليد: اسمها جميلة هانم ولما تتكلم معاها تتكلم بأدب... وليد دخل ونظراته جمدت فتحي مكانه قرب من جميلة وهمس: انتي كويسة !
جاوبته باشاره من دماغها وشاورت على هيام و وليد لف ناحيته: هو مش من الأدب والأخلاق انك لما تدخل بيت تتكلم مع رجالته ولا ايه يا عم فتحي ! مش ده الأصول برضه عندكم ! فتحي: الأصول ! وهو اللي انتو عملتوه في البت دي خلى فيها أصول، البت جاية قطة مغمضة اجي الاقيها بالشكل ده وليد: مالو شكلها ! فتحي: ماله ! انت شايف شكلها اكده عادي ! قلعت حجابها ولابسة بنطلون وتقولي ماله ؟
وليد: هيا حرة .. الحجاب لو مش لبساه عن اقتناع ان ده الصح وده دينها يبقى قلته افضل بدال ما البس حجاب واسيء لكل معانيه .. دورك كأب تعلمها ليه تلبس حجاب مش تأمرها تلبسه .. دورك كأب تفهمها ليه ما تلبسش بنطلون ! دورك كأب تاخد بنتك في حضنك وتكون بر الأمان لها مش تخليها تكره كل حياتها في بيتك وتتمني اللحظة اللي تخرج فيها من تحت طوعك ..
فتحي زعق: انا مش جاي هنا اخد درس ازاي اعامل بنتي انا جاي ارجعها بيت أبوها فهد هنا خرج من أوضته وواقف على السلم وبعد ما كان هينزل وقف يتفرج وليد: هيام مش هتخرج من هنا الا بمزاجها .. حضرتك جاي ضيف تزور بنتك أهلا وسهلا بيك غير كده آسف فتحي بإصرار: أنا هاخد بنتي وليد هيتكلم بس كان فهد نازل من على السلم: والله الراجل عنده حق .. انتو هتمنعوه من بنته ولا إيه !
وليد وجميلة بصوله باستغراب وهو نازل بمنتهي الهدوء مبتسم: اتفضل يا عم فتحي افطر وارتاح من سفرك ولو تحب السواق هيوصلك لحد بيتك انت وبنتك فتحي بصله مش مصدق اللي بيقوله اما وليد فقرب من فتحي ومسك ايد هيام اللي ابوها ماسكها منها وشدها من إيده وخلاها وراه جنب جميلة ووقف هو في وش فتحي: كلامي واضح اعتقد فتحي: ابنك كلامه غيرك..
وليد بصرامة: البيت ده بيتي أنا مش بيت ابني هو نفسه ضيف هنا ومالوش يقول مين يقعد ومين يمشي من بيتي .. هقولها لاخر مرة جاي ضيف أهلا وسهلا بيك غير كده ليك معاملة تانية فتحي بص لفهد فوليد اتكلم: فهد مالوش كلمة بعد كلمتي ما تبصلوش فهد واقف ايديه في وسطه متابع اللي بيحصل فتحي: هاخد بنتي حتى لو بالعافية وليد ابتسم: ومالو ! نمشيها عافية..
وليد مسك فتحي من هدومه بعنف وجره على باب الفيلا وفتحي اتفاجيء ان وليد قوي قدامه لدرجة انه مقدرش يخلص نفسه من بين ايدين وليد فتح باب الفيلا ورماه بره الباب ونادي على رجالته: .. سعد، عابد الاثنين قربوا بسرعة لوليد ووقفوا حوالين فتحي وليد: وصلوا عم فتحي لباب الفيلا وأوعوا تنسوا توقفوله تاكسي وتحاسبوه فتحي وقف: دي بنتي وليد: انت اتنازلت عنها وقبضت ولا نسيت !
فتحي: محدش بيبع عياله وليد: امال الفلوس اللي طلبتها وقبضتها دي كانت ايه ! والراتب الشهري اللي اتفقنا يوصلك ده ايه ! فتحي: غيرت رأيي وليد: وانا كلامي ما بيتغيرش .. هيام هتخلص جامعتها وبعد كده هيا هتحدد بنفسها هيا عايزة تعمل ايه في حياتها .. وهيا اللي تحدد هيا عايزة ترتبط بمين .. فتحي زعق: دي بنتي وليد: كان لازم تعاملها على الاساس ده وما تنساش انها بنتك فتحي: انت فاكر هتشتريها بفلوسك ! هترجعلي برضه..
وليد: الفلوس دي تفرق معاك انت مش معايا .. انا وجميلة اتبنينا هيام كبنت لينا مش اشتريناها .. احنا خلصناها من طمعك وجبروتك وهنا في البيت وطول ما انا عايش هتفضل في حمايتي .. ولحد هنا كلامي معاك خلص، وعلشان برضه اعمل بأصلي معاك بنتك هنا عايز تيجي تزورها وتطمن عليها اهلا بيك في اي وقت غير كده الأمن هيتعاملوا معاك .. عابد وصله لباب الفيلا وما يدخلش تاني بدون اذني..
عابد مسك فتحي اللي حاول يشد نفسه بعنف بس اتفاجيء بعابد مسكه جامد وسعد كمان وطلعوه بره وليد فضل واقف متابعهم لحد ما عابد رجع تاني عنده وليد بغضب: قسما بالله لو الحركة دي اتكررت تاني ودخلتوا حد بالشكل ده لجوه بيتي لهخليكم تشحتوا في الشوارع وما تلاقوش حد يشغلكم من تاني عابد: يا افندم ده والد الانسه هيام..
وليد: انت تعرفه ! زارنا قبل كده ! بأي حق تدخله بيتي وتسيبوه لوحده وبدون ما حد فيكم يكون موجود معاه ! الناس اللي ليها حق تدخل البيت انتو عارفينهم كويس غير كده لأ لما يكون مين ! فاهم ولا مش فاهم !
عابد: آسف يا افندم وليد: اتفضل وبلغلي الأمن اللي بره ان دي الغلطة الأولي والأخيرة محدش يدخل البيت بدون إذن والأمن يفضل موجود لحد ما احنا نطلب منه يخرج اتفضل عابد: امرك يا افندم بعد اذنك وليد دخل واتقابلت عنيه في نظرة غضب بينه وبين إبنه طويلة وبعدها راح لجميلة الأول يطمن عليها كانت قعدت على الكنبة وفي حضنها هيام اللي مش مبطلة عياط وليد: جميلة إنتي كويسة !
جميلة: انا كويسة ايوه .. هيام خلاص بقى هيام: ابويا مش هيسيبني ! ابوي مش هيسكت ابدا ولا هيعديها وليد بهدوء: أبوكي خلاص مشي وطول ما انتي هنا في حمايتي محدش يقدر يلمس شعرة منك هيام بصتله ومسحت دموعها: ممكن ياخدني من الجامعة..
وليد: ما يقدرش برضه .. هخلي حد من الامن يوصلك ويفضل قريب منك وموبيلك معاكي اي حاجة هيكون تحت ايدك .. هيام انتي هنا في امان ما تقلقيش .. يالا قومي افطري انتي وعمتك .. قومي يا جميلة افطري انتي كمان يالا .. قوموا وانا هطلع اغير هدومي علشان اتأخرت على شغلي جميلة بصتله: مش هتفطر ؟
وليد بص في ساعته: لا إتأخرت قوموا انتو وليد راح ناحية السلم وطالع لفوق فهد كان في طريقه: كان المفروض تسيبها تمشي مع أبوها وليد تجاهل سؤال فهد وكان هيطلع السلم ويدوب اتحرك خطوة فهد مسك دراعه وقفه: انا بتكلم فياريت حضرتك ترد عليا ! كان لازم تخليها تمشي وليد زق إيد فهد بعنف: سبق وقولتلك إمبارح اني لما أموت أبقى مشي كلامك براحتك..
جميلة وقفت: بعد الشر عليك يا وليد .. فهد في ايه مالك ! بعدين انت ازاي تتدخل اصلا بالشكل ده ! فهد: هقولها للمرة الألف وجود البنت دي هنا غلط وليد: اسمها هيام يا فهد مش البنت .. ثانيا دي خلاص بقت من العيلة وكل ما تتقبل ده بسرعة كل ما يكون أفضل فهد وقف قصاد أبوه: ولو ما تقبلتش ؟ وليد شاور علي الباب: الباب وراك انا مش قافلو..
فهد بص لأبوه باستغراب وجميلة وقفت بسرعة بينهم: في إيه مالكم انتو الاتنين ؟ واقفين قصاد بعض كده ليه ! فهد انت ايه اللي جرالك ! مالك ! فهد بصلها: تربية ميس ولا نسيتي ! إنتو ايه انتو الاتنين ! ما بتحرموش ! ما بتتعظوش من اللي بيحصلكم ! ( بص لامه ) ازاي تسمحي لواحده تدخل بيتك بالشكل ده ! وازاي تديها الامان كده ! الماضي معلمكيش اي حاجة ؟
( بص لوليد ) وسيادتك مش هتبطل الثقة العامية للي حواليك اللي دفعت عمرك كله تمن لها ! وثقت في اولاد عمك وقتلوك وحبسوك ! مش ده كان بسبب ثقتك ! جاي دلوقتي برضه بتثق في واحدة ما تعرفهاش ودخلتها بيتك ليه ! معندكش حاجة تخاف عليها ! كل ده بتعملوه ليه ! انتو مش شايفين انا شايف كويس قوي وزي ما حضرتك قلتي انا تربية ميس وميس علمتني ما اثقش في اي حد حتي اقرب الناس .. فقدامكم اختيارين مالهمش تالت .. يا انا يا البنت دي !؟
جميلة: فهد ارجوك وليد مسك ايدها ومنعها تتكلم: وانا قلتلك الباب وراك يا فهد .. لو انت مش قادر تفهم وتقدر مشاعر والدتك ولا تفهم احنا ايه وبنعمل كده ليه يبقى الكلام قلته افضل .. انا حاولت اشرحلك بس للاسف انت عايز توصلها لكده براحتك .. لو انت لسه ما تعرفش مين هو وليد نصّار فآن الآوان تعرفه .. وليد نصّار ما بيتلويش دراعه ولا حد بيضغط عليه ولا حد بيمشي كلامه عليه حتي لو كان الحد ده ابنه ..
فيا تعرف حدودك هنا وتعرف ازاي تتعامل مع والدك ووالدتك يا براحتك اللي يعجبك اعمله .. اللي عندي قلته بعد اذنكم ... يالا يا جميله ! وانتي يا هيام اتفضلي على جامعتك عابد منتظرك بره هيوصلك هيام بتعيط: انا مش عايزة اللي بيحصل ده ! انا ممكن اسيب البيت ارجوكم بلاش كده وليد: انتي مش هتسيبي البيت وده كلام نهائي روحي على جامعتك يالا .. ( نادي ) عابد، عابد عابد دخل: افندم..
وليد: وصل هيام جامعتها وتفضل معاها لحد ما تجيبها وتشوف حد من بكره يكون مسؤل عن الموضوع ده عابد: اوامرك .. اتفضلي معايا هيام بصت لجميلة اللي شاورتلها تروح وابتسمت لها تتطمنها: روحي وما تخافيش من حاجة .. هيام مشيت والتلاته واقفين مكانهم فهد باستغراب: للدرجة دي هيا مهمة ! طيب وانا ؟ ماليش اعتبار عندكم !
وليد: انت ليه بتنزل نفسك للمنزله دي ! انت ابني وكنت حاسس انك راجل وعاقل بس مش عارف ليه بتتصرف زي الاطفال فهد زعق: علشان اللي بتعملوه ده غلط جميلة: فهد ارجوك .. علشان خاطري انا .. ( بصتلهم هنا الاتنين ) علشان خاطري انتو الاتنين ما تقفوش قصاد بعض كده .. خلاص لو هيام مضيقاكم قوي كده وطلباتي مضيقاكم ممكن يا وليد اروح اقعد انا وهيا في شقتنا القديمة وبكده ترتاحوا كلكم مننا احنا الاتنين !
وليد بصلها باستغراب: انتي عايزه تسيبيلي البيت يا جميلة ! جميلة عيطت: انا مبقتش عارفة اعمل ايه ؟ ارضيكم ازاي ! وليد مسك ايديها الاتنين ومسح دموعها: انتي مش مطلوب منك ترضي حد وطلباتك اوامر يا جميله انتي بس تشاوري وكل اللي تتمنيه او تحلمي او تفكري حتي مجرد تفكير فيه انا هنفذه..
جميلة بصت لابنها بتسأله بعنيها فهد باستسلام: زي ما هو قال طلباتك اوامر جميلة سابت ايد وليد وحطتها علي وش فهد: ما تسيبش البيت علشان خاطري فهد مسك ايدها وباسها: انا اصلا مش هاممني غير خاطرك انتي جميلة ابتسمت بدموعها: عارفة بس ارجوك بلاش وليد ساب ايدها الثانية: انا اتأخرت كتير بعد اذنكم سابهم وطلع لفوق اما فهد فضل مع امه مسك ايدها وقعدها وقعد جنبها: انتي ليه مش عايزة تفهميني !
جميلة: فهماك يا حبيبي فهد: جميلة لما حست بس ان البنت بصتلي كانت عايزة تقتلها وكانت شرسة وعايزة تفترس الكل انتي ليه مش زيها جميلة ابتسمت: هيا عيلة ولسه مشاعرها بتكون قوية وكل حاجة عندكم يا ابيض يا اسود فهد: وانتي مشاعرك خلاص بردت مثلا .. بطلتي تغيري علي وليد معدش يفرق معاكي !
جميلة بصت لقدام بحزن: حبي لوليد عمره ما يقل ابدا ولا ينقص .. وغيرتي عليه برضه ما بتقلش بس مش هغير من هيام فهد: ليه ! ناقصها ايه ! جميلة ابتسمت: مش ناقصها حاجة بس اللي بيني وبين وليد اكبر من ان عيلة زي هيام تهده .. حبيبي وليد أبوك مش بيتهز بسهولة فهد مش عارف يعمل ايه: امي وليد راجل ايوه عاقل واخلاقه عالية بس برضه راجل و وسيم جدا ومرغوب من كتير .. ده لسه من يومين صاحبة الاتيليه كانت بتعاكسه ومستغربه انه متجوز وبتتغزل فيه .. يا امي الثقة حلوة بس الغيرة مطلوبة..
جميلة: ممكن يا فهد ما تشغلش بالك بعلاقتي انا وأبوك ! اذا سمحت فهد وقف: إنتو حرين انتو الإتنين ... انا ورايا شغل بعد إذنك .. سابها ومشي وهيا فضلت قاعدة مكانها لحد ما وليد نزل وتأملته وهو نازل وافتكرت كلام ابنها ان جوزها مرغوب ووسيم وفكرت قد ايه عنده حق وليد جوزها وسيم لأقصي درجة فاقت علي صوت وليد قدامها وليد: سرحانة كده في ايه !
جميلة: لا عادي بس بفكر في اللي حصل وليد قعد علي الارض قصادها علي ركبه ومسك ايديها الاتنين وباسهم: ما تقلقيش وما تشغليش بالك أبدا علي الأقل طول ما أنا عايش جميلة قربت قوي: علشان خاطري ما تقولش كده .. ربنا يخليك ليا وليد: ويخليكي ليا جميلة اترددت وبصت لوليد اللي فهمها: عايزة تقولي ايه ! جميلة: ليه فضلت امبارح بعيد ؟
وليد اتنهد: كنت مخنوق شوية وانتي كنتي تعبانة محبتش اضايقك جميلة هزت دماغها بتفهم مع انها مش فاهمة وغيرت الموضوع: فتحي يقدر ياخد هيام غصب عنها ! وليد البنت دي مش عايزه حد يغصبها او يقرب منها او حد يبيع ويشتري فيها ! وليد بصلها كتير وشاف مدى اصرارها ان هيام ما تكونش زيها او تحميها: سبق ووعدتك يا جميلة ولا ما بقتيش تثقي في وعودي !
جميلة: لا طبعا بس ارجوك ما تسمحش لحد يأذيها يا وليد وليد بحزن: حاضر يا جميلة محدش ابدا هيأذيها ( قام وقف ) انا لازم أمشي جميلة هزت دماغها بتفهم وهو باسها في خدها ومشي من قدامها... وصل الشركة وراح علي مكتب ابنه علي طول دخل كان في كذا حد من المهندسين وليد بصرامة: سيبونا لوحدنا..
الكل بنظرة واحدة لوليد اتحركوا بسرعة و فهد قاعد مكانه بهدوءه المعتاد او بروده لحد ما الكل خرج فوليد قرب من فهد اللي وقف احتراما لأبوه: اللي انت عملته ده معناه ايه ! فهد: انا عملت ايه ! وليد اتنرفز: فهد انا اكبر من انك تفضل تلف وتدور، ابو هيام ايه اللي جابه ! فهد: جاي لبنته وليد زعق: فهد ! فهد: نعم يا وليد باشا نصّار..
وليد: ابوها جاي وبيقول سامع كلام عن بنته وجاي بنفسه يتأكد ويلغي الاتفاق وأبوها كلب فلوس مش هيلغي الاتفاق الا اذا حد زغلل عنيه بفلوس أكتر ومحدش ممكن يعملها غيرك يا فهد نصّار فهد بص لأبوه وما انكرش ولا حرف: وبعدين ! وليد استغرب: ليه ! يعني وجودها عاملك ايه ! فهد هنا دوره يتنرفز: وانت مهتم قوي بوجودها ليه ! كنت متخيل ان حبكم اقوي من اي شيء في الكون انت وجميلة وليد: ايه علاقة حبنا انا وجميلة بهيام ! فهد: معرفش والله شوف سيادتك...
وليد: لا انت اللي نورني ! طالما انت ابو العريف وتعرف كل حاجة عرفني مالها هيام ومال علاقتنا انا وامك بيها فهد: انت عارف كويس قوي نظرة هيام ليك ازاي وعارف انها قبلك بصتلي ازاي وحكيتلك اللي حصل وليد: وطالما بصتلك انت الاول وبعدها بصتلي ده قالك ايه ! ايه استنتاجك العظيم ؟
فهد: انها جاية هنا تصطاد راجل مش جاية تتعلم ان كان هيا او امها او حتي ابوها .. بصوا لجميلة وقالوا ليه لأ ! ما نعمل زيها يمكن ... وسيادتك بتسهلهالها قوي وليد: انت شايف كده ! شايف هيام جاية تصطاد عريس ! طيب سيبنا من هيام خالص .. انت شايف ان انا صيدة لهيام ؟ فهد: ايوه وصيدة حلوة كمان وللاسف انت بتسهلها قوي وبتعاملها بطريقة غريبة..
وليد: طيب بما ان سيادتك ما بتفهمش نهائي وما بتعرفش تحكم على الأمور وما بتعرفش تميز اي حاجة فياريت ما تتدخلش تاني في اللي ما يخصكش .. وعلاقتي بهيام ما تخصكش .. ولو الحركة دي اتكررت تاني قسما بالله يا فهد ما هعديهالك وزي ما قلت انت ما تعرفنيش كويس وكل يوم ده بيوضح قوي .. بعد اذنك مشي خطوتين وبص لابنه: اه صح زي ما عملت الاتفاق مع فتحي تلغيه والا هسجنه وهيكون ذنبه في رقبتك انت ..مش هسمحله يدمر حياة هيام..
خرج وليد من عند فهد وراح لمكتبه وفهد افتكر كلامه واتصاله بأبو هيام وعرضه ضعف الراتب الشهري اللي وليد خصصه ليه وطبعا فتحي وافق بسرعة رفع فهد السماعة واتصل بفتحي وبلغه انه لغي الاتفاق علشان خاطر وليد ...
نبيلة اتصلت بوليد وطلبت منه يعدي عليها علشان يروحوا لمى وبالفعل راحلها واخدها وطول الطريق نبيلة تتكلم وهو في ملكوته وأفكاره الخاصة لحد ما وصلوا ونزلوا وقابلوا مى وطبعا نبيلة فضلت تتكلم كتير عن العيلة والترابط والتسامح ومى و وليد ساكتين نبيلة: هاه يا بنتي ساكتة ليه !
مى: أنا مش عارفة اقول لحضرتك ايه ! حضرتك مجيك لحد عندي دي كبيرة قوي كبيرة فوق ما تتخيلي بس انا بجد مش قادرة اسامح .. آسر من ساعة ما اتجوزنا واحنا كل يوم في مشكلة .. يا اتكلمت، يا بصيت لحد، يا لمح حد بصلي، انا لو سرحت بيسألني سرحانة في ايه وبفكر في مين ! مش هقدر اتحمل ده ! خلاص صبري نفد .. كان خناق وكلام لكن توصل انه يتخانق مع الناس ويعمل كل اللي حصل ده فلأ مش هقدر اسكت اكتر من كده ومش هقدر اتقبل ده...
نبيلة: يا بنتي هو عرف غلطه وندم وكلنا اتكلمنا معاه مى: ماهو كل مرة بيندم ويعتذر ويتأسف ويوعد انها آخر مرة فاللي بيحصل ده مش اول مرة يحصل هو بس اول مرة يتعرف قدامكم نبيلة بصت لوليد: قول حاجة يا وليد ! ساكت ليه ! وليد بص لامه وبص لمى: مى ادي لجوازك فرصة تانية .. اعتقد حبك يستاهل ده منك ! مى عيطت ودموعها نزلت: المرة دي كنت هموت انا وبنتي تضمنلي ان المرة الجاية محدش فينا هيجراله حاجة ؟
نبيلة: يا بنتي انتي ليه مفترضة ان ده هيحصل ؟ مى وقفت: لانه حصل ميت مرة قبل كده ! نبيلة: هو المرة دي عرف غلطه مى: كل مرة بيعرف غلطه وكل مرة بيقول اخر مرة وعمرها ما هتكون اخر مرة..
وليد: وانتي خلاص فقدتي الأمل فيه لدرجة انك مش عايزة تجربي مرة كمان ! مش يمكن تكون فعلا دي آخر مرة لانه شاف هو ممكن يخسر ايه ! جربي بدال ما تندمي عمرك كله وتفضلي تقولي يمكن .. مى: أنا آسفه .. انا مش عايزة ازعلكم مني بس .. نبيلة مسكت ايدها: حبيبتي احنا مش جايين نضغط عليكي او نحرجك وترجعي علشانا احنا .. احنا عايزنكم تعيشوا مبسوطين مع بعض مى بصت لنبيلة: جربنا وفشلنا.. نبيلة هزت دماغها: ربنا يهديكم .. يالا يا وليد..
وليد وقف وحط ايده علي راس مى: أنا موجود ديما وقت ما تحبي ترجعي او تتكلمي او تحتاجي اي حاجة تليفون بس وهكون عندك مى بصتله بتقدير: ربنا يخليك لينا يا عمي .. حضرتك ربنا يعلم زي بابا بالظبط وليد هز دماغه وخرج و وراه نبيلة اللي وصلها لحد ندى وهناك كلهم منتظرين ندى: ماما عملتوا ايه ! آسر واقف منتظر وأمل و وليد كمان معاها..
نبيلة هزت دماغها بلأ مفيش فايدة وقعدت علي اقرب كرسي وكلهم واقفين، أمل مسكت ايد جوزها بخوف وعنيها علي أخوها ندى مرة واحدة انفجرت في أخوها: انت السبب يا وليد ... انت السبب .. انت اللي قولتلها ان الماضي مش هيتنسي وانت اللي قتلت الأمل بينهم .. انت السبب وليد: ندى انتي عارفة ان مش ده السبب وعارفة كويس قوي ان غباء ابنك و افكاره المتخلفة هما السبب نبيلة بتحذير: ندى اقفلي الكلام..
ندى: لا مش هقفله يا ماما .. وليد مش عارف كلمته تأثيرها بيكون ايه في اللي حواليه .. كلمتك لها وزنها ولها تقلها فلما تقولها لمى ان مفيش فايدة هتسمعك ( حاول يتكلم بس هيا كملت ) ولما تقولي اثق في خالد واتجوزه هسمعك .. فما تقوليش ان مش انت السبب لان انت السبب .. انت دمرت العيلة زمان وبتدمرها تاني دلوقتي..
وليد هنا بصلها قوي ... لتاني مرة الماضي بيطارده واخطاؤه بتهاجمه من تاني نبيلة وقفت وزعقت: ندى زودتيها قوي وليد مش ذنبه ان آسر غبي مع مراته ولا ذنبه ان خالد طلع خاين وبعدين هو نفسه اكتر حد اتعذب فينا، هو اكتر حد شال مسؤوليتنا وبعدين لما خالد كان وحش قوي كده ما سيبتيهوش ليه ! فضلتي علي ذمته ليه ! قتل اخوكي ورمي امك وفضلتي معاه فلو حد اناني هنا ولو حد غلطان فهو انتي ندى بصت لأمها: هددني بعيالي وانتي عارفة ده كويس...
نبيلة: ما انا بقولك اخترتي نفسك .. اخترتي عيالك ونفسك وما بصيتيش لحد فينا فما تجيش دلوقتي تحملينا احنا اخطاء عيالك اللي انتي ربيتيهم بنفسك واتربوا في حضنك، انتي ربيتي عيالك علي الانانيه اللي هما فيها دلوقتي وحميتيهم زياده عن اللزوم لحد ما دمرتي شخصيتهم وده واضح في آسر اللي ثقته في نفسه مهزوزة فمش قادر يثق في مراته وكل ما تتنفس يحاسبها علي النفس وواضح في أمل اللي مش قادرة تعيش وحدها في بيتها ومش مكفيها حب جوزها ومش قادرة تشوف امها مبسوطة وعلشان كده سايبة بيت جوزها وقاعدة هنا جاية دلوقتي تلومي اخوكي ! اخوكي اللي اتحرم عشرين سنة من ابنه ومراته واتحبس واتعذب بتلوميه هو دلوقتي ! بأي حق بتلوميه ! بأي حق بتشيليه فوق همومه هموم عيالك ومشاكلهم...
ندى بصت للأرض وسكتت والكل سكت اما وليد فأخد نفس طويل وبص لأمه: مالوش لازمة كلامك ده كله . ندي لو في ايدي حاجة اعملها مش هتأخر وبعدين لما برأت جوزك برأته من محاولة قتلي لاني ساعتها عرفت انها كانت تدبير ميس اما جوازك منه فاعذريني اني وافقت عليه بس اولا انا وافقت لانك انتي بتحبيه وثانيا لاني ما اطلعتش علي الغيب...
( بص لآسر ) لو بتحب مراتك لازم تتغير وتغير افكارك الغبية وتتعلم تثق في نفسك وفي رجولتك وفيها غير كده مش هترجع .. طول ما انت واقف وماسك الماضي ومعلقه قدام عنيك مش هترجع .. انت مش صغير ومش محتاجنا احنا نرجعهالك .. شوف مراتك سابتك ليه وحدد مع نفسك هتقدر تتغير وتتقبل الماضي وتتعايش معاه ارجعلها لو مش هتقدر فانهي العلاقة دي وروح دور علي واحدة معندهاش ماضي تعيش معاها ... بعد اذنكم...
سابهم وخرج وركب عربيته واتحرك وهو مخنوق مش عارف يعمل ايه ولا يروح فين ! حس ان الدنيا كلها صغرت في وشه .. ليه الكل فجأه اتقلبوا ضده كده؟ الكل بيفكره بالماضي واخطاؤه ليه ؟ فاق من أفكاره علي موبيله وكانت هيام وفكر ما يردش عليها وفضل يبص للفون كتير لحد ما فكر في ابوها وقلق يكون رجعلها فرد عليها وكانت منهارة من العياط ومش فاهم حاجة منها..
وليد: هيام اهدي انا جايلك دلوقتي خليكي مكانك خمس دقايق واكون عندك وصل عندها واتصل بيها وعرفته مكانها بالظبط وراح وقعد جنبها في صمت وسابها لحد ما بصتله واتكلمت: انا لازم امشي من بيتك وليد بصلها: ليه ! هيام: ابنك مش هيوافق عليا ! هيحصل بينكم مشاكل وانا مش عايزة كده..
وليد: اولا انتي مش في بيت ابني انتي في بيتي انا وثانيا انتي في حمايتي ومسؤلة مني انا.. فاهمة يعني ايه مسؤلة مني ! يعني انتي بقيتي من عيلتي خلاص وانا ما بتخلاش عن حد في عيلتي .. انا اتبنيتك واعتبرتك زي بنتي هيام بصتله قوي..
وليد: بتبصيلي ليه ! شوفي يا هيام انا مش عيل ابن امبارح وفاهم مشاعرك كويس قوي .. فاهم احاسيسك ومقدرها هيام بصتله قوي: يعني انت فاهم اني بحبك ! وليد انا مش بس بحبك انا بعشقك وليد ابتسم وبصلها: انتي لا بتحبيني ولا بتعشقيني يا هيام هيام باعتراض: لا بحبك انت مش هتعرف مشاعري اكتر مني...
وليد: اهدي بس انتي متخيلة انك بتحبيني لكن انتي حبيتي اهتمامي بيكي، حبيتي انك تكوني محور اهتمام حد، عقلك ترجم الاهتمام ده غلط وترجم قربي منك غلط .. انتي مفتقدة للحنان في حياتك وللحب وانا قدمتلك الاتنين حنان الأب يا هيام وحبه مش اي حب تاني ... عقلك صورلك انك لو حبتيني او خليتيني انا احبك فانتي بكده هتكوني في أمان مدى الحياة وتعيشي زي جميلة فأنا بطمنك اهو انا مش هتخلى عنك ابدا وهأمنلك مستقبلك كله..
هيام بكرة لما تكبري شوية ومشاعرك تستقر وتفهمي الدنيا صح وتقابلي الانسان المناسب ليكي هتعرفي تميزي الحب صح وهتعرفي ايه الفرق بين حبك دلوقتي ليا انا والحب اللي بجد .. الحب اللي بيخطف انفاسك وياخدك لعالم تاني .. الحب اللي بيلغي العقل والمنطق وبيدخلنا لحالة من الجنون .. الحب حاجة مختلفة تماما عن اللي انتي فاكراه دلوقتي حب..
وليد مد ايده لها: حطي ايدك في ايدي كأب ليكي وانا اوعدك اني مش هتخلي عنك ابدا في اي يوم .. هيام دموعها نزلت ومبقتش فاهمة اي حاجة بس مدت ايدها وحطتها في ايد وليد اللي وقف ووقفها معاه بس هيا شدت ايدها وبصتله: فهد مش هيقبلني ؟ وليد ابتسم: فهد لما انتي تعقلي وتوزني الأمور صح هيعقل هو كمان وهيكون أخ بجد ليكي .. أخ يعتمد عليه ومراته هتكون أخت ليكي .. هيام انتي دخلتي بيتنا وقدامك فرصة تعيشي وسط عيلة تحبك وتحترمك او تمشي في طريق غلط وساعتها هتخسري احترام الكل وحبهم..
فانتي عدي بقى مرحلة الانبهار لان خلاص كل حاجة بقت تحت ايدك .. دلوقتي بقى شغلي عقلك وركزي علي مستقبلك اللي بجد و اهتمي بدراستك وكليتك لان حاليا ده المطلوب منك وده المهم مش اي حاجة تانيه ولما تتخرجي ليكي عليا اجوزك لواحد يقدرك ويعشقك بجد وتكوني ملكته هو .. احفظي نفسك يا هيام للي يستاهلك بجد لانك لو غلطتي او فرطتي في اي حاجة منك صدقيني هتندمي عليها جدا .. الراجل لما بيحب بيحب حبيبته تكون كلها علي بعضها ملكه هو وبس بكل ما فيها بماضيها وحاضرها .. حافظي علي ماضيكي علشان تضمني مستقبلك...
هيام مسحت دموعها: كلامك حلو قوي بس ما فكرتش اني ممكن اكون بحبك بجد ! وليد بصلها واخد نفس طويل: انتي داخله البيت ده وانتي عارفة اني مش بس بحب جميلة انا بعشقها وكنتي متقبلاه عادي وده اكبر دليل انك بس انبهرتي بحاجات تانية مجرد انبهار هيزول لوحده .. فكري عقلك ونفسك اني اب ليكي وبس وصدقيني هتتفاجئي من نفسك ومن مشاعرك وليد اخد هيام وطلب من عابد يروح هو ... اخد هيام وراح يغديها بره البيت بعيد عن الكل .. هو معظم الوقت سرحان وهيا كمان ..
موبيل هيام رن وبصت لوليد: دي عمتي وليد: ردي عليها هيام ردت: ايوه يا عمتو ... ايوه انا معاه ... احنا كويسين ... تحبي تكلميه ؟ اه طيب خلاص ... حاضر سلام قفلت و وليد استغرب: قالتلك ايه ! هيام: مفيش بتطمن عليا لما لقت عابد راجع لوحده وليد: وايه تاني ؟
هيام ابتسمت: قالت هتبقى هيا تكلمك علي موبيلك لانها حاليا بتتغدي مع الباقيين وليد هز دماغه بس اتخنق انها مكلمتوش هو .. ليه ما اتصلتش بيه هو واتصلت بهيام ! وليد حاسب ووقف: يالا محتاج انام .. امبارح ما نمتش غير نوم مقطع هيام وقفت: يالا ركبوا العربية وهيام بصت من الشباك بتفكر هل ممكن تتخطى حب وليد وفعلا تعتبره كولي امر ولا ده صعب !
وليد بيفكر في شريط حياته كلها من اول يوم شاف فيه جميلة وحياتها معاها وندى وجوازها من خالد ونسمة اللي ماتت بسبب محاولة محي من الانتقام .. كل ده ليه ! علشان شوية فلوس زيادة .. اتخنق من كل حاجة حواليه والدنيا بتضيق وتضيق وتضيق وفاق علي صوت هيام بتصرخ: وليييييييييييييييييد...
رواية جميلة الجزء الثالث بقلم الشيماء محمد حلقات خاصة الفصل الثاني عشر
وليد انتبه بس للأسف متأخر لأنه حس بدربكة وخبطة وحاجات كتير بس حاول ياخد فرامل جامد والعربية لفت حوالين نفسها وعملت صوت عالي جدا لحد ما استقرت .. كل ده حصل في لحظات وهو مش مستوعب ايه اللي حصل .. بص لهيام برعب: هو ايه اللي حصل ! انتي كويسة ! هيام كمان كانت مرعوبة وبصوت بيترعش: انا...كويسة وليد بص حواليه وسألها مرة تانية: ايه اللي حصل يا هيام ! انا خبطت حاجة صح ! انا خبطت ايه !
هيام عيطت: خبطنا حد هنا وليد بصلها للحظة ونزل من العربية بسرعة بيتلفت حواليه لحد ما لمح حد جنب الرصيف مرمي علي الارض جري عليه لاحظ انه بينزف من دماغه وهيام نزلت من العربية بس متثبتة مكانها وليد صرخ: كلمي الاسعاف بسرعة هيام دخلت ومسكت موبيلها ومعرفتش تعمل ايه .. لمحت موبيل وليد في الدواسة جابته وبرضه معرفتش تتصل بمين نزلت وجريت علي وليد: معرفش الاسعاف اتصل بفهد ؟
وليد بصلها: فهد لأ .. هاتي مسك موبيله وفكر بتصل بمين ومخطرش باله غير شخص واحد بس فاتصل بيه @ عاش من سمع صوتك فينك يا عمنا وليد بصوت متوتر: ادهم الحقني قاله باختصار شديد جدا اللي حصل..
ادهم: لحظات يا وليد وهيكون عندك الاسعاف وانا كمان ما تقلقش .. هقفل معاك علشان ابلغ ليلي وهكلمك تاني وبالفعل خلال خمس دقايق كان الاسعاف وصل وأخدوا الراجل اللي وليد خبطه وبعدها بدقيقتين وصل ادهم كمان ادهم: وليد انت بخير ! طمني وليد: انا انا .. انا كويس ادهم: انت مش كويس خالص .. انت بتنزف علي فكرة !
وليد حط ايده بتلقائية علي جنب وشه: ده ولا حاجة .. خبطة بسيطة ادهم: تعال معايا نروح علي المستشفي ونطمن علي الوضع ايه ونطمن عليك يالا .. وليد ماشي مع ادهم زي التايه وادهم ركبه العربية بتاعته ادهم: اديني مفاتيح عربيتك علشان اركنها واقفلها لحد ما ابعت حد لها وليد بصله: العربية مفتوحة ادهم راح للعربية وهناك اتفاجيء بهيام اللي قاعدة مكانها خايفة ادهم: انتي مين ؟
هيام بصتله بخوف: هيام ادهم: ايوه ماشي هيام، مين يعني ؟ هيام معرفتش تقول ايه: كنت مع وليد ! ادهم كشر وبصلها ومش فاهم مين دي! ادهم ركب العربية وركنها علي جنب ادهم: انزلي علشان اقفل العربية نزلت وبصت حواليها وسألت ادهم لما نزل: وليد فين !
ادهم بصلها قوي واتخنق منها: هو انتي متعودة تقولي عليه وليد كده ! هيام بصتله: ايوه ليه ! هو فين ! هو ما ركبش الاسعاف ! ادهم: في عربيتي اتفضلي راحت هيام ناحية عربية ادهم اللي فتحلها العربية: اتفضلي لما نعرف حكايتك انتي كمان ايه ! ركب ادهم وبص لوليد اللي حاطط راسه بين ايديه ادهم: اربط حزامك يا وليد ..
وليد بص لادهم بتوهان فأدهم ربط هو الحزام لوليد وطلعوا علي المستشفي وراحوا يطمنوا علي المصاب بس كان لسه في العمليات وقعدوا ينتظروا وادهم عنيه علي هيام عايز يفهم مين دي ؟ ليلي جت عليهم فوليد وقف وادهم كمان وقربوا عليها ادهم: انتي مش خارجة من العمليات ليه ! امال مين معاه جوه ؟
ليلي: لا مش انا اللي معاه ما تقلقش ادهم: ليلي قولتلك ادخلي بنفسك ليلي: حبيبي اهدي هو معاه دكتور ممتاز ما تقلقوش ادهم اتنرفز: مين يعني ! ليلي: ابنك يوسف .. عندك اعتراض انه دكتور فوق الممتاز كمان !
وليد اتدخل: المهم يا ليلي نطمن علي الراجل ده ! ما ينفعش يجراله حاجة ! انا مش هقتل بني ادم .. ما ينفعش يموت اصلا ! ادهم: ليلي ينفع طيب تدخلي تطمنينا عليه وتشوفي ابنك بيعمل ايه جوه ! ليلي: حاضر هدخل حالا اشوف الوضع ايه واطمنكم .. وليد ما تقلقش وبعدين اكيد غصبا عنك يعني .. بعدين الدم اللي في وشك ده ايه ! انت متعور ادهم: اه يا ستي متعور ورافض حد يشوف الجرح ليلي: هدخل اطمنكم وبعدها نطمن عليك لحظة وراجعة ليلي خرجت بعد خمس دقايق: ما تقلقوش وضعه مستقر نوعا ما .. وليد ينفع نطمن عليك انت !
دخلوا الثلاثة في أوضة ليلي اللي بدئت تعالج جرح وليد وادهم واقف عنده الف سؤال ادهم: وليد ايه اللي حصل ! ازاي خبطته ! وليد اتنهد ومش عارف يقول ايه: مش عارف .. انا مرة واحدة اتفاجئت بهيام بتصرخ وبعدها حسيت بدربكة واكتشفت بعدها اني خبطت حد ! ادهم: انت اللي كنت سايق ولا هيا ! وليد: انا طبعا يا ادهم ! ادهم بتردد: وليد مين هيام دي !
ليلي اتدخلت: ادهم مش وقته ادهم: لا وقته لان هيكون في تحقيق والكل هيعرف بوجود هيام معاه فلو هيا موجودة بصورة مش وليد قاطعه: انت متخيل هيام دي ايه ؟ ادهم: معرفش قولي انت ! عيلة في السن ده معاك وبتقولك وليد كده بدون اي ألقاب، يعني ملهاش معاني كتيرة يا وليد ! ليلي بتلقائية: وليد انت بتخون جميلة ؟ وليد بصلهم الاتنين باستغراب: انتو بتقولوا ايه انتو الاتنين ؟ مين ده اللي يخون جميلة ! ادهم: طيب مين دي !
وليد اخد نفس طويل طلعه علي مراحل: هيام دي كانت الشرارة الصغيرة اللي ولعت الدنيا كلها .. هيام هيا البداية ! هيام اثبتت ان الماضي ما بيتنسيش وانه ممكن نتجاهله لكن بيفضل موجود ومع اي نبش فيه بيصحي كل اللي فات .. هيام دي جميلة جديدة او جميلة بتعتبرها كده ! هيام دي مسؤلية جديدة اتحطت علي اكتافي وانا صراحة معدتش قادر اشيل مسؤليات تانية .. انا تعبت .. تعبت من كل حاجة .. تعبت منهم كلهم .. كلهم أدهم قرب من وليد: وليد انت فيك ايه ! ايه اللي بيحصلك بالظبط ؟
وليد بصله: وايه اللي ما بيحصليش ؟ ادهم: طيب واحدة واحدة قولي مين هيام دي وبلاش كلام مبهم ! وليد كان محتاج يتكلم بس بص ل ليلي اللي وقفت: انت اخذت غرزتين بس والحمد لله ان الجرح سطحي .. هروح اطمن علي يوسف والحالة واطمن علي هيام دي .. وليد تحب اتصل بأي حد ؟ وليد بسرعة: لأ .. مش عايز حد يعرف حاجة خالص .. وبلغي هيام بكده قوليلها ما تكلمش حد نهائي اي حد ليلي باستغراب: مش هتبلغ ابنك او جميلة ؟
وليد: مش هبلغ حد ليلي سابتهم وخرجت اما ادهم فقعد قصاد وليد: اتكلم بقى براحتك وابدأ من الأول وليد حكى لادهم كل اللي حصل من ساعة ما هيام دخلت البيت وخناقاتهم المستمرة وبعده عن جميلة وآسر ومى واخته وخلافه معاها .. كان محتاج يتكلم ومحتاج لحد يسمعه وادهم كان الحد ده وانتظر لحد ما خلص كلامه خالص وسكت تماما أدهم: غلطان يا وليد .. غلطان قوي كمان وليد: أنا غلطان ؟ غلطان في إيه !
أدهم: في كل حاجة .. غلطان انك تشك في حب جميلة لك .. غلطان في سكوتك وصمتك قصادها .. غلطان في افتراضاتك دي كلها .. غلطان في كلامك مع مى وانك تنصحها تسيب جوزها .. غلطان انك مقفلتش الماضي تماما .. غلطان مع هيام انك ترفع كل الحدود بينك وبينها بالشكل ده .. غلطان انك تفترض ان لان جميلة عاقلة وطيبة يبقى مش هتغير عليك .. غلطان انك تسمح لعواطف مراتك وماضيها يلخبط كيان بيتكم كله .. انت اذكى من كده يا وليد..
وليد زعق: انا مش اذكى ولا زفت انا مش عارف أعمل ايه اوكي ؟ مش عارف ايه الصح ؟ قولي انت ايه الصح ؟ اني اطرد هيام من البيت ! واقول لمراتي لأ ؟ ادهم: لا طبعا .. في الف حل غير طردها من البيت .. في اختراع اسمه بيت الطالبات أوالمدينة الجامعية او حتي سكن خاص مع صحباتها .. او علي الأقل يا وليد تعرفها حدودها ايه !
وليد: علي فكرة هيام مش مشكلتي مع جميلة خالص ادهم: عارف مشكلتك مع جميلة تتلخص في صمتك .. ليه ما اتكلمتش معاها ؟ ليه ما سألتهاش مباشرة ليه فتحت الموضوع ده من تاني ؟ هل هيا لسه مجروحة ولا بس بتبرر لبنت اخوها علشان تخليها تقبل هيام في البيت !
وليد بص لادهم اللي كمل: اه احتمال كبير و وارد جدا ان جميلة حاولت تكسب بنت اخوها في صفها ف فتحت قلبها ليها وحكت عن ذكرياتها بس مش معني ده ابدا انها بتكرهك او انها مجبورة تعيش معاك .. يا ابني دي اتحملت علشانك اللي مفيش واحدة تتحمله وليد: لانها مجبرة ادهم صحح: لانها بتحبك مش لانها مجبرة .. انت ازاي بتشك في حبها ؟ وليد سكت ومسك دماغه: طيب دي جميلة وباقي العيلة ؟
ادهم: آسر عنده مشكلة ومحتاج لمساعدتكم ومحتاج ثقته في نفسه تترد الاول اما ندى اختك فدي لحظة غضب مش مقصودة منها اكيد .. وفهد ابنك خاف علي امه .. خاف ابوه يكرر الماضي من تاني وزي ما انت ما شكيت في حب جميلة ليك هو شك في حبك انت لجميلة .. حب يدافع عن مشاعر والدته ويحميها .. خاف عيلته اللي ما صدق لقاها تتفرق من تاني .. وليد: علي فكرة انا ما شكتش في حب جميلة ادهم: امال ايه ؟ عملت مسافة بينكم ليه !
وليد: ده خوف .. خوف يا ادهم تكون بس بتتقبل اللي حواليها .. خايف تكون لسه مجروحة مني .. خايف اكون مهما اعمل مش هقدر انسيها اللي حصلها في بداية حياتي معاها ادهم حط ايده علي كتف وليد: وليد اللي بيحب بيسامح .. انت معملتش حاجة في جميلة واللي حصل كان قبل حتي ما تعرفوا بعض كويس او تحبوا بعض.. وظروفك كنت مجبر عليها .. انا لو حكيتلك عن المطبات اللي قابلتني انا ولوليتا هتشيب منها .. احنا جرحنا بعض وهِنّا بعض وافترقنا عن بعض بس حبنا ديما بيرجعنا لبعض .. فكل اللي انت بتحكي عنه ده ولا حاجة من اللي انا وليلي عملناه في بعض ..
اهم حاجة يا وليد انك انت وحبيبك تكونوا واحد .. ما تتقسموش اتنين وكل واحد يفكر بعيد عن التاني ويفترض بعيد عن الثاني .. ما تخبوش حاجة عن بعض .. واشتكوا لبعض حتي لو هتشتيكي منها اشكيها لحبيبتك .. المفروض تكون كل حاجة لحبيبتك تكون اب واخ وصديق وحبيب وزوج فلما تحب تشتكي جوزها هتشكيه لحبيبها او لابوها .. هتشكيك منك ليك .. وبكده هتحلوا كل مشاكلكم بدون الافتراضات اللي ملهاش اي معني..
وليد اتنهد: ده المفروض .. ده المفروض .. ( وليد بص لادهم ) انا تعبااان تعبان فوق ما تتخيل ومحتاج ارتاح بعيد عن الكل .. حاسس بعبء .. عبء شديد قوي ومش عارف أعمل فيه ايه ؟ مش عارف ارتاح ازاي ؟ ادهم: خد هدنة من الكل .. ارتاح يومين بعيد عن الكل .. ليلي هنا دخلت عليهم: الراجل خرج من العمليات وحالته مستقرة .. وليد حمد ربنا وبص لادهم: دلوقتي ايه اللي هيتم..
ادهم: المستشفي بتبلغ البوليس وهيكون في تحقيق بس ما تقلقش . غير كده ممكن نقنع المريض انه ما يرفعش دعوي او ممكن يكون هو غلطان وليد: غلطان او مش غلطان انا كنت سرحان يا ادهم .. مكنتش مركز في الطريق خالص ولولا هيام صرخت ولا كنت اخدت بالي ده انا كده كمان كنت دوست فرامل ادهم: كل الكلام ده سابق لأوانه يفوق بس الأول وبعدها ربنا يسهل وياريت ما تقولش لحد حتة انك كنت سرحان ومش مركز ارجوك..
وليد خرج لهيام بره وليد: اوعي تكوني كلمتي حد ؟ هيام هزت دماغها: أصلا انا نسيت موبيلي وشنطتي في العربية .. بس هيقلقوا .. وليد: هبقى اطمنهم بعدين..
في البيت اتغدوا متأخر وبعدها جميلة منتطرة وليد يرجع بقى.. كام يوم وهو بعيد عن حضنه .. فضلت كتير منتظراه لحد ما تأخيره بدأ يقلقها وخصوصا بتليفون هيام اللي ما بتردش عليه خالص وحاولت تتصل بوليد بس هو كمان تليفونه مغلق .. اخيرا راحت لابنها وقلقته معاها فبدأ يسأل عن ابوه فين وبدأ يلف عليه في كل مكان .. معندوش فكرة ممكن يكون فين هو او هياااام جميلة هتتجنن من القلق ومهما الكل يطمنها الي انها هتتجنن عليه ...
فهد بلغ الكل صلاح ابو مى وأكرم ويزيد والكل بيدور عليه .. البوليس جه وبدأ يحقق وادهم طلب منهم يأجلوا الاستجواب لحد ما الراجل يفوق وليد قلقان جدا علي الراجل اللي خبطه وقاعد جنبه منتظره يفوق يوسف دخل عنده: علي فكرة اونكل وليد هو بإذن الله هيكون كويس ما تقلقش عليه .. وليد: يفوق بس الأول يا يوسف وبعدها نطمن كلنا بإذن الله..
يوسف بيهزر: انت عندك شك في قدراتي كدكتور ولا ايه ؟ ايوه انا مش بكفاءة الدكتورة ليلي بس انا شاطر يعني وليد بصله: لا طبعا ايه اللي بتقوله ده ! انت زي ابني بالظبط وزي ما بثق في ابني وفي ذكاؤه بثق فيك برضه ده انتم كمان ممكن تكونوا اذكى مننا وبمراحل كمان يوسف اتحرج: انا متشكر للثقة دي .. علي العموم انا بس كنت عايز اطمنك ما تقلقش حضرتك ..
يوسف خرج وادهم دخل: تعال يا وليد معايا لحظة اخده ودخلوا اوضه لوحدهم ادهم: مش عايزك تتكلم خالص عن موضوع السرحان والتوهان وانك ما شفتوش وليد: انت عايزني اتهرب من غلطي ومسؤليتي ؟ طيب الراجل اللي كان هيموت فيها ده ؟ ادهم: حبيبي انا ولا عايزك تتهرب ولا هنضر الراجل ده ! في مثل بيقولك رب ضارة نافعة وليد بصله: مش فاهم !
ادهم: بص الاول انا عارف ان اللي حصل ده غلط ومش قصدي خالص تتهرب من مسؤليتك انت هتشيل المسؤلية بس بصورة تانية تفيدكم انتو الاتنين .. يعني كلامك هيسجنك وهو مش هيستفاد شيء بسجنك وليد: انا مش فاهم يا ادهم حاجة ادهم: افهمك .. الراجل اسمه محمود عبدالكريم، راجل في الخمسين عنده ٣ عيال منهم واحد متجوز وساكن معاه في بيت صغير في منطقة شعبية بيت من ٣ أدوار وعنده ولد في الجامعة وبنت اتخرجت وعلي وش جواز مخطوبة من كام سنة وليد: كل ده عرفته منين !
أدهم: لقينا بطاقته معاه وليد: البطاقة فيها كل ده يا ادهم ؟ ادهم: يعني ده شغلي انت مالك بقى وليد: انت بتقولي كل ده ليه ! ادهم: الراجل ده بيته آيل للسقوط وجايله أمر ازالة وليد: بمعني ؟ أدهم: بمعني انه هيترمي في الشارع هو وعياله لأنه موظف بسيط ومحيلتوش غير البيت ده وراتبه وليد: انت عايزني ارشيه !
ادهم اتنرفز: ترشي ايه يا عم انت .. في ايه يا وليد ؟ وليد بزهق: ما انا مش فاهم يا ادهم انت عايز توصل لأيه ! ادهم: الراجل ده النهاردة استلم قرار المحكمة بإزالة البيت .. بعدين اللي فهمته من هيام ايوه انت كنت سرحان بس كمان كنت في طريقك .. يعني ولا لفيت شمال ولا لفيت يمين وليد: بمعني برضه ؟
ادهم: بمعني انك انت اه مش مركز بس ماشي في طريقك هو اللي جه في طريقك .. هو اللي غلطان مش انت .. انت غلطك بس انك ماخدتش فرامل لانك سرحان لكن قانونا انت مغلطتش هو اللي غلط لانه بيقطع طريق وهو مش مركز فيه كده انت مكنتش ماشي بسرعة مثلا او ماشي غلط وليد: يعني انت فعلا عايزني اخلي مسؤليتي ادهم: قانونا انت مش غلطان .. وليد: وضميري ؟
ادهم: ضميرك ترضيه بإنك تنقذ الراجل ده وعيلته من التشرد في الشارع وساعتها خبطك للراجل ده هيكون اجمل شيء حصله في حياته وليد بص لأدهم كتير وسكت وقبل ما يتكلم يوسف خبط ودخل: الراجل فاق الاتنين خرجوا وراحوا عنده وليد: حمدالله علي السلامة ! طمني عليك ! الراجل بتعب: أنا فين ؟
وليد: في المستشفي .. انا جبتك علي هنا علي طول الراجل بيحاول يتعدل: انا مقدرش علي مستشفي بالشكل ده ولا حمل مصاريف .. الممرضة دخلت: البوليس بره عايز يحقق معاه ! ادهم: خليه بره لحظة لما انا اطلعلهم..
الممرضة خرجت والراجل بصلهم بخوف: انا عارف اني غلطان انا عديت الشارع وانا تايه وسرحان .. يا بيه لو عربيتك اتأذت ولا حاجة معلش حقك عليا يعني انا ممكن ادفعلك بالتقسيط اي ضرر ادهم بص لوليد وبص للراجل ادهم: البوليس هيدخل دلوقتي وهيحققوا معاكم انتو الاتنين وهما يحددوا مين فيكم الغلطان محمود: طيب ولزمته ايه البوليس ؟
وليد: استاذ محمود انا كمان كنت سايق ومش مركز زيك وانا خبطتك ادهم اتنرفز بس سكت وحط ايديه في وسطه وفضل باصصلهم وسكت محمود: يعني انت مش هترفع عليا شكوي وعربيتك مجرلهاش حاجة ! وليد: يا عم عربيتي ايه اللي بتتكلم عنها تولع العربية المهم انت تقوم بالسلامة لبيتك ولعيالك ده اللي يهم دلوقتي وما اقلقش من مصاريف المستشفي زي ما قولتلك المهم صحتك..
محمود ابتسم: انت انسان ذوق قوي حضرتك .. انا لو ليا حق متنازل عنه كفاية ذوقك وادبك واخلاقك وليد بص لادهم: دخل البوليس ادهم: اعتقد كده انتو الاتنين متنازلين عن حقوقكم .. محدش فيكم هيشتكي التاني ؟ الاتنين: طبعا بالفعل اتقفل المحضر بسهولة لان محدش فيهم اشتكي ولان ادهم سرع كل الاجراءات اللي ممكن تحصل ..
وليد كلم عيال محمود اللي جوله علي المستشفي وقعدوا كلهم جنبه وليد مع ادهم اتفاجيء بأكرم جاي عليهم وليد: أكرم ! مين بلغك ؟ ادهم: محدش بلغه هو اتصل بيا لما شاف عربيتك مركونة ولانه قلقان طمنته اكرم: عيلتك هتموت من القلق ! كلهم ماعدا نبيلة معرفتش اصلا انك مختفي وليد: طيب كويس ما تعرفوش امي بحاجة وباقي البيت مش مستعد اواجه او اشوف حد فيهم ..
أكرم: علي الأقل طمنهم يا وليد وليد: مش عايز اطمن حد يا أكرم .. مش دلوقتي أكرم: أنا لازم ابلغ قاطعه وليد: تبلغ مين ! ندى ؟ ندى اللي بتتهمني اني سبب كل مشاكلها في الحياة يا اكرم ! اكرم: وليد دي كانت بس لحظة غضب وليد بصرامة: غضب ولا غيرو لو بلغت حد بمكاني او حد عرف منك حاجة هعتبرك من هنا ورايح جوز اختي وبس أكرم: ياوليد قاطعه: جوز اختي وبس يا أكرم..
أكرم باستسلام: انا مش جوز اختك وبس يا وليد .. انا صاحب ورفيق وأخ كمان وليد: يبقى اذا سمحت تسيبني براحتي روح وقولهم معرفتش حاجة وبلغهم كمان انك تواصلت مع ادهم وهو بيدور هو كمان علشان فهد ما يتصلش بيه ادهم: انت هتقاطع عيلتك يعني ؟
وليد زعق: انا عايز ارتاح ليلة واحدة .. مجرد ليلة ؟ كتير ؟ انت اخدت هدنة من بيتك خمس سنين ولا نسيت ؟ ادهم: ما نسيتش بس ظروفي كانت مختلفة وندمان علي الخمس سنين دول فوق ما تتخيل، خد هدنة زي ما قولتلك من الكل بس مش كده ومش بالطريقة دي ! وليد: معلش سيبوني الليلة دي براحتي روح يا اكرم وخليك معاهم اكرم: طيب اخد هيام !
هيام: لا خليني هروح بعدين معاهم لما اطمن علي الوضع هنا أكرم روح علشان محدش فيهم يشك فيه اما وليد دخل عند محمود قبل ما يمشي وليد: الأول حمدالله علي سلامة والدكم محمود: والله يا استاذ وليد مش عارفين من غيرك كنا عملنا ايه !
وليد: اولا قولتلك اسمي وليد وبس وثانيا انا غلطان زيي زيك المهم زي ما قولتلك تخرج لعيلتك بالسلامة مرات محمود: الحمد لله علي كل شيء ابنه الصغير: ايوه المهم تخرج علشان تشوف هنعمل ايه .. المفروض نخلي البيت خلال اسبوع ونشوف هنعمل ايه ! محمود: مش وقته يا مودي وليد اتدخل: فعلا مش وقته وما تقلقوش خالص من الموضوع ده انا هتصرف فيه مودي وقف: انت تقدر تلغي قرار المحكمة بالازالة ! وليد: البيت هيقع ولو ما اتزالش دلوقتي هيقع في اي وقت الابن الكبير احمد: امال حضرتك هتتصرف ازاي !
وليد اخد نفس طويل وبص لمحمود وكلهم لان انظارهم اتعلقت بيه وافتكر كلمة ادهم ان رب ضارة نافعة يمكن ربنا عمل كده علشان يبعته للعيلة دي .. وليد: مش وقته زي ما قولت خلي والدكم يرتاح ده لسه خارج من عملية والحمد لله ان ربنا نجّاه .. المهم ما تقلقوش خالص انا موجود وهتصرف انتو حاولوا بس تلموا حاجتكم من البيت وانا هتصرف في مكان تاني .. نتكلم بالتفصيل بكرة ان شاء الله لان انا كمان تعبان ومحتاج ارتاح .. احمد تليفوني معاك اي شيء يحصل بلغني .. هو تليفوني مقفول دلوقتي لانه فاصل بس اول ما اروح هشحنه ولو في اي شيء دكتورة ليلي ودكتور يوسف مكاني بلغوهم وهما هيتعاملوا .. اشوفكم الصبح ان شاء الله..
سابهم في حيرة مش عارفين يفكروا وخرج كان ادهم منتظره هو وهيام واخدهم علشان يروحهم ادهم: يالا علشان اروحكم الوقت اتأخر ركبوا و وليد طلب من ادهم يوصله شقته القديمة مش البيت وليد: ادهم احنا هنا قريبين وصلني الاول وبعدها وصل هيام ادهم وقف تحت العمارة: علي الاقل يا وليد طمنهم عليك الاول ! وليد: لا معلش محتاج اكون لوحدي .. هيام لما تروّح تطمنهم ادهم: انت حر بس ده غلط اللي بتعمله وليد: معلش هيام: طيب انا هنزل معاك..
الاتنين بصولها باستغراب وهيا كملت كلامها: خليني معاك .. انت اتعورت وتعبان وما اكلتش حاجة نهائي .. انت بتقول اني بنتك وانت بتعتبرني كده يبقي اسيبني اقوم بالدور ده .. ما ينفعش اسيبك لوحدك علي الاقل تاكل لقمة وترتاح وبعدها هروح وليد: يا بنتي عايز افضل لوحدي هيام: اتعشي وبعدها همشي ( بصت لادهم ) قوله حاجة ! يمكن يتعب بالليل وهو لوحده .. علي الاقل نطمن انه ياكل وياخد دواه هو مخبوط في دماغه وممكن يتعب !
ادهم بصلها كتير وبصله: هيا عندها حق .. لو كده انا ممكن اطلع معاك واستناها لحد ما اوصلها لو ده قالقك هيام: هطلب اوبر عادي يعني .. انتو محسسني اني عيلة لو مشيت لوحدي هتوه ولا هتخطف ادهم بتأكيد: انتي فعلا عيلة واه ممكن تتوهي او تتخطفي هيام كشرت وبصت لوليد: ساعة وهمشي ما تقلقش ادهم: وليد انجز بقى نطلع معاك ولا ايه ! يا تروح لبيتك..
وليد: هطلبلها اوبر .. روح انت .. انت تعبت معايا كتير النهاردة واليوم كان طويل ادهم: ساعتين زيادة مش هيهدوا الدنيا وليد: لا معلش روح انت كفاية عليك بعدين انت مش ناقص غضب لوليتا ولا ايه ! ادهم ابتسم: لا ما تقلقش من ناحية لوليتا .. قصة حب وليد وجميلة مهمة بالنسبالها فأنا في الأمان ما تقلقش وليد ابتسم: معلش روح انت ولو في حاجة هبلغك ادهم مشي و وليد طلع علي شقته ومعاه هيام وليد: انا سيبتك تنفذي اللي في دماغك علشان بس ما تقوليش مش بعتبرك زي بنتي .. وهطلبلك اوبر تروحي بيه...
هيام: طيب اتعشي الأول وبعدها هروح وليد: يا بنتي مش عايز أكل هيام: لازم تاكل حتي لو ساندوتش خفيف علشان بس تاخد المسكن وعلاجك وبعدها ترتاح عملت لوليد ساندوتشات اكل منهم واحد بالعافيه وعملتله قهوة شربها وليد: انا طلبت اوبر قدامه خمس دقايق وهيوصل وزي ما فهمتك مش هتعرفيهم حاجة من اللي حصلت بس انك كنتي عند صاحبتك انا وصلتك ليها وسيبتك ومشيت وقولتلك اني هبلغهم وانتي تليفونك فصل شحن ومتعرفيش حاجة عني نهائي فاهمة !
هيام: فاهمة حاضر وليد: انا تعبان وهدخل ارتاح عايزة حاجة ! اول ما السواق يوصل هيكلمك هيام: خلاص انا مش صغيرة ناقص تاخذني من ايدي وتركبني العربية وليد ابتسم: انا لو مش تعبان كنت عملت كده فعلا .. يالا تصبحي علي خير سابها ودخل ورمي نفسه علي سريره..
اليوم كله بيعدي قدام عنيه .. اتهام ندى له .. اتهام فهد .. كلام جميلة .. حاسس انه مخنوق من الكل ومحتاج يبعد فعلا عن الكل .. محتاج ياخد هدنة منهم كلهم من التعب غرق في نومه وهو مش متخيل الحالة في بيته شكلها ايه ! وجميلته حالتها ايه !
جميلة كانت هتموت من القلق والخوف وطول الليل تدعي ربنا يرجعهولها بأي تمن، استغبت نفسها وبعدها عنه ! ازاي نسيت حالتها وهو بعيد عن حضنها .. ليه حطت مسافة بينهم ؟ ليه سمحتله يبعد عنها كده ! ليه اهتمت بهيام وبالماضي اكتر منه هو ! غباء في غباء في غباء .. من امتي هيا و وليد اتنين مش واحد .. من امتي ما بيتكلموش مع بعض ! ازاي ما اتكلمتش معاه وخبت مشاعرها جواها ! يرجع بس وهيا هتصلح كل حاجة .. هتصلح كل حاجة بينهم .. لازم وليد يرجع لحضنها وبس ...
النهار نور والكل قاعد محدش فيهم عارف وليد فين او حتي هيام فين ! وليد وآسر وفهد وجميلتين وندى وأكرم اللي بيتخانق مع نفسه علشان يبلغهم باللي حصل بس وعده لوليد مانعه .. أما أمل فضلت مع جدتها بحجة ان وليد عنده نبطشية وهيبات بره علشان نبيلة ما تعرفش حاجة جميلة الكبيرة وقفت: فهد تعال معايا كلهم وقفوا وسألوها رايحة فين !
جميلة: هشوف وليد في اخر مكان مش عارفة ازاي ما فكرتش فيه من امبارح .. فهد تعال وصلني رفضت تزود اي كلمة وخرجت وفهد خرج وراها بسرعة فهد: علي فين ! جميلة: مكان ما بدئت الحكاية فهد باستغراب: فين ده !
جميلة بصت لابنها: شقتنا اللي كتبنا فيها كتابنا وعشنا فيها اجمل ايامنا .. ده المكان اللي كنا بنهرب فيه انا و وليد من الكل .. مش عارفة ازاي ما فكرتش فيه من امبارح .. فهد: وهيام ! معاه ؟ جميلة كشرت: معرفش هيام فين المهم دلوقتي وليد وبس يا فهد .. المهم وليد وليد فتح عنيه واستغرب ازاي نام لحد ما الشمس فردت نورها بالشكل ده .. قام حس بصداع ومسك دماغه وفضل شوية ثابت مكانه وبعدها قام خرج بره وشم ريحة أكل .. استغرب وراح ناحية المطبخ وهناك اتفاجيء بهيام لابسه جلبية من جلبيات جميلة مراته ورابطة شعرها بايشارب زي جميلة ما بتعمل وواقفة بتحضر الفطار وليد باستغراب: انتي بتعملي ايه هنا ؟
ما روحتيش ولا روحتي وجيتي ولا عملتي ايه بالظبط ! هيام: مكنش ينفع اسيبك تعبان كده واروح مكنش ينفع وليد لاول مرة يزعق فيها: انتي اتجننتي انتي ازاي فكرتي تفضلي هنا ! هيام بصتله: انت قولت اني بنتك..
وليد زعق: زي بنتي لكن انتي مش بنتي في فرق .. انتي وجودك هنا غلط .. انا حاولت يا هيام اتعامل معاكي بحنية وافهمك براحة بس انتي مصرة .. انتي مصرة تمشي في الطريق ده .. انتي قصدك ايه بانك تباتي هنا معايا .. عايزه توصلي لايه بالظبط ؟ ولابسة هدوم جميلة ليه ! بتقلديها مثلا ! لو عايزة تقلديها قلديها في ادبها واخلاقها وقيمها ودينها اللي عمرها ما فرطت فيه وعلشان كده ربنا اللي بيقف جنبها ..
هيام عيطت: انا مش قصدي مش قصدي حاجة ابدا وليد بهجوم: قصدك ولا مش قصدك انا عملت كل اللي اقدر عليه معاكي ووقفت قصاد الكل علشان خاطرك وفهمتك اكتر من مرة بس لحد هنا وكفاية مش هسمحلك تتمادي اكتر من كده .. زودتيها قوي .. زودتيها يا هيام كل اللي فات كوم وانك تباتي هنا كوم تاني خالص كانت واقفة علي السفرة وباصة للارض وهو قصادها من الناحية التانية وليد: اتفضلي غيري هدومك دي..
قبل ما تتحرك من مكانها الباب اتفتح والاتنين بصوا ناحية الباب وكانت جميلة قصاده واتقابلت عنيها مع وليد في نظرة طويلة .. نظرة ارتياح من جميلة انها اخيرا شافته من تاني .. وانه كويس وسليم ده بالدنيا وما فيها .. كل افكارها السودا اللي بتطاردها طول الليل اختفت بمجرد ما لمحته واقف علي رجليه قصادها .. ارتياح ملي قلبها .. حبيبها سليم فكل الدنيا تهون بعد كده ..
وليد: جميلة جميلة ابتسمت وبعدها لمحت هيام اللي اتحركت من مكانها .. بصتلها نظرة طويلة وبصت لهدومها اللي هيا لبساها وبصت لوليد مش فاهمة حاجة وليد كمان نقل نظره بينهم هما الاتنين وتخيل اللي بيدور في دماغ مراته وقرب خطوة من جميلة قابلتها جميلة بخطوة منها لوري بعيد وقبل ما حد ينطق جميلة غمضت عنيها وانهارت بس انهيارها كان فيي لحظة دخول فهد اللي ركن عربيته وطلع وراها ووقعت بين ايدين فهد اللي بسرعة مسكها قبل ما تقع و وليد كمان جري عليها وفهد قبل ما ينطق لمح هيام اللي وقفت متسمرة مكانها..
وليد حاول يشيل جميلة بس فهد منعه فهد: ابعد عنها .. مش هسمحلك تجرحها اكتر من كده..
رواية جميلة الجزء الثالث بقلم الشيماء محمد حلقات خاصة الفصل الثالث عشر
وليد حاول يشيل جميلة بس فهد منعه فهد: ابعد عنها .. مش هسمحلك تجرحها اكتر من كده فهد شال هو جميلة وأخدها ونزل و وليد نزل وراه بسرعة فهد ركبها ورى و وليد ساعده وفهد جه ينطق وليد: ولا كلمة مش وقته فهد: عربيتك فين ؟ اركبها وليد: عربيتي مش معايا اتفضل اتحرك فهد سكت وركب عربيته واتحرك و وليد جميلة على رجليه بيحاول يفوقها وليد: فهد هات موبيلك بسرعة فهد بص لأبوه في المراية: موبيلك فين ؟
وليد: اكيد في الشقة فهد: انت ازاي تعمل كده ؟ انت متخيل حالتها كانت ازاي طول الليل وهيا مليون فكرة وفكرة في دماغها .. تستاهل هيا منك كده ؟ وليد زعق: انت مش فاهم حاجة فاسكت فهد اخد فرامل بعنف وبص لأبوه: افهم ايه هاه ! علاقتك بالزفتة دي ؟ عجباك في ايه ! وليد بصرامة لابنه: اتحرك على المستشفى واسكت خالص لانك أغبى من إنك تفهم .. فهد بص لأمه واتحرك علشانها وليد زعق: قولتلك هات موبيلك فهد طلع موبيله وعطاه لأبوه اللي سأل: معاك تليفون أدهم !
فهد: متسجل باسمه وليد اتصل بيه وادهم رد عليه بصوت نايم ادهم: صاحي بدري ليه ! تعبان ولا حاجة ! وليد: لا مش تعبان .. مراتك في المستشفى ولا معاك ؟ ادهم اتعدل: مراتي معايا ! خير ؟ وليد: جميلة تعبانة وواخدها على المستشفى ! أدهم: جميلة مراتك ولا مرات ابنك ؟ وليد: مراتي !
أدهم: انت روحت ! كويس انك روحت وليد بضيق: مروحتش هفهمك لما اشوفك المهم مراتك ادهم: حاضر هوديها على المستشفى حالا وهخليها تبلغ دكتورة النسا تستقبلكم على الباب ما تقلقش ادهم قفل وبص لمراته اللي صحيت على صوته ليلى: في ايه ! وليد ماله !
ادهم رقد تاني: مراته تعبانة وواخدها للمستشفى ليلى: كويس انه روحلها وماسبهاش قلقانة .. ان شاء الله هيكون بس شوية ارهاق من القلق ادهم بصلها: هو ما روحش ليلي بصتله باستغراب: امال ايه ! ادهم: معرفش ممكن اتصلوا بيه بلغوه بتعبها ! المهم شوفي حد يستناهم على الباب ليلى مسكت تليفونها: هبلغ دكتورة فوزية تستقبلهم..
وليد وفهد وصلوا المستشفى وكان في انتظارهم دكتورة فوزية اللي ليلى بلغتها واخدتها والاتنين وقفوا ينتظروا حد يطمنهم وحالة صمت رهيبة بينهم فهد موبيله رن كانت مراته وبلغها باللي حصل لأمه وهيا بلغت اللي حواليها وطبعا كلهم اتحركوا للمستشفى عندهم ادهم وصل مع مراته وراحوا لوليد ولاحظوا ابنه واقف بعيد ادهم: ابنك بعيد ليه ! ايه اللي حصل ؟ عرفت ازاي بتعب مراتك ؟ بعدين انت بهدوم البيت ليه !
وليد اخد نفس طويل: مراتي جت عندي الشقة من شوية وأغمى عليها عندي ليلي: طيب ابنك بعيد ليه ؟ وليد بص لأدهم واتردد يتكلم بس اتكلم: صحيت من النوم وقومت من النوم لقيت هيام في الشقة ادهم كمل: هيا باتت عندك ! ما انا قولتلك اروحها يا وليد ! وليد: طلبتلها اوبر وسيبتها ودخلت نمت واتفاجئت بيها الصبح ادهم: وطبعا مراتك شافتها عندك الصبح وأغمى عليها ليلى: معلش وقفوا انتو الاتنين ؟ ايه اللي ودى هيام معاك الشقة ! هيا مين دي أصلا !
وليد: ادهم ما قالكيش ! ليلى: لا مقاليش ! وليد: المهم دلوقتي عايز اطمن عليها ! ليلى بصت لادهم ولوليد: علشان كده ابنك بعيد ! بيتهمك ؟ على فكرة اتهامهم طبيعي وليد: يعني ايه طبيعي ؟ ليلي: يعني لما الواحدة بتشوف واحدة مع جوزها بتفترض ديما الاسوأ وعقلها بيتلغي وما بتشوفش غير منظرهم وبس وعقلها بيرسم الف منظر ومنظر تاني، فما تتوقعش انك هتشوف جميلتك العاقلة الطيبة .. انت هتشوف نمرة هتفترسك..
وليد بص لادهم اللي هز اكتافه: ما تبصليش احنا اطلقنا خمس سنين في موقف زي ده ! قولتلك امبارح حط حدود يا وليد .. قولتلك اروحها البيت وانت رفضت .. ده نتيجة تهاونك وليد زعق: يعني كنت اعمل ايه ! ما تخيلتش ابدا انها هتفضل .. طلبتلها التاكسي وكنت تعبان ومصدع وسيبتها على اساس هتمشي ليلى: طلوعها معاك الشقة غلط ! ازاي واحدة تدخل معاك شقتك وانت لوحدك ! ادهم: ما تسكتي يا ليلى !
ليلي بصتله: اسكت ليه هاه ! يعني انتو تبقوا غلطانين وتطلعونا عن شعورنا وبعدها تقولو اسكتو وفين الثقة وفين الحب والكلام اللي لا يودي ولا يجيب ؟ ادهم: لوليتا مش وقتك خالص .. ادخلي اطمني على جميلة وتعالي طمنينا ادخلي ليلى سابتهم ودخلت اما ادهم وقف مع وليد ادهم: ابنك اللي واقف هيولع في الدنيا بعنيه مش هتفهمه اللي حصل ؟ وليد: لا مش هفهمه خليه كده !
باقي العيلة وصلوا وكلهم اتجمعوا ومحدش فيهم فاهم حاجة جميلة: فهد عمتو مالها وايه اللي حصل ؟ واونكل وليد لقيتوه فين ؟ فهد: لقيناه في شقته وماما اغمى عليها وجبناها ندى قربت من أخوها: وليد .. انا آسفة مكنتش اقصد اللي قولته وليد بصلها: مش وقته بعد عنهم كلهم وقعد لوحده وادهم قعد جنبه ادهم: ما تقلقش مراتك هتكون كويسة ! وقطتك هتكون كويسة بإذن الله وليد بصله: انت عرفت منين عن قطتي ؟
ادهم ابتسم: لوليتا قالتلي .. اعتقد جميلة اللي قالتلها ولوليتا يا سيدي عايزة تقل عقلها وتخلف تاني وليد غصبا عنه ضحك وادهم ضحك وسكتوا ادهم: اضحك ما تقلقش جميلتك هتبقى كويسة ليلى خرجت والكل جري عليها بس هيا عنيها على وليد وادهم ومشيت ناحيتهم لحد ما وقفت قصادهم وليد: ايه الاخبار ؟ ليلى: هيا كويسة وليد: انتي بتقوليها كده ليه !
ليلي: هيا كويسة لكن وضعها مش مستقر وليد بخوف: يعني ايه مش مستقر اتكلمي على طول يا ليلى بالله عليكي ؟ ليلى: عندها طلق مبكر .. حاليا بنحاول نسيطر عليه فهد: وايه اللي هيحصل لو معرفتوش تسيطروا عليه ؟ الكل بص لليلى منتظر اجابتها: هتولد جميلة: طيب وبعدين ! فين الخوف ؟ هيا في اخر السابع ؟ في بيبيهات كتيرة بتتولد في السابع ! ليلى: البنوتة صغيرة قوي .. على العموم احنا اديناها حقن تنشط الرئة علشان لو ده حصل .. بس هيا صغننة قوي لسه ف ... وليد بترقب: ف ايه ؟
ليلى مش عارفة تقول ايه ؟ وبصت لادهم يتدخل ادهم: اعتقد ان قصدها ان ممكن ما تستحملش صح ! طيب تتحط في حضانة يا ليلى ؟ ليلى: مش عايزين نسبق الأحداث .. خلونا نمشي خطوة بخطوة .. وليد: هيا فاقت ! عايز أشوفها فهد اتدخل: اعتقد الأفضل تبعدوا عن بعض شوية وليد: ما تدخلش في اللي مالكش فيه فهد كان هيزعق بس جميلة اتدخلت: دكتورة ليلى هيا فاقت !
ليلي: أيوه فاقت فهد: ينفع ندخلها ؟ ليلي: ادخلوا بس حاولوا تفرفشوها كده لان القلق والخوف مش كويسين عليها محتاجينها تكون هادية وضغطها هادي .. فهد بص لأبوه: أكيد محتاجينها هادية ! الكل دخل و وليد وقف جنب ادهم وليلى مش عارف يعمل إيه ؟
ليلي: انت ما دخلتش ليه ! مراتك مش هتهتم بحد فيهم ولو محتاجة حد هيكون انت وبس ادهم: وليد بُعدك دلوقتي غلط جدا .. ادخلها وليد بصله: مش عارف اعمل ايه ! انتي بتقولي مش عايزة انفعالات ! طيب وجودي في حد ذاته هيخليها تنفعل، فهد عنده حق ادهم بغيظ: فهد ابنك ده محتاج يتلجم شوية ! انت ازاي سايبه يتكلم كده وبالطريقة دي ! وليد فوق بقى بطل تعمل حساب للكل على حساب نفسك لان لما بتقع محدش هينفعك غير نفسك وده عن تجربة صدقني ليلى: وليد ادخل لمراتك وخلي خلافاتكم دي لبعدين !
الكل جوه اتلم حوالين جميلة اللي عنيها متعلقة بالباب منتظرة وليد جوزها جميلة بصت للكل ولفهد: وليد فين ! مش معاكم ! آسر: وليد راح لأمل يطمن عليها هيا ونانا فهد بغضب مكتوم: بره آسر: اه سوري انتي قصدك اونكل وليد ! ايوه بره مع ادهم وليلى فهد: دلوقتي انا عايزك تهدي كده وتركزي في صحتك وفي نفسك شوية لو سمحتي جميلة دورت وشها بعيد عن الكل حابسة دموعها تنزل الباب خبط واتفتح ودخلت ليلى: جميلة ادهم عايز يسلم عليكي يدخل ؟
جميلة ابتسمت وهزت دماغها بالموافقة وادهم دخل ووراه وليد وجميلة بصت لوليد بعتاب ونظرتها وجعته قوي فوق التخيل ادهم: حمدالله على السلامة .. بعدين انتي كويسة اهو ولا عايزة تعرفي غلاوتك عند وليد ! ما تقلقيش انتي غالية قوي ! ولا عايزة تعرفي غلاوتك عندنا احنا ! وليد يجي امبارح وانتي النهاردة ! اهدوا بقى..
الكل استغرب وبص لادهم باستغراب اللي عمل نفسه وقع بالكلام غصب عنه وخصوصا نظرة وليد له ادهم حط ايده على بوقه بهزار: أوبس سوري يا وليد نسيت انك معرفتش حد .. قبل ما حد يتكلم الباب خبط وأكرم دخل مخضوض وبص لوليد مستغرب: انت كويس امال مين تعبان ؟
بص في السرير ولمح جميلة: انتي اللي تعبانة ؟ انا خفت يكون وليد تعب من حادثة امبارح وجيت جري اول ما علية قالتلي انكم في المستشفى هنا الكل بص لأكرم وندى سألت: حادثة ايه ! انت كنت عارف بمكان وليد ؟ أكرم رجع خطوة لوري: انتو معرفتوش ؟ ادهم كان عايز يضحك على منظره: لا معرفوش وشكلك انت هتتعلق دلوقتي فهد زعق: ما تفهمونا في ايه ! حادثة ايه ! وفي ايه اللي حصل !
وليد بهدوء ونظره متعلق بجميلته: عملت حادثة امبارح بالعربية وانا مروح هيام على البيت ! هنا جميلة دموعها لمعت في عنيها ودورت وشها بعيد عن وليد وهو معرفش يفسر تصرفها ده أدهم كمل: والحمد لله زي ما انتو شايفين وليد كويس بس اخد غرزتين في دماغه والراجل اللي خبطه الحمد لله خرج بالسلامة من العمليات والمحضر اتنازلوا الاتنين عنه والوضع استتب بس وليد محبش يقلق حد فيكم وبالتالي وصلته بالليل لحد شقته يرتاح فيها فهد بتريقة: على اساس ان كده بالطريقة دي محدش قلق واحنا كلنا دايرين في الشوارع ندور عليه ! هو ده مفهومكم عن عدم القلق !
جميلة الصغيرة: خلاص المهم ان الكل بخير ! صح هيام فين ! الكل هنا بص لوليد اللي مش عارف يقول ايه ؟ وليد بهدوء: في الشقة ! الكل بص لبعضه وسكت وبدؤا يحطوا النقط على الحروف وخصوصا جميلة الصغيرة اللي تقريبا فهمت الوضع كله ! اغماء جميلة وغضب فهد من أبوه ! الوضع كله بقى واضح قدامها جميلة الصغيرة: هيا فين دلوقتي ؟
فهد: سيبناها في الشقة ونزلنا بماما ادهم: يا جماعة المهم دلوقتي ان الحمد لله وليد كويس والحادثة عدت على خير وجميلة كمان كويسة وندعي بقى ربنا ان قطتنا الصغيرة تكون هيا كمان كويسة ( بص لفهد ) أي حاجة تانية تتأجل دلوقتي ونتعاتب بعدين على كل حاجة ! انا هضطر اسيبكم دلوقتي علشان عندي شغل .. وليد تعال معايا غير هدومك وليد باستغراب: اغير هدومي فين !
ادهم: معايا دايما هدوم في العربية استبن لاي ظرف بدال ما انت بهدوم البيت كده تعال ادهم أخد وليد ونزل وليلى قعدت معاهم شرحتلهم اللي حصل بالتفصيل وندى نظراتها كلها توعد لجوزها .. أكرم هرب منها: انا هشوف وليد واطمن عليه وليد غير هدومه مع ادهم وفضلوا مع بعض شوية هو واكرم يتكلموا وبعدها ادهم انسحب على وعد يرجعلهم تاني و وليد طلع لمراته اللي مش عارف يتكلم معاها..
آسر مشي على الشركة بدال فهد و وليد، وأكرم كمان انسحب يروح شركته ليزيد هربا من ندى ومواجهتها .. وليد دخل وقعد على الكنبة في الأوضه قصاد جميلة اللي متجاهلاه تماما وفهد جنبها و ندى وجميلة قاعدة على كرسي جنب السرير .. حالة صمت غريبة مسيطرة على الكل محدش عارف يقطعها لحد ما ندى اتكلمت ندى: وليد خلاص بقى فكها .. حقك عليا مش قصدي ازعلك !
وليد بهدوء: عادي بقى يا ندى ما تاخديش في بالك ندى: ما اخدش في بالي ازاي .. انت اخويا وحبيبي وليد سكت وماردش عليها جميلة الصغيرة: لا فهمونا العبارة بقى انتو كمان ! أونكل وليد هيزعل منك ليه ! ندى مرضتش توضح: يعني شدينا مع بعض في الكلام شوية امبارح واول امبارح جميلة الكبيرة اتنهدت وبصت لوليد في نظرة خاطفة ورقدت في السرير فهد: تعبانة ولا حاجة !
جميلة الكبيرة: عايزة انام بس شوية فهد قام من جنبها وغطاها كويس وبص لأبوه نظرة طويلة، لحظات وجميلة اتعدلت وفهد ساعدها تتعدل فهد: في ايه ! مالك ؟ جميلة باحراج: عايزة ادخل الحمام بس ندى وقفت تساعدها هيا وكمان وليد وقف وقرب منها يساعدها بس هيا بدون ما تبصله: ندى هتساعدني ارتاح انت اكيد تعبان من امبارح ! وليد رجع الخطوة اللي قدمها وفكر كتير ومش عارف ياخد قرار بس مخنوق ومحدش حاسس بيه ..
ندى ساعدتها ودخلوا الحمام وقفلوا الباب وفهد بص لأبوه فهد بزعل: كنت متخيل ايه ! انها هتمد ايدها ليك بعد كل اللي حصل ده ؟ انا مش قادر افهم انت ازاي تسمح للبني ادمة دي تهد بيتك بالشكل ده وليد بهدوء: طالما انت مش فاهم حاجة يبقى ياريت تخرس خالص يا فهد فهد: دلوقتي اخرس ؟ انا من امتى بقولك وجود البنت دي غلط في البيت ! قولتلك نواياها وما سمعتنيش دلوقتي منتظر منها ايه ! تقولك معلش حصل خير !
وليد بص لفهد بنظرة غضب واتكلم وهو بيصر على اسنانه: لأخر مرة هقولك إخرس يا فهد فهد هيتكلم بس جميلة الصغيرة وقفت في وشه: اسكت دلوقتي ياريت وبطل تدخل بينهم ! كفاية كده فهد بغضب وصوت مكتوم: البنت كانت بايتة معاه جميلة: برضه اسكت دلوقتي..
فهد: اسكت ازاي هاه ! امي كانت هتروح فيها ! انتي ما شفتيهاش ازاي وقعت من طولها اول ما شافتها ! جوزها اللي اتحرمت منه سنين عمرها يرجع اخيرا ودلوقتي حتة عيلة لا راحت ولا جت تاخده منها ! دي كانت تموت وليد هنا بتريقة: مش بقولك غبي وما بتفهمش..
فهد بص لأبوه: ماشي يا سيدي انا غبي .. البنت دي كانت بايتة معاك ليه ! عملتو حادثة ماشي هاتها البيت وبعدها خليك لوحدك براحتك .. قول انك عايز تفضل لوحدك وعرفنا مكانك وافضل لوحدك براحتك محدش هيجبرك تفضل معانا .. قبل ما وليد يرد ندى خرجت هيا وجميلة وساعدتها ترجع مكانها في السرير.. وليد قعد شوية وجميلة حاطة حدود كتيرة بينهم فوقف مرة واحدة وكلهم بصوله ندى: رايح فين !
وليد: رايح اطمن على الراجل اللي كنت هقتله امبارح وبعدين كان عنده مشكلة هحاول اساعده فيها فهد بغضب: ده وقته ! وليد بصله: قعدتي هنا ملهاش لازمة وبعدين البركة فيك انت وعمتك قايمين بالواجب وزيادة .. وجودي مش مهم لحد فيكم( ووجه نظره لجميلة مراته) .. بعد اذنكم جميلة كان نفسها تقوله يفضل مفيش حد مهم غيره بس سكتت وبصت لبعيد وهو خرج وقفل وراه الباب وراح اطمن على محمود وحالته ومقدرش يمشي من المستشفى ويبعد فضل فيها بس بعيد ولوحده ..
جميلة فضلت طول الوقت تعيط ومحدش فيهم عارف يهديها وتعبت زيادة وطلبوا الدكتورة جات لها هيا ومعاها ليلى وحاولوا يهدوها لكن مفيش فايدة وفهد مش عارف يعمل ايه ! ليلى راحتله وقالت بصوت هامس: تعال بره عايزاك خرجوا الاتنين بره ليلى: شوف ابوك فين ؟ هيا محتاجاله مش محتاجاكم انتو ! هيا عايزة جوزها جنبها ! فهد: هو مش عايز يقوم بالدور ده ؟ اعمله ايه !
ليلى بصت لفهد: مش يمكن تكون انت واقف بينهم ؟ فهد: أنا ؟ واقف ازاي ؟ ليلي: انت واقف في وش أبوك وعمال تتهمه وواقف بينهم ومش عايزو يقرب منها مستني ايه ؟ انت بتشعللها بدال ما تهديها فهد بغضب: انا بحميها ليلى: مش منه .. هيا مش محتاجة لحد يحميها منه ! هو حماها ده اللي انت لازم تفهمه كويس قوي .. انت مهما تعمل عمرك ما هتعوضها عنه ولا حتى ضمة منه ! انزل شوف ابوك فين وهاته فهد بغضب: ادور عليه فين ! موبيله مش معاه !
جميلة: شوف ادهم وشوف أكرم دول اصحابه على ما اعتقد اكيد مع حد فيهم فهد اتصل بالاتنين بس الاتنين ما يعرفوش مكانه والاتنين اتحركوا يشوفوه فين ! اتقابل ادهم واكرم وفهد تحت المستشفى مش عارفين يشوفوه فين ! ادهم: يمكن راح يجيب عربيته ! فهد: هيا فين ؟
أكرم: اناعارف مكانها هروح اشوفه بس قبل ما يتحرك ادهم مسكه ادهم شاور على دكة بعيد: مش هو اللي هناك ده ؟ كلهم بصوا وشافوه وراحوا ناحيته فهد بغضب: حضرتك هنا واحنا قالبين الدنيا عليك ؟ ادهم مسك فهد وشده بعيد: اسكت انت .. وليد مراتك محتاجاك..
فهد شد دراعه وكلم ادهم: انا مش فاهم انت بتتكلم في ايه ! هو مش فارق معاه جميلة اصلا ! هيا ما تعنيش شيء له ! هيا مجرد الخدامة اللي خلفتله الولد وليد هنا وقف ومسك فهد من هدومه بعنف بس ادهم وأكرم فصلوا بينهم ادهم: مش وقته خالص .. وليد ! فهد مش فاهم هو بيتكلم في ايه ! هو مش فاهم حاجة !
فهد زعق: لا فاهم ! فاهم كويس قوي ! هيا بتموت فوق وهو ولا على باله ! هيا من امبارح بتموت وهو مقضي ليلته مع واحدة غيرها أدهم: يا ابني اسكت بقى شوية .. وليد يالا مراتك محتاجاك يالا بينا طلعوا على فوق و وليد دخل معاهم وشكل جميلة يغني عن اي كلام .. التعب متمكن منها ووشها كله عرقان وليد قرب من جميلة بس قبل ما يلمسها جميلة بصوت متقطع: خليك بعيد عني الكل استغرب جميلة وكلهم بصولها باستغراب وليد بيحاول يقرب منها: جميلة أنا..
قاطعته وهيا بتنهج وتعبانة: إنت عايز تفضل بعيد خليك بعيد .. خد مسافتك وأبعد براحتك .. انت جاي ليه ؟ قالولك تعبانة ! عادي ما انا تعبانة بقالي كذا يوم فعادي تعبي ده .. احنا بقينا عبء عليك ارتاح منه ! وليد بصلها كتير واتقابلت عنيهم في نظرة طويلة وانفجر فيها وفي الكل: أيوه بقيتوا عبء كبير قوي ومعدتش قادر اشيله .. أيوه يا جميلة محتاج مسافة بعيد عنكم كلكم .. محتاج ارتاح من الكل وأولهم انتي جميلة بصتله: ترتاح مني انا ؟
وليد: أيوه ارتاح منك لانك اكتر حد في الكون ده واجعني .. أدهم حاول يتدخل بس وليد منعه: لا مش هسكت .. مش هسكت ..( بص لجميلة ) انتي بتلوميني ليه ؟ نظراتك دي معناها ايه ! جميلة بوجع ودموعها نازلة: انت عايز تبعد .. عايز ترتاح مني ؟ انا اللي تعباك يا وليد ؟
وليد بوجع اكبر منها: أيوه انتي اللي تعباني .. انتي وبس .. لما بعد اكتر من ٢٥ سنة يا جميلة وانا بعمل كل اللي اقدر عليه علشان اسعدك وتيجي انتي دلوقتي تشتكيني لبنت اخوكي اني ذليتك في اول جوازنا يبقي اه تعباني .. ٢٥ سنه يا جميلة ومقدرتيش تنسي غلطة ارتكبتها في حقك قبل حتى ما اعرفك او احبك ؟ فهد وجميلة الصغيرة هنا بصوا لبعض الاتنين لانهم متخيلوش انهم كانوا البداية..
وليد كمل: ابنك بيلومني اني ذليتك وهنتك واني خليتك في السر .. من اول ما حبيتك وانا عرضت عليكي نعلن جوازنا واعلنك قدام الكل وانتي اللي رفضتي .. جاية دلوقتي تفتحي كل جروح الماضي يا جميلة ؟ ليه ما نسيتيهاش ! بعد كل اللي عملته ما نسيتيش ! انا ضيعت عمري كله علشانك يا جميلة ! انا علشانك عاديت الكل، انا علشانك وعلشان خوفي عليكي انتي وابنك قسمت الشركة بيني وبين علاء وخالد علشان احميكم منهم ومن طمعهم وجايين دلوقتي تلوموني..
انا عشت عمري كله مسجون وبتعذب ده ما غفرليش يا جميلة قدامك ! مجبلكيش حقك مني ! انتي متخيلة يعني ايه تعيشي في زنزانة مترين في مترين عشرين سنة بتتعذبي بكل الطرق اللي عمرك ما هتتخيليها ! كل ده مش كفاية في رأيك ! ودلوقتي جبتيلي بنت وقولتيلي تكفل بيها وعايزاها في حمايتك قولتلك آمين ! قولتيلي روح لابوها قولتلك حاضر .. قولتيلي عاملها زي بنتك ونخليها في حضننا قولتلك حاضر .. حتى ابنك لما رفض وقفت في وشه وقولتله مش عاجبك امشي من البيت وفي الاخر برضه مش عاجب .. اعمل ايه اكتر من كده ! ايه اللي في ايدي اعمله واتأخرت عنه؟
عرفيني انتي المفروض اعمل ايه علشان تنسي الماضي ولا انتي اصلا عايشة في الماضي وبتمشي مع التيار وخلاص .. انتي ايه فهميني ؟ عايزة مني ايه ! نظرتك النهاردة ليا دي معناها ايه ! بتتهميني بإيه ! بتتهميني زي ابنك ان هيام كانت بايتة معايا ! ده اتهامك ! بتبعديني عنك علشانها ؟ جميلة مسحت دموعها: هيام مين دي اصلا اللي اتهمك فيها ! انت متخيل ان نظرتي ليك كانت اتهام ! انت متخيل اني ممكن اشك فيك ؟ او ان حتة عيلة زي هيام انا هغير منها ؟
وليد زعق: فهميني طيب نظراتك دي معناها ايه ؟ عايزة مني ايه ! جميلة دموعها نازلة واتوجعت: اااااه ليلى قربت: والله ما وقته اللي بتعملوه ده ندى وقفت: وليد مش وقته اهدى يا حبيبي..
وليد زعق لندى كمان: دلوقتي انا حبيبك يا ندى ؟ مش كنت امبارح السبب في كل مشاكلك في الحياة مش انا اللي جوزتك لخالد ؟ وانا سبب انفصال مي وآسر، مش انا سبب كل مشاكلكم في الحياة ؟ يبقى من حقي بقى اخد هدنة منكم كلكم ولا مش من حقي ..( بص لجميلة ) هاه يا جميلة ! قوليلي مش من حقي ؟ جميلة بعياط وبهمس: انا سمعتك على فكرة وليد بصلها وباستغراب: بتقولي ايه ؟ سمعتي ايه ؟
جميلة زعقت: سمعتك وانت بتقولهم ان انا اكبر غلطة في حياتك .. سمعتك يا وليد وانت بتدمر حب سنين في كلمة واحدة منك وليد مش فاهم هيا بتتكلم عن ايه ؟: انتي بتقولي ايه ؟ وبتتكلمي عن ايه اصلا ؟ جميلة: وانت بتقول لندى ونبيلة انك سكت على الغلط زمان وبتندم على سكوتك ده ولما سألوك ايه الغلط قولت الغلط كان ان نبيلة اشترتلك عيلة تتجوزها علشان تخلف منها والغلط الاكبر هو انك قبلت ده وسكت..
وليد افتكر: ومكملتيش باقي كلامي ! وهنا كمل بتريقة والا تكملي ليه؟ ما خلاص لقيتي غلطة على وليد تكملي ليه بقى... ما كملتيش وسمعتي ان الغلط هو الطريقة اللي اتجوزنا بيها واني غلطي الاكبر هو سكوتي فعلا بس مش سكوتي على جوازي، قصدي سكوتي على ان جوازنا يفضل في السر ده اكبر غلط في حياتي.. اني سكت مش اني اتجوزتك..
انا اه اتجوزتك عندا في ميس مش هنكر ده ولا عمري نكرته لكن انا عشقتك يا جميلة وندمي الوحيد اني من اول يوم ما اعلنتش جوازنا قدام الكل وده اللي وجعني منك ان بعد الحب ده كله وبعد كل اللي اتحملته بتفتحي في الماضي ولسه فاكرة اللي حصل زمان وبتشتكيني لابنك ولبنت اخوكي قد ايه انا هنتك جميلة بصاله ومش عارفة تقول ايه: انا ... انا بس كنت بوضح لجميلة ليه انا مصرة اساعد هيام كنت بوضحلها بس مش بشتكي ابدا..
وليد بيهز دماغه: مش على حسابي يا جميلة ! مش علشان بنت اخوكي تقبل وضع في البيت غلط، تقبله على حسابي انا، وانك تفتحي في جروح قديمة وأكون قدام ابنك الراجل اللي اهان مراته ومحافظش عليها وعلى كرامتها جميلة بوجع وعياط: مفكرتش كده ابدا، ومقصدتش دا، ثم انا قلت مش ناسية صح لكن مقلتش مش مسامحة او اني متجاوزتش الموضوع معاك، مقلتش ان انا زعلانة منك عشان كدا، لكن هو موضوع ميتنساش، وما تخيلتش ان جميلة هتقول لفهد وفهد هيكلمك انت وليد هدى صوته: امال فكرتي في ايه ! وبعدتي عني ليه الايام اللي فاتت !
جميلة بصتله: فكرت اني سبب كل مشاكلك في الدنيا وانت ذوقك واخلاقك مانعينك تبعدني عنك، كنت عايزاك تبعد فعلا عني وما اكونش حمل عليك اكتر من كده انا وحملي الجديد ده ! كنت حاسة اني بحملي ده حمل عليكم كلكم وهيام حمل على جميلة وعلاقتها بفهد فحبيت اوضحلها ليه انا مصرة على مساعدة هيام، اوضحلها ان انا ربنا كان بيحبني ووقفك ليا بطريقي لكن هيام الله اعلم هيكون نصيبها ايه واللي هيختاره باباها هيكون نصك او حتى ربع اخلاقك ويعاملها حلو او ايه . وليد بصلها: من امتى الزوجة حمل على جوزها ! هيا او حملها ! فما بالك لما تكون حبيبته !
جميلة مسحت دموعها: بعدت علشان تاخد فرصتك وتفكر صح ولو عايز تبعد ... وليد بعتاب: لو عايز ابعد ايه ! هتسيبيني ابعد ! هههه بجد هتسيبيني ابعد عنك ! إنتي متخيلة بعد العمر ده كله وبعد كل اللي مرينا بيه إني ممكن ابعد عنك او أعيش من غيرك ! انتي عارفة انتي عملتي فيا ايه اليومين اللي فاتو ببعدك عني ! وبكلامك عن هيام ! حسستيني ان كل الحب اللي بينا وهم .. وهم انا عايش فيه لوحدي واني ضيعت عمري على وهم .. وانك بس مشيتي مع التيار واهو مجرد راجل انتشل عيلتك واديكي عايشة كويس ولما مات عادي كملتي حياتك مع اخوكي اللي هو صاحب الفضل الوحيد في حياتك ولما جوزك رجع اهو بركة يا جامع..
جميلة بتمسح دموعها: انا كنت بموت بغيابك يا وليد .. كنت بموت في اليوم ميت مرة وعشت ميتة معاهم .. عشت اه بس كنت من غير روح .. روحي مرجعتش غير برجوعك ليا .. خفت اكون أنا اللي وهم وانا اللي ضيعت منك عمرك كله ! لمت نفسي وليد بهدوء: وأنا كمان لمت نفسي جميلة مدت إيدها لوليد اللي بصلها ومسك ايدها وقرب عليها وضمها في حضنه وهيا عيطت في حضنه اما ادهم فمسك فهد وشاورلهم يخرجوا كلهم والكل انسحب وسابوهم لوحدهم..
أدهم بص لفهد: يعني انت يا سبع الرجال اللي بدأت الليلة كلها ! صح كده ! جميلة حكت مع بنت اخوها وهيا حكت لجوزها وانت اخدت الكلمتين ورحت بخيتهم لأبوك وحسسته انه ارتكب غلط في حق جميلة، انت كنت الشرارة اللي بدئت بينهم، ولحد دلوقتي جاي تنهي علاقتهم خالص بنظرتك لابوك واتهامك له ! أبوك اكبر من انه يبص لعيلة زي هيام دي !
فهد بزعل: انا تخيلت انهم خطوا الموضوع ده جميلة: قولتلك اتكلم معاهم ووضح الأمور .. فهد: ما تخيلتش انهم شايلين من بعض بالشكل ده ليلى: أمال تخيلت ايه ! اي حد بيتدخل بين اتنين بيحبوا بعض بتكون دي النتيجة ادهم بصلها: شوف مين اللي بيتكلم .. اخيرا يعني اقتنعتي بالنقطه دي يا اخت الدوش !
ليلي بصتله: ومالك وماله دلوقتي ! هو بطل يدخل بينا ادهم: صح صح .. أمال مين اللي كان من يومين بيقنعني اسيبك تسافري المؤتمر لوحدك ؟ ليلى بصتله: ماهو انت رافض تخليني اسافر اعملك ايه ! ادهم بصلها: تقومي تدخلي الدوش ؟ ليلى: ماهو انت اللي رافض طيب ! ادهم باصرار: مؤتمرات لوحدك لأ وألف لأ !
ليلى: تعال معايا زي كل مرة ادهم: مش فاضي الفترة دي ولوحدك لأ ليلى: هاخد يوسف معايا ادهم: المرة اللي روحتي فيها لوحدك كان يوسف معاكي برضه ليلى: انت بتهرج ؟ يوسف كان ساعتها في بطني ادهم حرك حواجبه: كان معاكي ولا مكنش ؟ بصي اقفلي الحوار مش هتروحي ونهينا الكلام ليلي باصرار: هروح وده آخر كلام..
ادهم: همنعك من السفر ! هحطك على قايمة الممنوعين من السفر ليلى: هقدم فيك بلاغ انك بتستغل منصبك لاغراض دنيئة ! ادهم ابتسم: اسمها اغراض شخصية مش أغراض دنيئة ! ليلى: ما تغيرش الموضوع لو سمحت كملوا خناقهم و فهد وجميلة أخدوا جنب يفكروا هيعملوا ايه وازاي يصلحوا اللي عملوه وليد مع جميلة ضمها وهيا عيطت في حضنه كتير لحد ما رفع دماغها ومسح وشها بايديه وليد: كفاية عياط .. كفاية..
جميلة: انت ازاي فكرت اني بطلت احبك ! او اني محبتكش من اساسه ؟ وليد: بنفس الطريقة اللي فكرتي بيها اني مبحبكيش وانك عبء وحمل عليا .. جميلة: أنا آسفة يا وليد .. آسفة بس ما تخيلتش ابدا ان جميلة هتقول لفهد وفهد هيتكلم معاك ما تخيلتش ده أبدا وليد: وانا متخيلتش ابدا انك لسه فاكرة الماضي وعايشة فيه وده اللي وجعني .. اني مقدرتش انسيكي الماضي وجروحه جميلة: مجرد وجودك في حياتي ده اكبر نعمة يا وليد..
وليد: وهيام ؟ جميلة: مالها هيام ! وليد: نظرتك ليا الصبح ! انتي شكيتي يكون حصل حاجة بي حطت ايدها على شفايفه تمنعه يكمل: اوعى تكمل وليد شال ايدها: انتي اغمى عليكي بعد ما شوفتيها..
جميلة: أغمى عليا من التعب والقلق والخوف عليك ماهمنيش ساعتها غير انك كويس وبس .. انا طول الليل منمتش ولا كلت حاجة وعمالة افكر وافكر يا ترى انت فين والا جرالك ايه، تخيلت كل حاجة وحشة ممكن تخطر عل بالك الا انك تكون نايم الليل كله في سريرك، واول مشفتك اطمنت وسمحت لنفسي اني اقع يعني أغمي عليا من التعب مش من هيام .. وليد: هيام ما تعنيش اي شيء ليا واهتمامي بيها علشانك انتي وبس جميلة: عارفة ده ومش محتاج توضحه .. بس ازاي باتت عندك وليه سمحتلها بكده ؟
وليد: ما سمحتلهاش .. طلبت منها امبارح تعتبرني اب ليها وبس ولما اتعرضنا للحادثة اصرت تيجي معايا الشقة تقوم بدورها كبنتي وتتأكد اني اكلت واخدت الدواء وبعدها طلبتلها اوبر علشان تمشي وسيبتها ودخلت انام ومن التعب فعلا نمت على اساس انها روحت بس لما صحيت الصبح اتفاجئت بيها موجودة وبعدها انتي جيتي..
جميلة: انت ازاي عرفت تنام ؟ انت نايم طول الليل وانا طول الليل قلبي واجعني على غيابك وعقلي شغال بكل السيناريوهات اللي بالعالم، انت ازاي مجيتش ليا ! ازاي طاوعك قلبك تبعد عني ! تعمل حادثة يا وليد وتبعد ؟ طيب ازاي ؟
وليد: كنت مخنوق من الدنيا كلها .. الكل بيلومني والكل بيحملني كل حاجة غلط حصلتله، وانتي اكتر حد اتوجعت بسببه، احساسي ان حبنا هش وممكن يتهد او انه كان وهم وانا عشت فيه لوحدي كان احساس صعب وكان بيخنقني، خفت اكون بخسرك او على الاقل بخسر حبك وولعك واهتمامك واني اهم حد بحياتك زي ما كنتي بتقوليلي .. فكنت عايز ابعد عن الكل وخصوصا انتي..
جميلة مسكت وشه بإيديها الاتنين: اياك تشك بحبي ليك لحظة واحدة او تحس ان انت ممكن تخسرني، مفيش حاجة بالكون كله ممكن تضعف او تقلل حبك بقلبي .. اياك تبعد عني تاني .. يا عمري كله ! اياك تهرب لاي مكان بعيد عن حضني وليد: ده كان رد فعل مش اكتر يا جميلة جميلة كشرت:قلت جميلة يبقى لسى زعلان. وليد قرص خدها: جميلتي.
جميلة: حقك على قلب جميلة يا قلب جميلتك... وليد باس ايدها: اوعديني ما تبعديش تاني عني وتسيبيني كده بخبط في أفكاري لوحدي جميلة: أوعدك بس انت كمان اوعدني انك ما تبعدش عني ابدا ولو عايز تبعد نبعد مع بعض، واوعدني زي ما هاوعدك تفتحلي قلبك وتقولي على اي حاجة جواك حلوة كانت او وحشة. وليد هز دماغه موافق على كلامها: اوعدك يا جميلة عمري كله..
جميلة ابتسمت بحب وضعف: أنا بحبك يا وليد .. بحبك قوي وليد ابتسم لها بس اتفاجيء بجميلة بتبتسم وبتغمض عنيها وجسمها كله بيرتخي بين ايديه وليد: جميلة .. جميلة فتحي عنيكي .. جميلة هزها بس غابت عن الدنيا وما فيها وهو قام بسرعة فتح الباب بعنف لفت انتباه الكل ليلى: في ايه !
وليد برعب: جميلة غمضت عنيها وما بتردش عليا ! ليلى جريت على جوة وحطت ايدها على رقبة جميلة تشوف النبض وبعدها بصت لادهم برعب وضربت جرس الانذار اللي فوق السرير وبتحاول بإيديها تنعش جميلة اللي قلبها وقف...
قصة جميلة بنت بسيطه فلاحه
