<article> 1- العنايه بالبشره الدهنيه :اول واهم نصيحه هو غسل الوجه مرتين باليوم باستعمال غسول مخصوص للبشره الدهنيه وافضل غسول اني شخصيا جربته هو غسول لوريال بالطين النقي ( البنات الي بشرتهم جافه ابتعدو عن هذا <a name=\'more\'></a>الغسول لان نهائيا ميناسبكم ), وبعد غسل الوجه بنات ضروري تستعملون شي ايسد المسام لان الجراثيم والغبار الي بالجو زائد الدهون الي تفرزها البشره راح تطلع حبوب بالوجه , احسن طريقتين لسد المسام هي باستعمال مكعب ثلج وتمررو على كامل الوجه ا و ممكن مي ورد تخففي بمي وتحطي بقطنه وتمسحين بي كل الوجه راح ينطيج نتيجه حلوه . 2- ترطيب البشره الدهنيه :طبعا اغلب البنات الي بشرتهم دهنيه يهملون ترطيب بشرتهم , بنات الترطيب ضروري لكل انواع البشره , طبعا اكو انواع مرطبات بالمحلات كولش هوايه كل وحده تشتري على حسب امكانيتها بس اني افضل مرطب الليل ايكون ثكيل ومرطب النهار ايكون خفيف وافضل مرطب نهاري وقبل المكياج هو مرطب الالوفيرا طبعا قوامه يجي مثل الجل وبسرعه ينشف وينطي للوجه ملمس حلو يغنيج عن البرايمر . 3- تاثير نوعيه الاكل على البشره الدهنيه :بنات نصيحه ابتعدو كد متكرون عن الاكل المقلي والجاهز وابتعدو عن المكسرات والموز والجبس والنساتل والكاكاو , اشربو كميه كافيه من المي من 2 ل3 لتر باليوم , امشو شهر واحد على هذا النظام وشوفي التغير الي راح ايصير بالبشره والحبوب راح تخف بشكل ملحوظ . 4- ماسكات للبشره الدهنيه :الماسك الاول / هو ماسك الطمامطه طبعا هذا الماسك راح ايساعدج على تقليل دهون البشره ويصغر المسام , الماسك عباره عن طمامه تخليها بالخلاط لحد متنطحن وتوزعيها على كل وجهج وتخليها لمده 15 دقيقه ويكرر من 2 ل 3 مرات الاسبوع .الماسك الثاني/ هو ماسك بياض البيض والليمون راح يساعد على تقليل الدهون وشد البشره عباره عن بياض بيضه وعصره ليمون تخلطيهم وتوزعيهم على وجهج و يترك لحد مينشف تماما وبعدين ينغسل بالمي الفاتر ممكن تكرري من 2 ل 3 مرات بالاسبوع . **وطبعا البنات الي ميحبون او الي يتعاجزون من الماسكات الطبيعيه ممكن تستخدمون الماسكات الجاهزه موجوده باغلب محلات الكوزمتك وخاصتا ماسكات الطين كولش مفيده للبشره الدهنيه . 5- شلون نخلي المكياج يثبت على البشره الدهنيه ؟؟بنات البارحه نزلت بوست كامل ومفصل بي خطوات تثبيت المكياج انزو تحت هذا البوست وراح تلكوها , وبالنسبه للبنات الي سألو على نوع باودر زين ممكن تستخدمون باودر نوت تغطيته ثكيله واذا اتحبون تغطيه اخف جربو باودر ديبورا الاحمر وبالنسبه للفاونديشن جربو برجوا اسمهAir mat) ( هذا مخصوص للبشره الدهنيه . </article> https://archive.janatna.com/