ماجد: وبعدين؟ ذهب: بعدين بشنو؟ تره احتمال جبير يطلع اكو حمل مو مال تذب نفسك عليه. ماجد: اففففف.. منخلص يعني احنه من هالموضوع الا تذكريني؟ ذهب: انت لو ناسي جان كعدتني الصبح للصلاة لو خابرت مثل كل يوم تسال على خالتي والجهال. ماجد: جنت مشغول. ذهب: اصلا لو ناسي جان من دخلت سلمت. سكت. وره ثواني رجع يبوس بركبتي. ضحكت. رفع راسه باوعلي: لتضحكين واني محترك كلبي. ضحكت حيل ابتسم. ذهب: انت محترك كلبك اني شذنبي مااضحك؟
ماجد: محاسه انت بالمصيبة؟ متفكرين هذا الشي شنو تأثيره على صحتج وحياتج؟ على بيتج واولادج وعائلتج؟ ضجت كتله بعصبية: تره انت متحب اولادي اكثر مني ولا راح تخاف على صحتي وحياتي اكثر مني، اذا اكو احد مسؤول عن هالمصيبة هاي على كولتك فهو انت. اني لازم الومك واحجي واصير عصبية مو انت. ماجد: اني هسه الغلط مني؟ ذهب: اي انت طبعاً لعد منو؟ منو ابوه؟ سكت واني هم سكتت. بعدين كال: العصر اخذج سوي تحليل.
يحجي ويبوس بخدودي. ذهب: ورجلي التصوبت؟ ماجد: مو عالجتها. انطيج فصل عليها. ذهب: وقهرتي من البارحة اليوم؟
رفع راسه باوعلي: ماكو رجال ميحب يصير عنده جهال بكد شعب الصين. بس مو على حساب امهم وصحتها. لو الظروف مختلفة جان من الفرحة رحت جبتلج هدية ومخليتج تتحركين اي حركة بالبيت. اتمنى يصير عدنه بعد طفل وامنيتي تصير عندي بنية بس بهيج ظروف مااريد. مامستعد للمجازفة. الحمدلله عدنه جهال اثنين نعمة من الله جنه منحلم بيها. بقيت ساكتة دنك باسني وكلي: هسه شلون نتنوس لونروح نصلي ونتغدا وانام؟
ضحكت و..؟؟؟؟ نزلنه للغدا. ماجد: امي اتغدت؟ ذهب: اتحنت وسبحت واتغدت ونامت. ماجد: اتحنت؟ ذهب: اي خلت حنه لشعرها. صفن بوجهي بعدين ضحك: شذكرها بالحنة؟ ذهب: خالتك جايبتها الها. ماجد: اممم. هنا الحجي. العصر نزلنه حتى نروح نسوي تحليل جانت العلوية كاعده تشرب جاي ماجد من شافها انصدم بلون شعرها راساً باوعلي اني غلست حتى لااضحك. اتدنه يمي كلي بصوت ناصي: شمسويه براسها؟
ضحكت كتله: شمسوية هو لون شعرها ابيض والحنة حمرة يطلع هيجي لونها. ظل كل شوية يشرب جاي ويضحك على كيف: خررب يومج على هالدكة هاي؟ ذهب: اسكت لاتفضحنه. ماجد: هي هاي الجريمة ينكست عنها؟ رحنة للمستشفى سوينه تحليل بس ماجد اعصابة تفور بعد نص ساعة طلعت النتيجة حامل. اشرلي براسه امشي. رجعنه للبيت ساكتين بس مبقى واحد عبر من يمه بالسيارة مارزله. ماجد: ثور. لا يكوم الثور هم يفتهم اذا عاش بين البشر. مطي.
اتنهدت وبقيت ساكتة. ماجد: شوف المطي هذا الثاني شلون يريد يعبر منا واني مشغله اشارة، انزل هسه اطيح حظه؟ درت وجهي وغلست. ماجد: هذا الزمال شوفي شيسوي. شفناك شفناك. ذهب: لاحول ولاقوة الا بالله. ماجد: استغفر الله ياربي. استغفر الله. اني ناقص قلق وتفكير. ذهب: اذكر الله. ماجد: ذاكره وحامده وشاكره. الحمدلله والشكر. اتحسرت وبقيت ساكته. ماجد: دنكي راسج. ذهب: دنكت. اففف.
ماجد: اففف معاجبج تردين تفرين براسج والشارع كله شباب. متشوفيهم ياكلون المره اكل لاحيا ولامستحه! اها شوفي هذا مو بالسيارة عيونه راح تطلع. تعال. تعال شوفها من قريب ليش بعيد هيجي خاف متشوف ملامحها عدل. ضحكت على كيف التفتت علي: على شنو تضحكين؟ اكو شي يضحك؟ ذهب: اتذكرت شغلة. ميصير اضحك؟ شنو علي القاء القبض؟ ماجد: شتذكرتي بالله؟ ضحكينه وياج بما انه ورانه قهر وتعب وشلاع كلب.
احتاريت شكله بس تلاحكت نفسي كتله: اتذكرت شعر خالتي. زين هيج؟ سكت. بقى ساكت دقيقيتن بعدين ضحك. ماجد: اخ ياربي، استغفر الله. والله ماادري اضحك لو اضوج. ذهب: هذا كله وبعدك مضايج؟ ماجد: اخخخ لو الزمج، هذا البرود العندج راح يموتني. ذهب: احمد ربك وشكره على هذا البرود الشايفه ومعاجبك لان اذا حجيت تره انت الخسران. ماجد: لا بالله؟ شتحجين مثلاً؟ احجي بالله خل اشوف شعندج من حجي؟
مااسمعها شنو ترد عليه. اتدنيت يم المحجر حتى اسمعها لان هي كاعده بالهول الجوه. العلوية: خير وجايك. متريد جهال انت بعد؟ بس اثنين عدك خو متريد تبقى عليهم؟ هم لازم عدهم بعد اخوان جيبلك بعد فد اثنين وياهم وانوب عود بطل. ماجد: هو واحد وممنوع انوب اثنين؟! واحد هو ومو زين عليها شتجيب اثنين؟ العلوية: يعني اذا مو زين عليها شنو تبقى بلا جهال؟ تتحمل هن تسع شهور حالها حال النسوان مو هاي النسوان تحبل وتجيب.
ماجد: يمه ممنوع عليها الحمل مو زين على كلبها. العلوية: هذا الحصلناه من هالزواج. ماجد: شحصلتي؟ العلوية: بس التعب والقهر شحصلت هم زين من طلعتلك باثنين جهال عالاقل البكدك عدهم اربعة وخمسة. ماجد: اني طالع. تردين شي؟ العلوية: لا. مااريد. طلع. اسمعها بعدما طلع تكول: مسحور يمه. مسحور وليدي. ميقبل احد يحجي عليها. فوك الضيم الشايفه من اخذها ليهسه، هذا هم حظك.
انغثيت من حجيها. هالمرة لوشنو اسويلها تبقى متحبني ومتحسفه على بت اختها. حسبي الله ونعم الوكيل. بقيت مغثوثة. صليت ونزلت يم الجهال بعدين جهزت العشا ويه البنات واتذكرت صورة العلوية ماادري نجلاء شافتها لو لا. فتحت التليفون لكيتها كاتبتلي: يمه دخيلك ياسبع الدجيل امي شبيها؟ ضحكت ضحك. كتبتلها: مبين معجبج اللون؟
وره دقايق جاوبتني: بالقران اخترعت من شفته. عبالي نار مجلبه بشعرها جنت جاي اكل وشفت الصورة وكفت اللكمه على كلبي. ذهب:؟ نجلاء: اي ضحكي ماعندج خالة تدك هيج دكات ناقصة بأمج. ذهب:؟ نجلاء: باجر راح اجي واجيبلها وياي صبغ اصبغه الها لون غامق لاينصدمون الجهال من يشوفون بيبيتهم طالعة صهباء. ذهب: والنبي راح اموت من الضحك؟ نجلاء: ليش هيجي خيه استفردتي بامي لو مخابرتني كايلتلي.
ذهب: لو كايلتلها لا جان اول مارجع اخوج اشتكتله مني وانوب خابرت لاختها حتى تجي تاخذها تزعل عدها. نجلاء: صحيح. امي هاي سوالفها بس هم ميخالف تزعل ولاهاللون المرعب هذا. يالله شنسوي هذا ابتلاء من رب العالمين. ذهب:؟ كافي عفيه والنبي يمكن يصير عندي اجهاض بسببج. نجلاء: اععع سويتي تحليل؟ ذهب: سويت صخام. نجلاء: يمه. من يمي خفت. بشرفج ماجد شسوه؟ شبدع هالمره. ذهب: بس احجي ابجي تره.
الله رحمني وخلاني انام لو باقية يمكن جان متت من القهر. كعدت الصبح كوه نعسااانه بس نزلت اشوف العلوية اتريكت لو لا. لكيتها تتريك وهو بره جاي يطلع السيارة. فتحت الثلاجة ماادري شسوي غدا كالت سارة: مدام بابا كال يجيب غدا. درت عليها كتلها: شعنده؟ منين؟ سارة: مااعرف. كلت بعد احسن خل ارجع انام لحدما يكعدون الجهال. صعدت رتبت الغرفة وشلت ملابسه وبعدين رحت اندحست بلحافي ونمت. كعدوا الجهال يلعبون يمي.
انجبرت اكعد اريكهم واغسللهم. نزلتهم جوه واني نازله عالدرج سمعت امه تحجي بالتليفون: تعبت نفسيته تعبت منها ومن امراضها ومشاكلها. حامل ويكول ممنوع عليها الحمل شفتي بالله؟ شنو قابل يظل بس ذوله الجهال الاثنين؟ المثله عده درزن وهو محروم حتى من الخلفة. يااا شيتزوج، مسويتله سحر معدل. بس احجي وياه كلمة يكلب وجهه علي عبالك عدوته مو امه. اتنهدت حيل وكلت حسبي الله ونعم الوكيل اكيد تتقل الموجز لاختها.
دخلت عليها للغرفة رأساً كمزت واتغير الحجي: اي شنسوي بعد محسودين محسودين. الله يبعد عنهم العين والحاسدين ولاارتاحوا. كعدت الجهال يمها ورحت كعدت بالمطبخ كلش انقهرت. بقيت كاعده يمكن ساعة وصافنه ماادري شوكت الله يخلصني من هالخاله هي وبناتها. لو امه اللي بوجهي شكل وبظهري شكل. فجأة اجت براسي فكرة ماادري زينة لو لا ماادري راح تفيدني لو لا بس كلت اجرب يجوز تفيدني بيوم من الايام.
قررت انزل برنامج تسجيل المكالمات بجهاز امه. حتى متعرف شي عن البرامج والتليفونات. بقيت اراقبها لحدما نامت. واخذت التليفون ونزلت البرنامج ورجعته. وره شويك ظليت الوم بنفسي اني شسويت؟ شبيه هيجي صرت حقوده؟ وشراح تفيدني المكالمات حتى لو سمعتها؟ قابل راح اسمعهن اله واسوي مشكلة بينه وبين امه؟ لا مااسويها مااكدر. هاي امه مهما كان ومره جبيرة. رحت اريد احذف البرنامج لكيتها كاعده وبيدها التليفون.
شافتني كالت: متدكيلي على نجلاء اريد احجي وياها بالله. اتصلتلها على نجلاء وصعدت سبحت واتصلت على عمه حميدة اشوف اخبارها كالت: صدك حامل؟ ذهب: منو كلج ام عبدالله؟ عمه حميده: لا ماجد خابرني الصبح وكلي. ليش ام عبدالله هم تدري؟ ذهب: خابرج علمود يشتكيلج؟ عمة حميدة: ليش يشتكي؟ منين يشتكي؟ شنو متزاعلين انتو؟ ذهب: متزاعلين هاي للجهال الزغار. كولي متعاركين متمالخين.
عمة حميده: يااا يااا. عليمن؟ اوكفي خل اسد الباب لحد يسمعني. ذهب: علمود الحمل بعد عليمن. عمة حميدة: شنو ميريده؟ ذهب: يكلي نزليه. عمة حميدة: اسم الله، شلون حجي هذا؟ شنو نزليه؟ يمه اسم الله ابنه من صلبه من دمه ولحمه شلون يكلج نزليه؟ ذهب: يخاف.
عمة حميده: حتى لو يخاف. بعدين ليش واحد يتشائم ويفكر بالاشياء المو زينة شنو العدها مشكلة بكلبها تبقى بدون جهال هاي هنا بنية يم بيت عمج عدها فتحة بالقلب سوولها عملية وحبلت وجابت والحمدلله كل شي مابيها. ذهب: والله يمه ماادري. عمة حميدة: فد يومين خل تصير ام عبدالله زينة واجيكم. اني احجي وياه لتحجين انت. وعوفيه من تشوفينه عصبي طلعي وعوفيه. ذهب: غير يعوفني هو.
رواية صبرا يا قلبي
