<article> البنطرون الجينز قطعه اساسيه بدولاب كل امراة لكن بنفس الوقت قطعه صعبه الاختيار لان اذا جانت مو مناسبه لشكل الجسم ممكن تخرب كل الاطلاله لذلك لازم ايكون الاختيار حسب شكل الجسم : 1- النوع الاول هو الجسم على شكل كمثرى<a name=\'more\'></a> (هذا النوع يكون ضعيف من فوك ومليان من تحت واغلب البنات العراقيات عدهم هذا النوع من الاجسام ) , البنات اصحاب هذا النوع من الاجسام اختاري دائما جينز ايكون خصره عالي وبلون غامق ويكون واسع شويه من تحت الركبه لنهايه الساق وابتعدي عن الجينزات الى تجي كولش ضيقه او الي الوانها فاتحه او الي بيها لؤلؤ لان راح اتبينج مليانه اكثر .
2- النوع الثاني هو الجسم على شكل تفاحه (هذا النوع يكون مليان من فوك وتكون منطقه البطن بارزه وبنفس الوقت تكون رجليها جدا ضعيفه ) , البنات اصحاب هذا النوع من الاجسام اختارو دائما البناطير بالالوان الفاتحه والي تجي عريضه من فوك ليجوه مثل كصه البوي فرند الي تشبه كصه البناطير الرجاليه وابتعدي عن الجينزات الضيقه والي يجي خصرها واطي لان راح تبرز عيوب جسمج .
3- النوع الثالث هو الجسم على شكل ساعه رمليه (نكدر نكول ان هذا هو النوع المثالي من الاجسام يكون عرض الاكتاف مساوي لعرض الارداف والخصر يكون صغير ) , البنات اصحاب هذا النوع تكدرون تلبسون كل الالوان وكل الكصات بس الافضال تختارون الجينز الي خصره عالي حتى يبرز جمال جسمكم .
4- النوع الرابع هو الجسم على شكل مستطيل ( هذا النوع تكون الاكتاف والخصر والارداف كلها بنفس العرض ) , البنات اصحاب هذا النوع من الاجسام اختارو دائما الجينزات الي خصرها واطئ لان راح تنطي جسمكم انوثه اكثر وتكدرون تلبسون كل الالوان بس ابتعدو عن الجينزات الي خصرها عالي والجنزات الي تجي كصتها عريضه .
</article>
https://archive.janatna.com/
