<br class="clearfix" />في بنات كتير عندهم مشكلة في اظهار حبهم للطرف التاني، سواء خطيبها او زوجها وده بيعمل مشاكل كتير في علاقتهم، وعلشان تتفاديها في مليون طريقة رومانسية بسيطة تظهري بيهم حبك واهتمامك لشريك حياتك من غير اي مجهود وبتفرق جدًا مع الوقت، اعرفي ده في دليل لهلوبة للحب والعلاقات: 1- ابعتيله رسالة غرام حلوة في جواب، مش على مواقع التواصل الاجتماعي. 2- خططي لسهرة مفاجأة واعزمي جوزك على العشا في نص الاسبوع. 3- يا سلام لو بعتيله قطعة حلوة زي الكوكيز مثلًا على الشغل لو كان من عشاقه، او جهزيله ساندوتش شاورمة ياخده معاه. 4- فجأيه انك عملاله بسبوسة بالقشطة او كنافة بالمكسرات. 5- لو انتي وهو بتشتغله في نفس المكان او قريب من بعض، فضي نفسك ساعة في نص اليوم وانزلوا اتغدوا سوى برا. 6- دلكيله ضهره واعمليله مساج بعد يوم عمل طويل ومرهق، هيحبك جدًا. 7- اغسليله رجله بالميه والملح من غير ما يطلب منك ده. 8- لو نزل يسهر مع صحابه بلاش تزني عليه بالمكالمات الكتير، واتركيه على راحته. 9- حضريله الفطار وقدمهوله على السرير. 10- فضي نفسك من شغل البيت، وقضوا يوم انتي وهو على السرير بالبيجامة من غير ما تنشغلوا بأي حاجة تانية في يومكم. 11- اتمشوا بالليل سوا واوعي تتحججي بانك عايزة تنيمي العيال. 12- اندهي عليه باسم الدلع وخصصيله اسم لوحده، علشان يكسر اي حاجز بينكم في التعامل. 13- مارسوا الرياضة سوا، او اعملوا اي هواية مشتركة بينكم. 14- عاملي اهله كويس، ودايمًا اهتمي تقولي كلام حلو لمامته واخواته. 15- شاهدوا سوا فيلم على ذوقه، مش لازم كل مرة انتي اللي تختاري. 16- خصصي وقت في اليوم تتكلموا فيه وتتشاركوا تفاصيل احداث حياتكم. 17- جربوا في يوم عيد الحب انكم تستحموا سوا. 18- اغسليله هدومه واكويهاله، واهتمي بحاجته دايمًا من غير ما يطلب ده منك. 19- اتركي له رسالة على مراية الحمام، فيها جملة حب، علشان يبدأ بيها يومه. 20- اشتريله كتاب بيحبه او شريط فيديو وقدميها له هدية من غير مناسبة. 21- فكريه بمواقف حلوة كانت بينكم ايام الخطوبة. 22- احجزي لجوزك يوم في الـ "spa". 23- قولي لجوزك يترك الزبالة وهو نازل، اكيد هيحبك جدًا. 24- اشتري "نوت" وسجلي فيها المواقف الحلوة اللي بينكم، والتواريخ المهمة، وفكريه بيها لو نسي. 25- لو جوزك كان شغال طول الليل وسهران، قدري ده وقوليله نام انت كويس وانزلي انتي ادفعي فاتورة النت بداله. 26- اشتريله برفان حلو وجذاب او جرافته شيك، من غير مناسبة. 27- اعملوا مغامرة مجنونة سوا في حياتك، علشان تبعدوا عن فكرة الملل. 28- ظبطوا يوم اجازة موحد من الشغل، وقضوه سوا. 29- دلعي جوزك بقُبلة الصبح قبل ما ينزل لشغله. 30- قدري زوجك واذهبي معاه في الرحلات والمناسبات اللي تابعة للشغل، علشان مش يكون هو لوحده اللي جاي من غير مراته. 31- شجعيه لو عايز يخس، وقللي من اكلك وكلي الوجبات اللي بياكلها. 32- اضحكي على النكت اللي بيقولها وبلاش تكوني بايخة معاه. 33- اتباهي بزوجك قدام صحابك، علشان يعرف انك بتقدريه في كل وقت واي مكان. 34- لو كان تعبان، لازم تقعدي جنبه طول اليوم، وتعاملي معاه كأنه طفل صغير.
