رواية جميلة الجزء الثاني للكاتبة الشيماء محمد الفصل التاسع والثلاثون
الرجاله والعرسان وصلوا البيوتي سنتر وانتظروا جميله الكبيره طلعت اول واحده وفهد قابلها وضمها فهد: ده ايه الجمال ده ! ( قلب الكلام ) امال جميله فين ! امه ضحكت: طالعه ورايا ما تقلقش ابوك فين !
فهد ابتسم: ورايا ما تقلقيش جميله سابت ابنها وراه وليد ابن اخوها باسته وسلمت عليه وسلمت علي اسر وكمان عماد اخوها وعينها طول الوقت علي وليد جوزها اللي مبتسم ومنتظر دوره لحد ما اخيرا وصلتله وقفت قصاده جميله اتحرجت من نظراته: ايه مش هتقول حاجه !
وليد بغلاسه: اللي قبلي قالو كتير .. بصي وراكي كده في كام راجل قبلي ! جميله كشرت: ابنك واخويا وابنه و قاطعها: ماليش فيه كل الكلام ده ... جميله مسكت ياقته: يعني المفروض اعمل ايه ! اسيب ابنك اللي في وشي واقوله استني اروح لحبيبي الاول وليد: برضه ماليش فيه..
جميله بصت حواليها وكانت مي خارجه والكل مشغول بيها فقربت من وليد وباسته في خده بحب: مفيش قبلك ولا في بعدك انت وبس ... وليد ابتسم: دي مش نافعه جميله ابتسمت: دي تحت الحساب ولما نكون وحدنا هصالحك كويس وبما يرضي ضميرك وليد ابتسم: ما يرضي ضميري ! انتي قد الجمله دي جميله ضحكت: قدها..
وليد ابتسم وحط ايدها في ايده: ماشي هنشوف تعالي نشوف ابنك وعروسته مي خرجت واستقبلها ابوها وامها بفرحه وبعدها آسر وقف قصادها وباسها في دماغها وحط ايده في ايدها خرجت بعد كده امل ومعاها امها ندي و وليد قابلها وباس ندي في خدها واخد مراته امل وباسها في دماغها بحب اما ندي فعنيها بتلقائيه بتدور في الوشوش مش عارفه بتدور علي مين ... لحد ما عنيها وقعت علي اكرم وابتسمت وهو بادلها الابتسامه و ابنه مركز قوي معاه... يزيد: انت مبتسم كده ليه !
اكرم: وانت مالك ما تخليك مركز مع مراتك فهد منتظر علي نار جميله تطلع واخيرا الدور عليها وطلعت بهاله كبيره حواليها او هو اتهيأله كده وقفت قصاده وبصتله وابتسمت وسحرته وهو عايز يعمل حاجات كتيره قوي بس مش عارف يعمل ايه ! احاسيس كتير قوي جواه عايزه تطلع مره واحده وهيا واقفه قصاده مكسوفه ومحروجه ومش عارفه هو واقف كده ليه وبيفكر في ايه ! ما كل واحد باس عروسته في دماغها وخلاص ما تعمل زيهم يا فهد وليد: ابنك ماله !
جميله: انا عارفاله واقف كده ليه ! انا هروحله يدوب هتتحرك كان فهد كمان اتحرك وقرب من جميله اللي اتوترت وبصتله لفوق ومستغربه فهد: اخيرا جميله ابتسمت: اخيرا فهد قرب قوي: مش هتقولي تاني مش من حقك فاهمه قبل ما ترد كان هو باسها..
وليد مسك ايد جميله وضحك: ابنك هيعرف يتصرف سيبيه وروحي لاخوكي اللي بيضرب اخماس في اسداس ده وقوليله يهدي كده ويقعد علي جنب ويسيب العيال يتبسطوا جميله ضحكت وراحت لاخوها فعلا واتفاجئت بدموعه جميله: عماد مالك !
عماد: بنتي كبرت واتجوزت ... عيالي الاتنين يا جميله بيتجوزوا جميله اتنهدت: خضتيني انا قولت ماله .. طيب المفروض تفرح عماد مسح دموعه: ماهو انا فرحان ضم اخته في حضنه: لولا انتي ولولا تضحيتك مكنتش وقفت هنا دلوقتي فرحان ومبسوط ... انتي يا جميله سبب الفرحه اللي الكل فيها النهارده انتي وبس جميله عنيها دمعت: انا بس عملت اللي اي اخت هتعمله لاخوها..
وليد جه وراهم وحط ايديه علي اكتفاهم الاتنين: ايه حكايه الدموع اللي ملهاش مكان النهارده دي عماد: لا ابدا دي دموع فرح .. بشكر جميله انها سبب الفرحه دي النهارده وليد: فعلا هيا سبب فرحه الكل النهارده جميله: انا معملتش حاجه وليد بحب: انتي عملتي كل حاجه ! انتي زرعتي ورد يا جميله .. زرعتي ورود في قلوب الكل وكان لازم تحصدي ورود..
جميله خبت وشها في كتف جوزها بحب اما فهد بعد ما بعد عن جميله ضمها بحب وهيا ضمته اتجمع العرسان التلاته بعروساتهم وكل واحد بارك للتاني وكل عريس اخد عروسته علي عربيته ندي بصت حواليها تشوف وتفكر هتعمل ايه وهتركب مع مين لانها رفضت تركب مع آسر ورفضت امل كمان اكرم شافها واقفه فراح ناحيه وليد و وقف قصاده وليد كان واقف مع جميله ونبيله ورايح لاخته يجيبها وليد: خير يا اكرم..
اكرم: ينفع انا اوصل ندي هانم للقاعه وليد بصله كتير اكرم: ده بعد اذنك طبعا وليد: ماشي يا اكرم وصلها اكرم ابتسم: متشكر يا وليد يالا وراك علي طول وليد ركب عربيته واتحرك وندي استغربت ان اخوها سابها ومشي واتفاجئت بأكرم جنبها اكرم: بتدوري علي حد !
ندي: وليد سابني ومشي اكرم: ما سابكيش ندي بعدم فهم: امال ايه ! اكرم: انا طلبت منه يمشي وانا هوصلك تسمحيلي شاور علي عربيته وهيا قلبها دق زي المراهقات ومشيت قدامه فتحلها الباب وركبها عربيته وركب جنبها واتحرك اكرم: ينفع اقولك انك رائعه الجمال النهارده اللي يشوفك ما يصدقش ابدا انك والده عروسه وعريس ابدا يدوب اختهم ندي: ما تبالغش يا اكرم..
اكرم بصلها: انا مهما اتكلم مش هوفيكي حقك ابدا الكل وصل القاعه ودخلوا ورقصوا سلو مع بعض كل واحد مع حبيبته .. علي اغنيه خاصه طلبها ادهم كمان هو ومراته حضروا الحفله من اولها .. فهد طلب من الديجي يشغلوا الاغنيه اللي جميله طلبتها منه يوم حفلتهم وبالفعل شغلهالها وادهم ابتسم وفهد شاورله..
اغنيه ( how i love you ) ورقص معاها علي الاغنيه دي واتفاجئت جميله كمان بالتورته لما دخلت عشر ادوار زي ما طلبت وفوق عروسه وعريس صغيرين وضمت فهد اللي باسها بحب فهد بهمس: احلامك اوامر جميله ابتسمت: ربنا ما يحرمني منك ابدا قطعوا التورته واتعشوا كل عروسه مع عريسها وكل حبيب مع حبيبه بعد العشا الكل اتفاجيء بوليد علي الاستيج وطلب من الديجي اغنيه وبدأ يغني ( لو كان بخاطري انا ما كنت اسيبك يوم ولا ثانيه ) واتفاجؤا اكتر لما طلعت جميله تغني معاه دويتو والكل هيص بيهم جدا مع ان صوتهم كان عادي بس الحب اللي كان بينهم مش عادي ابدا ...
بعدها طلبوا من كل عريس يغني بنفسه اغنيه لعروسته فهد غني اغنيه ( my baby you ) اسر غني اغنيه ( no promises) وليد غني لامل ( بحبك مش هقول تاني لوائل جسار) ادهم طلبوا منه يغني بس رفض تماما لان الليله دي مش بتاعته هو ومش عايز يخطف اي اضواء من حد..
سالي كانت بتتفرج عليهم من بعيد وشافت فرحت كل عروسه بعريسها وسألت نفسها هل ممكن يجي يوم هيا تلبس فستان ابيض وترقص بحب وفرحه كده .. تقريبا هيا عمرها ما فرحت بالشكل ده .. بصت لجميله وضحكة عيونها ونظراتها لفهد ونظراته هو ليها وافتكرت خطوبتهم وقعدته جنبها مجبور وعنيه طايره علي جميله كانت عارفه ساعتها انه ما بيحبهاش .. استغربت ليه قبلت وضع زي ده علي نفسها..
ازاي قبلت ترتبط بواحد مش بيبصلها بالطريقه دي .. مش بيحضنها بعنيه قبل ايديه .. واحد تكون هيا دنيته وحياته ... ازاي كانت حياتها كلها غلط بالشكل ده ! لازم تغير كل حاجه وتتغير كلها علشان تلاقي الحب ده والنظره دي ... لازم تسافر وتبدأ من جديد...
عماد كان بيتفرج عليهم وبعدها راح للبوفيه وطلب كوبايتين عصير واخدهم ورايح ياخد جنب يشربهم لوحده عماد لنفسه: بما ان كل واحد مع حبيبه انا كمان اخد كوبايتين استفرد بيهم، خليني اجيب طبق واتعشي كويس الليله شكلها هتكون طويله رجع جاب طبق وشكله وماشي بالطبق والكوبايتين بالعافيه ومركز قوي معاهم وده خلاه مش واخد باله من اللي جايه في وشه تبرطم وترغي ولبسوا في بعض والبنت صرخت من العصير اللي غرقها وعماد وقف قصادها مذبهل..
عماد: انا اسف انا اسف انا اسف البنت عندها حاله ذهول وبصتله: النظاره عماد مش فاهم: انا ماخدتش نظارات البنت بصت حواليها فعماد فهم انها وقعت منها وبص كانت في الارض فجابها وعطاهالها وبسرعه رجع لتاع البوفيه جاب مناديل كتيره واخدها بره وجرسون شافهم وشاف الموقف كله اخدهم جوه بعيد عن القاعه وبدأ عماد يساعدها تنظف هدومها وعمال يتأسف...
البنت نظفت علي قد ما قدرت الجرسون: انا لازم ارجع لمكاني انتو محتاجين مني حاجه ! براحتكم هنا بس اقفلوا الباب وانتو خارجين عماد: متشكر يا ابني روح انت لشغلك البنت بصتله: بتعمل ايه بكوبايتين عصير ! عماد: كنت هشربهم هعمل بيهم ايه يعني ! البنت: الاتنين !
عماد باستغراب: اه الاتنين انا حر اشرب اتنين ولا تلاته البنت: تشربهم مش تلبسهم للخلق عماد: انا اسف بقي يا ستي وبعدين انتي لو مركزه كنتي شوفتيني .. انا مركز في العصير والاكل انتي بقي تايهه ليه ! البنت بصتله وكشرت: انا مكنتش تايهه انا كنت بتكلم في التليفون عماد: علي العموم انا اسف بعدين دلوقتي تنشفي..
البنت بصتله وماردتش وفضلت تبرطم مع نفسها عماد بيسمعها وهيا بصتله فرفع دماغه عماد: علي فكره انا ما بحبش اللي يفضل يبرطم كتير ده اتكلمي كلام واضح البنت: علي فكره ده شيء ما يخصكش.. هو انت اسمك ايه ! عماد: اسمي عماد ابو العروسه والعريس البنت فرحت: مين فيهم ! انا عارفه ان في ولد وبنت اخوات و ولد وبنت اخوات .. امل واسر ولا جميله و وليد عماد: جميله و وليد !
البنت مدت ايدها تسلم عليه: انا ابتسام خاله مي مرات آسر عماد: كنت متخيلك اختها مثلا ابتسام: اختها هههههه لا يا عم انا خالتها عماد: جوز حضرتك فين ! ابتسام: انا مش متجوزه انا مطلقه عماد: انا اسف ابتسام: لا ما تتأسفش طلاقي منه كان اجمل شيء حصلي في حياتي عماد: طيب مش هنتأسف بس بما اننا عيله بقي تسمحيلي اعوضك واجيبلك عصير ابتسام: انا ما اتعشتش اصلا..
عماد ضحك: طيب تعالي نجيب اربعه عصير وطبقين محترمين ونتعشي ابتسام ضحكت: انت شايف كده عماد: يعني بما ان العروسه للعريس والجري للمتاعيس اللي هو احنا يبقي نطلع علي الاقل بالعشا ابتسام ضحكت: ما نبقاش متاعيس قوي يعني .. عماد ضحك: بالعشا نص متاعيس ابتسام: نص متاعيس افضل ... يالا اخدها وراحوا يتعشوا علي تربيزه بعيده عن الدوشه شويه ويتعرفوا اكتر علي بعض ...
الحفله كانت فوق الخيال وخلصت الليله علي خير وكل عريس روح بيته ... فهد في الفيلا بتاعته آسر في فيلا ابوه اما وليد في شقته اللي كانت هديه من وليد نصار ... وليد اشتري تلات شقق كبار فوق بعض للتلات عرسان بس فهد وآسر حبوا يقضوا لياليهم الاولي في البيت اللي اتولدوا فيه كالعاده وليد دخل وهو و امل شقتهم وكانت امل في منتهي التوتر و وليد كمل عليها وليد: وبعدين بقي !
امل: بعدين ايه مالك ! وليد: مبحبش انام جنب اي حد شوفي بقي ياستي من اولها كده كل واحد فينا في اوضه لاتزهقيني ولا ازهقك خلاص امل زعلت: براحتك طبعا وليد: انا مرضيتش اقول الكلام ده بدري علشان ايه محدش يتدخل بينا بس انا كمان عايزك زي الشاطره كده تنقليلي هدومي وحاجتي كلها في اوضتي او تنقلي حاجتك انتي بره الاوضه احنا نتفق من دلوقتي انهي اوضتك وانهي اوضتي امل كانت هتعيط: انت عايز دلوقتي تقسم الحاجات ؟
وليد: شهر عسل ايه وكلام فاضي ايه ! ده للناس الفاضيه انا مش فاضي وبعدين من اولها كده يا شاطره لا ليا دعوه بفهد عمل ايه ولا آسر اخويا راح فين هما لهم حياتهم واحنا لينا حياتنا ودلوقتي يالا امل: يالا فين !
وليد: ادخلي جهزيلي عشا جعان انتي فاكره اللي كلناه ده اكل ... خشي يا اما اعمليلي اكل عدل اكله قبل ما نام يالا امل مشيت من قدامه بصمت وقبل ما تدخل المطبخ اتفاجئت بيه بيشدها من دراعها وبصتله وليد بابتسامه: نفسي مره واحده بس ... مره يا امل تعرفي اني بهزر امل فضلت واقفه مش مستوعبه شويه ايه هو اللي بيهزر فيه امل: بتهزر في ايه ؟ مش عايز عشا ؟
وليد: بهزر في كل الكلام اللي قولته ده ! في كل حاجه الاوضه والهدوم وشهر العسل وكله امل كشرت: بتهزر ! وليد: طبعا بهزر ده انا هموت عليكي نكون مع بعض في اوضه واحده ونسافر نقضي أجمل شهر عسل في الدنيا امل: ينفع استأذنك لحظه !
وليد: براحتك يا قلبي امل راحت علي اوضه نومها ودخلت وقبل ما تقفل الباب امل: الكنبه عندك قضي ليلتك عليها قبل ما وليد يوصلها كانت قافله الباب بالمفتاح في وشه وليد: ما تهزريش يا امل امل: امال اسيبك انت وحدك تهزر وليد: طيب هزري بس افتحي الباب امل: قضي ليلتك عندك لاني مش هفتح وليد: واهون عليكي وليد حبيبك ؟
امل: تهون ؟ ده انت تهون وتهون وتهون لبكره تهون بعدد كل المرات اللي اشتغلتني فيها تهون وليد: عيب عليكي يا امل تنومي جوزك اول ليله بعيد عنك امل: لا مش عيب ده عيب عليا لو سمحتلك بس تشوف حتي وشي اسبوع يا وليد هتقعد عندك وليد شهق: انتي بتهرجي ولا ايه قسما بالله اكسر الباب امال انتي فاكره ايه !
امل سندت علي الباب مبتسمه: يالا كتفك وفي الباب بس اوعي كتفك يتخلع يا حبيبي وليد: امل افتحي بقي خلاص مش هشتغلك تاني امل: تقضي ليله كده علي الكنبه تعد نجوم الليل وبعدها افتحلك وليد: ماشي اقضي ليله اعد النجوم بس مش الليله دي امل: ده الليله دي أجمل ليله انت بتقول ايه !
وليد: امل امل: وليد وليد: بطلي رخامه امل: انا ابطل رخامه ! بقالك كام شهر بترخم عليا ! انا هردلك رخامتك كلها الليله ... تصبح علي خير انا هنام اصلا من الصبح هموت وانام تصبح علي خير حبيبي مهما يكلمها معدتش بترد عليه راح الصاله وفضل رايح جاي منتظرها تفتح بس منشفه دماغها واخيرا قرر يتصل بندي اللي اتفاجئت: خير يا وليد في ايه ! امل مالها يا قلبي..
وليد: قافله الباب ومش راضيه تفتحلي ندي ضحكت: طيب بالهداوه كده وهيا هتفتح ما تقلقش تلاقيها بس مكسوفه شويه منك وهتغير وتفتح وليد: حضرتك مش فاهمه اصل انا ! ندي قلقت: انت ايه ! انت زعلتها ! وليد: مش قوي ندي: وليد انطق علي طول انت ايه !
وليد: اشتغلتها شويه زي ما بشتغلها كل شويه وهيا قفشت وعاقبتني باني اقضي الليله علي الكنبه يرضيكي كده ! ندي ضحكت: اممممم طيب دي بقي مشكلتك انت مش مشكلتي انا وتاني مره ما تدخلنيش في حل مشاكلكم انا جوزتها وهنا مهمتي انتهت تعامل انت مع مراتك تصبح علي خير يا حبيبي قفلت ندي مبتسمه ومطمنه علي بنتها ...
وليد فضل بره بابها ساعه كامله يترجاها تفتح وهيا رافضه لحد ما قررت تخرج .. فتحت الباب وخرجت وليد جري عليها: اخص عليكي يا امل بجد امل: انا رايحه عند ماما ... اتفضل وصلني وليد: اوصلك فين انتي عبيطه ولا ايه ! خلاص بقي ما تكبريش الموضوع امل: لا انا كبرته بقي مش كل يوم تشتغلني كده اتفضل يالا وصلني يا اما هطلب اوبر او هكلم آسر..
وليد: آسر مش فاضيلك امل: بمكالمه مني هيفضالي وليد: امل خلاص بقي قولتلك حقك عليه ومش هشتغلك تاني خلاص امل بصرامه: وصلني اتفضل يا هنزل واوقف تاكسي وليد: يا بنتي امل قاطعته: وصلني وليد بصلها وهيستسلم وهنا هيا ضحكت وهو بصلها وفهم انها بتشتغله المره دي وليد: انتي بتشتغليني !
امل: اتضايقت ! دمك اتحرق ! صدقت ! هو ده احساسي في كل مره بتشتغلني فيها وليد مره واحده طلع يجري وراها وهيا تجري وتصرخ وهو وراها وليد: قسما بالله بس اطولك يا امل فضل يجري وراها لحد ما مسكها وشدها وشالها علي كتفه وهيا بتحاول تفلت منه بس خلاص دخل اوضه النوم وحدفها علي السرير وراح قفل الباب بالمفتاح واخد المفتاح وهيا اتوترت بس بفرحه مش خوف قلع جاكت بدلته وحدفه بعيد: انا هوريكي ازاي تشتغليني هاه ... امل صرخت بدلع: وليييييد
عند آسر دخلوا الفيلا بتاعت ابوه وشالها لحد اوضه نومهم ودخلوا وآسر شغل مزيكا هاديه آسر مد ايده: تسمحيلي سنيوريتا ! مي ضحكت ومسكت ايده: طبعا بدئت ترقص معاه وهيا طايره وهو شد طرحتها من علي شعرها ورماها بعيد وهيا فكت شعرها وهو دفن وشه فيه وهو بيرقص معاها مي: بتحبني !
آسر من غير ما يرفع دماغه من شعرها: لأ .. بعشقك مي بابتسامه: مبسوط ؟ اسر باسها في رقبتها: فوق ما تتخيلي سكتت هيا فرفع دماغه وبصلها: انتي مبسوطه ! مي بحب: وانا في حضنك اسعد انسانه في الدنيا آسر: مقولتليش عايزه تفضلي هنا ولا نروح الشقه اللي جابها خالي وليد !
مي حطت ايديها حوالين رقبته: اللي يريحك انت ... بس لو كلهم هيقعدوا في الشقق يبقي الافضل لو كلنا في عماره واحده آسر: خالي وليد عارض اننا كلنا نعيش معاه في نفس الفيلا لو انتي عايزه تكوني مع الكل مي: لأ مش عايزه بيت واحد صعب مش هنكون براحتنا لكن عماره واحده وكل واحد له شقته دي جميله كل واحد براحته في شقته ووقت ما نحب نكون مع بعض سهله مي: احنا هنسافر امتي شهر العسل !
آسر: وقت ما نحدد بكره بعده اللي يناسبنا مي: الصبح نسافر آسر ابتسم: الصبح نسافر مي: ولا خلينا نفضل مع بعض الاول شويه وبعدها نسافر آسر: ما هو احنا لما نسافر هنكون برضه مع بعض مي: مش كلنا هنكون مع بعض ! آسر: ايوه ماشي بس كل واحد براحته احنا مش طالعين رحله يعني مي ضحكت: يعني هنكون براحتنا انا وانت !
آسر: طبعا محدش له دعوه بينا ... تعرفي سمعت ان وليد نصار لما حب جميله اخدها شهر عسل وقضوا الشهر كله في اوضه في فندق مخرجوش منها ابدا مي ضحكت: مين قالك ! آسر: امي يعني هيكون مين! كانت علي طول تحكيلنا عن حبهم الاسطوري مي: هما فعلا حبهم اسطوري .. آسر حبني زي اونكل وليد ما بيحب جميله ! آسر: تعالي يالا وانا احبك آسر شالها وبدأ يوريها ايه هو الحب ودخلها جنته او جنتهم الخاصه ..
فهد دخلوا الفيلا والاتنين متحفزين ومتوترين فهد: فاكره اول مره دخلتي هنا ؟ جميله: معاك ساعت حفله ميس فهد: عمرك تخيلتي اننا ندخلها عريس وعروسه ! جميله: في اليوم ده لأ طبعا فهد قرب منها: امتي تخيلتيني عريسك وان انا وانتي لبعض واتمنيتي ده !
جميله فكرت شويه: اول مره شوفتك فيها حسيت للحظه انك تخصني انا،، ملكي،، بس بعدها مفكرتش كده لفتره فهد مستمتع: فكرتي امتي تاني ! جميله: لما ضربتك بالفازه واتعورت تاني يوم وانت تعبان كان نفسي ساعتها يكون ليا حق عليك اخدك في حضني واقولك ارتاح هنا في حضني ده مكانك فهد مسك ايديها الاتنين: فعلا ده مكاني ... جميله بعدت شويه وفهد تقبل حرجها وبعدها فهد: مقولتيش برضه امتي تخيلتيني عريسك !
جميله: يوم خطوبتك علي سالي ... اتمنيتك تكون ليا فهد: علشان كده عيطتي ! جميله: وعلشان كده عيطت .. تعرف يومها لما عطتني ظهرك وقولتلي امشي تخيلتك بصتلي وجيت مسحت دموعي وبوستني وفوقت لما قولتلي ( قلدته ) انتي لسه هنا يالا اتفضلي..
فهد ضحك: تصدقي ان انا كمان تخيلت ده بس فوقت للوضع اللي انا فيه وعلشان ما اضعفش مشيتك انتي جميله: انت امتي تخيلتني عروستك ! ملكك انت وبس فهد: يوم ما كنتي في الكافتيريا ماسكه موبيلك ومركزه معاه قوي وعماله تبتسمي وتكشري كان نفسي ساعتها تكوني ملكي واقوم اشد الموبيل من ايدك واقولك ما تفكريش غير فيا انا وكان عندي استعداد ادفع نص عمري واعرف بتكلمي مين ساعتها جميله ضحكت: عايز تعرف كنت بكلم مين !
جميله: علشان عمتو ... كان نفسها تشوفك وكل يوم تسألني جيت من السفر ولا لأ واليوم ده صورتك يجي عشرين صوره لعمتو فهد ضحك: يا بنت الايه وانا فضلت اتخيل مليون سيناريو وسيناريو ولا واحد فيهم صح ... بس ملحوقه من النهارده ممنوع السرحان تماما جميله: ممنوع السرحان اتفقنا فهد وطي وشالها بين ايديه وهيا ضحكت: تعالي نكمل اتفاقتنا فوق طلعوا ونزلها براحه في الارض ويدوب باسها برقه وبعدها بعدت فهد: بعدتي ليه !
جميله: الفستان تقيل قوي ومضايقني .. ينفع اغيره ؟ فهد ابتسم: براحتك طبعا جميله طلبت منه يفتح السوسته وبمجرد ما فتحها جريت علي اوضه اللبس وقفلت عليها وغيرت هدومها في نص ساعه وهو منتظرها بره فهد خبط عليها: انتي كويسه جوه !
جميله: كنت متخيله الموضوع سهل .. طلع صعب لحظه وخارجه فهد: محتاجه مساعده جميله: لا يا قلبي جميله فضلت ربع ساعه تحاول تختار هتلبس ايه ! واخيرا استقرت علي بيجامه بيضا ستان طويله لبستها وليست فوقها روب وطلعت وفهد اول ما شافها فهد: ما لبستيش طرحه كمان ليه !
جميله: لا ما انا هلبسها واحنا بنصلي فهد تقبل كلامها بمزاجه ودخل هو كمان يغير هدومه وطلع: يالا نصلي ! جميله: لحظه البس الاسدال لبست اسدالها ووقفت وراه وصلوا وبعد ما خلصوا وفهد حط ايده علي دماغها وقال الدعاء واول ما خلص وقفت وقلعت الاسدال وفهد لمح البيجامه اللي تحت الروب وابتسم قام يدوب هيقرب منها جميله: لحظه يا فهد فهد: انتي رايحه فين !
جميله: دقيقه وجايه نزلت جميله وفهد فضل منتظرها وبعدها قام يشوفها فين ونزل يدور عليها وفجأه خطر علي باله السوبر ماركت فراح علي المطبخ ودخل لمح التلاجه مفتوحه بس هيا مش موجوده فنادي: جميله ! جميله طلعت من جوه التلاجه وبصتله وفي بوقها شريحه لانشون..
فهد: انتي بتعملي ايه ! ما احنا اتعشينا في الفندق جميله: الفستان كان طابق علي نفسي ولما قلعته حسيت اني هموت من الجوع .. يرضيك اموت من الجوع! فهد بغيظ: لا طبعا ما يرضينيش جميله حطت الاكل علي السفره وهتقعد فهد بصلها: انتي لسه هتقعدي ! امال كنتي بتعملي ايه جواها !
جميله: كنت بختار ودلوقتي هاكل فهد: امال اللي كان في بوقك كان ايه جميله: دي يدوب شريحه لانشون يا فهد فهد: طيب طيب كلي يا جميله كلي..
جميله عملت ساندوتشين وفهد بيتفرج عليها حاطط ايد علي خده وبيتفرج والايد التانيه بينقر بيها علي السفره ورجله بيهزها بتوتر وباصصلها وهيا بتاكل جميله: علي فكره انا كده هزور ..، ما تبصليش كده فهد بغيظ: انتي بتعملي ساندوتش ايه ! انتي حطيتي رومي علي فلامنك علي جبنه بيضا علي لانشون ومعاهم زيتون ... ايه ده ! جميله: كوكتيل حبيبي تدوق ؟
فهد:لا شكرا انتي عارفاني مبحبش حاجه مع التاني جميله: لو دوقته هيعجبك ! فهد: جميله مش هدوق انجزي في ام الليله دي اكلت وخلصت ويدوب فهد هيقف كانت طلعت طبق تاني وهو بصلها: ايه ده ! جميله: حته من التورته ... انت يدوب دوقتهالي عايزه ادوقها وبعدين هحلي فهد وصل لاخره: هتحلي ! حلي يا جميله انا طالع فوق..
سابها وطلع وهيا ضحكت واكلت التورته ومبسوطه وبتستمتع بكل قطمه من التورته ... جميله لنفسها: ياه يا بت يا جميله لو تحبسيلك بكوبايه شاي ... اممممم بس اعمل لفهد ولا ممكن يلبسه في وشي ! لا بلاش الشاي اطلعله بقي خرجت من المطبخ وقفلت النور ورجعت تاني نورته وعملت الشاي واخدته في ايدها وطلعت فهد اول ما شافها بتريقه: بتحبسي سيادتك صح !
جميله: كوبايه شاي ايه مش قادره اقولك ... دماغي هتنفجر اليوم كله تخيل ما شربتش شاي .. كنت هعملك كوبايه بس صراحه خوفت من رد فعلك فهد: لا كويس فعلا انك معملتيهاش لان رد فعلي مكنش هيعجبك جميله قعدت جنبه علي السرير: الا عمتك ندي وجدتك نبيله فين ! مع عمتو واونكل وليد ! فهد: وليد اصلا زمانه هايص دلوقتي هما مع سالي في فيلتها جميله: انت بتقر علي ابوك !
فهد: بقر لا انا بحسده بس علي مراته اللي بتحبه تخيليها كده لاطعه وليد وقاعده بتاكل ! متخيلاها ؟ جميله فكرت لحظه: لا عمتو ما تعملهاش ما تسيبش اونكل وليد لحظه فهد: طيب ما تقلديها جميله: ما انا قاعده معاك اهو فهد اخد من ايدها كوبايه الشاي حطها علي الكوميدينو: خلصت اهي اخيرا احمدك يارب يدوب هيقرب من شفايفها...
رواية جميلة الجزء الثاني للكاتبة الشيماء محمد الفصل الأربعون والأخير
يدوب هيقرب من شفايفها قامت فهد: ايه ؟ اكل واكلتي ؟ حلو وحليتي ؟ شاي وحبستي ؟ عايزه ايه تاني ؟ جميله: هدخل بس الحمام افرش اسناني و فهد ما استناش تكمل وقام شد مفاتيح عربيته واخد موبيله وهيا مستغربه جميله: انت رايح فين !
فهد لبس جاكت بدلته وماردش عليها جميله: انت رايح فين رد عليا فهد بصلها: في مثل بيقولك الجواب بيبان من عنوانه جميله: ايوه يعني رايح فين ! فهد: هريحك من الحجج الكتير دي بعد اذنك جميله وقفت قصاده: فهد انا مش بتحجج..
فهد بعدها من قدامه وخارج بره الاوضه ومهما تنادي عليه الا انه خرج ورزع باب الاوضه وراه جميله فضلت متضايقه واتصلت بعمتها اللي ما ردتش عليها ورنت تاني فردت جميله الكبيره: مالك يا حبيبتي خير جميله: ابنك سابلي البيت عمتها: لحظه يا وليد .. جميله: سيبك من اونكل وليد لحظه وشوفيلي ابنك راح فين !
عمتها: انتي زعلتيه ! زعلتيه وطفشتيه من اول ليله ! عملتي ايه يا مصيبه جميله: والله ما عملتله حاجه عمتها: طيب بلاش عملتيله ايه ! عملتي ايه من ساعت ما روحتو البيت جميله: يدوب اتعشيت وحليت وشربت شاي بس وليد انفجر في الضحك جنبها وعمتها ضحكت: بس يا جميله ! محمرتيش فرختين ليه ولا عملتيلك صنيه بشاميل..
جميله: ماهو فهد مكنش هيصبر عليا وليد ضحك اكتر: بنت اخوكي مش طبيعيه ... عيني عليك يا فهد جميله: انتو معايا ولا مع ابنكم ؟ جعانه ما اكلش يعني ! عمتها: طيب عشتيه هو ولا انتي بس ! جميله: مارضيش ياكل عمتها: يعني اعمل فيكي ايه يا جميله ! هشوف وليد يشوفه فين !
جميله: بسرعه بقي يا عمتو انتي عارفه بخاف افضل لوحدي والنور لو قطع ممكن اموت في الفيلا دي لوحدي جرس الباب ضرب وليد: اكيد ده هو جميله: اونكل ابعته علي هنا او انت هاته وليد قام وشد بنطلون لبسه بسرعه وخرج يفتح الباب وفعلا كان فهد ابنه اللي اول ما شافه فهد: هايص انت هايص وليد ضحك: انت سيبت بيتك ليه !
فهد: سيادتها بتعملي في ساندوتشات ... ساندوتشات غريبه ... لا وبتحلي ... خلص بقي علي كده لا لازم تحبس بالشاي وليد: طيب اتعشت يا فهد تلاقيها ما اكلتش اليوم كله فهد علي اخره: بتتعشي في ساعتين خلصنا بقي العشا هندخل بقي في قصه هغسل وشي وهفرش اسناني لا انا هاخد شاور ودول فيهم بتاع ساعتين كمان وليد ماسك نفسه من الضحك بالعافيه وفهد بيقلد في جميله فهد دخل وقعد علي الكنبه وبيهز رجله بغيظ وتوتر فهد: بني ادمه مستفزه بتاعت سحر اللحظه وليد كشر: سحر لحظه ايه ؟
فهد: يوم خطوبتنا بوستها وقبل ما تنزل عند بيتهم جيت ابوسها تقولي ايه لا ما ينفعش ليه يا بنتي اصل سحر اللحظه انتهي ... سحر لحظه ايه اللي انتهي ده ! هاه ! هنا امه خرجت وهو بصلها: لابسه روب سيادتك وانت واقف علي الباب ! انت متخيل اني همشي ! انا قاعد هنا الليله دي ... انتو مش هتهيصو جوه وانا افضل احرق في ام دمي هنا..
وليد قفل الباب ومراته ناولته تيشرت وهو اخده ولبسه فهد: ايوه البس علشان ليلتنا طويله وليد: قوم ياد روح لمراتك ما تسيبهاش ليله فرحكم فهد: بص انا دمي محروق وعلي اخري مرواح مش هروح ونوم انتو الاتنين كل واحد هينام في اوضه وليد ضحك: قوم ياد اطلع بره يالا انا غلطان اصلا اني فتحتلك .. قوم روح لمراتك..
جميله قعدت جنب ابنها: حبيبي جميله فعلا تصرفاتها مستفزه بس النهارده ليله فرحكم يعني دي ليله حب فهد: دي ليله اكل وحرق دم جميله: هيا ما تقصدش تزعلك بدليل انها كلمتني وعماله تعيط وتعيط وتقول مكنتش تعرف انك هتضايق لو هيا اكلت وبتوعدك مش هتاكل تاني طول ما انت في البيت..
فهد: بقولك ايه ماتحوروش في الكلام انتي وبنت اخوكي انا ما اضايقتش من اكلها انا اتضايقت من طريقتها وتصرفاتها انا مش هتكون جعانه وامنعها تاكل يعني جميله: طيب هيا مستفزه ده مش جديد عليك بس ليه ما فكرتش انها ممكن تكون خايفه او متوتره ودي الطريقه اللي بتقضي بيها علي توترها فهد كشر وبدأ يسمع لامه وبصلها وهيا بصت لجوزها يتكلم.
وليد: البنت في الليله دي بتكون خايفه فهد: جميله ما بتخافش وليد: جميله اللي بتنهار لو النور قطع ما بتخافش ! فهد: ايوه ماشي بتخاف في الظلمه بس مش هتخاف مني يعني وليد: مين قالك ! ده موضوع جديد ليكم انتو الاتنين تعرف منين هيا بتتعامل معاه ازاي ؟ اتكلمت معاها ؟ هدتها في حضنك وحاولت تطمنها ؟ ولا فضلت قاعد تبصلها ومترقب اللحظه اللي هتنقض فيها علي فريستك..
فهد: فريسه ايه وانقض ايه ! هيا بطلت اكل اصلا علشان اخدها في حضني ولا اتنيل اقرب منها جميله: انت غلطان انك سيبت بيتك في ليله زي دي قوم لمراتك واوعي تعاقبها بانك تسيب اوضتك تاني مفيش شيء في الدنيا يضايق الست ويجرحها قد ان جوزها يسيب اوضه نومه ما بالك بيته وما بالك في ليله فرحهم ! قوم يا حبيبي لحضن مراتك اللي بتحبك وليد: ليله زي دي ما بتتعوضش يا فهد اوعي تسمح لاي شيء في الكون يضيعها منكم ..
فهد قام: حاضر هسيبكم وليد بجديه: والله ما قصدي ابدا بس بجد مش عايز تفوتك ليله زي دي فهد: عارف تصبحو علي خير جميله: ابقي طمني لما توصل فهد رجع بيته ووصل ودخل الفيلا ووقف تحت يفكر هيطلع باي وش او هيقولها ايه !
جميله فوق حست انها زودتها قوي معاه فقامت غيرت هدومها ولبست اللي اختارته جميله لها وجددت الميكب بتاعها وبقت عروسه فعلا اجمل ما يكون وقعدت منتظره فهد يرجع... فهد تحت متردد يطلع ولا لأ وهو علي السلم باصص لفوق يطلع ولا لأ النور اتقطع والدنيا بقت كحل كلها..
جميله فوق انفاسها وقفت وعنيها برقوا والخوف سيطر عليها بس سمعت صوته: جميله، جميله جميله: فهد انا هنا فهد نادي عليها علشان ما تتفاجئش بيه وفتح الباب وفي ايده موبيله منوره ودخل وهيا رمت نفسها بسرعه في حضنه وهو ضمها قوي جميله بعياط: ما تبعدش عني تاني كده !
فهد ضمها قوي: حقك عليا يا عمري كله رفع دماغها وباسها بوسه طويله واستوعب هنا انها مش لابسه البيجامه وابتسم: طيب ليه مش من الاول جميله بتكشيره مصطنعه: انت ما بتصبرش فهد: انا برضه ولا انتي اللي غلسه جميله هتتكلم بس حط ايده علي شفايفها منعها فهد: كفايه كلام علشان خاطري..
ابتسمت وسكتت وسمحتله يقرب وشالها حطها علي السرير برقه ويدوب هيقرب منها جميله: ينفع تتصرف في الظلمه دي ولا هنقضي الليله علي كشاف الموبيل فهد وقف وبص حواليه: هيا ليله باينه من اولها جميله: في جوه درج فيه شمع فهد دخل وقلب شويه وخرج بالدرج كله وهيا ضحكت جميله: ليه الدرج كله ؟
فهد: هتشوفي فهد طلع كل الشمع اللي في الدرج ووزعه في الاوضه كلها ونوره كله وبقت الاوضه كلها شموع وشكلهم تحفه فهد: اعتقد ليله رومانسيه مفيش بعد كده جميله ضحكت: كانت واحده كفايه فهد: لا كده حلو ...
فهد قصادها علي السرير: نفسك في اي حاجه تانيه بره الاوضه دي ؟ جميله ابتسمت بحب ومسكت ايده: اللي نفسي فيه قدامي اهو فهد قرب منها: يعني خلاص مش عايزه ساندوتش ولا شاي ولا حلو ولا قهو ما سابتوش يكمل الكلمه وهيا اللي باسته وده كان ضوء اخضر لفهد انها ملك ايديه ... وبعد فتره طويله من الحب كانت نايمه علي صدره وهو بيلعب في شعرها فهد: مبسوطه !
جميله: تقريبا مفيش حد في الدنيا دي كلها مبسوط زيي فضلوا ساكتين شويه جميله: انا عايزه انام ومش عايزه انام ! فهد ابتسم وبصلها وباسها في دماغها: نامي يا قمر وكأنها كانت منتظره الكلمه دي منه لانها غمضت عنيها وفي اقل من دقيقه كانت نامت في حضنه وهو كمان نام بسرعه زيها ...
بعد فتره فهد حس ان الجو حر جدا وفتح عنيه جميله لسه في حضنه زي ماهي بس الدنيا نور قوي .. نور اصفر وحر جدا .. غمض عنيه وفتحهم تاني واستوعب ان ده مش نور دي نار مولعه في الاوضه كلها حواليهم اتعدل فهد: جميله اصحي جميله: عايزه انام فهد بيشدها: قومي يخربيت كده الاوضه بتولع..
جميله فتحت وبصت حواليها وصرخت ووقفت علي السرير وفهد شد ملايه السرير لفها بيها وشالها خرجها بره الاوضه ونزلوا بسرعه علي تحت وطالع تاني جميله مسكته: انت رايح فين ! فهد: هجيب موبيلي اصبري .. نطلب المطافي والا اي حد جميله: لا مش هتطلع تاني اطلب من الارضي فهد: مش حافظ رقم اي حد اصبري بقي..
شد نفسه منها وطلع جري لمح موبيله على الكوميدينو بس الطريق كله نار وقرر يخاطر ودخل جاب موبيله وخرج ونزل لجميله اللي رمت نفسها في حضنه واخدها وخرج بره الفيلا خالص اتصل بأبوه اللي رد بالعافيه وبصوت نايم: عايز ايه ياد انت فهد بصوت عالي: البيت بيولع وليد فتح عنيه واتعدل شويه: بيت ايه اللي بيولع !
فهد: الفيلا بتولع .. اتصل بالمطافي ولا باي حد بسرعه قبل ما الفيلا كلها تولع وليد اتعدل ووقف: انت بتتكلم بجد ولا بتهزر ؟ فهد زعق: يا بابا يعني ههزر معاك الساعه ٦ الصبح اقولك البيت بيولع ده ايه هزار البوابين ده ! اتصل بالمطافي فهد قفل و وليد جميلته صحيت: في ايه ابنك ماله ! وليد: بيقول البيت بيولع جميله شهقت: هما كويسين ؟
وليد: اكيد انا ما سألتوش جميله شدت من ايده الموبيل واتصلت بابنها: انت ومراتك كويسين ؟ فعد: ايوه احنا كويسين بس كلموا المطافي وهاتي هدوم لجميله وتعالي انا لاففها بملايه جميله: حاضر هنجيلك دلوقتي قفلت وقامت جري لبست في لحظه ووليد جه يبلغ المطافي معرفش اي ارقام لهم فاتصل بأكرم وقاله يتصرف..
اكرم ساعتها كان بيكلم ندي وسهرانين مع بعض علي الفون وقفل معاها لما وليد ظهر في الانتظار وبعد ما قفل ندي كلمته تسأله في ايه واضطر يقولها ايه اللي حصل وهيا بلغت آسر ينزل لابن عمه وبلغت وليد علشان يروح لاخته ولكهم قاموا مفزوعين من نومهم بالخبر ده ... جميله كمان بلغت اخوها عماد..
فهد وهو مع جميله بصلها: انا هطلع اجيبلك اي هدوم من فوق جميله بخوف: ما تدخلش اوضتنا تاني ! فهد: هجيب من اوضه عمتو او تيته ... جميله اتعلقت في ايده: اوعي تخاطر بنفسك فاهم فهد ابتسم: ما تخافيش..
فهد دخل وطلع السلم بس النار خرجت من الاوضه وقفلت الطريق تماما وفكر يخاطر بس لقي جميله وراه علي السلم جميله: لو خطيت خطوه واحده هروح وراك انت فاهم ! فهد بصلها وبص للنار واخدها ونزل سمعوا سارينات المطافي وفهد اخد جميله بعيد علشان تكون بعيده عن طريقهم وهما دخلوا وعرفهم ان مفيش حد جوه وليد وجميلته وصلوا وجريوا عليهم ووراهم وصل عماد وبعدها اكرم ويزيد وبعدها اسر و وليد وكل واحد معاه مراته وندي ونبيله كمان ...
جميله عمتها اخدتها للملحق اللي جنب حمام السباحه ولبستها وليد جنب فهد خبط علي كتفه: مقولتليش ليه اجيبلك حتي تيشرت فهد بصله: مكنش فيا دماغ يزيد: انا معايا هدوم في عربيتي ... لحظه يزيد جاب تيشرت لفهد يلبسو ووقفوا كلهم وجت جميله وعمتها واخيرا المطافي خلصت وطلعوا..
راجل المطافي: في شمع كتير في الاوضه اعتقد دي اللي عملت الحريقه فهد بصوت واطي: لا ناصح راجل المطافي: ابقوا خلو بالكم بقي اكرم تعامل مع بتوع المطافي وبعد ما مشيوا الكل قعد في الجنينه حوالين بعض والكل ساكت ومره واحده جميله الصغيره بدئت تضحك والكل مستغرب وباصصلها لان كلهم زعلانين وهيا بتضحك وضحكها بيزيد ويعلي ويعلي فهد: في ايه !
جميله مش قادره تتكلم من الضحك: اصلي هههههه دعيت ههههه علي الاوضه ( ميته من الضحك ) فهد مش فاهم: دعيتي عليها ازاي ! جميله بتحاول تتكلم من وسط ضحكها والكل بدأ يضحك شويه شويه معاها جميله بضحك هستيري: واحنا بنشرتيها وانت اصريت انها تكون سودا دعيت انها تولع .. ما تخيلتش انها هتولع ليله دخلتنا هههههههه واحنا فيها فهد بصلها بغيظ وعض علي شفايفه نفسه لو يضربها..
وهيا مسكت ايديه وبتضحك والكل حواليها بيضحك وهو جامد وهيا سندت علي كتفه من كتر الضحك لحد ماهو كمان بدأ يضحك نبيله سكتت مره واحده وبصتلهم وكلهم سكتوا نبيله: انا كمان دعيت عليها تولع بس بميس مش بيكم الكل فتح في الضحك تاني فهد: كلكم سبحان الله دعيتوا وابواب السما مفتوحه محدش فيكم دعا دعوه عدله جميله الكبيره: انا دعيت فهد: دعيتي بأيه..
جميله الكبيره: انا اولع في البيت ده كله وافرشه علي ذوقي من جديد انا و وليد فهد وسط ضحكهم: طيب والله ده احنا نحمد ربنا ما ولعناش احنا مع كميه دعوات الحرق دي ... طيب حد دعا بحاجه تانيه ! عربيه تولع ! شقه ! مش ناقص نركب العربيه تولع بينا هنا عماد رفع ايديه وفهد بصله: خير يا خالي !
عماد: انا دعيت ان الشركه تولع بس باللي فيها لما كانت جميله شغاله فيها هنا كله ضحك من تاني فهد بص لابوه: بلغ المطافي يروحوا الشركه بسرعه وليد عماد رفع ايده والكل بصله وليد: انا دعيت المستشفي تولع علشان ما اروحش الشغل الكل دخل في حاله من الضحك الهستيري لفتره طويله...
وهديوا شويه شويه وسكتوا كلهم وحاله صمت مؤقت قطعتها جميله الصغيره: انا جعانه مش هنفطر هنا فهد اللي انفجر في الضحك اول واحد وكلهم حصلوه وخصوصا ابوه وامه لحد ما سكتوا جميله: علي فكره انا بتكلم بجد انا جعانه اطلبولنا فطار اكرم وقف: انا هطلب فطار لحظه طلب فطار ورجع قعد جنبهم اكرم: بما ان الكل متجمع ومبسوط كده انا عايز استغل الفرصه واطلب منكم كلكم ايد ندي ...
آسر بانفعال: علي فكره هيا لسه علي ذمه بابا وليد بصله: انا طلقتها منه من بدري آسر: طلقتها ! امتي وازاي ! هو بابا هنا ؟ وليد: رفعت قضيه عليه واتطلقت غيابي آسر بص لامه: ما قولتيليش ليه !
وليد رد عنها: لان دي حياتها هيا مش حياتك انت وكفايه بقي اللي ضيعته من عمرها علشانكم جه الوقت اللي تعيش علشانها آسر: يعني انت موافق علي جوازها من تاني ! وليد باستغراب: وليه لأ ! دي حياتها وهيا حره فيها وبعدين انت واتجوزت واختك اتجوزت عايزين ايه بقي منها ! آسر: انتي ساكته ليه اتكلمي !
ندي قامت وسابت الكل ومشيت بعيد وآسر قام وراها وليد عماد بص لمراته: روحي وراهم ولطفي الجو لو شعلل امل قامت وراهم اكرم لوليد: هو انا عملت حاجه غلط ! وليد بصله بغيظ: انت عايز تتجوز امه فكان لازم تمهد للموضوع ده مش كده اكرم: ما انا قايلك من بدري !
وليد: قايلي انا لكن ابنها فين ! مش راجل ده وبرضه مسؤل عن امه ! اكرم: طيب هقوم اكلمه ! وليد: لا سيبهم دلوقتي يتفاهموا لوحدهم الاول ندي وقفت عند حمام السباحه وانتظرت آسر آسر: انتي اتطلقتي فعلا من بابا ! ندي: انت كنت متوقع ايه ! هفضل علي ذمته ! وبعدين حتي لو مفيش اكرم كنت هتطلق آسر: طيب ليه !
ندي زعقت: لاني تعبت ... تعبت يا آسر اكتر من عشرين سنه عايشه في رعب وخوف عليكم وما صدقت كبرتم وما صدقت انت بالذات كبرت لان حتي لو لا قدر الله وليد ما كنش ظهر كنت هتحامي فيك انت واطلب منك تطلقني منه ولا مكنتش هتحميني منه ! آسر قرب منها ومسك وشها: انتي امي واغلي انسانه عندي بس ده برضه ابويا..
ندي باست ايده بحب الام: عارفه بس انا تعبت .. لو فكره الجواز مضايقاك هلغيها ويكفيني اتخلصت من خالد امل وراهم: لا طبعا اعملي اللي يسعدك يا ماما كفايا ضحيتي علشانا كتير ما تضحيش تاني ... لو انتي بتحبي اونكل اكرم اتجوزيه آسر: اكرم ! اشمعني يعني اكرم !
خالد كان هيهجم علي وليد بس السلاسل منعته و وليد ابتسم: ابنك اسر اتجوز بنت صلاح فاكرها ! وبنتك امل اتجوزت ابن اخو جميله ! وليد عارفو انت صح ! كنت عايز تاخد شركتي بس في الاخر انا اخدت منك كل حاجه حتي عيالك اخدتهم ... ياريت السجن يفوقك خرج من عنده مبسوط وروح بيته وسط ابنه وعيلته الجميله ...
سالي كتير حاولت تخرج ابوها والكل شاف انها اتغيرت فعلا وليد عمل استئناف لابن عمه علاء وحالوا انهم يرموا كل حاجه علي محي بصفته مدير لعلاء وبالفعل اتخفف الحكم من المؤبد لعشر سنين واتخففت العقوبه عليه .. بعد ما اتنطق بالحكم سالي وجنبها وليد قصاد علاء قبل ما ياخدوه وليد: ده اقصي شيء قدرت اعمله يا علاء علاء: ده اكبر من ماكنت احلم يا وليد .. انا استاهل المؤبد سالي: بس يا بابا..
علاء مسك وشها ومسح دموعها: كل واحد غلط بياخد عقابه ولما يتعاقب في الدنيا ارحم مليون مره من عقاب الاخره .. وبعدين دول يعدوا هوا واخرج الاقي ابنك او بنتك داخلين المدرسه وانا هوديهم وانا هجيبهم سالي ضحكت بعياط: انت جوزتني وخلفتني كمان !
علاء: باذن الله هتتجوزي واحد يستاهلك هدعيلك كل يوم وعمك وليد مش هيتخلي عنك ابدا سالي: بس انا هسافر .. همسك فرع الشركه بره مكان اونكل محسن الله يرحمه علاء بص لوليد: دي رغبتها سالي: محتاجه ابدأ في مكان جديد علاء بتفهم: بس حافظي علي نفسك وربنا يسعدك يا بنتي وخليكي علي اتصال بيا وليد اخدها ومشي وبالفعل سافرت تمسك الفرع الخارجي وتبدأ حياه جديده ...
فات شهرين علي الجواز الجماعي والكل كان متجمع عند جميله في الفيلا اللي جددتها بالكامل وبيجهزوا للغدا وجميله بتحضر السفره وراحت تنادي عليهم جميله: السفره جاهزه وليد: انتي كويسه ! جميله: بس مرهقه شويه وليد مسك ايدها واتغدوا كلهم مع بعض وهيا اكلت حاجات قليله قوي و وليد ملاحظها...
قامت جميله غصبا عن الكل تعمل القهوه لجوزها لانه متعود يشربها من ايدها ويدوب خطت خطوتين وقعت من طولها واغمي عليها و وليد شالها بسرعه وفوقوها وفهد هو وابوه اصروا يودوها لدكتور وبالفعل راحوا والدكتور بصلهم: من فيكم جوزها وليد: اكيد انا ده ابننا الدكتور: ده ابنكم؟ ده ابنها هيا ؟
فهد: ايوه ابنها انطق والدتي مالها ! الدكتور: هيا خلفتك وهيا عندها كام سنه ! فهد: يعني اقوم امد ايدي عليه ولا اعمل ايه ! جميله: فهد اهدي يا دكتور طمنا الاول علي عمتو واحنا هنجاوبك بعدها الدكتور: المدام حامل هنا الكل تنح وبص للدكتور وليد: حامل ! انت متأكد !
الدكتور: حامل في تلات شهور علي الاقل ! البيبي بيلعب في بطنها .. وليد بصدمه: بيلعب ؟ الدكتور: لا مش بيلعب قوي دي صيغه مبالغه بس ايوه هيا حامل في حوالي ١٤ أسبوع حاله صمت سيطرت عليهم و وليد اخد مراته وروحوا وكانت نبيله وندي منتظرينهم علي نار نبيله: بنتي مالها ! وليد مراتك مالها ؟ ومالكم كلكم عاملين كده ليه !
محدش رد عليها ندي: وليد قلقتنا مراتك مالها ! جميله في ايه ! وليد ضحك هنا: جميله حامل ! نبيله هنا ضحكت وبصت لجميله الصغيره مرات فهد: مبروك يا حبيبتي جميله الصغيره: مش انا اللي حامل ! عمتو ندي: عمتو مين ! نبيله: تقصد انهي جميله يا وليد ؟
وليد: جميله مراتي انا ... جميله مراتي حامل هنا وليد اخيرا استوعب فكره ان مراته حامل وبدأ يظهر رد فعله وجميله مراته خايفه ومحروجه وخايفه من رد فعل فهد اللي كان مصدوم فهد: في السن ده يكون عندي اخ جميله مراته: او اخت الكل فرح لخبر حمل جميله واحتفلوا بيه جدا و وليد كان طاير وعمل حفله ليهم يفرحوا فيها وليد قاعد جنب مراته وهيا سانده علي كتفه جميله: سرحان في ايه !
وليد: هلحق نربيه ! جميله بصتله: اخص عليك ما تقولش كده انت هتجوزه كمان وليد ابتسم: ليه ربنا كتب علينا البعد السنين دي كلها جميله: حكمته كده يمكن كان قضي اخف لحاجه ابشع وليد: ايه اللي ممكن يكون ابشع من بعدنا عمرنا كله ؟
جميله: موت حد فينا او ابننا لا قدر الله ! مش ده كان هيكون ابشع مليون مره وليد اتنهد وضم راسها علي صدره من تاني: ونعم بالله ونعم بالله .. استغفر الله العظيم من كل ذنب عظيم الحمد لله يا رب علي كل نعمك ... جميله: ربنا يباركلي في عمري معاك يا رب ويباركلنا حياتنا واببنا اللي جاي..
وليد: امين يا عمري امين .. بس هاتيلنا بنوته بقي المره دي ادعي دعوه حلوه كده بما ان اليومين دول ابواب السما مفتوحه جميله ضحكت: يارب تكون بنوته وفهد ابني يجيب هو ولد وبعدها يجيب بنت وليد بصلها باستغراب: اشمعني يعني ولد الاول !هتفرق ولد ولا بنت ! اللي يرزقه ربنا كويس المهم ربنا يرزقهم بالذريه الصالحه ...
جميله: باذن الله كلهم يرزقهم ذريه صالحه وليد قام بعد شويه و واقف بعيد بيبص علي عيلته اللي اكتملت فهد راح ووقف جنبه: واقف لوحدك ليه ! وليد: مبسوط فهد: يارب ديما .. انا عندي خبر ليك حبيت تكون اول حد يعرفه وليد: خير فهد: جميله مراتي حامل عرفنا امبارح وليد فرح جدا انه هيكون جد اخيرا: ما قولتش ليه !
فهد: اتشغلنا بتعب ماما وبعدها خبر الحمل بتاعها بس حبيت انك تعرف قبل الكل وليد حضن ابنه جامد قوي: ربنا يسعدك يافهد ومبروك يا ابني فهد اتحرج من ابوه وليد: عايز منك وعد ! فهد: وعد بايه ؟
وليد بجديه: اخوك او اختك تربيه زي ابنك بالظبط اوعي تسمح لاي شيء يفرق بينكم او يكرهكم في بعض فاهم فهد كشر: انت ليه بتوصيني عليه ! انت موجود وليد اتنهد: انا موجود بس العمر معدش فيه كتير يا فهد فهد اتضايق: بقولك ايه انا ما صدقت اعيش في وسط عيله وسط اب وام بيحبوني ومعنديش استعداد اخسر حد فيكم وبعدين مين هيجوز عيالي هاه ! مش انت !
وليد ابتسم: ان شاء الله بس ده ما يمنعش اني عايز اسمع الوعد ده منك ... علشان خاطر ابوك فهد: اوعدك اني هحافظ علي العيله دي كلها ايد واحده ومش هسمح لاي خلافات تفرق بينا وليد: وخصوصا الماديات يا فهد فهد: حاضر يا بابا حاضر .. هنفضل كلنا ايد واحده وليد خبط علي كتفه: يالا نبلغ العيله بالخبر السعيد ده..
وليد بلغ الكل بحمل جميله واتفاجؤا كلهم ان مي كمان حامل وامل وكانت فرحه العيله لا توصف ... والكل كان مترقب لانتظار اولياء العهد ... توته توته فرغت الحدوته اتمني ما تكونش ملتوته اتمني تكون الروايه عجبتكم واستفدتم منها وعرفتوا ان حب العيله ما يتعوضش ابدا ... تمت الجزء التالي رواية جميلة الجزء الثالث بقلم الشيماء حلقات خاصة
رواية جميلة الجزء الثالث بقلم الشيماء محمد حلقات خاصة مقدمة طويلة من الجزء الثالث
صحيت جميله من نومها وبصت حواليها جوزها في حضنها ابتسمت بحب .. سنين كتيره اتحرمت منه وكتير كانت تصحى من نومها تتمنى حتى تلمحه ... الحياة اخيرا ابتسمتلها .. ابنها في حضنها وجوزها جنبها وكمان ربنا حب يعوضها بعيل كمان ينبض جواها .. شكرت ربنا بصمت وقربت من جوزها بتلعب في شعره فبدأ يصحى وليد: صباح الخير لاجمل ملكة في الكون.
ابتسمت بحب: صباح النور يا حب عمري كله وليد بصلها كتير مبتسم: ايه الرضا ده كله جاوبته بحب: جديد عليك يعني حبي ؟ وليد حط ايده جوه شعرها بحب: لا يا قلبي بس مش عارف احساس مختلف كده اصحى الاقيكي بصالي كده ! ابتسمت: مبسوطة انك في حضني ! دي حاجه غريبة ؟
ضمها: لا يا قلبي ربنا يخليكي ليا انتي والقطة الصغيره اللي جوه دي جميلة: من اول ما عرفت بالحمل وانت تقول قطة ! مين قالك انها قطة ؟ وليد: احساسي مش اكتر واحساسي ديما ما بيكدبش جميلة بحب: ابدا ابدا وليد ابتسم: ابدا ابدا..
قاموا يفطروا ويجهزرا علشان ينزلوا اشغالهم ونزل علي الفطار فهد ومراته في ايده وصبحوا عليهم وقعدوا معاهم وليد: النهاردة في اجتماع الساعة ١٢ صح ولا ايه ؟ فهد وهو بيشرب قهوته: الساعه ١ مش ١٢ ما تنساش بقى جميله الصغيره: هو انا لازم اكون موجودة معاكم ! عمتها: وانتي مش عايزة تكوني موجوده ليه ؟
جميله: يعني كنا متفقين انا وامل ومي نخرج نشتري شوية حاجات للبيبهات اللي جاية دي قبل ما الحمل يتقل ونتعب فهد باستغراب: انتي يدوب في الخامس وهما بعدك كمان مفيش غير ماما هيا اللي سبقاكوا بس جميلة: انت معترض ليه ! احنا دلوقتي كويسين الله اعلم بكره في ايه فنكون مستعدين مش اكتر عمتها: يا بنتي ربنا ما يجيبش الا الخير ان شاء الله تفضلوا كويسين لاخر الحمل فهد: قوليلها بالله عليكي ..
جميلة: طيب بلاش كده عايزين نخرج نتمشي ونشتري شوية حاجات كده كويس ! فهد: كده افضل اخرجوا براحتكم جميلة: عمتو تعالي معانا ! انتي قربتي علي فكرة ! وليد اتدخل: قربت ايه دي يدوب شهر بينك وبينها وثانيا لأ سيبيلي عمتك معايا انتي اشتري علي ذوقك احنا واثقين فيكي جميلة: وليه بقي عمتو ما تنزلش معانا ؟
وليد: يا ستي انا حر .. انا مش عايزها تبعد عني ولو حبت تشتري بنفسها انا هفضي نفسي مخصوص لها وانزل معاها جميلة خبطت جوزها في كتفه: انت مش زي ابوك ليه ! فهد بص لابوه: دلع انت في مراتك واحنا ناخد فوق دماغنا وليد ضحك: وانت مين مانعك تدلع في مراتك !
فهد بتريقة: ماهو صراحة انت اللي اوفر قوي يا وليد .. اتقل شوية مش كده امه زعقت بهزار: اتلم ياولد انت وخليك في حالك ( بصت لبنت اخوها ) لمي جوزك وسيطري كده جميلة بصت لجوزها: ما تتلم بقى ديما جايبلنا الكلام فهد حط ايده على بوقه بهزار: اتلميت وخرست خالص وليد وقف: يالا ولا ايه !
فهد وقف معاه: اه يالا جميلة الكبيرة وقفت: استنوني لحظه هلبس طرحتي وانزل معاكم وليد قبل ما تطلع: جميلتي لو عايزة فعلا تروحي معاهم روحي يا حبي جميلة ابتسمت بحب لجوزها: لا يا حبيبي زي ما انت قولت، جميلة ذوقها كويس وانا خليني معاك طلعت ووراها بنت اخوها اللي اول ما وصلوا لفوق: عمتو ليه مش عايزة تنزلي معانا وليه سايبة اونكل وليد يقرر عنك ؟
عمتها بحب: لان وليد بيتصرف بحب مش بتحكم او سيطرة وده انا واثقة منه فليه اعترض ؟ على حبه ولا على خوفه؟ جميلة: بس مش كده عمتها: واكتر من كده .. طالما واثقة انه بيقرر من باب الحب مش السيطرة او التحكم فليه لأ ! وبعدين هو حارمني من ايه مثلا علشان اعترض ؟ واحد عايز حبيبته في حضنه وفي نفس الوقت لو انا عايزة انزل مش هيعترض فليه بقى اعترض انا ؟ حبيبتي العلاقة بيني وبين وليد مبنية كلها على الحب والتفاهم والثقة..
جميلة باعتراض: وهو فاهم كده ولا هو متخيل انه سي سيد يأمر فيطاع عمتها: وليد عمره ابدا ما كان سي سيد وانتي عارفة ده كويس يالا بقى سلام وابقي اختاري بقى شوية حاجات على ذوقك جميلة: بناتي ولا اولادي ؟
عمتها: بناتي ان شاء الله وبعدين ما انتي عارفة انها بنت فهد خرج هو وابوه وكل واحد رايح ناحية عربيته بس فهد وقف ابوه: هو انت ليه رفضت ان ماما تروح مع البنات ؟ وليد: اولا انا مرفضتش هيا براحتها وثانيا مش عايزها تتعب فهد: ما هيا وسط البنات لو هيتعبوا هيريحوا وليد: هيا غيرهم..
فهد: غيرهم في ايه بقي ان شاء الله واوعى تقول انك بتحبها اكتر مننا احنا وليد وقف قصاد ابنه: لا يا فصيح مش دي الحكاية خالص مامتك مختلفة علشان هيا مامتك فهمت ؟ فهد هز دماغه: لا طبعا مفهمتش وليد خبطه على دماغه بهزار: علشان يا فصيح هيا والدتك يعني هيا مش عيلة زيهم وهتتعب من اقل حاجه لكن البنات دول عيال فهمت يا فصيح ولا لسه ؟ فهد بقلق: هيا تعبانة ولا في حاجة انتو مخبينها ؟
وليد: لا طبعا وهيا لو تعبانة انا هسيبها كده ولا هخليها تنزل الشغل كل الحكاية يا فهد اني مش عايزها تتعب او تحمل نفسها فوق طاقتها وامك ما تتوصاش وعلشان كده عايزها ديما قصاد عيني لكن لو سيبتها هتفضل تلف وتعمل ده وده ولو سيبتها في البيت بتقف في المطبخ النهار كله فأسلم حل اني اخليها قصاد عيني فهمت بقى..
فهد: وهيا بقى رأيها ايه ؟ وفاهمة ده ولا لأ ؟ وليد ابتسم: طبعا فاهماني كويس وعارفة اني بعمل كده علشان اخليها قصادي فهد: نفسي انا وجميلة نوصل للمرحلة دي من التفاهم لكن هيا بتقف قصادي بكل همسة وكلمة وليد: كل واحدة ليها شخصية مختلفة وبعدين انت حبيت ده في جميلة ما تجيش بقى دلوقتي تطلب تغيرها او تغير شخصيتها او تسيطر عليها فهد: انا مش بحاول اسيطر عليها وليد: امال انت عايز تعمل ايه ؟
فهد: عايزها تبطل تعارضني عمال على بطال وليد: عايزها تسمع الكلام وهيا ساكتة ! طيب ده يفرق ايه عن السيطرة ؟ فهد: لا تفرق وليد: ما تضحكش على نفسك .. وبعدين لو جميلة سمعت كلامك في كل حاجة هتفقد رونقها والشيء اللي ميزها عن غيرها عندك .. فبلاش تطلب منها تتغير لان تغيرها ممكن ما يعجبكش .. جميلة لها شخصية استقلالية وده اللي شدك لها وصدقني لو بقت مسالمة ومطوعاك مش هتعجبك قاطعهم وصول جميلة الام عندهم وبحب لعبت في شعر ابنها: انت لسه واقف ؟ فكرتك سبقت..
فهد: كنا بنرغي شوية ... اسيبكم انا ... ( مشي خطوتين وبص لأمه ) على فكرة الراجل ده بيحبك كتير قوي جميلة ابتسمت وبصت لجوزها وبصت لابنها: عارفة يا حبيبي والحب ده متبادل من الطرفين وعلشان كده محسوس من الكل .. كل واحد ركب عربيته واتحركوا وجميلة جنب جوزها ساكتة لحد ما وليد بصلها: على فكرة لو عايزة تروحي معاهم فعلا روحي معنديش مانع هوديكي جميلة بصتله: عارفة انك هتوديني وليد: امال مالك ساكتة ليه كده ؟
جميلة: لا مش غلط بس مش للدرجة دي يا وليد ! خوفك شيء جميل ماشي بس انت من ساعة ماعرفت بحملي وانت بتعاملني كأني هنهار في اي لحظة وليد وقف علي جنب وبصلها: حبيبة قلبي انا عارف انك قوية وقوية جدا كمان بدليل كل اللي اتحملتيه في حياتك جميلة بصت للارض: انا مش قوية على فكرة..
وليد مسك ايديها: حبيبتي اللي تسيب كليتها علشان اخوها يتعلم وتوافق تتجوز واحد ما تعرفوش علشان عيلتها تعيش وتواجه واحدة زي ميس وتقدر تخلي كل اللي حواليها يحبوها وتقف بعد اختفاء جوزها وتربي عيال اخوها وتخليهم دكاترة ومهندسين دي ست عظيمة مش مجرد واحدة عادية واكيد طبعا قوية وابدا لا يمكن تنهار بسهولة جميلة: طيب انت ليه بتعاملني كده ؟
وليد: سيبيني اكمل كلامي ... انتي اه قوية بس اللي يتحرم من بيته ويتحبس حوالي عشرين سنة بعيد عن حبيبته وابنه اكيد يوم ما يرجعوا لحضنه لازم يحطهم جوه عنيه .. فانتي ابدا مش ضعيفة لكن انا اللي خايف يا جميلتي ... انا خايف عليكي حتى من الهوا اللي بيعدي جنبك .. واكيد مرعوب من فكرة الحمل دلوقتي .. وبفضل مراقبك طول الوقت جميلة: حبيبي احنا جنبك ومش هنبعد عنك وانا مخلية بالي من نفسي انت مش محتاج تخليني على طول قصاد عينك وليد ابتسم ومسك ايدها باسها: خدي الراجل العجوز ده على قد عقله ينفع !
جميلة: مين ده اللي عجوز هاه ! لو سمحت ما تقولش علي جوزي عجوز ابدا وليد باستسلام: حاضر مش هقول بس معلش استحمليني واستحملي خوفي عليكي واوعي تفتكري اني اقصد اسيطر عليكي او امنعك من حاجه انتي عايزاها جميلة: حبيب عمري كله انا بس كنت عايزة اسمع منك وجهة نظرك مش اكتر لكن انا عارفة انك بتخاف عليا وبتتعامل بحب مش اكتر وليد: ربنا يخليكي ليا ويقومك بالسلامة انتي والقطة دي جميلة ضحكت: برضه قطة ! وليد: طبعا قطتي الجميلة... رواية جميلة الجزء الثالث الحلقات الخاصة رواية جميلة الجزء الثالث بقلم الشيماء محمد حلقات خاصة الفصل الأول
البنات اتجمعوا التلاته امل ومي وجميلة وخرجوا محلات الاطفال ينقوا امل: عمتو مجتش معاكي ليه يا جميلة ! جميلة: جوزها عايزها يحب فيها يا اوختي ومش قادر تبعد عنه مي: يا زيدي يا زيدي ... والله انا بحسد عمتو جميلة على اونكل وليد ده أمل حطت ايدها في وسطها وقالت بهزار: ليه يا حلوة واخويا آسر كان قصر معاكي ولا ايه !
مي ضحكت: كتير بنسى انك اخته لازم اتلم قدامك هههههه جميلة: لا يا بت ولا تتلمي ولا حاجه هيا هنا تنسى انها اخت آسر يا اما انا كمان هفتكر اني اخت وليد امل هنا رفعت ايديها باستسلام: لا يا اختي وعلى ايه الطيب احسن انسى وماله ضحكوا التلاتة ولفوا يكملوا شراهم لحد ما تعبوا وقعدوا في كافيه يتغدوا ويريحوا جميلة: مالك يا امل بقالك فترة مش عجباني !
امل ابتسمت: لا ابدا عادي مي: لا طبعا مش عادي انتي فعلا في حاجه مغيراكي ! جميلة: وليد مزعلك ولا مش واخد باله منك أمل بدفاع: لا لا لا ابدا وليد بالعكس مخلي باله من كل حاجة وحنين وجنبي معظم الوقت او على قد ما شغله بيسمح مي: طيب انتي مضايقة من شغله ؟ أمل: لا ابدا يا بنات عادي مفيش حاجة جميلة: بت انتي انا عرفاكي كويس جدا فقري واعترفي في ايه ومالك ؟
امل سكتت وبصت للكوباية اللي بتشربها جميلة: كده يبقي في وفي كمان .. امل في ايه مالك ! امل سكتت كتير ومرة واحدة اتكلمت بنرفزة وبضيق: ماما .. جميله ومي مع بعض: مالها ؟
امل بغضب: معرفش مالها .. من ساعة ما اتجوزت هيا واونكل أكرم وهيا اتغيرت حساها عايشة في دور العيلة .. المراهقة اللي لسه يدوب بتحب جديد .. ولا عاملة اعتبار لسنها ولا لمكانتها ولا ان عيالها اتجوزوا وهيا هتبقي جدة جميلة بصتلها باستغراب: أمل انتي زعلانة ان مامتك مبسوطة مع جوزها ؟ أمل: لا طبعا تتبسط براحتها بس اللي ماما بتعمله اوفر قوي على فكرة مي: ايه اللي اوفر عملته ! كل ده علشان قصت شعرها وصبغته اشقر !
امل: وهيا ده بس اللي عملته ؟ اصلا القصه مش حلوة ابدا فيها دي بتليق على البنات اللي في سننا وبعدين طريقة لبسها وكلامها وسفرها هيا وهو، هي نسيت اصلا ان عندها عيال ! انا ما بقيتش اشوفها الا كل فين وفين جميلة: حبيبتي يا امل هيا اطمنت عليكم خلاص وانتي مع جوزك واخوكي مع مراته وضيعت عمرها علشانكم سيبيها تشوف نفسها شوية امل: تشوف نفسها بس من غير اللي بتعمله ده ! كل اصحابها في النادي بيبصولها ويتريقوا عليها وعلى شكلها..
جميلة: يا حبيبتي دول حاقدين عليها مش اكتر امل: لا يا جميلة انتي مش حاسة باللي بقوله علشان عمتك مختلفه ! جميلة: ماهي عمتو عايشه قصة حب كبيرة هيا واونكل وليد ولو شوفتيهم في البيت هتعرفي وبعدين هيا كمان عملت لوك جديد ده طبيعي امل: يا جميلة عمتك محجبة يعني تعمل ما بدالها محدش شايف تتجنن في بيتها وبعدين اونكل وليد عاقل وعمتك هادية غير ماما اللي اتجننت خالص مي: لا حول ولا قوة الا بالله انتي كمان جننتيها أمل: وهيا تصرفاتها تتسمي ايه غير جنان !
جميلة: حبيبتي مامتك ما صدقت لقت الحب خليها تعيش وبعدين ده بس علشان لسه متجوزين دول مكملوش شهرين امل: برضه ده مش مبرر المهم غيروا بقي السيرة اللي تحرق الدم دي جميلة: حاضر هنغيرها بس انتي حاولي تعذري مامتك وتتقبلي اللي حواليكي وتفرحيلها امل بابتسامه مصطنعة: ان شاء الله اصلا انا لولا تيتة نبيلة قاعدة معايا كان زماني فعلا اتجننت رسمي من تصرفات ماما جميلة: صح فكرتيني اخبارها إيه وصحتها عاملة ايه ؟
أمل: كويسة الحمد لله اصلا هيا اللي مصبراني على عمايل ماما ... المهم ان شاء الله الحاجة اللي جبناها تعجب عمتو واونكل جميلة: أكيد طبعا هتعجبهم قضوا وقت كبير مع بعض وبعدها كل واحدة روحت بيتها ...
(( عند عماد )) عماد راجع شقته اخر النهار تعبان ومخنوق من بيته الفاضي وفكر يعدي علي حد من عياله بس اتراجع كل واحد فيهم له حياته الخاصة وفي أشغالهم .. دخل بيته ورمي مفاتيحه علي التربيزة الصغيرة قدامه ورمي جسمه علي الكنبة وحس ان البيت فاضي جدا والدنيا فاضية عليه وفجأه تليفونه رن قطع الصمت اللي هو فيه مسكه وابتسم لما شاف الاسم المكتوب.
عماد: الو ازيك والله بنت حلال لسه داخل البيت وحاسس بكآبة فظيعة مبقتش طايقه بعد جواز العيال ابتسام: هو ده حال الدنيا المهم أنا عايزة استغلك مش معقولة من ساعة ما عرفتك ما استفادش منك خالص كده عماد ابتسم: استغلي يا ستي هو حد منعك ! خير ابتسام: أنا في الطريق لمحل النظارات بتاعك نظارتي اتكسرت بس انت اهو بتقول روحت نخليها لبكرة ؟
عماد وقف وشد مفاتيحه وخارج لبره البيت: لا طبعا انتي فين بالظبط ؟ ابتسام: ف الباس بتاع الشغل وكنت هنزل في الطريق عماد: خلاص تمام هقابلك علي المحل يالا سلام نزل عماد وخلال ربع ساعة كان قدام المحل وتوافق وصوله مع نزول ابتسام من الباص فاتقابلوا بابتسامة عريضة ابتسام: لحقت ترجع !
عماد: وانا عندي كام ابتسام ارجع علشانها يعني ابتسام اتحرجت وبصت للمحل وغيرت الموضوع: نظارتي يا سيدي وانت عارف اني من غيرها شيش بيش عماد ابتسم: هاتيها ولا مش معاكي ابتسام بتقلب في شنطتها وطلعت نصها وبتقلب علي النص التاني: هو ينفع تتصلح ! عماد: لا طبعا بس هاخد المقاس من العدسات وبعدين اتكسرت ازاي ؟
ابتسام هزرت: فيل بعيد عنك داس عليها عماد داخل المحل وهيا وراه وطلب منها تنقي اطار جديد للنظارة وهو بيفرجها سرحت هيا وافتكرت وهيا مروحة اول ما ركبت الباص وفجأه ضربت في دماغها الفكرة اللي تشوفه بيها فكسرت النظارة عمدا وكلمته وابتسمت وفاقت علي عماد مركز معاها قوي فاتحرجت اكتر عماد: اقطع دراعي وأعرف بتفكري في ايه !
ابتسام بتريقة: علي فكرة دي حرية شخصية وما ينفعش تتطفل علي حد كده عماد: حاضر يا ستي مش هتطفل قوليلي انتي ! ابتسام بتدور علي حجة جديدة وفجأة قالت اول حاجه خطرت علي بالها: جعانة وبفكر يا تري ماما عاملة غدا ايه النهاردة عماد اقترح: طيب ايه رأيك تسمحيلي اعزمك انا علي الغدا ابتسام بصتله ومش عارفة تقول ايه !
عماد: عقبال ما العيال يجهزوا النظارة نكون اتغدينا .. هاه ايه رأيك ؟ ابتسام: خايفة اتأخر عماد: لا مش هنتأخر هنتغدي في الكافية اللي علي الناصية ده بس اختاري frame بقي اختارلها برواز شيك وبلغ الفني اللي معاه يعمله بسرعة واخد ابتسام وطلعوا يتغدوا مع بعض.
طلبوا الأكل وأكلوا واتكلموا كتير والوقت بيعدي بسرعة لحد ما موبيل ابتسام رن ولقت مامتها واتفاجئت ان الدنيا بقت ليل فقامت وقفت وردت ومش عارفة تقول ايه لمامتها وكل شوية تبص لعماد وتعمل حركة بوشها ان هو السبب وهو بيبتسم .. حاسب وقاموا يمشوا ابتسام: اطلبلي بقي تاكسي خليني اروح وبكرة ابقي اخد النظارة عماد: أكيد النظارة جهزت ابتسام: لا معلش بقى خليها لبكرة اصلا اتأخر الوقت كتير .. شاورت لتاكسي ووقف وعماد بلغه عنوانها وطلب منها تطمنه أول ما توصل ...
(( عند جميلة )) جميلة اخيرا فهد روح واول ما دخل باسها في خدها وحدف نفسه على السرير بتعب جميلة: ايه ده ان شاء الله ؟ فهد: تعبان جدا وعايز اناااااام جميلة: نعم ! تنام ! انت بتهرج صح !
فهد بصلها: لا طبعا امبارح سهران معاكي لحد الفجر وصاحي بدري وهلكان طول النهار فأيوة عايز انام ساعتين على الأقل جميلة: طيب وانا !بلاش انا اسأل عملت ايه النهاردة ولا اشتريت ايه لابنك ! فهد: انام شوية واصحى اشوف كل اللي اشترتيه جميلة بضيق: تنام ! برضه تنام ! فهد مش ذنبي انك بتخلي باباك يروح بدري وتفضل انت تخلص الشغل فهد اتعدل: على فكرة بابايا اللي بتتكلمي عنه ده يبقي جوز عمتك وبيروح معاها علشان هيا ما تتعبش..
جميلة: اه يعني هو يخاف على مراته ويهتم بيها وبراحتها لكن انت لأ ! صح كده وأرجوك ما تدخلش عمتو في الموضوع وبلاش تلعب على النقطة دي فهد: جميلة أنا ما بلعبش على نقط اوكي بس ده ابويا وبغض النظر عن عمتك اللي هيا أمي هاه كنت برضه هخليه يروح هو بدري وأشيل أنا الشغل كله ولو هو يرضى انا اخليه يرتاح خالص وانا امسك المجموعة لوحدي جميلة: وانا اشرب من البحر صح !
فهد: انتي عايزه ايه دلوقتي ! علشان انا بس فعلا مش قادر ودماغي هتتفرتك من الصداع جميلة: وطبعا انا اللي عملالك الصداع صح ! فهد بنرفزة: حاليا ايوه انتي مزودة الصداع اللي عندي .. هاتي يا ستي اللي اشترتيه اتفرج عليه خليني أقدر أنام شوية وإقفلي القصة دي جميلة بغضب: لا يا سيدي متشكرة لتنازلك اللي مش عارفة من غيره كنت عملت ايه .. اتفضل نام انا سيبالك الأوضه كلها ( وضافت بتريقة ) خلي الصداع يهدى ... بعد اذنك..
سابت الأوضه ورزعت الباب وراها بعنف وراحت لأوضة عمتها خبطت والباب اتفتح بسرعة وعمتها بتقفل في الروب وخرجت بره الباب وقفلته وراها وبتتكلم بصوت هادي: خير يا حبيبتي في حاجة ! جميلة باستغراب: انتي بتهمسي ليه وقفلتي الباب ليه كده !
عمتها: أبدا يا حبيبتي عادي بس عمك وليد مريح شوية ومحبتش انه يصحى او يقلق من نومه فهد كان يدوب فتح الباب وسمع جملة مامته: اهو دي الستات اللي بتفهم وبتهتم بأجوازها جميلة بصتله: ده علشان جوزها يبقي وليد لما تبقى انت ربع باباك هبقى انا زي عمتو عمتها: استهدوا بالله انتو الاتنين في ايه مالكم فهد: سيادتها قالبة الدنيا علشان قولتلها عايز انام ساعتين جميلة: علشان هبلة انا صح !
فهد: أمال إنتي قالبة بوزك ليه على المسا جميلة بنرفزة وبصوت عالي: علشان سيادتك ديما تعبان ومش قادر وفي الشغل ويا اسكت يا انت تسوق فيها فهد زعق: انا ما بسوقش فيها انا يا اما معاكي فعلا يا في الشغل يا بنام واعتقد النوم ده من حقي ولا ايه سيادتك وبعدين ما انا سهران معاكي لحد الفجر امبارح ولا دي نسيتيها !
جميلة: لا يا سيدي ما نسيتش بس سيادتك كنت سهران علشان مزاجك غير كده بتنام وما بتسألش فيا فهد اتصدم للحظة وبعدها بص لأمه: شايفة كلامها وعمايلها امه: اللي بتعملوه ده ما ينفعش وما يصحش .. جميلة حبيبتي عيب كده جميلة بنرفزة: طبعا لازم تيجي في صفه ده مهما كان ابنك عمتها: جميلة..
بس جميلة سابتهم ورجعت أوضتها ورزعت الباب تاني وراها فهد بغضب: طيب أدخل أنا وراها أعرفها قلة الذوق بجد ! ويدوب هيدخل بس أمه مسكته من دراعه: إهدى إنت التاني وسيبها شوية تهدى هيا كمان هنا وليد فتح الباب وبصلهم جميلة: أسفة إنك صحيت حاولت أمنعهم بس...
وليد قاطعها: بس ايه يا جميلة ... حبيبتي انا مرضتش اطلع علشان جميلة والكلام اللي كانت بتقوله .. فهد تعال عندي جوة وانتي يا جميلة عقلي بنت اخوكي ادخليلها وليد شد ابنه وجميلة دخلت لبنت اخوها وكل واحد بيكلم التاني وليد: مش واخد بالك من مراتك ليه يا فهد ؟ فهد بنرفزة: انا برضه ؟ انت هتعوم على عومها ولا ايه ؟
وليد بهدوء: لا طبعا بس الست وهيا حامل بتكون محتاجة لمعاملة خاصة .. وكل حاجة بتتضاعف عندها وكل مشاعرها بتتضاعف فالمفروض انت كمان تضاعف كل حاجة بتعملها وده علشان يدوب تواكب تغيراتها فهد: يعني سيادتك بتبررلها قلة ذوقها دي وليد: طبعا .. واحدة محتاجة لحبيبها جنبها ايه الغلط في كده ؟
فهد وقف: بابا انا بشتغل اكتر من عشر ساعات وبرجع أفضل معاها وبنام ممكن أربع ساعات ده لو وصلوا لاربعة وتقولي أضاعف ! أموّت نفسي يعني ! وليد: لا يا سيدي بعد الشر عليك بس اوعى تتخيل للحظة إن الشغل أهم من بيتك ومراتك فهد بتريقة: يعني أسيب الشغل وأفضل جنبها صح كده ؟
وليد بهزار: هتتريق هلهفك قلم أعدلك بيه فهد بنرفزة: ماهو صراحة كلامك ينرفز أعمل ايه أنا المفروض، وسيادتك بتسيب الشغل وتيجي بدري علشان ماما المفروض أنا كمان أعمل زيك ؟ وليد: وليه لأ ؟ ده الوقت اللي تحت إيديك يشتغلوا فيه فهد بص لأبوه بعدم فهم: يعني إيه ؟ وليد: يعني كل اللي ينفع غيرك يقوم بيه انت ما تعملوش وفضي وقت أكتر لمراتك..
فهد: وليه يعني كل ده ! ما تعمل زي عمتها اللي خايفة عليك صوتنا يصحيك مش واقفة تتخانق معاك علشان قولتلها مصدع وعايز انام ساعتين وليد: ماهيا ردت عليك وقالتلك لما تبقى زيي تبقى هيا زيها وبعدين قولتلك الصبح ما تحاولش تغيرها اقبل مراتك زي ما هيا يا فهد وبطل تقارنها بغيرها .. أمك غير جميلة وتربيتها غير تربية جميلة وكل حاجه بينهم مختلفة فهد:جميلة تربية أمي ما تنساش وليد: ومين قالك ان أمك ما ريبتهاش على عدم الخضوع ! وانها تقدر تقف وتقول لأ ! مين قالك ان أمك ما عوضتش كل النقص اللي عندها في بنت أخوها وربتها ما تتنازلش أبدا هاه ! ساكت ليه !
وجهة نظر جديدة لفهد اول مره يفكر فيها وبالتالي سكت فهد: عايزني أقول ايه ! وليد حط ايده على كتف ابنه: ما تقولش بس قدر حمل مراتك وتعبها واهتم بيها أكتر من كده وتعال على نفسك اكتر من كده طبعا ده لو بتحبها ! فهد رد بسرعة: طبعا بحبها..
وليد ابتسم: يبقي محلولة .. حسسها بحبك ده وحسسها انها ما اتركنتش على الرف .. خليها تشارك في شغلك حتى لو عن طريقك انت .. احكيلها كل تفاصيل يومك وخد رأيها في كل حاجه وكلمها كل شوية خليها محور يومك حتى لو انت بعيد فهد باستسلام: هحاول حاضر
(( جوه عند جميلة )) عمتها دخلت عندها وقعدت جنبها على السرير جميلة: عمتو أنا أسفة مش قصدي أضايقك او أقول اللي قلته ده ما تزعليش مني عمتها ابتسمت بحب: أزعل منك إيه إنتي عبيطة ولا ايه ! أنا لو هزعل فهزعل علشان خناقكم ده .. انا مش هاجي في صف إبني بس اللي انتي عملتيه ده كان غلط وكل الكلام اللي قلتيه غلط .. إنتي عارفة كويس هو بيتعب قد إيه في شغله وعارفة إنه بيحاول يثبت قدام أبوه إنه زيه وإنه إبنه فعلا فإزاي انتي مش جنبه ! جميلة: طيب ماشي وأنا ؟ أنا فين من شغله يا عمتو ! فين حبه واهتمامه !
عمتها: إنتي عارفة كويس إنك روحه وقلبه جميلة: بس محتاجاله يا عمتو ... محتاجة جوزي جنبي .. محتاجة حبه وحنانه .. محتاجة لما ارجع مهدودة من بره هو يضمني وياخدني في حضنه ويسألني عملتي ايه ويسمعني ! انا منتظراه من ساعة ما رجعت عايزة افرجه على كل حاجة اشتريتها لإبننا .. وهو بكل برود مصدع وعايز ينام عمتها: هو كمان راجع تعبان محتاج حضن مراته ويرمي كل حموله عليها ويرتاح جميلة: ماهو كل يوم بيرجع من الشغل لكن أنا هيا مرة واحدة خرجت وراجعة عايزة احكيله عمتها: على أساس إنكم مش كل يومين بتعملوا الخناقة دي !
جميلة: أولا مش كل يوم وبعدين قولي لابنك يفضيلي أنا شوية من وقته عمتها: حبيبتي فهد بيرجع البيت وبيفضل معاكي طول الوقت ولا بيخرج ولا بيروح مكان بيفضل ليكي انتي وبس جميلة وقفت: أنا أسفة يا عمتو بس ده مش كفاية وبعدين هو ولا فقير ولا محتاج علشان يطحن نفسه كده في الشغل والأهم من كل ده إن أنا مش زيك يا عمتو ( رفعت راسها لفوق بكبرياء ) انا ما بقبلش بالقليل ابدا ... وما أقبلش أبدا حاجة تشاركني في جوزي حتى لو كان شغله...
عمتها وقفت بزعل: براحتك يا بنت أخويا كانت خارجة بس جميلة وقفتها وباستها في كتفها: عمتو أنا مش قصدي ابدا ازعلك والله بس أنا فعلا مش قادرة اتحمل غياب فهد عني .. غير كده إنتي أونكل وليد معندوش أهم منك في الكون كله وانتي رقم واحد قبل أي حاجة غير فهد تماما عمتها: أنا مش زعلانة يا حبيبتي منك بس خلي بالك فهد فعلا غير وليد وإنتي غيري فخلي بالك وحطي عقلك في راسك أنا نصحتك وإنتي حرة طبعا تقبلي بنصيحتي أو ترفضيها ده شيء يرجعلك...
جميلة باستها مرة تانية: اكيد هقبلها يا حبي انا عندي كام جوجو هاه خرجت وراحت أوضتها: فهد روح لمراتك وحاول يا إبني تخلي بالك منها أكتر من كده فهد باس إيدها: حاضر يا ست الكل .. ليه يا رب مخلقتش كل الستات زي أمي الجميلة دي جميلة ضحكت وخرجت ابنها وقعدت جنب جوزها سرحانة وليد: مالك يا حبي ؟ بتفكري في إيه كده جميلة: جميلة اتغيرت قوي بقت متطلبة جامد...
وليد: حبيبتي ولا اتغيرت ولا حاجة دي هرمونات حمل مش أكتر جميلة: يا ريت يا وليد يا ريت ... لأني خايفة أكون أنا ربيتها غلط .. أكون ربتها تكون أنانية واللي عايزاه تاخده مهما كان الثمن وليد: لا طبعا انتي بتقولي إيه ؟
جميلة: كانت ديما شايفة إن حبي ليك ضعف واستسلامي قدام ميس غباء وكانت ديما توعدني إنها عمرها ما هتكون زيي أو تسمح لراجل يسيطر عليها أو يخليها تضعف حتى لو بتعشقه او تتنازل أو تقدم تضحيات بمسمى الحب وأهي بتطبق كلامها مع فهد .. وليد: حبيبتي ... دي هرمونات حمل ... جميلة بتعشق فهد وهو بيعشقها ونقطة وخلص الكلام بكرة تولد وتتشغل بإبنها وهتشوفي بنفسك .. استحمليها بس انتي الكام شهر دول جميلة: انا استحملها ! وليد جميلة وأخوها عيالي وغلاوتهم من غلاوة فهد إبني وليد ابتسم: عارف يا حبي عارف ...
(( جوه عند فهد )) دخل متردد عندها وكلام أبوه كله بيدور في دماغه وجميلة كلام عمتها بتفكر فيه قرب منها ووقف وراها وحرك شعرها وباس رقبتها بحب: إنتي عارفة إني بحبك وعارفة اني غصب عني بتأخر .. اعذريني جميلة بصتله بزعل: فهد انا محتاجاك جنبي .. علشان خاطري في حملي خليك جنبي ما تتحسسنيش إن المجموعة والشغل أهم مني ومن إبننا فهد ضمها بحب: حبيبتي إنتي في كفة والكون كله في كفة تانية فاهمة ؟
جميلة: طيب حاول علشان خاطري تفضل معايا أكتر .. حاول تسمعني لما أحتاج أتكلم .. أنا غير عمتو ومعنديش كمية الطيبة والتسامح بتوعها دول اعذرني فهد: أنا مش عايزك زيها أنا حبيتك زي ما إنتي كده .. شعنونة ومجنناني ضحكوا الاتنين وفهد باسها في راسها: اعذريني وما تزعليش مني !
جميلة ابتسمت: ما أقدرش أزعل منك أبدا فهد بحب: فرجيني بقي جيبتي إيه لعم مصلحي ده جميلة شهقت: أنا إبني يبقي مصلحي ! اخرس فهد ضحك: خلاص ما تزعليش عمي بندق جميلة ضربته في كتفه: ولا بندق .. قرد هو ولا إيه ! فهد: طيب إيه ! عايزة تسميه إيه !
جميلة: اممممممم مش عارفة .. تعال نسميه زياد فهد كشر: لأ غيره جميلة: سيف ... سيف فهد فهد: غيره جميلة: طيب قول إنت فهد: حازم مثلا أو آدم جميلة رفضت وقالت بحماسة: أدهم إه رأيك فهد بغيرة: طيب براحة شوية على نفسك .. مش هسمي أنا أدهم ولمي نفسك بدال ما ألمك هاه جميلة ضحكت: ماله بس أدهم !
فهد: يا ستي مالوش سيبي أدهم في لوليته وخلينا هنا في إبننا جميلة: طيب ايه رأيك في ... اممممم .. مالك مثلا أو حمزة .. فهد: مش عارف مش حاسسهم جميلة: عايزين حاجه لها علاقه بالفهد فهد ضحك: تعالي نسمي ضرغام جميلة: يطلع إيه ضرغام ده كمان ؟
فهد: ده اسم من أسماء الأسد جميلة: لا طبعا يا أبو ضرغام إنت .. قال ضرغام قال فهد ضحك: قومي بس هاتي الحاجة وخلينا نفكر على مهلنا لسه قدامنا أربع شهور نختار فيهم الإسم قومي اتصالحوا وقضوا ليلتهم يختاروا في أسماء لإبنهم المنتظر ...
((( عند عماد))) عماد الصبح بدري كلم ابتسام وقالها ان نظارتها جاهزة واتفق هيعدي عليها يديهالها قبل ما تدخل الشغل كانت الساعه ٨ الصبح عماد: صباح الخير يا احلي بسمة في الدنيا ابتسام اتحرجت: صباح النور .. بس نازل بدري قوي عماد: علي رأي المثل لأجل الورد ابتسام محروجة منه ومش عارفة ترد عليه..
عماد طلع الجراب من جيبه: نظارتك يا ستي يارب تعجبك ابتسام اخدت الجراب وفتحته وتخيلت للحظة انها بتفتح علبة تانية خالص بس ابتسمت لأن النظارة عجبتها ابتسام: تصدق أول مرة أعمل نظارة وتعجبني عماد: طيب الحمد لله احنا أهم حاجة ننول الرضا يا باشا الاتنين ضحكوا من اللهجة اللي اتكلم بيها عماد: شايفه العربية دي ابتسام بصت وما فهمتش: انهي عربية ؟ عربية ايه تقصد ؟
عماد: عربية الفول والطعمية دي .. ابتسام ابتسمت: مالها بقي ؟ عماد: سمعت انها بتبيع فول بس انما ايه تحفة ابتسام ضحكت: سمعت هاه ؟ عماد بحرج: مشيها سمعت ابتسام: ماشي بس بشرط انا هعزمك عماد: مش هعارضك المهم النتيجة..
طلبوا ساندوتشات الفول والطعمية والباذنجان المخلل وقعدوا فطروا وسط جو هادي جدا وعماد مركز مع كل همساتها وحركاتها ابتسام: علي فكرة المفروض اقوم واروح شغلي بقى علشان ما اتأخرش عماد بتلقائية: علي فكرة انا بحبك يا ابتسام ابتسام عنيها الاتنين وسعوا جدا وفتحت بوقها ومش مستوعبة هو قال ايه اصلا عماد: ابتسام ؟
ابتسام وقفت: انا لازم امشي عماد وقف يحاسب وهيا سبقته وتقريبا جري وراها وقفها بالعافية عماد: في ايه ؟ انا قولت حاجة غلط ؟ ابتسام: انا اتأخرت ممكن امشي ؟ عماد: ماشي إمشي بس الأول فهميني مالك ؟ ابتسام: ماليش بس اتأخرت عماد علي صوته: الله ما تفهميني في ايه ؟
ابتسام: في اني وثقت فيك واعتبرتك صديق بس الظاهر ان مفيش راجل بيقدر الصداقة وكلكم تفكيركم واحد عماد مش مستوعب هيا مالها: انا برضه مش فاهم انتي زعلانة ليه ؟ ابتسام شاورت لتاكسي قرب منهم ووقف وبصت لعماد قبل ما تركب: عمري ما تخيلتك أبدا من النوعية دي .. حسيتك حد محترم وكويس مش مجرد راجل للأسف عايز علاقة عابرة .. بس انا اسفة انا مش من النوعية دي مش علشان مطلقة هقبل بعلاقة بالشكل ده بعد اذنك...
وقبل ما عماد يرد كانت ركبت ومشيت وهو استغباها جدا لأنها معطتوش فرصة يةمل كلامه او تسمعه للآخر حاول يكلمها بس قفلت تليفونها .. عماد اخد كام يوم مش عارف يكلمها خالص لان يا ام تليفونها مقفول او مش بترد عليه ...
(( عند جميلة )) عدى كام يوم بهدوء نوعا ما وفي يوم صحيت جميلة من نومها متأخر كان فهد لسه جنبها نايم ونزلوا يفطروا في الجنينة جميلة: ما تاخد إجازة النهاردة وخليك معايا فهد: عندنا اجتماع مع الشركة اللي قولتلك عليها جميلة: اممممم فهد: ايه امممم دي !
جميلة ضحكت: لا عادي ما تقلقش ... اعملك قهوتك ! فهد باستغراب: معقولة هتتنازلي وتعمليلي قهوة بنفسك ! جميلة: يا سلام ! ايه أتنازل دي ! انت عارف إن الحمل مانعني ولولا إني تعبانة كنت حتى أكلك عملته بإيدي فهد هزر: يا ستي بهزر ... بهزززززر إيه ما تعرفيش الهزار جميلة: اه بحسب فهد: لا ما تحسبيش جميلة: هعملك القهوة وجاية...
عملت القهوة وخرجت قعدت جنبه بهدوء وشويه وقام راح على شغله وهيا فضلت في الجنينة سقت حوض الورد وفضلت ترغي مع الورد وتوشوشه ... جاتلها علية ووقفت جنبها: خير يا علية في حاجة ! علية: لا ابدا بس في ناس من البلد عايزين عمتك جميلة باستغراب: بلد ايه ؟ وناس مين ؟
علية: اتنين ستات لابسين عبايات سودا وشكلهم فعلا فلاحين .. واحدة منهم بتقول انها بنت عم جميلة .. واسمها نادية ومعاها واحدة صغيرة بتقول إنها بنتها وعايزين عمتك ! جميلة استغربت: طيب هكلم عمتو تيجي وانتي ادخليلهم لحد ما أكلمها وأحصلك جميلة كلمت عمتها وحكتلها الموضوع وعمتها قالتلها هتيجي على البيت بسرعة ودخلت جميلة تستقبل أهل عمتها وترحب بيهم
نادية: ازيك يا بتي كيفك وكيف احوالك وكيف أبوكي وأخوكي جميلة: الحمد لله كلنا بخير نادية بصت لبطنها: ربنا ينتعك بالسلامة جميلة بنص ابتسامة: مرسي لحضرتك يا طنط نادية بتريقة: اسمي عمتي مش طنط ده انا وابوكي أولاد عم و عمتك برضك جميلة: حاضر يا عمتي نادية: معرفتكيش دي بتي هيام جميلة بصت للبنت وتأملت جمالها الهادي وكسوفها ونظرتها للارض: يا أهلا يا هيام هيام بحرج: أهلا بحضرتك جميلة: لا حضرتي إيه بقى إحنا كده نعتبر برضه أولاد عم صح ولا إيه !
نادية: طبعا أولاد عم ... أصيلة يا بتي .. إلا عمتك فين يا نضري ؟ جميلة: عمتو في الشغل نادية باستغراب: جميلة بتشتغل ؟ جميلة: ايوه بتشتغل مع أونكل وليد .. دي مديرة الشركة ابتسمت نادية: والله يا زمن ... طيب هتيجي امتى ؟ جميلة: كلمتها وهتيجي حالا نشرب الشاي تكون وصلت ونتغدي مع بعض كلنا نادية: بإذن الله تيجي بالسلامة وعلى مهلها جميلة نادت: علية ! علية..
خرجت علية: أوامرك يا هانم جميلة بابتسامة: الأمر لله وحده .. بلغي نعمة تجيب الشاي بسرعة وارتاحي انتي علية: حاضر يا بنتي لحظة وهتطلع بيه جميلة موبيلها رن وردت كان فهد جميلة: ايوه يا حبيبي ... اه ... عمتو جاية على البيت ... لا خير ما تقلقش عندها ضيوف من البلد ... بنت عمها ... خلاص حبيبي ما تتأخرش قفلت و نادية سألتها بفضول: هو جوزك فهد ابن جميلة صح ؟
جميلة ابتسمت: أيوه صح ! نادية بفضول أكتر: أمال أخوكي الدكتور متجوز مين ؟ جميلة: متجوز من أمل بنت ندى أخت أونكل وليد نادية: يعني جميلة جوزت عيال أخوها الإتنين جوازات مرتاحة والله برافو عليكي يا جميلة جميلة كشرت وإعترضت: ده نصيب يا عمتي مش جميلة اللي جوزت نادية تراجعت بسرعة: طبعا كله نصيب ومكتوب يا بتي...
شربوا الشاي ودخلت جميلة ترحب بضيوفها و نادية بصتلها من فوق لتحت كتير واستغربت شكلها لأنها لما بتروح البلد وده بيحصل على فترات متباعدة جدا بتكون لابسة عباية سودا مش لبس كده زي الهوانم نادية: يا أهلا ببنت عمي ... حبيبة قلبي جميلة: ازيك يا نادية وحشتيني يا حبيبتي كتير .. بنتك دي ؟
نادية شدت بنتها: ايوه .. قربي يا هيام سلمي على عمتك وبوسي ايدها جميلة حضنتها وجت البنت توطي على إيدها تبوسها بس منعتها وقعدوا كلهم مع بعض يتكلموا ويرحبوا ببعض جميلة الصغيرة: هو أونكل وليد مجاش معاكي ! عمتها: لا يا قلبي عنده اجتماع مهم جميلة الصغيرة: اه صح فهد كان قالي على الإجتماع ده .. هيتأخروا بقى ؟
عمتها: بإذن الله لأ هيخلصوا الإجتماع ويجوا على طول .. ( بصت لبنت عمها ) احكيلي يا نادية أخبارك إيه وليه جوزك مجاش معاكي ولا أبنك الكبير اسمه ايه ! هاشم صح ! نادية: ايوه هاشم اتعين استاذ قد الدنيا جميلة ابتسمتلها بحب: ربنا يحفظهولك .. جوزتيه ولا لسه ؟ نادية: بندور على بت الحلال فضلوا الاتنين يرغوا وجميلة الصغيرة انسحبت بحجة انها تعبانة ومحتاجة تريح شوية عقبال ما الرجالة تيجي ..
جميلة اتغدت بدري مع قرايبها علشان ما يتحرجوش من الرجالة وهما قاعدين اخيرا وليد وفهد وصلوا ونادية بصتلهم كتير وبصت للشبه ما بينهم نادية: سبحان الله ولدك شبهك اوي ياأستاذ وليد وليد ابتسم وهزر: اللي يشوف كده يقول ابني ولا حاجه كلهم ضحكوا وليد رحب بيهم وقعد جنب مراته يطمن عليها بهمس وهيا ابتسمتله وفهد قبل ما يسأل كانت مراته نازلة من على السلم فراح ناحيتها وباسها كعادته دون أي اعتبار للضيوف اللي اتحرجوا...
نادية: ابنك متأمرك يا جميلة جميلة: ده جيل اليومين دول .. خليهم يعيشوا أيامهم يا نادية وليد اتدخل: يعني ايه متأمرك دي ؟ جميلة ضحكت: نسبة يا حبيبي لأمريكا .. متأمرك وليد ضحك جامد لدرجة خلت جميلة تستغرب وتبصله: بتضحك كده ليه ؟ وليد سكت وابتسم: لا ابدا بس افتكرت الشاكوسي فهد هنا اللي سأل: ايه الشاكوسي ده كمان وليد: لا ده موضوع مالكش فيه انت .. خليك في حالك .. إيه يا ام فهد مش هتغدينا ولا ايه ؟
جميلة: طبعا هغديكم .. لحظه قامت وجهزت السفرة ومعاها نعمة بتساعدها وليد قعد واتفاجيء بجميلة بتبعد: انتي رايحة فين ؟ هاتي بنت عمك ويالا جميلة: سبقناكم حبيبي وبعدين دول جايين من سفر .. وليد: اكلتي من غيري ماشي بس هعديهالك المرة دي علشان بنت عمك بس جميلة: ماشي حبيبي .. انا هطلعهم يرتاحوا شوية ماشي اخدت بنت عمها وبنتها وطلعتهم أوضة الضيوف ودخلتهم وقبل ما تخرج نادية شدتها وقعدتها جميلة: ارتاحي يا نادية ونتكلم بعد ما ترتاحي نادية: لا معلش يا بت عمي اسمعيني الأول ..
جميلة: اتكلمي براحتك طيب انا بس كنت عايزاكي ترتاحي شوية نادية: معلش ... شوفي انا محلتيش من الدنيا غير ابني هاشم وبتي هيام جميلة: ربنا يخليهملك حبيبتي نادية: تسلمي حبيبتي ويخليلك .. المهم جوزي الافندي عايز يجوز البت ومش عايزها تدخل الجامعة .. هيا قبلت في كلية اداب قسم انچليزي بس هو راكب دماغه ورافض وعايز يجوزها ويقول كفاية كده وخصوصا ان العريس اللي جايلها مرتاح حبتين ...
جميلة: طيب تخلص جامعتها الاول والجواز ملحوق عليه نادية: وتقولي ايه لقلة العقل .. غبي بعيد عنك راجل يا باي عليه ما بيفهمش جميلة: معلش .. طيب انا أقدر أساعدك بإيه نادية باحراج: شوفي ... يعني أنا طمعانة ... أقصد جميلة: نادية اتكلمي على طول حبيبتي نادية: طمعانة فيكي يا جميلة .. تعتبري هيام بتك وتخليها عندك تاخد شهادتها ..
جميلة اتصدمت وسكتت شوية: اخدها عندي ازاي ؟ وغصب عن أبوها يعني ولا إيه مش فاهمة نادية: لا مش غصب طبعا .. جوزك هيكلمه ويطلب منه يسيبها ويقول انه متكفل بيها وساعتها هو هيوافق طالما ما مش هيدفع هيوافق واني بعون الله هبعتلها مصاريفها وكل اللي تحتاجه..
جميلة: يا حبيبتي الحكاية مش في احتياجتها او مصاريفها دي حاجة بسيطة بس انتي متخيلة انه يوافق يسيب بنته عندي ! وبعدين انا لازم قبل ما أوافق أخد رأي وليد وأستأذنه الأول نادية: طبعا حقك .. لازم استاذ وليد يعرف الأول جميلة وقفت: ارتاحي انتي وانا هكلم وليد وأرد عليكي فضلت نادية تدعيلها كتير وهيا خارجة...
جميلة نزلت لعيلتها اللي خلصوا غداهم وبيشربوا قهوتهم وقعدت وسطهم ساكتة ووليد بيحاول يقررها مالها لحد ما اتكلمت جميلة الصغيره: بنت عمك عايزة حاجة يا عمتو ولا زيارة عادية ؟ عمتها بصت لوليد جوزها ولابنها ولجميلة وبعدها رجعت لوليد تاني: هيا عايزانا ناخد بنتها هيام عندنا وتفضل معانا هنا تدرس وتدخل جامعتها ...
قصة جميلة بنت بسيطه فلاحه
