<br class="clearfix" />

الراجل الوسيم سلاح ذو حدين، لأنه بيبقى عارف انه جذاب وساعات ممكن يستكتر نفسه على ست واحدة، أو لو مش بيفكر بالطريقة دي ممكن تلاقي عيوب خطيرة في شخصيته، علشان كده لهلوبة بتقولك بلاش الشكل يخدعك واعرفي حقيقة شريكك قبل ما تنبهري بوسامته لان في شخصيات لازم تبعدي عنها لأن علاقاتهم مش بتعمر وده اللي اثبتته لينا الدراما السنة دي.

- الغامض:في الاول بيبقى جذاب، لكن بعدين هتلاقي نفسك خايفة منه لأن حياته كلها سرية ولو سمعتي عنه كلام من أي حد، الشك هيسيطر عليكي لانك مش عارفة حاجة من المصدر الأصلي، وده اللي حصل مع شخصية زي "توفيق" - اللي ادى دوره باسل خياط - في مسلسل 30 يوم لأن حياته كانت غامضة وسرية وده اللي دفع مراته لطلب الطلاق بعد ما بدأت تخاف منه.

- الاناني:

مش لازم يبقى واضح أوي في البداية، لكن مع الوقت بتكتشفي انه بيهتم بسعادته وراحته على حساب غيره، وبيدي لنفسه الحق في استغلال اي حد لمجرد انه يبقى راضي، وده اللي سبب ان شخصية "أكرم" - اللي ادى دوره إياد نصار - في هذا المساء ينتهي بيه الأمر لوحده لأن زوجاته الاتنين رفضوا أنانيته معاهم.

- راجل العيلة:

طبعا انه يكون بيحب عيلته دي حاجة تزوده مش تعيبه، لكن لازم يوازن بين عيلته الأصلية واسرته الجديدة اللي كونها بنفسه، لأنه لو جه عليهم لحساب أهله الوضع بيبقى سيء زي ما حصل مع "عمر" - اللي ادى دوره كريم عبد العزيز- في الزيبق اللي انفصل عن مراته بسبب ارتباطه بأهله وحياته معاهم في الوقت اللي مراته كانت طموحة وعايزة تعيش في شقة لوحدها.

- بيكرر غلطاته:

لا يلدغ المؤمن من جحر مرتين، الانسان العاقل يغلط ويتعلم من غلطه، لكن لو بيكرره لازم تبعدي عنه، لأنه كده شخص مش حكيم، وده اللي وقع فيه "فارس" - اللي ادى دوره احمد السقا- في مسلسل الحصان الاسود لما وثق في نفس الناس اللي خانوا ثقته في الاول، مش بس كده ده لكن كمان بعد عن الناس الجديرة بثقته وقرب من اللي بيأذوه، وده كان سبب إنه فضل لوحده.

- متعدد العلاقات:

الراجل اللي حواليه كتير ودايرة علاقاته واسعة خصوصا من الستات لا يصلح زوج كويس، وده كان سبب فشل علاقة "مروان" - اللي ادى دوره عمرو يوسف- في عشم إبليس مع مراته، صحيح ان القدر سمح له بفرصة تانية مع حد تاني، لكن ده لما اكتشف قد ايه حياته مليانة علاقات غلط.

- مش مستقر نفسيا:

مش متصالح مع نفسه وكاره حياته وحاسس إنه غضبان وفي حرب طول الوقت، ده الحياة معاه مستحيلة، ومهما حاولتي تغيري فيه وتغمريه بالحب، الظلام اللي جواه بيطغى على العلاقة وبتفشل زي ما حصل مع "محمود عبد الظاهر" -اللي ادى دوره خالد النبوي- في واحة الغروب لأنه كان غير مستقر نفسيا وكان لازم علاقته تنتهي بالفشل لأن اللي مش قادر يحب نفسه مش هيقدر يحب حد تاني.

- ناكر الجميل:

انكار الحاجات الكويسة ونسيان التضحيات من أوحش الصفات في الناس، لو حسيتي ان شريكك عمل كدهه مع حد، اعرفي ان الدور جاي عليكي وفي يوم هينسالك أنتي كمان تضحياتك ووقوفك معاه زي ما عمل "هشام" - اللي ادى دوره احمد فهمي- في لأعلى سعر لما نسي تضحية مراته ووقوفها جنبه وانكارها ذاتها علشانه.

- قلبه أسود:

الشخص اللي بيشيل في قلبه والكره بيعميه ده مخيف جدا لأنك مش هتضمني شره ممكن يوصل لفين ويأذي به مين، زي شخصية "سعد / شهاب" - اللي ادى دوره يوسف الشريف- في مسلسل كفر دلهاب، اللي الانتقام حوله لشيطان عينيه مش شايفة غير الخراب والقتل ونسي انه انسان ولازم يعيش ويحب ويرحم.

- اللي مكبر دماغه:

قبل ما تفرحي بنجاح شريكك اعرفي هو حقق نجاحه ازاي، لان ممكن يكون وصل بتكبير الدماغ وبيع المبادئ زي "يوسف" -اللي ادى دوره أحمد مجدي- في لا تطفئ الشمس، اللي كان عنده استعداد يغمض عينه عن رغبة راجل تاني في مراته لمجرد انه يوصل وينجح، الشخص ده طبعا الحياة معاه غير سوية ولا تحتمل.

- عملي لدرجة تزهق:هو مش وحش، لكن لما بيوصل لدرجة تنسيه احتياجات بيته ومراته وقتها يبقى غلط، الراجل العاقل يوازن بين عمليته وعواطفه وده اللي فشل فيه "ليل" -اللي ادى دوره هاني سلامة- في مسلسل طاقة نور لما اهتم بشغله وحياته الخاصة أكتر من بيته ومراته وانتهت علاقته بالفشل.

- العنيد: العند هو الصخرة اللي ممكن يتكسر عليها كل مشاعر الحب والرومانسية لان الراجل اللي فيه الطبع ده ممكن جدا تفشل علاقته العاطفية علشان السبب ده حتى لو كان الطرفين بيحبوا بعض، لكن العند وعدم مشاركة القرار بتحسس الست بخنقة زي اللي حصل مع "سليم" اللي لعب دره النجم امير كرارة في مسلسل "كلبش" لما كانت قراراته كلها فيها تحدي واضح وبعيدة عن الاسباب المنطقية.