دخل ماجد كعد يمنه اني رحت للمطبخ ساعدت البنات بالغدا وبعدين اخذت تليفوني كعدت اكلب بي وغيرت خلفية الواتساب حتى يشوفها خليت: (انهم يؤذونك اولئك الذين تخشى عليهم من الوجع).. خلصت رحت يم فضولي خاف يكعد اتمددت ونمت دك تليفوني وسكت هو يرمش اكيد علمود الغدا. حاول يبرر ويحجي وياي بس اني ملكيته وجه يحجي ويبرر. مرت هالايام بسكته لا اني احجي وياه ولاهو وعمه حميده ساكته مطيتنه مجال على كولتها.
اليوم اروح لاهلي محتاجه اطلع واغير جو واصلا هو مهر بنت خالتي ولازم اكون موجوده بس المشكله بالاولاد مااكدر اخذهم ولااكدر ابقيهم. بابا اتصل بماجد وصاه يجيبني العصر حتى بس العصر وارجع علمود الاولاد.
ماجد: يعني ركصتي؟ ذهب: اي ركصت. حصرتني الضحكه بس خفت. ماجد: فستان مصلخ وقصير رجليج كلها طالعه وكعب طوله شبر والصدر كله شفاف مبين من هيج كل شويه وحده تروح تسأل عليج متزوجه لو لا. بقيت ساكته وواكفه ولازمه فستاني من الظهر بيدي منتظرته يطلع وخايفه احصلي ضربه لو حجايه تسم بدني بهالليل. ماجد: مو احاجيج؟
ذهب: اي شتريد؟ يعني شنو تريد اجاوبك؟ ماعندي جواب تريد تسوي مشكله يعني؟ سوي تريد تضربني يالله اضربني خل نخلص اعرفها اني تطلع من خشمي الطلعه. ماحجه شي اتنهد و راح للغرفه يبدل واني هم بدلت ونزلت عالسريع يم عمه حميده. بعد العشا صعدت نمت بغرفة الجهال واتغطيت اليوم بارده.
سمعت صوته بغرفتنه تليفونه كل دقيقه مسج انعصر كلبي كلت اكيد شيماء الله اليعلم هسه شنو دازتله هسه من صور بجيت اختنكت شنو اسوي ياربي معقوله اني ماعندي كرامه وابقى ساكته لو هذا يسموه عقل لو شنو معقوله كل إلى يسويه واحبه. حسيت البطانيه انرفعت كمزت طلع هو كعدت ومسحت عيوني كعد هو يمي ماحجيت شي مااريده يحس من صوتي جنت ابجي مادام الغرفه ظلمه شويه. ماجد: كمزتج؟
بقيت ساكتة بس دموعي تصب ليش هيج يعذبني ليش مينام هناك ويخليني بلكي الله يهديني وانام لو الا ينكد علي. ماجد: اكول الفستان اللي لابسته مساع منو جابلجياه؟. صفنت هذا شبي. يعني البنيه راح تتزوج وهو بعده يفكر بالفستان الظاهر مشكلة اليوم عالفستان الله يستر. ذهب: ماما. ماجد: امم. مو حلو لو متلبسيه كدام احد بعد خصوصا هو قصير. ذهب: وبعد؟ ماجد: والصور هم متطلع لاحد خوما دزيتيها لاحد؟ ذهب: اي صور؟
ماجد: صورج الدزيتيهم لامي حميده. ذهب: شمدريك شنو بيهم حتى متريد ادزهم لاحد؟ ماجد: دزتلياهم وشفتهم. ذهب: ماعدها سالفه تدزهم الك كافي عليك صور شيماء احلى بهواي. ماجد: اي صحيح حبيبتي شيماء منو بجمالها جسم وطول وسمارها يخبل بعدين تفتهم تعرف المن تدز صورها. انغثيت منه حيل اتمددت واتغطيت قبل لا ابجي حيل اتمدد يمي واتغطى. غلست ومااتحركت حتى دموعي ماتجرأت امسحها..
هو اتحرك وبعدين هدأ جنه نام اني ارتاحيت مادام نام نمت شويه وكعد رائد يبجي كمت بسرعه اخذت رائد غسلتله وغيرتله ورضعته بس ميقبل ينام ظليت اغفي وهو كاعد يلعب خليته بفراشه بلكي ينام وحده ورجعت اتمددت واتغطيت هو حضني يعني منايم.. ماجد: احبج. وخرت ايده وابتعدت. ماجد: ذهب باوعيلي، ماكو نوم اليوم اذا مانحجي تره عيب احنه يوميه قصه كدام امي حميده. ظليت ساكته ومغمضه، وهو يحجي بهدوء..
ماجد: همم؟ احجي ليش ساكته هاذي ثاني مره تظلميني تره. كعد باوعلي كال: تبجين مو؟ زين عالاقل بالليل انام مثل الناس ماله داعي انت بغرفه واني بغرفه وبس اتدنه يمج تكشين عبالك رجال غريب. بجيت بصوت عالي حضني باسني كال: راح اسامحج هالمره على موضوع الفستان بشرط متلبسيه بعد بره هالغرفه. ذهب: تحبها؟
ماجد: منو؟ مخبله انت؟ والله. والله. والله. ماعندي شي وياها ولا حاجي وياها من اخر مره من حجينه اني وياج وانت ضجتي وكلتيلي خل ننسى انت شفتي موبايلي شفتيها هي اللي تدز مسجات ولامره رديت عليها ولامره اتصلت بيها حتى من جنت احجي وياها جانت هي اللي تتصل بس هي لزكه شسويلها متستحي هاي طريقه جديده على اساس تستدرجني ظلت تدز صورها. ذهب: احلف؟ ماجد: بداعة رائد وفضل ماعندي شي وياه. بعد؟
ذهب: كول والله متحبها ولا تعجبك ولا عندك شي وياها. ماجد: والله وعيونج وغلاة امي وغلاة رائد وفضل مااحبها ولامعجب بيها ولاعندي اي شي وياها، بعد؟ ضميت راسي بصدره باس راسي كلي: اللي عنده القمر ماله ومال النجوم ولو هي شجابها عالنجوم. ضحكت كتله: امنيتي اصدكك. ماجد: ليش تعذبيني هيج؟ هالمره مااكدر اسامحج ضوجتيني حيل..
حط راسه عالمخده وغمض عيونه انقهرت عليه ضوجته وصار كم يوم مااحجي وياه وخوفته من شربت الحبايه عباله انتحرت. وخرت ايده ونمت على صدره وحضنته. ماجد: يعني هيج راضيتيني يعني؟ هالمره مو مثل كل مره هالمره فعلا جرحتيني. ذهب: مو قصدي بس خلي نفسك بمكاني شتحس؟ ماجد: لا احط نفسي بمكانج ولاتحطين نفسج بمكاني ليش محطيتي نفسج بمكاني من لبستي اليوم هالفستان وكشختي واتمكيجتي ورحتي؟ اتعجبت شجاب الفستان بالوسطه..
ذهب: ماطلع فستان ادري غير حفله وبس بنات شنو البس يعني؟ بعدين منو شافني محد بس نسوان. ورحت بالعبايه ورجعت بالعبايه.. ماجد: بالضبط، شافوج النسوان وكل وحده تريد تخطبج لابنها وانت مكيفه كاعده حاطه رجل على رجل والرجلين طالعه والفستان اسود يعني فرجه لامة محمد ويمي بس العبايه.
ذهب: هسه ماافتهمت شي وشنو يعني اذا خطبوني شراح يصير مثلا؟ اذا اني متزوجه وعندي اطفال ( ٢ )؟ وشدخل العبايه متريد البس العبايه اروح هيج يعني؟ ماجد: الفستان هذا مينلبس بعد الا اذا تردين تراضيني يعني ميخالف قابل بي لبسي وتعاي. ذهب: مو صدك تحجي؟ ماجد: كيفج انت بعد مو تردين اسامج؟ ذهب: يعني هالهوسه والقصه الطويله العريضه والتمثيلية كلها علمود الفستان؟! كمت لبسته واتعطرت واتمكيجت ورجعتله.
ماجد: متلبسيه بعد كدام احد اليوم ماشفته من طلعتي نزلتي بالعبايه والله لو شايفج هيج جان مخليتج ترحين. ذهب: الحمدلله ماشفته. ماجد: زين كومي نروح بغرفتنه شنسوي هنا لايكعد رائد ويخرب الخطط بعدين هناك اشوفه احسن عالضوه. ذهب: لا ضوه ولا ظلمه اريد انام هسه يكعد ابنك يخبصني بالبجي اتفاقنه جان البس الفستان حتى اراضيك ولبسته هياتني.
ماجد: ايباااه. شلون لوتيه. حبيبي اني هالاتفاقات الناشفه مااعترف بيها تعرفين دائما اريد مقبلات وياها، شلون طاوعج كلبج تطلعين هيج بعد اي مناسبه لازم اشوف الفستان وتلبسي كدامي تسوين عرض وبعدين اقرر ينلبس لو لا. مفهوم؟. ذهب: تره فستان عادي مو مستاهل هالهوسه كولها. ماجد: عادي ها؟ شفاف كله من فوك وصدرج طالع وقصير ورجليج طالعات والكعب تمشين عبالك تدوسين على كلبي. ذهب: هههه حلوه هاي تدوسين على كلبي.
ذهب: اي شسوي، كلبي ظل يوجعني من القهر وعيوني حسيتها تطلع منها حراره ومااريد افكر بعد متت من التفكير شيحب بيها وشلون هيج يسوي وشلون اني غبيه لهدرجه واحبه. حضني حيل وكلي: لاتعيديها بعد لو شيصير افتهمتي؟ موتينه من الخوف؟ ذهب: انت الموتتني يومية سالفة جديدة. ماجد: زين يابه اثنينه ميتين ميخالف بس الميتين يعني هم عدهم مقبلات شي اكلات دسمه وراها لو بس يابسه وتمن؟ ذهب: هههههههههه لا ماعدهم بس الفاتحه.
ثاني يوم لبست فستان مال بيت رصاصي شتوي طويل وبي فتحات عالرجلين. رجع من الشغل وصعد فوك صعدت وراه لكيته واكف منتظرني كال: شنو اليوم هم عندج حفله؟ ذهب: لا. ماجد: لعد المن لابسه هالفستان. ذهب: فستان مال بيت هذا مو مال طلعه ولامناسبه. ماجد: اممم زين خوش فستان يعني لابسته علمودي. ذهب: يعني حبيت ادلعك مادام طلعت تحب الفساتين. ماجد: زين وهاي البزونه الميته برجلج؟ ذهب: وينها؟ ماجد: هذا الفرو البجواريبج؟
ذهب: عبالي صدك خفت ولعبت نفسي. جواريب. ماجد: زين ماكو شي عالماشي نتصبر بي؟ ذهب: لا ماكو كافي عليك حفلة البارحه خليتني البس واتمكيج نص الليل. ماجد: لعلمج بعد يوميه حتى اذا منتحاجه راح تكشخين وتلبسين وتتمكيجين وتجين يمي. ذهب: ليش بالله شنو حتى اذا منتحاجه؟ غير زعلانين شكو بعد؟ ماجد: مو اتفقنه ماكو زعل بالليل بعد وماكو تنامين بغير غرفه مفهوم؟ ذهب: ان شاءالله.
نزلنه اتغدينه وعمه حميده راحت تنام العصر تريد تروح تبارك لجيرانه بتهم مخطوبه اخذنه الاولاد نومناهم ونمنه شويه والعصر كعدنه ماجد طلع معزوم بعرس وعمه حميده راحت لجيرانه.. شويه وسمعت الباب الخارجي انفتح عبالي عمه حميده رجعت استغربت كلت شبسرعه. باوعت شفت بالكاميرا اسراء. اتعجبت واستغربت وانصدمت وضجت من هالصلافه بيا عين تجي تدخل بيتنه بعد.
دخلت بوستني واكلتني اكل بالسلام عبالك تحبني تموت عليه وبوست الاولاد وجايبتلهم العاب وهو اني من ولدت لاهي ولااي وحده من خواتها اجت وجبتني وامها اجت خلت جوه راس الجهال كل واحد عشره حتى نجلاء بوكتها كلبت الدنيا بالحجي على امها. اسراء: مشتاقتلكم والله بس شسوي ملتهيه دوام وبيت والزواج مسؤوليه تدرين.
اسراء: اكلج ياهو بالبيت شنو بس انت؟ ذهب: محد كلهم طالعين بس اني، امي حميده راحت للجيران تباركلهم بتهم مخطوبه. اسراء: هاا اي خوش بعد احسن لان اجيت حتى احجي وياج بموضوع بس مااريد احد يعرف اني كتلج تره مالي علاقه والله. ذهب: اي اتفضلي كولي. اسراء: والله ماادري شلون ابدي بس تره ماجد عنده علاقه بوحده ثانيه غيرج يعني واعتقد يحبها وناوي يتزوجها. ذهب: منو كلج؟
اسراء: بالصدفه عرفت من البنيه لان صديقتي هي وحجتلي واني رزلتها وطيحت حظها كتلها ابن خالتي ومتزوج وعنده جهال ويحب مرته عوفيهم لاتهجمين بيتهم. حسيت روحي بفلم هندي! منين اجت هالمحبة هاي كلها وجايه مناك لهنا حتى تحذرني وتنبهني ومتريد بيتي ينخرب؟
رواية صبرا يا قلبي الجزء الأول للكاتبة روز الفياض الفصل الثالث والأربعون
ذهب: منو هي؟ شنو اسمها؟ اسراء: اسمها شيماء بس عفيه لاتكولين اني كتلج واصلا همه يعرفوها كلهم جانت مرت رائد.. ظليت ساكته كلت شنو هالحنيه معقوله ضميرها صحى فجأة وقررت متريد بيتي ينهجم.. ذهب: وشتريد من عدنه؟ وشذكرها بينه؟ مو من زماان رائد متوفي الله يرحمه؟ اسراء: اي مو سمعت بي اتزوج غارت وانقهرت وهي جانت تعرف اخباره مني اني حشاج ثوله جنت احجيلها على نيتي ماعبالي هي هيج نيتها سوده.
اجت عمه حميده اتعجبت من شافتها وظلت تباوعلي. ظلت تحجي هي وعمه حميده اني اخذت رائد وفضل يم البنات ورحت وصبيتلها جاي وكيك وخليتهم كدامها. اسراء: طيب الكيك انت مسويته؟ ذهب: اي.. اسراء: هاا خوش وديلي الطريقه على رقمي خل اسويها لمهند رجلي. ذهب: صار. ظلت كاعده فتره وبعدين راحت حتى ملبست العبايه هي جانت تلبس. ظليت مصدومه شفت العجب من اتزوجت لحد الان من تصرفاتها هي وامها وخواتها.
حجيت لعمه حميده الحجي اللي كالته. عمه حميده: اكص ايدي اذا مطلعت متفقه وياها وهي كايلتها سوي هيج. ذهب: وليش تجي تفضحها اذا متفقه وياها؟ عمه حميده: لان هاي غبيه اكيد تريدج تعرفين حتى تصير مشكله بينكم بدون متفكر راح تفضح نفسها.. ذهب: والله عقلي راح يوكف من وراها معقوله لهدرجه يعني؟ عمه حميده: هو شصار بموضوعها هالكلبه شويمه.
ذهب: ماادري يمه ماادري كلبي خلص من هالسالفه واخاف اسأل ماجد يسويلي قصه ومااعرف شسوي. عمه حميده: كل شي متسوين احنه نسوي انت عليج بماجد وجهالج احنه منريدة يتدخل ويتصرف حتى لايدورون الموضوع عليه ويكولون هو يتحرش بيها ويركض وراها وتصير جبيره عشاير وفصول الله لايكولها.
اتنهدت كلبي ظل يوجعني كتلها: اكو شي اريد اكولج عليه حتى تكونين بالصوره بس يمه الله عليج مااريد ماجد يعرف انت تعرفين لو شنو يصير بس راح اموت ماادري المن احجي. عمه حميده: شبيج شصايرلج كولي مااحجيله اكيد. حجيتلها اللي صار على موضوع الصور اللي تدزهم لماجد والمسجات.
عمه حميده: لا ياسا، استغفرالله ربي هاي شنو؟ وين وصلت؟ الله يرحمك يارائد يايمه ويسامحك وين لكيتها وبليتنه بيها طايحت الحظ الحمدلله مابقت شايله اسمه جان انفضحنه من وراها. ا كلتلي: اخاف علمودها شربتي الحبايه ذاك اليوم ووجهج جان مضروب؟ ذهب: يمه الحبايه شدخلها؟ وجنت اريد انام حتى ماافكر بيها ولابالصور ولا انقهر علموده وعلمودها.
عمه حميده: يااا ولج اذبحج اذا عدتيها مره ثانيه تردين تنامين تجين يمي اقره عليج وتنامين موتينه بليلتها منمنه من الخوف واجه يموت هو كال شربت الطبقه كلها وميقبل يكول ليش.. ذهب: هو يحلف يكول ماعندي شي وياها ومحاجي وياها صار اشهر وميرد على مسجاتها وتليفوناتها لهذا السبب تدز الصور تريد يعني تغريه.. عمه حميده: اممم اي حقيره ماعدها شرف لو عدها شرف متسوي هيج. وانت شتشوفين؟
ذهب: ششوف هو حلف برائد وفضل ماعنده شي وياها. عمه حميده: مادام حلف معناها صادق هو ميجذب تره بدون حلفان مو بعد يحلف بالحلوين اسم الله عليهم. باقي النهار ظليت محتاره احجي لماجد عن جيت اسراء لو لا بعدين كلت لا مااحجي خلي عمه حميده هي تحجيله بس حجيت ويه فطوم من زماان ماحاجيه وياها حجيتلها اللي صار حتى قصة الفستان وشلون اتصالحنه وجيت اسراء والحجي اللي كالته وردت اخذ رأيها شلون اتصرف..
فاطمه: الله ذهوبه اتمنى محمد يطلع مثل ماجد هيج رومانسي عنيف كل مره يضربني حتى يرجع يصالحني هيج تره والله رجلج تنحسدين عليه مااكو اطيب منه ويحبج يموت عليج ومتحمل خبالج.. ذهب: اوكفي، اوكفي، عوفي ماجد على جهه منو محمد؟ فاطمه: ياا مو كتلج جنت مشغوله واخيرا راح انخطب باركيلي. حجتلي فطوم عن خطيبها مو غريب ابن عمتها والخطوبه والمهر عالجمعه الجايه ان شاءالله فرحتلها حيل وكتلها اجي ان شاءالله.
ثاني يوم بقينة اني وعمه حميدة نتناقش بموضوع اسراء وشيماء. عمه حميده: والله ماادري يايمه نحجي لو نسكت بس اذا سكتنه خاف تكبر السالفه ويتمادن هالميستحن اني اكول احجيله انت او تردين اني احجيه حتى يكون بالصوره حتى خاف يصير شي هو عنده خبر منصير بالملامه. ذهب: اني مااكدر احجيله اخاف يطلع قهره بيه لو يزعل انت احجيله. عمه حميده: ان شاءالله بالليل من يرجع مااريد اضوجه هسه خاف يروح للمعرض ووراه طريق.
عمه حميده: ولج صيري لوتيه وشاطره الرجال ميحب المره الزعول انت من كتيله انعم الله عليك خلص هو عرف نفسه غلطان وهسه يحوس شلون يحجي وياج اتعلمي لاتخلين الزعل يطول الصبح زعلي بس قايمه بكل واجباته وبالليل جوه عباته. افتهمتي؟ ضحكت على جوه عباته..
عمه حميده: والله شبيج اني امج هم مره اني و المرحوم اتعاركنه وصيح عليه وغلط عليه كدام اهله واني مجنت غلطانه بس سكتت وكلت بالليل احاسبه بالليل رحت لبست واتكحلت وقبل ماكو حمره وهالسوالف جان ديرم اتديرمت وسويت حلكي احمررر واتعطرت واتمددت بصفه عالفراش احتار شيسوي حتى بس احجي وياه ظل ياصاعد للسطح يانازل اخر شي اجه باس راسي بس كتله مثلما فشلتني كدام اهلك تراضيني كدامهم يالله.
ثاني يوم راح كعد يم اهله وصاحلي اريد جاي كمت سويتله جاي وجبته وكعدت يمه كلي انت ماكو مثلج مره لو شما اسوي مااجازيج على دلالج كتله وحجيك امس كال لا من لسين الموت وفوك.. ذهب: ههههه طلعتي مو هينه يمه. عمه حميده: اي طبعا لعد شعبالج ليش اكلج اخذي نصيحتي من انصحج اني اريد مصلحتج. ذهب: زين شنو يعني من لسين الموت وفوك؟ عمه حميده: يعني مو من كلبي بس حجي لسان. لسان الموت هذا الموجود ابداية البلعوم..
يالله دروحي كعدي يمه سوي نفسج تباوعين عالتلفزيون. ذهب: لااريد اصعدهم انومهم. عمه حميده: اخذي رائد بس فضولي حبيب كلبي خلي يمي اني انومه.. كمت اخذت رائد انومه بس ميقبل ينام شبعان نوم خليته يمي عالجربايه يلعب وشغلت التلفزيون شفت فلم بي هذا الممثل الاجنبي اللي يشبه ماجد بقيت اتفرج واحاجي رائد. ذهب: شوف شوف هذا منو هذا بابا طالع بالتلفزيون. دخل ماجد سكتت باوع عالتلفزيون.
ماجد: والله النسوان امرهن عجيب يعني يمهن الاصل ويباوعن عالتقليد. شوف باباتي حتى باجر من تكبر متتورط وتتزوج تره ميبقن براسك عقل. غلست اني ماحاجيته كلت خل اسوي مثل ما عمه حميده كالت..
كلت خل اتجرأ طلعت فستان مال بيت ضيق حيل وجوه الركبه لونه ازرق جويتي وحفرة الصدر مالته جبيره ووياه مثل الرقبه تنلف بحدها نزعت كدامه كوه لان استحي ولبست الفستان بعدين كعدت عالطابوريه مشطت شعري ورفعته وكصيت كذله طويله شويه وجانبيه وخليت خط كحل ازرك وحمره وردي و لبست سلسلتي القديمه المكتوب بيها اسمي.. هو يباوعلي اني مغلسه اخذت تليفوني على اساس اريد انزل كتله: دير بالك عالولد نازله شويه وراجعه.
رواية صبرا يا قلبي
