رواية صبرا يا قلبي الجزء الأول للكاتبة روز الفياض الفصل الثالث عشر

دخلنه للقاعه فعلا مسويها قاعه اضاءه وسجاد وكراسي وطاولات وكوشه واهله يهلهلون ويركصون واشتغل الدي جي وكلها كعدت عالكراسي ودخلنه احنه بعدين ضغط على ايدي هو اني جنت مدنكه رفعت راسي.
كعدنه وبدت الاغاني والركص شويه وطلع هو يم الرياجيل بره وبعدين رجع كصينه الكيكه وبدلنه الحلقات وطفوا الاضويه هو ضحك باوعلي: هههه هاي الفقره اللي احبها.

خلولنه اغنية يارا (مابعرف) بدت بطيئه وشويه الايقاع بده يزيد وكلهم ظلوا يغنون وياها جانت فد شي حلو حسيت عبالك فعلا متزوجه شخص اني مختارته واحبه رغم اني استلطفه.
بعدين خلوا اغنيه ثانيه ( انطيني وعد للموت).
ذهب: مو كافي؟
ماجد: لا هالمره هاذي مني الج.
بدت الاغنية اني انعصر كلبي الاغنية حزينة كلش مو مال هيج مناسبة.
دنكت وظلت بس دموعي تنزل وحده وره الخ.

وكلمة الموت تأذي ومن كلي هاذي مني عبالك ديموت صدك. حضي وباس راسي باس ايدي خلاها على صدره دنك كلي: حبيبي.
تره اغنيه مراح اموت صدك.
حضني حيل عبالك واكفين بحدنه ماكو ناس.
ماجد: كافي بجي.
ذهب: ماابجي.
ماجد: وهالدموع شنو؟ بعدين خالتي وبناتها راح تطلع عيونهم عليج ضحكي شويه لو تدري بيهم امي حميده بس.
ضحكت كتله: كله منك اكو احد يختار هيج اغنية بيوم زواجة؟

ضحك سكتت ورجعت ضحكت كال: سبحان الله حميده لازم تكعد عدنه بالبيت لان الظاهر بس هي تكدر عليج.
ضحكت كال: كافي ضحك خالتي خطيه هسه ارتفع عدها الضغط.
ضحكت حيل كال: اششش لج كافي المره راح تجلطين المره شبيج.
ذهب: كافي فدوه لتحجي بعد مااكدر.
خلصت الاغنيه ورجعنه كعدنه كل شويه اضحك واسكت وهو يضحك ويسكت اجت فطوم تركض: والله العظيم اليوم اذا محجيتيلي شبيكم افضحج.
ذهب: اشش بعدين احجيلج.

وطبعا مثل اي عرس هلاهل وركص بعدين العشا وراه رقصه جماعيه ماجد طلع يم الرياجيل رجع مرجع الا عالزفه.
كالوا راح يدخل العريس لبسوا حجاباتكم اني باوعت لعهود: ليش؟
عهود: شنو ليش يزفوكم غير؟
اني حسيت صخنت شبسرعه صارت الزفه شلون هسه شسوي؟
باوعت لفطوم والبنات واشرتلهم اجوا يركضون كتلهم: الحكوني.
كالوا: خير شبيج اجتج؟
ذهب: عزا ولكم يااجتني هاي السالفه صارت صدك راح يجي علمود الزفه.

ظلوا يضحكون ويفرون بأيديهم عافوني ورجعوا لمكاناتهم.
واني ظليت الوب بمكاني.
دخل ماجد كعد شويه جانت اخر اغنيه وراها نكوم نطلع لبسوني البنات البرنص وهو نزله على وجهي وبدينه نطلع اني هنا خلص انتهيت ظليت انحب نحيب على ماما هي لازمه ايدي واني لازمتها بكل قوتي هي تبجي واني ابجي كلها ظلت تبجي على بجينه انقهروا حيل عليه وعلى ماما خطيه.

اخر شي ماما بوستني وباست ايدي وتركتها اني من تركت ايدي عبالك واحد دفعني من السما للكاع بالضبط مثل مرات واحد من يحلم مرات يوكع من شي عالي ويفز مرعوب اني هيج حسيت بلحظتها.
مااشوفها من البرنص بس شويه رافعته بس من عافت ايدي صحت: ماما لتعوفيني.
وشهكت واسمع بجي عمه حميده والبنات اخذوا ماما جوه حتى يهدأوها اني ماجد سحبني من ايدي وفتح باب السياره وعمته خطيه تبوس بيه وتسكت بيه وعهود.
اني جنت مثل المخدره.

صعدنه بالسياره وصعدت وكعدت عمته وعهود وره وطلعنه للفندق هو لازم ايدي.
وعمته وعهود يسكتون بيه ويكلولي يوميه ماجد يوديج الهم شوفيهم تردين هم يجون وياج البيت جبير وفارغ بس اهدي شويه كل اللي ترديه يصير.
ذهب: اريد ماما.
عمته: ليش يايمه هيج تسوين بنفسج اني هم مثل امج ماعندي بنات انت بنتي اني يمج واذا تردين ابات وياج هم ميخالف.
ماجد: يمه مو جنه اخذج الواهس حيل.
عهود وعمته.

طول الطريق اصدقائه وولد عمه يسوون حركات بالسيارات مخلين كلهم اغنية جنه جنه بصوت عالي والناس بالشوارع تباوع عليهم شلون يسوون حركات بسياراتهم سووا ضجه بالشارع وكل شويه ينزلون يركصون ويرجعون.
وصلنه للفندق وصعدنه ماجد حاجز سويت دخلنه سدوا الباب اجت عهود نزعتني البرنص والعبايه وكعدنه السويت بااارد واني فستاني مصلخ بدون ردن كتلني البرد حسيت ظليت ارجف.

كومتني عهود للغرفه كلتلي: اساعدج نزعي البدله ودخلي للحمام سبحي وارتاحي وصلي وكافي بجي تره ماجد حساس صح ميحجي وميعبر بس يتأثر وكلبه يظل يوجعه وعفيه ذكريه ياخذ دواه.
ذهب: ان شاءالله.
نزعتني البدله ومن جنه بالحفله اهله واهلي لبسوني ذهب نزعتهم كلهم وخليتهم بجنطه زغيره وانطيتهم لعهود.
دخلت للحمام كعدت جوه المي الحار بعدين خلصت وطلعت عهود منتظرتني مشطت شعري وجففته بالسشوار بس اني ارجف.

عهود: شبيج تره بس اول يوم بعدين عادي.
اني محجيت بس ارجف ماادري خوف ماادري اتمرضت.
خلصت حطتلي مكياج خفيف حيل كلتلي: ميحتاج انت حلوه بدون مكياج.
طلعتلي طقم قميص نوم طويل ابيض وفوكه روب طويل حلو هي جايبته لبسته بدون كلام.
عهود: انت هسه اختنه الزغيره نحبج وندللج وندلعج من معزة ماجد واكثر.
ذهب: مشكوره حبيبتي.

طلعت عهود بره يم عمتها وماجد اسمعها توصي ماجد: دير بالك عليها تره زغيره بعدها ومبينه فقيره متعرف شي مو مثل بنات هالوكت.
مو تضوجها وتعصب عليها هسه هي امانه بركبتك خلصت كلبنه من البجي اليوم على امها هسه انت امها وانت ابوها واخوها وكل اهلها احنه منفيدها ولا نترس عينها.
ماجد: خلص على كيفكم تره اني هم ابنكم استلمتوني عمتج مقصرت وانت هسه زين وصوها عليه.

عمته: هي متحتاج وصيه بنيه متربيه متهديه وطيبه واهلها ناس طيبين ومتهدين.
بوسوه ودخلوا بوسوني واخذوا وطلعوا..
دخل ماجد اني لبست احرام الصلاة صليت هو دخل للحمام سبح واتوضا وطلع صلى.
اني خلصت كعدت على الجربايه خليت راسي بين رجليه ودنكت حسيت نفسي بردانه يمكن اتمرضت ظليت كاشه بمكاني ونعست حيل بس بردانه عبالك عظامي جامده متحركت من مكاني.
اجه ماجد كعد يمي.
ماجد: حبيبي تعبانه؟
ذهب: لا.

رفعت راسي هو باوعلي: كلي تعباانه مو؟
هزيت راسي اي ودمعت عيوني.
ماجد: يالله هسه يجيبون العشا اتعشي ونامي عيونج ذبلت من البجي.
طاحت دمعه مسحها بيده.
جابوا العشا ماجد اجه صاحلي.
ماجد: حبيبي يالله تعالي نتعشى.
كمت طلعت مستحيه من ملابسي وبردانه ارجف ردت فد شي استر بي نفسي اخلي فوك الروب الفضيحه ماكو.
طلعت هو كاعد عالطاوله مدنك كعدت كباله مباوعلي.
بده ياكل اني اباوعله شكله تره محبوب مدري اني تعودت عليه.

باوعلي كلي: حبيبي معاجبج الاكل تردين نطلب غيره او نطلع نروح نتعشى بغير مكان.
هزيت راسي لا..
بديت اكل كوه هو فتح التلفزيون خلاه عالاخبار اني مااحب اشوف الاخبار انقهر وينعصر كلبي لان كلها تفجيرات وشهداء.
ذهب: دوره عفيه مااحب الاخبار يضيك صدري مااتحملها.
داره ورجع ياكل المهم خلصنه اكل اني دخلت جوه راسا اتمددت واتغطيت حسيت بعد مااكدر ظليت ارجف بردت.
دخل ماجد شافني مغطيه حتى راسي كعد يمي عالجربايه.

ماجد: حبيبي نمتي اطفيلج الاضويه؟
مااكدر ارد احس اسناني تصطك من البرد.
ماجد: حبيبي شويه بس نسولف مو لهدرجه رفع اللحاف شافني ارجف.
ماجد: شبيج؟
خله ايده على كصتي كلي: صايره نار ليش هيجي شمنتظره متحجين؟
راح للحمام بلل المنشفه وخلاها على راسي اني نزيت المي بارد هو غطى جسمي باللحاف وكام طلع من جيبه براسيتول مدري شنو انطاني شربت ( 2 ).
وبقى كاعد يمي كل شويه يسالني: حبيبي شلون صرتي؟ نمتي؟

اني بعد محسيت بشي بس اسمعه هو يحجي مدري يضحك.
بعدين حسيت بدفوا وغفيت.
كعدت الفجر حسيت نفسي عركانه اتحركت شويه شفت يمي ماجد اكول ليش دفيانه وعركانه عزا هذا ينام بدون قميص.
شكد فشله كمت على كيف رحت للحمام وطلعت من الجنطه بجامه ستن وردي فاتح وبيها قلوب بيض دخلت للحمام غسلت واتوضيت ولبستها حتى اصلي سمعت صوت اذان الظاهر بتليفون ماجد.
لبست احرام الصلاه وفرشت السجاده وماجد كعد اتفاجأ باوعلي.

ماجد: حبيبي كعدتي؟ شلون صرتي؟
ذهب: الحمدلله.
خله ايده على كصتي كال: بعدج دافيه شويه خلصي صلاه وسبحي او اذا تردين اسويلج كمادات؟
سكتت كلت هذا يريد يصير لوتي براسي طبي سبحي لو اسويلج كمادات لا عيني خليني اصلي وابقى كاعده اسوي نفسي اباوع عالتلفزيون احسن فكره.
صليت وخلصت وفعلا رحت فتحت التلفزيون وكعدت اباوع بس مفتحه عين ومغمضه عين من النعاس.
خلص هو صلاته وطلع كال: متنامين؟

ذهب: لا داشوف فلم انت نام اذا تريد.
سكت محجه شي دخل للغرفه واني خليت راسي عالقفنه واتجتفت بارده ماادري لان مصخنه.
غفيت بس بردانه ميته كتلني البرد واخاف اروح للغرفه بعدين اجه كعدني وجرني من ايدي للغرفه كلي: الدنيا بارده ليش العناد وهو غطا واحد اذا اغطيج هناك وحدج يكتلني البرد وانت متقبليها مو؟

اني ميته من النعاس لاحجيت ولارديت ذبيت نفسي ميته عبالك من التعب بس اتغطيت ارتاحيت شلون حلو الدفو يمكن حضني بس بعد مابيه حيل اعترض لو احجي نمت وكعدت على صوت تليفونه يدك كل شويه فتحت عيوني هذا صدك حاضني شهالميانه وجماله نايم بدون قميص يبوووي انرعبت باوعت لملابسي الحمدلله كامله.
زين تليفونه يدك ميسمعه شلون؟ صحت: ماجد، ماجد..
ميجاوب ميسمعني معناها لازم اندهه يبوووي.

مديت ايدي اندهه بس استحيت شلون اخلي ايدي عليه ياربي وهو بدون قميص.
اتشجعت ومديت ايدي عليه وندهته جر ايدي باسها.
اتجمدت اني اخاف اتحرك اخاف هذا يلعب الشيطان بعقله.
فتح عيونه باوعلي شلون كاعده وايدي هو ساحبها واني متحنطه ضحك: هههه صباح الخير.
ذهب: صباح النور.
ماجد: ليش هيجي كاعده من وكت شعندج؟
ذهب: وين من وكت الساعه ( 12 )وتليفونك كل شويه يدك كعدتك مسمعتني ندهتك محسيت.

ماجد: حسيت بس مااريد اكعد عالاقل شابك ايدج.
ذهب: زين شوف التليفون خاف البيت يردوك بشي مهم.
ماجد: امي حميده اعرفها نغمه خاصه مخليلها.
كعد كال: يالله نصلي ونروح للبيت اكيد ينتظرونه عالغدا واريد انام مخليتيني البارحه انام.
صلينه ولبسنه ورحنه للبيت وصلنه كالمعتاد فتحوا الباب ودخلنه نزل ماجد واني نزلت شفته يسلم على الرجال اللي يفتح الباب كل مره(ابو جبار) دار الرجال سلم علي وباركلي.